Pedroa vara bivaniꞌaki Cornélio varani hina
11
Hari.
Oniaroa,
Jesus Cristo kaijaꞌari,
Jesus athi avavaadahaoniva abono khama Judéia kaarabonia vahojakia vakamithaꞌihi ida moni,
judeus kaijaꞌari vihirikia vanofiꞌihi ida Jesus athi-ra vanaabavini.
2 Oniaroa,
Judéia kaarabonia ajoiꞌaha ada Pedro,
Jerusaléa kaikahiꞌaha.
Jesus Cristo kaijaꞌari vahararana vahojamaniha adani makhira isani-ra vakarajomivini-ra vanofiki siikosida karajomihia.
Vaꞌora vanofiki adani judeus kaijaꞌari vihiriki-ra vakarajomivini jaboni.
3 Hari.
Pedro-ra vakajaꞌoriavini vaniꞌaha:
—Jahariki ida makhira vakarajomiriki vagorana ihojani.
Iꞌbaini vakadiania jaboni ni-jahapaꞌitxiki — Pedro-ra avanaathidanoararivini.
4 Oniaroa,
Pedro vaꞌora navaꞌisohihahavivini hiki ida namithaꞌiki.
5 —Jope sidajia ohojana kari Deu-ra vara oniꞌavini kabaꞌi vadami fori hikia onokiꞌiki ida makari karaho fori hiki akaahohaninikhamaki nama gaarini.
Kodiania maakariꞌihi,
daaniꞌihi ida makari fori hiki.
6 Vada oniꞌahi ida makari bodinia hojaki igitha ipohiki.
Onokiꞌihi ida arabo kahijava,
nama kahijava,
tapoꞌija hiki.
7 Onokivini naothinia okamithaꞌihi ida athii hora niꞌavini:
“Pedro,
gaaꞌa mahija
igitha-ra inaabinivini
kadaꞌbai kaimoni.”
8 Ogathaniꞌihi ida athii:
“Kodikaꞌdaꞌdi,
jokoa
onaabinirihi oni igitha.
Ni-igitha havahaki hojaki.
Ni-hoaranija ohaꞌiaki ida
igitha kaaji hiki.”
“Deus kaaji hirini bikahivini kabaꞌi,
hariꞌa kaaji hini kahi.
Ni-makhaniki havahani.”
Hora niꞌahi ida athii.
10 Ahoarabakosikia onokihi ida igitha,
okamithahi ida jaboni athii ahoarabakosikia.
Naothinia nama Deua bianajoisiꞌianahi ida makari fori hiki.
11 Hari hiꞌihi ida vadami fori hikia onokiꞌiki,
gora ovahojaki banininija vakaikahiꞌaha adani makhira avahoarabakosiki.
Cesaréia sidajia vikhaki adani hora vanikhaki.
12 Vakaikahina vani Maꞌonahai Jahaki hora honariahi:
“Ijariꞌdarini okhaꞌa
vakadiania.”
Hora niꞌaha.
Jope sidajia vahojaki hadani Jesus vaipohihava abono.
Hihadani 6 vihiki vaipohina hida kodiania vahojaki hora vavaipohihaꞌiki.
Aokhahi,
Cornélio gorana aakhanohi,
aokhajakosiꞌihi.
13 Oniaroa,
haria navaꞌisohiha ada Cornélio:
“Ogorana bodinia onokiꞌiki
ada Deus ibavi
kaijaꞌarini gaana.”
Niha ada Cornélio.
Cornélio hora nanamithavini hiki ida Deus ibavi kaijaꞌarini athi:
“Jope sidajia
vaꞌora karonaꞌa adani kadahonai abono
mahija Simão Pedro-ra avanikhaꞌavini.
14 Pedro aꞌonira navaꞌisohivini hiki bana ida varani,
nihaniki vania Jesus aꞌonira akavaꞌijoaki aꞌoni,
kadaijaꞌari khama.”
Cornélio-ra navaꞌisohiha ada Deus ibavi kaijaꞌarini.
15 Oniaroa,
vara onina-ra onakamaꞌdavini vani gaariꞌaha ada Maꞌonahai Jahaki vakadiania,
vaꞌora aviꞌonaniꞌaha.
Maꞌonahai Jahaki-ra agathanibiininivini vani fori vanihaha Cornélioa vagathaniꞌavini jaboni,
16 oniani ida akadikaꞌdaꞌdi Jesus athi haria niꞌavini hiꞌiki-ra okavaꞌihokivini hija:
“João Batista ijaꞌari-ra
kanavini paha bodinia.
Deus vania bikaronara bana o Maꞌonahai Jahaki
avavaꞌini bodinia hojara kaimoni.”
Jesua biniꞌaꞌboꞌdaꞌiki.
17 Jesu-ra agathanivini hiki akadikaꞌdaꞌdi kaimoni hina,
Maꞌonahai Jahaki haria aviꞌonaniꞌihi.
Maꞌonahai Jahaki haria aviꞌonanivini vani fori vihira adani jaboni vaꞌora aviꞌonaniꞌavini ada Maꞌonahai Jahaki Deua bikaronaꞌiki.
Deus vaꞌora nofiki adani judeus kaijaꞌari vihiriki,
kidijaꞌari vihira kaimoni.
Ni-okaathiriki ida Deua binofiki.
Ovaꞌahamanihi — vaꞌora niꞌaha ada Pedro.
18 Pedro athi-ra vakamithaꞌaha,
avakariakaꞌaha ada Pedro.
Deu-ra khai vaniꞌaꞌaha,
vakhaniꞌaha:
—Deus vaꞌora nofiki jaboni adani judeus kaijaꞌari vihiriki vakadihojai asohiriki-ra vakavaꞌipahinivini,
vaꞌora noꞌara kaimoni mahi jaꞌdini anokhomirikia.
