Kamaꞌdaꞌihi ida Paulo, Barnabé vihiki vaadahana varani hini
13
Hari.
Oniaroa,
Antioquia sidajia vajoronibakhiaha adani Jesus Cristo kaijaꞌari vaipohiki.
Vahararana vahojaki adani Deus athi namoniva abono,
ijaꞌari vakaꞌojomoꞌiva abono vihiki.
Onivani fori hihi ida vaonina:
Barnabé,
Simão,
Lúcio,
Manaém,
Saulo vihina.
Tapajona ada Simão.
Lúcioa bivaꞌbanaki ibavini sidaji Cirene oniki.
Manaém,
Iroji khama isai vihina kari vaabono vavavijavajabanaꞌiki.
Karahoꞌaha ada Iroji kohana arabo vakaꞌdaꞌdiva hiꞌaha.
2 Hari.
Vajoronijabanaꞌaha adani Jesus athi-ra vanaabaꞌiki Deu-ra vakanamasivivini.
Vakoꞌbaina kabaꞌi viꞌbairina vahojaha Deu-ra khai vaniꞌavini.
Vajoronina vani Maꞌonahai Jahaki vaꞌora niꞌaha:
—Vaꞌora vanahoariha bana hadani Saulo,
Barnabé khama kodimoni vihina.
Vaꞌora onofiki hadani bana bada vaniꞌaja kaimoni ida badani vaꞌora ohonariavini hiꞌiki,
Jesus monina-ra avavaadahaonira kaimoni.
3 Viꞌbairina kabaꞌi adani Jesus athi-ra vanaabaꞌiki,
Saulo,
Barnabé vihiki vaꞌdaꞌdi aꞌani namani vakaabadavini Deu-ra vara vaniꞌaꞌavini vaꞌora kakodiara kaimoni.
Oniaroa,
vaꞌora vakaaminaꞌaha.
Chipre kajoviri kakaarabonia vaadahaꞌiki adani Saulo
4 Hari.
Oniaroa,
Antioquia sidajia ai vihiꞌaha adani Barnabé,
Saulo khama.
Maꞌonahai Jahaki vaꞌora honariavini avikhana ibavi hoariha.
Selêucia sidajia avikharafoniha,
kanava kakarahoa vakiꞌdamaꞌaha vahoariha khama,
ai vakihiꞌaha.
Chipre kajoviri kakaaraboni-ra avakanikhaꞌaha.
5 Avakoꞌomisiꞌaha Salamina sidajia.
Judeus kaijaꞌari Deu-ra vara vaniꞌavini kagorania avikhaha afonana vaꞌora vanavaꞌisohivini hiꞌihi ida Deus athi.
João Marcos hojaki Saulo vakadiania vakadibadani biakodiavini.
6 Ai vihiꞌianaha adani Barnabé,
avikharimananiꞌaha,
Pafos sidajia avakhanoꞌaha.
Vakaragarariꞌaha ada makhira Bajiso oniki.
Arabani kabadani fori hiki ida kidibadani.
Judeus kaijaꞌari ada.
Deus athi namoniva abono hina-ra kahiꞌbadaraki ada.
Onina hoariha grego athinia Elimas.
7 Elimas kavaꞌahi ada kajoviri kavakaꞌdaꞌdiva Sérgio Paulo oniki.
Ogahaki ada Sérgio Paulo.
Hari.
Kajoviri kavakaꞌdaꞌdiva vaꞌora kaboaꞌiha adani Barnabé vara vavaniꞌaja kaimoni ida Deus athi.
Bikamithavini binofiki ida Deus athi kavaranihi.
8 Elimas ni-vaꞌora vajahaki adani Barnabé,
ni-binofiki ada Sérgio Paulo abono-ra gahinai nihavini Jesus kania.
9 Maꞌonahai Jahaki Saulo vaꞌi-ra nahonariahihiꞌiki.
Sauloa vada biniꞌaha ada arabani Elimas oniki.
10 Biniꞌaha:
—Jahari fori ihiꞌoamanija.
Ivajahariki ida nahina hahavi jahaki.
Ijahariꞌoamanija.
Korijanahia ikavaraniki i afobakhia.
Kaꞌoa oamani ida Deus athia akavaranina.
Kaꞌoa hirihi ida iniꞌaki Deus athi.
11 Deus ira naabosivini kadahojai jahariki nahina jaharikia.
Ikamaodorohaki bana i.
Deus ira naabosivini oadani,
ni-inokijanaki bana ida safini vagana — Sauloa biniꞌaha.
