Judeus kaijaꞌari Deu-ra vara vaniꞌavini kagorania avikhaha,

Jesus varani hina-ra vara vavaniꞌaꞌianaha.

Paulo kavarani-ra vakajariꞌdaravini mani ida ijaꞌari vaipohiki Jesus kania vaabono gahinai vanihavini hija.

Judeus kaijaꞌari vaipohiki ni-vakajariꞌdaki.

Judeus kaijaꞌari vihiriki jaboni ni-vakajariꞌdaki.

2 Judeus kaijaꞌari vahoariha vani adani vajariꞌdaha.

Judeus kaijaꞌari Jesu-ra vanofiriki vaꞌora vara vaniꞌaha adani judeus kaijaꞌari vihiriki,

vaꞌora vanajahariharira kaimoni adani Paulo,

Barnabé khama.

3 Hari.

Mahi ipohikia Icônio sidajia vahojaꞌaha adani Jesus athi avavaadahaoniva abono viꞌbamiki.

Ni-Paulo,

Barnabé khama vaꞌora vifiniki adani vajariꞌdaki,

vara vavaniꞌamanihi ida vakadikaꞌdaꞌdi Jesus varani hina afobakhia.

Paulo kavarani hibakhiaki Jesus ijaꞌari-ra kajoamoravini.

Jesus vaꞌora kakodiavini mani ida Paulo Jesus kabadani danoki-ra vakaabokavini hija.

Ipohiki ida vakadibadani jahaki danoki.

Icônio sidaji kaijaꞌarini vanokivini mani ida Jesus monina kaꞌoa hini-ra avigavini hija.

4 Vakadivarani-ra vaakajariꞌdakhamaꞌaha adani Paulo athi-ra vakajariꞌdaki,

Paulo athi-ra vakajariꞌdariki khama.

Paulo athi-ra vakajariꞌdaki vaꞌora vanofiki adani judeus kaijaꞌari.

Paulo athi-ra vakajariꞌdariki vaꞌora vanofiki adani Paulo.

5 Oniaroa,

vaabono vara vakaniꞌakhamaꞌaha adani vajariꞌdaki,

hivaꞌoani judeus kaijaꞌari,

judeus kaijaꞌari vihiriki,

judeus kaijaꞌari vanavaꞌisohiva abono khama.

Vaniꞌaha:

—Vaꞌora anajaharihariꞌava adani Jesus athi avavaadahaoniva abono.

Vaꞌora anagahaꞌava jaꞌdia — vaabono vakanaaminakhamavini vakhaniha.

6 Pauloa vakamithahi ida vaꞌora vanaabinivini monini,

avigaꞌaha.

Listra sidajia avikhaꞌaha.

Derbe sidajia jaboni avikhaꞌaha.

Licaônia kaaraboni kasidajini ida Listra,

Derbe hiki.

7 Sidaji kaaraboni maakarini avaadahaoniꞌaha,

ijaꞌari-ra vaꞌora vakanamonihaꞌavini Jesus monina jahakia.

8 Hari.

Oniaroa,

Listra sidajia hojaha ada makhira adahariki.

Biakavikhaonanijahaki ida ꞌdama kajaharini,

ni-adahana-ra kaabokaꞌiki.

9 Paulo iꞌoaria vithiha ada makhira adahana-ra kaabokariki,

Paulo athi-ra kamithaha,

ni-bikajariꞌdaki.

Pauloa biogaki ida athi kajariꞌdarini hina,

aihotana-ra kajariꞌdaravini jaboni,

oniania Pauloa vada biniꞌaha,

10 athi ꞌbarakia biniꞌaha:

—Gaaꞌa.

Gaamananijorakiꞌaha,

adahaꞌaha.

11 Ijaꞌari vaipohikia vanokiꞌihi ida Paulo kabadani,

Licaônia kaaraboni kaijaꞌarini vaathia vabodiꞌbarahaꞌaha:

—Deus oamani hadani vikhaꞌara akadiania makhira vihina.

12 Paulo,

Barnabé khama ijaꞌari vakadideus vaꞌora vavanihaha.

