3 Tiago abinina vaꞌora khai niꞌaha adani judeus kaijaꞌari,

oniani ida Iroji Pedro maina gathana-ra vahonariahivini hija.

Pão kathoramananiriki kakaihinikani amonahani vani Pedro-ra vagathiꞌaha.

Páscoa oniki ida ihinika.

4 Hari.

Pedro-ra vagathiha,

cadeia avibaiꞌaha.

Iroji vaꞌora honariaha adani sorara:

—Avakadavaꞌajahaki bana o Pedro ajihirara kaimoni.

Sorara avakoꞌbamahakhamaki Pedro-ra avakadavaꞌaki afohaꞌoadaha.

Avakaabosinakhamana adani sorara avakoꞌbamahakhamaki vagavagani,

safini sohirarina,

safini aꞌbirina,

joma ꞌboꞌdahini.

Irojia binokhahi ida Páscoa kaihinikani amonahani anokhomini Pedro-ra vikhaonanira kaimoni,

ijaꞌari vaipohikia vanokira kaimoni ada Pedro abinina.

5 Oniaroa,

Pedro-ra avakadavaꞌaha adani sorara cadeia.

Cadeia hojana oadani,

Deu-ra vakanikhariahaꞌoadahaha adani Jesus Cristo kaijaꞌari Pedro-ra kajoamorara kaimoni.

6 Hari.

Oniaroa,

Irojia binofiki abinina ada Pedro afokajoma.

Joma abinirina oadani,

vadiha ada Pedro cadeia kabodinia.

Dabohana kihiki corrente koꞌbamiki.

Sorara viꞌbamiki vahojaki kidiania,

varakhaniamaniha ada Pedro.

Cadeia kaathani kabanininija vahojaha adani sorara jaboni vanokina.

7 Pedro vadina kabaꞌi nokiajorakiꞌaha ada Deus ibavi kaijaꞌarini.

Vagaꞌihi ida ibavi bivahojaki kani.

Amadosia biraꞌbaniꞌbaniꞌaha,

Pedro-ra nanokiahaꞌavini.

Biniꞌaha:

—Gamajorakiꞌa bana.

Kaꞌoniani oa kakhanoniꞌihi ida saꞌa kodabohani.

8 —Inakaramisi bana oni kadacinturão.

Kasandáliahaꞌa bana — niha ada Deus ibavi kaijaꞌarini.

Pedroa binaabaꞌihi ida Deus ibavi kaijaꞌarini athi.

—Ikaimahaꞌa oni kadakarahobi bana.

Kodiania okhaꞌa bana — niha ada Deus ibavi kaijaꞌarini.

9 Okhananavaha ada Deus ibavi kaijaꞌarini,

okasiagaꞌaha ada Pedro cadeia okhaonaniꞌina.

Adahaꞌina kabaꞌi ada Pedro,

ni-biogaki ida kaꞌoa hini okhaonaniꞌina,

vadami kaꞌoa bivanihamanihi ida adahaꞌina.

10 Sorara vavahojaki kania varadahaha,

avikhamiꞌianaha.

Sorara vahoariha vavahojaki kania varadahaꞌianaha.

Ni-sorara vaꞌora vanokiꞌiki varadahana.

Cadeia kakavasiribanini kakaferroni kaathani kania avakhanoꞌaha.

Kaꞌoniani oa akarabikhajahaꞌihi ida bakatha,

varadahaꞌaha.

Sidaji kahagihinia vakaikahiꞌaha,

vaadahaꞌaha.

Avisoniꞌaha ada Deus ibavi kaijaꞌarini.

Gaakosoana hojaꞌaha ada Pedro hagihia.

11 Hari.

Vaꞌi bodinia abono-ra vara niꞌaꞌaha:

—Kaꞌoa oamani hijanani hida oadahana.

Kodikaꞌdaꞌdia bikaronaꞌiki ada ibavi kaijaꞌarini hora akavaꞌijoara kaimoni Iroji saꞌa kabodinia.

Hora vanaimaꞌbanavini-ra vanofiki adani judeus kaijaꞌari.

Jesus hora akavaꞌijoaꞌoamaniꞌia!

— abono-ra niꞌaꞌaha ada Pedro.

12 Bikavaꞌibodivaraniꞌihi ida namithaꞌiki kidiania,

naothinia Maria gorania okhaꞌaha.

João Marcos kaamia ida Maria.

Maria gorani bodinia vajoroniꞌiki adani ijaꞌari vaipohiki Deu-ra vara vaniꞌaki.

13 Maria gorania kaikahiha ada Pedro,

too too bikaniꞌaꞌihi ida bakatha.

Badani abono Rode onikia bikanavanavanahaꞌihi ida bakatha too too khaniki.

14 Rodea bikamithahi ida Pedro athi,

khai biniꞌaꞌihi ida Pedro khaꞌina.

Biakavaꞌiꞌbiriniꞌihi ida bakatha-ra akarabikhaivini khaii nini.

Biakarabikhairavini vani kiꞌdarahihia ajoimiꞌihi,

vaꞌora navaꞌisohihavini hiha ada Pedro hojaꞌina bakatha kabanininija.