Jorakia Elima binokihi ida nokho haꞌdini ihimini.
Kamaodorohana binakoꞌdiꞌaha ada hoariha saꞌa biakavanamara kaimoni.
12 Arabo vakaꞌdaꞌdiva vada biniꞌaꞌihi ida Elimas pohimajaꞌina,
oniani ida Jesus varani hina-ra kajariꞌdaravini hija.
Bikavaꞌibodivaranikarahoꞌihi ida Jesus varani hina Sauloa bikavaꞌojomoꞌihaki.
Pisídia kaarabonia vaadahaki adani Paulo
13 Hari.
Oniaroa,
Pafos sidajia ai vakihiꞌaha adani Paulo.
Saulo onina hoariha Paulo.
Avakakhaꞌaha.
Panfília kaarabonia avakoꞌomisiꞌaha.
Vigaimorahaꞌaha Perge sidajia avikhaha,
avakhanoꞌaha.
Oniania João Marcos vaꞌora nahojahaꞌaha,
Jerusaléa ajoiꞌaha.
14 Perge sidajia ai vihiꞌaha adani Paulo,
Barnabé khama.
Pisídia kaarabonia avikhaha,
Antioquia hoariha sidajia vakaikahiꞌaha.
Avakoirina kamahini vani judeus kaijaꞌari Deu-ra vara vaniꞌavini kagorania aviꞌoiha vavithiꞌaha.
15 Hoarana vara bivaniꞌahi ida Deus kavaꞌisohihi jiriki.
Hoariha maina vara bivaniꞌahi ida Deus athi namoniva abono kohana vaathi kapapirani.
Hari hiꞌihi ida papira-ra vara vaniꞌavini.
Judeus kaijaꞌari Deu-ra vara vaniꞌavini kagorani avakadavaꞌava abono vaathi-ra vakaronaꞌaha Paulo vakadiania.
Vaniꞌaha:
—Arigamina,
ijaꞌari-ra avanavaꞌisohivini-ra avanofihi;
ba vaꞌora vanavaꞌisohi Deus athia — Paulo-ra vaniꞌaꞌaha.
16 Gaamananiꞌaha ada Paulo.
Vaꞌora kaabaniꞌaha saꞌa,
mitha vaniꞌaja kaimoni ida kidivarani.
Paulo vaꞌora niꞌaꞌaha adani ijaꞌari hahavi:
—Aꞌonivaniti arigamina,
Israel kaijaꞌari aꞌoni.
Aꞌonivani judeus kaijaꞌari avihirini kabaꞌi Deu-ra khai avaniꞌaki.
Mitha vaniꞌa hida aꞌonira vara oniꞌavini.
17 Vara ovaniꞌaki bana ada Israel kaijaꞌari vakadiDeus.
Deus vaꞌora nagathogathoꞌiki adani akadijaꞌari avikhananavaki,
kidijaꞌari vihira kaimoni.
Egito kaarabonia vahojana kari Deus vaꞌora anaꞌbaꞌdiꞌiki adani.
Vakadiarabo hirini ida Egito kaaraboni.
Danoki ada Deus,
oniani ida Egito kaarabonia vaꞌora anivini hija.
18 Avikhaonanina naothinia 40 badara ipohini Deus vaꞌora kahinanikaꞌaha amasia.
Deu-ra vanofijahakiravini kabaꞌi,
Deus vaꞌora kahinanikaꞌaha.
19 Deus vaꞌora kakodiavini hiki ida Canaã kaaraboni ahoroani.
Vaꞌora naabiniꞌaha adani 7 vihiki nação afohahavi Canaã kaarabonia vahojaki.
Arabo kaijaꞌarini vaabinina naothinia Deus Canaã kaarabonia vaꞌora noꞌaꞌaha adani Israel kaijaꞌari.
20 Hari.
450 badara ipohini vavahojaꞌihi ida arabo.
Naothinia Deus vaꞌora honariahananaꞌaha adani ijaꞌari nasohiva abono vaꞌora vakaꞌdaꞌdira kaimoni.
Naothinia bihonariaha ada athi namoniva abono Samuel kohana oniki vakadiania.
21 Akadijaꞌari avikhananavakia vaniꞌaha ada Deus:
“Anofiki ada arabo
vakaꞌdaꞌdiva haria
vasohiki kaimoni.
Haria navaꞌisohi bana
hana hina ada inofira
akadikaꞌdaꞌdi hina.”
Oniaroa,
Deus vaꞌora navaꞌisohiꞌaha vaꞌora vakaꞌdaꞌdira kaimoni ada Saul kohana.
