Jerusaléa vajoroniꞌiki
15
Hari.
Oniaroa,
Antioquia sidajia vakaikahiꞌaha adani makhira Judéia kaarabonia vikhaꞌiki.
Vakaikahiha,
vaꞌora vakaꞌojomoꞌiꞌaha adani Jesus athi-ra vanaabaꞌiki.
Vaꞌora vaniꞌaha:
—Aꞌonivani judeus kaijaꞌari avihiriki.
Moisés kohana athi kapapirani haria honariaꞌiki hari:
“Vaꞌora bana vakarajomi adani makhira isani
hahavi bana.
Makhira bivahojavini hiki ida siikosida karajomihi
Deus kaijaꞌari hina.”
Nimania ida Moisés kohana kahonari.
Rajomi-ra avavahojarihi;
jokoa bana Deus aꞌonira akavaꞌijoarihi Ibavi Jahakaꞌoakia avarikhani — vakhaniha.
2 Hari.
Paulo,
Barnabé khama vavajahariꞌihi ida vahoariha vaathi.
Pauloa ni-asohipaꞌitxini vakahiki.
Vaabono avakanaathidanoararikhamaꞌaha adani Paulo,
vahoariha khama.
Makhira karajomiki kavaranihia vakavaraniꞌaha.
Oniaroa,
vaniꞌaha:
—Jahaki ida Jerusaléa avikhana adani Paulo,
Barnabé,
vahoariha vihiki vara vaꞌora vaniꞌara kaimoni adani Jesus athi avavaadahaoniva abono,
Jesus kaijaꞌari vanavaꞌisohiva abono vihiki khama,
Jerusaléa vahojaki,
makhira karajomiki kavaranihia vakavaranijabanaꞌara kaimoni — vakhaniha.
3 Oniaroa,
Jesus Cristo kaijaꞌari Antioquia vahojaki vaꞌora vakaronaꞌaha adani Paulo,
Barnabé,
vahoariha vihiki Jerusaléa avikhana.
Ai vihiꞌaha,
avikhaha,
Fenícia kaaraboni-ra varadaha,
Samaria kaaraboni-ra varadaꞌianaha.
Jesus athi-ra vanaabaꞌiki vaibavi-ra vakaragahananaꞌaha,
vaꞌora vanavaꞌisohivini hihi ida judeus kaijaꞌari vihiriki vaipohiki Deu-ra vanofijahakiꞌavini,
vakadikaꞌdaꞌdi kaimoni hina.
Moni-ra vakamithavini mani ida vaꞌora khai niꞌaja.
4 Jerusaléa vakaikahiꞌaha adani Paulo,
Jesus Cristo kaijaꞌari vahoariha vaꞌora vagathaniꞌaha.
Jesus athi avavaadahaoniva abono vaꞌora vakaꞌivanitiꞌaha adani Paulo.
Jesus Cristo kaijaꞌari vanavaꞌisohiva abono jaboni vaꞌora vakaꞌivanitiꞌiki.
Oniaroa,
Paulo vaꞌora vaniꞌaha:
—Deus haria kakodiabakhiavini mani ida kidibadani bada aniꞌavini hija.
Oniaroa,
vananamithaꞌihi ida badani bada vaniꞌaꞌiki arabo hoariha avaadahaoniꞌina.
5 Hari.
Vahararana vahojaki adani judeus kaijaꞌari farisio vaoniki,
vaꞌoaniaro jaboni Jesus athi-ra vanaabaꞌiki.
Vigaamananiꞌaha,
vaniꞌaha:
—Vaꞌora vahonariaꞌa adani judeus kaijaꞌari vihiriki mahija siikosida rajomia vakarajomiꞌavini jaboni.
Vaꞌora vahonariaꞌa jaboni vaꞌoani Deus kavaꞌisohihi Moisés kohana binajiriꞌiki athi kapapirani-ra vanaabaꞌiki — farisio vaꞌora vaniꞌaha.
6 Oniaroa,
vajoroniꞌaha adani Jesus athi avavaadahaoniva abono,
Jesus Cristo kaijaꞌari vanavaꞌisohiva abono vihiki,
vara vavaniꞌaja kaimoni ida makhira karajomiki kavaranihi.
7 Tororihi ida vakadivarani.
Naothinia gaamananiꞌaha ada Pedro,
vaꞌora niꞌaha:
—Oigamina,
avarigaki ida Deus hora nagathogathoꞌboꞌdaꞌavini avahararania ohojana.