Vara vavaniꞌaꞌaha ada Barnabé:

—Ovari ada akadiDeus Júpiter oniki — vakhaniha.

Vara vavaniꞌaꞌaha ada Paulo:

—Vara niki ada ovari.

Akadideus Mercúrio oniki ada — vakhaniha.

Ni-Pauloa avigaki ida vaathi vara vaabono vakaniꞌakhamavini hiki.

13 Sidaji ꞌdihania hojaki ida gora vakadideus Júpiter oniki-ra vakavaihinikavini ibavini.

Vakadideus kabadani abono vakadibadani hiki ida Júpiter-ra vakanavaꞌigavini igitha abononi ahaꞌdikia,

Júpiter-ra khai vaniꞌara kaimoni.

Hari.

Ihinika ibavini kaathania vakadideus kabadani abono vaꞌora avisaha adani ꞌdaama kahidari,

kajamari kakamovaiki kihiki.

Vakadideus kabadani abono,

ijaꞌari khama vanofiki vaꞌora vanaabinivini adani ꞌdaama kahidari Paulo-ra vakanavaꞌigavini kaimoni.

Vakadideus vavanihavini ada Paulo.

14 Vakadibadani kavaranihi-ra vakamithaꞌaha adani Paulo,

vakadimakari-ra vanaꞌbiraꞌaha ijaꞌari-ra vanavaꞌisohivini hija kaimoni ida deus vihina kahiani-ra vavajaharavini.

Ijaꞌari vahararana avikhajorakiꞌaha vakiꞌdarahahaꞌaha,

vabodiꞌbarahaꞌaha:

15 —Ijaꞌari,

nahina kaimoni bada avaniꞌaki oni avakadibadani.

Hariꞌa bana bada vaniꞌa.

Makhira kaꞌoa hari,

aꞌonifori arihiki hari.

Deus arihirihi.

Hida haria rakhaki moni jahakia aꞌonira akanamonihavini,

avakavaꞌipahinija kaimoni ida avakadideu-ra khai avaniꞌavini afobakhia.

Deus vihiriha adani avakadideus.

Vanofiꞌa bana ada Deus kaꞌoa hokiki nama hojaki.

Deus vania binamonahaꞌia ida nama,

arabo,

paha hiki.

Binamonahaꞌiki ida nama kahijava,

arabo kahijava,

paha kahijava hiki jaboni.

16 ꞌBoꞌdakari Deus vaꞌora vaꞌahaki adani ijaꞌari hahavi vakadihojai-ra vavahojara kaimoni.

17 Bivaꞌahavini kabaꞌi,

Deus ijaꞌari-ra nanokiahibakhiaki kidibadani jahakia avigara kaimoni hojana.

Bahi-ra rakharariki Deus aꞌonira paha noꞌavini.

Avakadirakhajahi bononi kamasikonia aꞌonira noꞌaki jaboni ada.

Aꞌonira noꞌabakhiavini jaboni avakadiꞌbaia.

Deus aꞌonira nanokiahibakhiavini hiki kidibadani jahakia,

khai avaniꞌara kaimoni.

Ovani kaꞌoa ada Deus hira.

18 Paulo vara vaꞌora niꞌavini kabaꞌi,

vanofihi ida Paulo-ra vakaabinihivini ꞌdaama kahidaria,

Paulo-ra vakavaihinikavini kaimoni.

Ni-Paulo vaꞌora vaꞌahaki.

19 Hari.

Oniaroa,

vakadiania vakaikahiꞌaha adani judeus kaijaꞌari Paulo-ra vakaihamahiki.

Antioquia de Pisídia sidaji,

Icônio sidaji hikia vikhaki adani vaihamahiki.

Listra sidajia vakaikahijabanaꞌaha,

Paulo-ra vakanavaranihaꞌaha.

Kaꞌoa hiki vavanihavini ida Paulo jaharina varani hini,

oniani ida Listra sidaji kaijaꞌarini Paulo-ra vanagahavini hija jaꞌdia.

Abiniꞌiki vavanihaꞌaha ada Paulo.

Avarahokaoninaꞌaha sidaji banininija,

abinina amaakarini vanahojahaꞌaha.