Saul kaabiꞌi onina Quis kohana.
Kidiꞌarahoda kohana kaꞌarahoda Benjamim kohana oniki.
40 badara ipohini Saul vaꞌora vakaꞌdaꞌdiꞌaha adani Israel kaijaꞌari.
22 Naothinia Deua bianiꞌaha ada Saul kaꞌdaꞌdi hijanarara kaimoni.
Bianivini naothinia Deua bihonariaha ada Davi kohana kidijaꞌari vakaꞌdaꞌdina hiki kaimoni.
Deua vara bivaniꞌaha ada Davi:
“Ovajahaki ada Davi oniki Jessé kohana kaisai.
Ovaria bada biniꞌaki bana ida badani hahavi
onofiki.”
Niha ada Deus.
23 Davi kohana kahanodi avijavaronisiagaki ada Jesus.
Deus Jesu-ra honariavini vaꞌora akavaꞌijoara kaimoni adani Israel kaijaꞌari.
(Judeus kaijaꞌari vaonina ꞌbamini ida Israel kaijaꞌari.)
Deus vaꞌora navaꞌiponijoravini hiki akavaꞌijoahi abono-ra karonavini.
24 Jesus kabadani kamaꞌdani viahania João Batista vaꞌora navaꞌisohibakhiaki adani Israel kaijaꞌari hahavi:
“Vakavaꞌipahiniꞌa oni
avakadihojai asohiriki
bada avaniꞌaki mahija
aꞌonira okanavini.”
Vaꞌora niꞌabakhiaha.
25 Hari hiꞌini ida João Batista kabadani,
vaꞌora niꞌaꞌaha:
“Hora avakavaꞌibodivaranimanija koda
hiꞌada avanokhaki hora avavanihamanija koda?
Ni-khaꞌiaki kaho ada ovari avanokhaki.
Homiroꞌa okhaja.
Ovari kasiagaki bana ada.
Kaꞌdaꞌdi oamani bana ada.
Hovani kaꞌdaꞌdi ohirihi.
Kidihonai abono oamani ho.”
Vaꞌora niꞌaha ada João Batista kohana.
26 Paulo asia vaꞌora vara niꞌaha adani ijaꞌari Deu-ra vara vaniꞌavini kagorania vahojaki:
—Oigamina,
aꞌonivani.
Abraão kohana kahanodi vavijavaronisiagaki avakadimoni hida Deus ijaꞌari-ra akavaꞌijoavini kavaranihi.
Aꞌonivani Deu-ra avakanamasivivini judeus kaijaꞌari avihirini kabaꞌi,
avakadimoni hini jaboni ida Deus athi.
Harivani afohahavi akadimoni hini ida Deus athi,
haria akavaꞌijoavini-ra nofivini.
27 Jerusalém sidaji kaijaꞌarini,
judeus kaijaꞌari vanavaꞌisohiva abono vihiki khama ni-avigaki ada Jesus ijaꞌari hahavi kaꞌaihotahi abono hina.
Aakoirina kamahini hahavi ijaꞌaria vara bivaniꞌaki ida Deus athi namoniva abono vaathi Deus athi kapapirani hojaki.
Vakamithavini kabaꞌi ni-avigaki ida Deus athi namoniva abono kohana vaathi nahina hini.
Avigaravini kabaꞌi,
Jesus kania namithaꞌihi ida Deus athi namoniva abono kohana vaathi.
Jesu-ra vanaabinivini mani ida vaathi nanamithani hiꞌia.
28 Hojai asohirikia kahojairina kabaꞌi ada Jesus,
vanakoꞌdihi ida hojai asohiriki kidiania.
Ni-vakaragaꞌiki.
Badani asohirikia kabadanirina kabaꞌi,
vanaabinivini vanofiꞌaha.
Oniaroa,
Pilato-ra vaniꞌaha:
“Ivahonariahi o Jesus
abinina.”
29 Jerusalém kaijaꞌarini,
vakadikaꞌdaꞌdi khama bada vaniꞌahahavihi ida Jesus varani hina Deus athia bivavaꞌisohihijoraꞌiki.
Deus athi namithaꞌini naothinia Jesus vaipohihava abonoa vaaniꞌihi ida Jesus abaꞌona ava akasanakhamakia,
avibaiꞌihi jaꞌdi hodijamaꞌoki bodinia.
30 Deus vania bianahokiꞌara ada Jesus.
31 Ahokiꞌina naothinia mahi ipohikia Jesus abono-ra nanokiaꞌianaki vaipohihava abono vakadiania.
Hiꞌadani Jesus ahokiꞌina-ra vanokiꞌiki Galiléia vaadahajabanaki adani,
abinina viahania.