Hovani hora nagathogathovini hiki judeus kaijaꞌari vihiriki-ra vaꞌora onavaꞌisohija kaimoni Jesus monina jahakia.
Deua binofiki ida moni jahaki-ra vakamithavini,
Jesus kania vaabono gahinai vanihara kaimoni.
8 Ijaꞌari hahavi kavaꞌibodivarani-ra ogaki ada Deus.
Deua bikaronaꞌaha ada Maꞌonahana Jahaki akadijaꞌari vihiriki vakadiania,
akadiania bikaronavini vani fori hiki,
oniani ida vaꞌora kapoarivini aogavini hija.
9 Deus haria nahojavini vani fori vaꞌora nihaha.
Harifori vihiꞌoamanira adani.
Jesu-ra akajariꞌdaravini mani ida Deus akadihojai asohiriki-ra naꞌbiravini hija.
Jesu-ra vakajariꞌdaravini mani ida Deus vakadihojai asohiriki binaꞌbiravini hija jaboni.
10 Hariꞌa vaꞌora vahonaria vakarajomina.
Jesus kaijaꞌari vakarajomina-ra avavahonariahihi;
daji khanaki-ra vakaibaꞌiki fori hihi vaꞌora avahonariahi.
Ijaꞌari daji khanaki-ra kaibaꞌivini vani fori hija ida Moisés kohana kahonari jiriki-ra naabaki.
Ni-akaabokaꞌiki ida daji khanaki fori hiki-ra akaibaꞌivini.
Honari jiriki-ra anaabavini-ra anofivini kabaꞌi,
ni-akaabokaki.
Ni-akadijaꞌari avikhananavakia jaboni vakaabokaꞌiki ida daji khanaki fori hiki.
Avanofimania koda ida Deu-ra avanaihamahivini athi avakajonivinia?
11 Ni-niki asohiki.
Jesus athi-ra akajariꞌdaravini vani kidiania ariabono gahinai anihaꞌihi,
oniani ida haria akavaꞌijoavini hiꞌia.
Onivani fori vihira adani akadijaꞌari vihiriki Deus vaꞌora akavaꞌijoavini jaboni.
Akadikaꞌdaꞌdi Jesus Cristo-ra vakajariꞌdariha;
vaꞌora kajoamoraha — vaꞌora niꞌaha ada Simão Pedro.
12 Hari.
Paulo,
Barnabé khama vaꞌoaniaro maina vara vaꞌora vaniꞌaha.
Viso vakhaniꞌaha adani vajoroniki,
vakadivarani mitha vaniꞌavini.
Paulo vaꞌora vananamithavini hihi ida Deus kabadani danoki bada vaniꞌaki:
—Deus haria kakodiabakhiavini mani ida badani danoki jahaki ipohiki-ra bada aniꞌavini hija akadijaꞌari vihiriki vakadiania — Paulo vaꞌora niꞌaha.
13 Aꞌdiahiꞌihi ida Paulo vakadivarani,
Tiago maina hada vara niꞌaha.
—Oigamina,
mitha vaniꞌa bana hida kodivarani.
14 Simão Pedro haria vara niꞌavini niha ninini Deus vaꞌora vaꞌadibiininivini adani akadijaꞌari vihiriki.
Akadijaꞌari vihiriki vakadiania Deus vaꞌora nagathogathoꞌiki adani ijaꞌari kidijaꞌari vihira kaimoni.
15 Onivani fori hija jaboni ida Deus athi namoniva abono kohana vaathi.
Athi kapapirania hojaki ida Deus athi:
16 “Naothinia ojoiꞌianaki bana ho.
Avakarafarakhamaki bana adani Davi kohana kaijaꞌari vavijavaronisiagaki,
nação fori vihijanarara
kaimoni.
Vaꞌora onajoroniki bana adani,
nação vihiꞌianara kaimoni.
17 Judeus kaijaꞌari vihiriki-ra vaꞌora okaboaꞌiki ho
kodijaꞌari vihira kaimoni.
Hivaꞌoani ijaꞌari hahavi hora vanakoꞌdivini hiki
bana vakadikaꞌdaꞌdi kaimoni ohina.”
18 Nimania ida ꞌboꞌdakari Deus ijaꞌari-ra navaꞌisohijoravini hiki.
19 Asia vara niha ada Tiago:
—Vaꞌora okavaꞌibodivaraniki adani akadijaꞌari vihiriki gahinai vaabono vanihaꞌiki Jesus kania.