20 Paulo iꞌoaria vajoroniꞌaha adani Jesus vaipohihava abono,

gaamananiꞌaha ada Paulo,

ajoiꞌianaha sidajia.

Kaꞌafokajomani vani ai vihiꞌaha adani Paulo,

Barnabé khama,

Derbe sidaji-ra avanikhahavini.

21 Hari.

Oniaroa,

Derbe sidajia vakaikahiha vaꞌora vanavaꞌisohiꞌaha Jesus monina jahakia.

Ijaꞌari vaipohikia vakajariꞌdaravini ida Jesus monina,

oniani ida vaabono gahinai vanihavini hija Jesus kania.

Vaꞌora vanavaꞌisohivini naothinia vajoiꞌaha adani Paulo.

Listra sidaji,

Icônio sidaji,

Antioquia da Pisídia sidaji hikia avikhana vajoiribaniha avikharibaniꞌaha.

22 Vajoina vani vaꞌora avanavaꞌisohioniꞌaha adani Jesus vaipohihava abono:

—Vanofijahaki bana ada Jesus mahi hahavi.

Hariꞌa bana vakavaꞌipahiniꞌa ida Jesus athi-ra avanaabavini.

Vajaharihariki bana adani ijaꞌari Deus vaꞌora vakaꞌdaꞌdiki.

Vajahariharina-ra vakajoniha;

ni-Deus vaꞌora kapoariki kidijaꞌari vihina — nimania ida Paulo vaꞌora vakaꞌojomoꞌivini hiꞌiki athini.

23 Sidajia avajoioniꞌianaha adani Paulo,

Barnabé khama,

vaꞌora vanagathogathoꞌaha adani Jesus Cristo kaijaꞌari vanavaꞌisohiva abono vaipohina vahararana.

Viꞌbairina vahojaha Deu-ra vara vaniꞌavini.

Deu-ra vaniꞌaha adani Paulo:

—Deus,

vaꞌora bana akadavaꞌa hadani Jesu-ra vavakaijokaki — vakhaniha adani Paulo.

Onivani fori hiꞌianahi ida Paulo kabadani.

Jesus Cristo kaijaꞌari vaibavi hoariha vahojaki,

Paulo vaꞌora avanagathogathonionivini adani Jesus Cristo kaijaꞌari vanavaꞌisohiva abono.

24 Ai vihiꞌianaha adani Paulo,

Barnabé khama.

Pisídia kaarabonia avikharimananiꞌaha,

Panfília kaarabonia avakhanoꞌaha.

25 Perge sidaji kaijaꞌarini-ra vaꞌora vanavaꞌisohiꞌaha Jesus monina.

Ai vihiꞌianaha,

Atália sidajia avikhanaiꞌaha.

26 Atália adamininia avikharafoniꞌaha,

kanava kakarahoa vakiꞌdamaꞌaha,

ai vakihiꞌaha,

Antioquia da Síria avakajoiꞌaha.

Hari.

Antioquia da Síria vania kamaꞌdaꞌia ida vakadiadahai.

Vaadahana viahania Jesus Cristo kaijaꞌaria vakanikhariaki ada Deus vaꞌora akadavaꞌara kaimoni adani viꞌbamiki.

Anokhomiꞌihi ida vakadibadani,

avakajoiꞌaha.

27 Oniaroa,

Antioquia da Síria vakaikahiꞌaha adani Paulo,

vajoroniꞌaha adani Jesus Cristo kaijaꞌari vaipohiki,

vakamithaja kaimoni ida ibavi ipohikia avaadahaoniꞌina kavaranihi.

Paulo vaꞌora nanamithahahaviꞌaha:

—Oigamina,

Deus akadiania hojana mani ida haria kajoamorabakhiavini hija.

Haria kakodiavini mani ida kidibadani bada aniꞌavini hija.

Deus vaꞌora kajoamoraꞌiki adani judeus kaijaꞌari vihiriki vaipohiki.

Jesus kania vaabono gahinai vanihaꞌiki adani — vaꞌora vaniꞌaha.

28 Oniaroa,

masiko ipohikia vahojaha adani Paulo,

Barnabé khama Jesus kaijaꞌari vakadiania.