Jerusaléa avikhajabanaki adani Jesu-ra vavaipohihavini.
Jesus ahokiꞌina-ra vanokivini mani ida Jesus varani hina-ra vara vavaniꞌavini hiꞌia.
Israel kaijaꞌari-ra vaꞌora vanavaꞌisohibakhiaha vanokiꞌikia.
32 Haria hida rakhaki aꞌonira anavaꞌisohihavini Jesus monina jahakia.
33 Deua bada biniꞌaꞌiki ida athi akadijaꞌari avikhananavaki-ra vaꞌora navaꞌiponijoravini hiꞌiki.
Vakadihanodi kaisai vavijavaronisiagaki hari.
Deus Jesu-ra anahokiꞌavini kavaranihi ida namithaꞌia.
Deus athi kapapirani pitani Salmo oniki ꞌbamikia hojaki ida athii:
“Ivani kodisai i.
Hidakabaꞌi kadabiꞌi
ohina-ra okahiki ho.”
34 Deua vara bivaniꞌaꞌiki ida Jesus ahokiꞌina kavaranihi afojora.
Bivaꞌaharihi ida Jesus abaꞌona ꞌbathani.
Deua biniꞌaha:
“ꞌBoꞌdakari Davi kohana-ra onavaꞌisohijoravini hiꞌiki
aꞌonira okajoamoravini,
oniani ida oathi-ra bada
oniꞌavini hija.
Kaꞌoa oamani ida aꞌonira okajoamoravini
kavaranihi.”
“Deus,
ni-ivaꞌahaki ꞌbathani ida kadahonai abono
jahaki abaꞌona.
Iathini-ra naabahahaꞌoadahaki ada kadahonai abono jahakaꞌoaki.”
Nimania ida papira athini.
36 Asia vara niha ada Paulo:
—Davi kohana hokina oadani bada biniꞌaꞌiki ida badani Deua binofiki.
Naꞌarihavi hiꞌina vani abiniꞌaha,
kaꞌdamahaꞌaha.
Kidiꞌarahoda avikhananavaki vakaꞌdamana ꞌdihania Davi abaꞌona-ra vakaꞌdamaꞌaha.
Oniaroa,
ꞌbathaꞌihi ida Davi kohana abaꞌona.
37 Jesus abaꞌona vani ida Deua bianahokiꞌia,
oniani ida abaꞌona naꞌbathani hirija.
38-39 Oigamina,
kaꞌoa oamani hida Jesus ahokiꞌina varani hini.
Jesus ahokiꞌina mani ida Deus ijaꞌari kahojai asohiriki-ra naꞌbiravini hija,
oniani ida ahokiꞌina kavaranihia aꞌonira ananamithavini hija.
Avarigavini anofiki jaboni hida moni.
Deus kavaꞌisohihi jiriki-ra avanofivini kabaꞌi,
ni-avanaabahahaꞌoadahaki,
oniani ida Deus avakadihojai asohiriki-ra naꞌbiraravini hija.
Jahaki ida Jesus kania avaabononi gahinai avanihavini.
Ijaꞌari Jesu-ra vavakaijokahi,
athi vanaabahi;
Deus vakadihojai asohiriki binaꞌbirahi.
40-41 Deus athi namoniva abono kohana vaniꞌaꞌboꞌdaꞌiki:
“Aꞌonivani Deus athi-ra
avakanahahanihabakhiaki,
mitha vaniꞌa.
Aꞌonira narapatahi,
avaabiniki bana aꞌoni.
Avakajariꞌdaki bana ida
kodibadani bada oniꞌaꞌiki
avanokivini kabaꞌi.
Hoariha aꞌonira
navaꞌisohijahakivini kabaꞌi,
kodibadani-ra
avakajariꞌdahi.”
Nimania ida Deus athi.
Avakavaꞌigairi bana mahija Deua biniꞌaꞌiki aꞌonira napohimajaravini — Paulo vaꞌora niꞌaha adani ijaꞌari vajoroniki.
42 Oniaroa,
judeus kaijaꞌari Deu-ra vara vaniꞌavini kagorania avikhaonaniꞌaha adani Paulo,
Barnabé khama.
Avikhaonanina kabaꞌi,
Paulo athi-ra vakamithaꞌiki Paulo-ra vaꞌora vaniꞌaha:
—Aakoirina kamahini vikhaꞌiana bana mahija haria avanavaꞌisohiꞌianavini Jesus varani hina — vakhaniha.