Jesus Cristo kaijaꞌari Antioquia sidajia vahojaki
19 Hari.
Oniaroa,
Estêvão abiniꞌina naothinia kamaꞌdaꞌiki ida vajariꞌdaki Jesus athi-ra vanaabaꞌiki-ra vaꞌora vanajahariharivini,
oniani ida vaꞌora akarakhanakhamaꞌia.
Vahoariha Fenícia kaarabonia avikhaꞌiki.
Vahoariha Chipre kajoviri kakaarabonia avikhaꞌiki.
Vahoariha Antioquia sidajia avikhaꞌiki,
avigaꞌina.
Avaadahaoniꞌina adani Jesus athi-ra vanaabaꞌiki,
vara vavaniꞌabakhiavini ida Jesus varani hina.
Judeus kaijaꞌari kaꞌoa vakadiania vara vavaniꞌavini ida moni jahaki.
20 Antioquia sidajia avakhanoha adani Jesus athi-ra vanaabaꞌiki vahoariha.
Hivaꞌoani vara vaꞌora vaniꞌaꞌiki adani judeus kaijaꞌari vihiriki.
Vaꞌora vaniꞌaha:
—Moni jahakia aꞌonira akanamoniki bana hari.
Kaꞌdaꞌdi jahaki ada Jesus Cristo oniki — vakhaniha.
Hiꞌadani moni nanamithava abono vaibavi kaꞌoa Chipre kajoviri kaoniki,
vahoariha vaibavi Cirene sidaji.
21 Deus vaꞌora kakodiavini mani ida Jesus varani hina-ra vara vavaniꞌavini hija,
oniani ida ijaꞌari vaipohikia vakajariꞌdaravini hija.
Jesus kania vaabono gahinai vanihavini hiki vakadikaꞌdaꞌdi kaimoni hina.
22 Jesus Cristo kaijaꞌari Jerusaléa vahojakia vakamithaꞌihi ida moni Antioquia sidaji kaijaꞌarini Jesu-ra vanofijahakivini.
Oniaroa,
vakaronaꞌaha ada Barnabé,
Antioquia sidajia okhana,
vaꞌora navanavanahaꞌavini.
23 Akhanoꞌaha,
vaꞌora nokiꞌaha adani ijaꞌari Jesus kania gahinai vaabono vanihaꞌiki nihanikia Deus vaꞌora kajoamoraꞌavini.
Khai niꞌaha ada Barnabé.
Vaꞌora navaꞌisohiꞌaha:
—Hariꞌa bana vakavaꞌipahini oni Jesus ipohina avihini.
Mahi hahavi bana Jesus athi-ra vanaabaꞌa.
Vanofikaꞌoa bana o Jesus — vaꞌora niꞌaha ada Barnabé.
24 Hari.
Makhira jahaki ada Barnabé.
Maꞌonahai Jahakia vaꞌi binahonariahihiki ada.
Barnabéa bivakaijokajahakiki ada Jesus.
Antioquia sidajia Barnabé hojana oadani ijaꞌari vaipohikia vanofijahakiha ada Jesus vakadikaꞌdaꞌdi hina.
25 Oniaroa,
ajihiꞌaha ada Barnabé,
Tarso sidajia okhaꞌaha,
Saulo-ra nakoꞌdihavini.
26 Bikaragaꞌaha,
biavikhaꞌaha ada Saulo Antioquia sidajia.
Badara,
pahakari,
vajoronibakhiaha adani Barnabé,
Jesus Cristo kaijaꞌari khama.
Barnabé,
Saulo khama ijaꞌari vaipohiki-ra vaꞌora vakaꞌojomoꞌiꞌaha.
Antioquia sidaji kaijaꞌarini vaꞌora vanaonivini adani Jesus vaipohihava abono afobiinini Cristo kaijaꞌari.
27 Oniaroa,
Jerusaléa vikhaha adani Deus athi namoniva abono Antioquia sidajia avakhanoꞌaha.
Vaꞌora vanavaꞌisohijoravini hiꞌihi ida namithaꞌiariki.
28 Vajoroniꞌaha adani Jesus vaipohihava abono,
gaaꞌaha ada Deus athi namoniva abono Ágabo oniki.
Maꞌonahai Jahaki vaꞌi binahonariahihivini vani Ágabo vaꞌora niꞌaha afojora:
—Arabo hahavi kaijaꞌarinia vakainamoki bana ida vakadiꞌbai — niha ada Ágabo.
Hari.
Arabo ipohiki kakaꞌdaꞌdini Cláudio oniki hojana kari namithaꞌiki ida athii,
vakainamoꞌiki ida ꞌbai.
29 Hari.
Ágabo athi-ra vakamithaha adani Jesus vaipohihava abono,
vaabono vara vakaniꞌakhamaꞌaha:
—Jahaki ida jiniroa Jesus kaijaꞌari-ra vaꞌora akajoamoravini Judéia kaarabonia vahojaki — vakhaniha.
Oniania,
vakajiniropaꞌitxiki vaꞌora vanoꞌaꞌaha paꞌitxia.
Vakajinirodoroniki vaꞌora vanoꞌaꞌaha jiniro doronikia.
30 Jiniro-ra vagathaniha adani Barnabé,
Saulo khama,
ai vavanihaꞌihi Jerusaléa avisaꞌihi.
Avakhanoꞌaha,
Jesus vaipohihava abono vavakaꞌdaꞌdiva vakadiania jiniro-ra avarakhaꞌaha adani Barnabé,
Saulo khama.