Kodivaꞌibodivarani ni-jahaki ida vajariꞌdarina anadabavini siikosida karajomihia.
20 Oniaroa,
akaronaki bana ida papira jiriki vaꞌora anavaꞌisohira kaimoni akadivarania.
Nimania hida ariathi akaronaki bana:
“Hariꞌa bana vahaꞌa ida
baimana
vahoariha vakadideus amovana-ra khai vaniꞌavini-ra vakaviꞌbaivini.
Avakadikaaji hiki ida baimana avakadimoni hini.
Hariꞌa makhira kidigamo
hiriki khama vaabono
vakaviꞌomakhamava.
Hariꞌa bana igitha mathani raꞌdoꞌbahaki-ra vaha.
Hariꞌa viꞌavi ida igitha amani jaboni.”
Nimania hida akadipapira athini akaronaki kaimoni akadijaꞌari vihiriki vakadimoni.
21 Tiago asia vara niki:
—Badara ipohiki vani akadijaꞌari Deu-ra vara vaniꞌavini kagorania aakoirina kamahini semana hoarahanana,
ijaꞌaria vanamoniki ida Deus kavaꞌisohihi jiriki Moisés kohana binajiriki athi kapapirania.
Sidaji hahavi ijaꞌaria vara bivaniꞌaꞌiki ida Moisés kohana athi vahoariha vakamithaja kaimoni — vaꞌora niꞌaha ada Tiago.
Papira jiriki-ra vakaronaha
22 Hari.
Oniaroa,
vara vakhaniꞌaha adani Jesus athi avavaadahaoniva abono,
Jesus Cristo kaijaꞌari vanavaꞌisohiva abono khama.
Jesus Cristo kaijaꞌari hahavi vajoroniꞌiki vakadiania vara vakhaniꞌaha jaboni.
Vaabono vakanavaꞌisohikhamaꞌaha:
—Vaꞌora anagathogathoꞌava hadani arigamina viꞌbamiki,
Antioquia sidajia vaꞌora akaronara kaimoni,
Paulo,
Barnabé vihiki-ra vaꞌora vavaipohihaki kaimoni — vakhaniꞌaha.
Oniaroa,
vaꞌora vanagathogathoꞌaha adani Judas,
Silas vihiki.
Judas onina hoariha Barsabás.
Jesus Cristo kaijaꞌari vajahana vani vaꞌora vakahiha adani Judas,
Silas khama.
23 Oniaroa,
vanamonahahi ida papira jiriki Silas avisaki kaimoni.
Vakadipapira jirini athini:
—Arigamina,
aꞌonivaniti.
Harivani Jesus athi avavaadahaoniva abono hari,
Jesus Cristo kaijaꞌari vanavaꞌisohiva abono hari.
Aꞌonira akaꞌivanitihahaviki hari.
Arigamina avihiki aꞌoni,
akadijaꞌari avihirini kabaꞌi.
Antioquia kasidajini,
Síria kaaraboni,
Cilícia kaaraboni hikia avahojaki aꞌoni.
Avakadimoni hida papira jiriki.
24 Akamithaꞌiki ida varani vihina akadijaꞌari vaipohiriki avakadiania avikhaꞌina.
Makhira karajomiriki kavaranihia aꞌonira avanavaꞌisokoniki aꞌoni.
Deus kavaꞌisohihi jiriki-ra avanaabavinia aꞌonira vahonariaꞌaha.
Ni-vaꞌora ahonariaki avikhana aꞌonira vara vaniꞌavini,
oniani ida haria najoronijabanaja hida.
25 Akadivarani hihaviꞌiki ariathi avikhava abono vaꞌora anagathogathoꞌiki ahararana vaꞌora akaronara kaimoni avakadiania.
Hiꞌadani vaꞌora akaronaki kaimoni vaꞌora vavaipohihaki bana adani Barnabé,
Paulo khama.
Vaꞌora anakaidivaki adani arigamina Barnabé.
26 Akadikaꞌdaꞌdi Jesus Cristo kabadani-ra bada vaniꞌavini mani ida vaꞌora vanapohimajakamarivini hija.
27 Avakadiania vaꞌora akaronaki bana adani Judas,
Silas vihiki.
Aꞌonira vanavaꞌisohiki bana adani akadivarania.
Vakadivarani hiki bana hida papira akaronaki athini.
28 Harivani afohahavi,
Maꞌonahai Jahaki khama vara avaniꞌaki hida varani.