43 Oniaroa,
judeus kaijaꞌari Deu-ra vara vaniꞌavini kagorania ai vihiꞌaha adani ijaꞌari hahavi vajoroniꞌiki.
Judeus kaijaꞌari vaipohiki vaꞌora vavaipohihaꞌaha adani Paulo,
Barnabé khama.
Paulo-ra vaꞌora vavaipohihavini jaboni adani judeus kaijaꞌari vihiriki Deu-ra vanofiꞌiki.
Paulo vara vaꞌora niꞌaha adani ijaꞌari hahavi vaꞌora vavaipohihaꞌiki:
—Ijaꞌari-ra kajoamorabakhiaki ada Deus.
Vakapoari bana ada Deus mahija aꞌonira kajoamorahaꞌoadahavini — Paulo vaꞌora vaniꞌaha.
44 Hari.
Avakoiriꞌianana kamahini sidaji kaijaꞌarini vaipohiki avikhaꞌaha judeus kaijaꞌari Deu-ra vara vaniꞌavini kagorania,
vakamithaja kaimoni ida Deus athi.
45 Judeus kaijaꞌari vaꞌora vanokiꞌaha adani ijaꞌari vâipohiki vajoroniꞌiki Paulo kavarani-ra vakamithamahaki.
Avakabaivini hiki ada Paulo,
ovani ijaꞌaria bivajoronivini.
Paulo-ra avakabaiꞌaha,
oniani ida Paulo-ra vakanavaranihavini hija.
Paulo korijanahi kaꞌoa kavaranina-ra vakahiꞌaha.
46 Vakanavaranihavini kabaꞌi,
ni-Paulo vaꞌora vifiniki,
vara vaꞌora niꞌamaniha:
—Judeus kaijaꞌari avihihi,
aꞌonira ananamithahi Deus athia.
Jahaki ida aꞌonimiroꞌa avakamithavini.
Avaabononi avanakaidivaravini mani ida Deus aꞌonira kajoamoravini-ra avanofiravini hija.
Ni-avanofiki ida avakadimahi Deua bianajaꞌdivini hidiaja.
Kidiania avarikhani-ra avanofiriꞌoamanija.
Deus athi-ra avakajonivini mani ida aꞌonira anahojahavini hija.
Judeus kaijaꞌari vihiriki vakadiania vara avavaniꞌaki bana ida Deus athi.
47 Deus athi kapapirania hojahi ida honari:
“Ira okaronahi arabo hahavi kaijaꞌarini vakadiania
vavaꞌi bodini inavagaja kaimoni,
avigaja kaimoni
ida vaꞌora oakavaꞌijoavini onofivini.”
Nimania ida Deus athi haria honariavini hiꞌiki — niha ada Paulo.
48 Paulo athi-ra vakamithaꞌaha adani judeus kaijaꞌari vihiriki,
khai vakhaniꞌahapikiꞌaha,
vaniꞌaha:
—Jahaki ida Deus athi — vakhaniha.
Deus vaꞌora nagathogathoꞌavini mani ida Deus athi-ra vakajariꞌdaravini hija,
oniani ida vakadimahi anajaꞌdini hija,
mahi jahaki anokhomiriki-ra vavahojavini hija Deus kania.
49 Oniaroa,
Antioquia kaarabonia okhaꞌokhaonihi ida Jesus varani hina.
50 Judeus kaijaꞌari varani jaharikia vaꞌora vakanavaranihaꞌaha adani Paulo,
Barnabé khama,
sidaji vakaꞌdaꞌdiva vakamithaja kaimoni.
Gamoa jaboni vakamithaki ida Paulo vajaharina varani hini.
Hiꞌadani gamo vakanahinaꞌahapikiki.
Judeus kaijaꞌari vihirina kabaꞌi Deu-ra vanofiki adani.
Sidaji vakaꞌdaꞌdiva,
gamo vihikia vakamithaꞌihi ida Paulo vajaharina varani hini,
oniani ida Paulo-ra vaꞌora vakaihamahivini hija.
Vaꞌora vanofiki ida vaꞌora vanajahariharivini vaꞌora avakakojaꞌaha ibavi hoariha avikhara kaimoni.
51 Oniaroa,
Pauloa vanaꞌdaraꞌdaraꞌihi ida khomakhomani vakadisandália hojaki.
Ijaꞌari Deus athi-ra vakajoniki-ra vakavarajomivini ida sandália-ra vakanaꞌdaraꞌdaravini.