15 Vaniꞌahi ida Rode:

—Ivaꞌini bajadidiꞌoamaniꞌia.

—Iniani,

ovaꞌi bajadidirihi.

Kaꞌoa oamani ida oniꞌaki — Rode vaꞌora niꞌaꞌaha.

Vaniꞌaꞌihi:

—Pedro abono kaꞌoa ida inokiꞌia vahabini — vakhaniha,

vakajariꞌdavini ida Rode athini.

16 Vara vakhanina kabaꞌi,

Pedroa too too bikaniꞌahahaꞌoadahahi ida bakatha.

Hari.

Avakarabikhaiꞌihi ida bakatha,

Pedro-ra vanokiꞌaha,

varapataꞌaha.

17 Hari.

Pedro vaꞌora kaabaniꞌaha saꞌa viso vakhanira kaimoni.

Vaꞌora nanamithavini hiꞌihi ida Deua biarakhaonaniꞌavini cadeia hojana.

—Vaꞌora vanavaꞌisohihaꞌa bana adani Tiago,

arigamina Jesus kaijaꞌari vihiki Deus hora kajoamoraꞌavinia — vaꞌora niꞌaha ada Pedro.

Oniaroa,

ajihiha,

ibavi hoariha okhaꞌaha.

18 Oniaroa,

vagavagani ofini vaꞌora najaro tharararahaꞌaha adani sorara cadeia kabodinia vahojaki.

Ni-avigaꞌiki ada Pedro hana okhaonanina,

ni-avigaꞌiki hana hojaꞌina,

oniani ida vaꞌora najaro tharararahaꞌia.

Vakadihojai hiki sorara vavakaꞌdaꞌdiva bivahonariahivini ada abinina gathaꞌiki-ra akadavaꞌajahakiriki.

19 Iroji vaꞌora honariaꞌaha Pedro-ra vanakoꞌdihavini.

Ni-vakaragaꞌiki.

Iroji vaꞌora nanaꞌdohiha adani sorara Pedro-ra avakadavaꞌaki nihanikia ajihiꞌina.

Vaꞌora nanaꞌdohivini naothinia vaꞌora vahonariahiꞌaha vaabiniꞌina.

Oniaroa,

Judéia kaarabonia ajihiꞌaha ada Iroji,

Cesaréia sidajia okhaꞌaha,

hojaꞌaha.

20 Hari.

Oniaroa,

arabo vakaꞌdaꞌdiva Iroji oniki vaꞌora kavaꞌijokojokohaꞌoadahavini adani ijaꞌari Tiro sidaji,

Sidom sidaji hikia vahojaki.

Sidaji kaijaꞌarini vaꞌora vakaronaha adani vakadijaꞌari vaipohiriki Iroji-ra avanariakahaꞌavini.

Bilasito kani miroꞌa avikhaꞌaha.

Iroji kahonai abono vaipohiki-ra vaꞌora honariafiahaki ada Bilasito Iroji gorana bodinia.

Hari.

Bilasito kania avikhaha adani Sidom sidaji kaijaꞌarini,

Tiro sidaji kaijaꞌarini khama,

Bilasito-ra vakanikhariaha vaꞌora kakodiara kaimoni.

Naothinia Iroji kania avikhaꞌaha.

Iroji-ra vakanikhariaha vaꞌora kaihamahijanarara kaimoni.

Tiro sidaji kaijaꞌarini,

Sidom sidaji kaijaꞌarini vihikia vagathanibakhiaki ida vakadiꞌbai,

vakadikiivi hiki Iroji kaaraboa,

oniani ida Iroji vaꞌora kaihamahivini-ra vanofiravini hija.

21 Oniaroa,

vaabono vakanamahiꞌaha vaabono vara vakaniꞌakhamavini kaimoni.

Arabo kakaꞌdaꞌdini kamakari jahaki-ra kaimahaꞌaha ada Iroji.

Kaꞌdaꞌdi kavithi ibavinia vithiꞌaha,

vaꞌora vara niꞌaꞌaha.

Tororihi ida Iroji kavarani.

22 Vara nina naothinia vabodiꞌbarahaꞌaha adani Iroji athi-ra vakamithaꞌiki:

—Makhira hiriha o vara nira.

Deus oamani o vara nira — vakhaniha.

23 Irojia bivajahaki ida Deus hina vakahivini.

Ni-vaꞌora navaꞌisohiki makhira kaꞌoa hina,

oniani ida jorakia Deus ibavi kaijaꞌarinia binakavamonivini hija.

Kaꞌdokiꞌahapikiha,

abinijorakiꞌaha.

24 Oniaroa,

Deus athi-ra avavikhaoniꞌaha.

Ijaꞌari vaipohikia vakamithaꞌihi,

ni-vakajariꞌdaꞌiki.

25 Hari hiꞌihi ida vakadibadani Jerusaléa,

Saulo,

Barnabé khama Antioquia avajoiꞌaha.

Okhaꞌaha ada João Marcos vakadiania.