Ni-anofiki ida vaꞌisohihi ipohikia aꞌonira ahonariavini.
Daji khanaki-ra kaibaꞌivini vani fori hihi ida ijaꞌari vaꞌisohihi ipohiki-ra naabavini.
Vaꞌisohihi ipohiriki kaꞌoa vani aꞌonira ahonariaki hari,
avanaabaja kaimoni.
29 Hariꞌa vaha bana ida baimana vahoariha vakadideus amovana-ra khai vaniꞌavini-ra vakaviꞌbaivini.
Hariꞌa vaha oni igitha imani,
baamana kararakia bivahojaki.
Hariꞌa vaha ida igitha mathani raꞌdoꞌbahaki.
Hariꞌa makhira kidigamo hiriki khama vaabono vakaviꞌomakhamava.
Avanaabahi ida akadikaabanahi;
ni-avamakhaniki.
Hari ida vani oamani akadipapira athini.
30 Oniaroa,
vaꞌora vakaronaꞌaha adani papira jiriki-ra avavikhaki.
Antioquia sidajia avikhaꞌaha.
Vakaikahiha,
vajoronihahaviꞌaha adani Jesus athi-ra vanaabaꞌiki,
papira jirikia Silas vaꞌora vanoꞌaꞌaha.
31 Vada vaniꞌaꞌihi ida papira jirini,
khai vaꞌora niꞌaꞌihi ida athii jahaki.
32 Deus athi namoniva abono adani Judas,
Silas khama.
Cristo kaijaꞌari-ra vaꞌora vara vaniꞌavini hiki vaathi tororiki vaꞌora naofiniria kaimoni,
khai vakhanira kaimoni.
33 Masiko ꞌbamiki vakadiania vahojaha adani Judas.
Naothinia Cristo kaijaꞌari vaꞌora vakaronaꞌianaha Jerusaléa vajoiꞌianana.
Vaꞌora vaniꞌaha:
—Anofiki ida avakaikahijahakini ibavi avaranikhakia.
35 Masiko ipohiriki Antioquia vahojaꞌaha adani Paulo,
Barnabé khama.
Vahojana oadani adani Paulo,
Barnabé,
Jesus athi-ra vanaabaꞌiki vahoariha vihiki vara vavaniꞌaꞌihi ida Jesus varani hina,
vakaꞌojomoꞌiꞌihi ida Jesus monina jaboni.
Paulo, Barnabé khama vaabono avakakakaraꞌokhamaꞌiki
36 Oniaroa,
masiko hoariha Pauloa biniꞌaha ada Barnabé:
—Sidaji ipohikia ariadahana kari vaꞌora anavaꞌisohiꞌiki adani Jesus varani hina.
Aajoiꞌianava mahija vaꞌora anavanavanahavini adani Cristo kaijaꞌari — niha ada Paulo.
37 Barnabéa binofiki ada João Marcos okhana vakadiania.
38 Pauloa ni-okhana binofiki.
Panfília kaarabonia vahojaꞌina kari João Marcos vaꞌora nahojahaꞌiki adani Paulo.
Sidaji ipohiki kaijaꞌarinia vakamitharavini kabaꞌi ida Jesus monina,
João Marcos vaꞌora nahojahaꞌaha.
Ni-vaꞌora kakodiajanaki.
39 Vara vaabono vakaniꞌakhamavini hiki ida João Marcos okharina okhana kavaranihi,
ni-vanasohiki kaho ida vakadivarani.
Paulo,
Barnabé khama vaabono avakakakaraꞌokhamaꞌiki.
Oniaroa,
Barnabéa biavikhaꞌaha ada João Marcos,
vakiꞌdamaꞌaha,
Chipre kajoviri kakaarabonia avakakhaꞌaha.
40 Paulo Sila-ra nagathogathovini hiki ꞌbamina kaimoni hina.
Jesus athi-ra vanaabaꞌiki Deu-ra vaniꞌaha:
—Deus,
vaꞌora akadavaꞌa bana hadani Paulo,
Silas vihiki.
Vaꞌora kajoamorabakhia bana — Deu-ra vaniꞌaha.
41 Oniaroa,
ai vihiꞌaha adani Paulo,
Silas khama.
Síria kaaraboni,
Cilícia kaaraboni hikia avikharimananiꞌaha.
Vajoronionahaꞌaha adani Jesus Cristo kaijaꞌari,
Paulo vaꞌora vara vaniꞌaha,
khai vaniꞌaja kaimoni ida Jesus athi.