Cornélio varani hina hida
10
Hari.
Oniaroa,
Cesaréia sidajia hojaha ada sorara Cornélio oniki.
Cornélio kabadani hiki vaꞌora honariavini adani 100 sorara vihiki vaipohina.
Vakadiarabo onini Itália.
2 Judeus kaijaꞌari hirina kabaꞌi ada Cornélio,
Deu-ra nofijahakiha.
Deu-ra vakanamasivivini adani Cornélio,
gorana kaijaꞌarini vihiki.
Cornélio vaꞌora kaijahitabakhiaki adani judeus kaijaꞌari vakanahinariki.
Deu-ra vara niꞌaki jaboni ada Cornélio mahi hahavi.
3 Hari.
Safini aadosina vani,
vadirina kabaꞌi vadami fori hikia Cornélioa binokijahakiha ada Deus ibavi kaijaꞌarini oꞌoina kidiania.
Biniꞌaha:
—Cornélio.
4 Deus ibavi kaijaꞌarini-ra vada niꞌaha ada Cornélio,
bifiniha,
binanaꞌdohiha:
—Nahina mani ida inofija?
—Cornélio,
Deua bikamithaꞌiki ida vara iniꞌabakhiavini.
Bivajahaki ida kanahinariki-ra ikajoamoravini,
oniani ida bana Deus ira kajoamoravini hija jaboni.
5 Jope sidajia vaꞌora karonaꞌa adani kadahonai abono mahija makhira Simão Pedro oniki-ra avanikhavini.
6 Simão hoariha gorana hojaki ada Pedro.
Igitha asafini aniaki anaꞌbakova abono ada Simão.
ꞌDako karaho kajokiraki vadinia hojaki ida Simão gorana.
Vaꞌora honariaꞌa adani kadahonai abono Pedro-ra avanikhavini.
7 Hari hiꞌihi ida kidivarani,
ajihiꞌaha ada Deus ibavi kaijaꞌarini.
Ajihiꞌina naothinia Cornélio vaꞌora baranahaha adani kidihonai abono viꞌbamiki.
Cornélioa bibaranahaꞌaha ada sorara jaboni kidiania hojabakhiaki.
Cornélio kabadani abono ada.
Deus khai niꞌava abono jaboni ada sorara.
8 Vaꞌora nanamithavini hihi ida vadami fori hikia binokiꞌiki,
Deus ibavi kaijaꞌarini kavarani hiki.
Vaꞌora honariaha:
—Jope sidajia avikhaꞌa mahija Simão Pedro-ra avaranikhavini — vaꞌora niꞌaha.
9 Hari.
Kaꞌafokajomani safini sohirarina vani avanamaakariꞌihi ida Jope sidaji.
Vanamaakarivini kabaꞌi,
okasiha ada Simão Pedro gora ꞌdaꞌdini aꞌani sohiriamaꞌokia Deu-ra vara niꞌara kaimoni.
10 Oniaroa,
hojana oadani vaiꞌamiꞌaha ada Pedro.
ꞌBai-ra nofiꞌaha.
Kidiꞌbai vanamonahavini kabaꞌi vadami fori hiki-ra nokiꞌaha ada Pedro.
11 Binokihi ida nama arabikhajahaki.
Ogariꞌihi ida nahina karaho akaahohaninikhamaki makari nokiani fori hiki arabo namania khanorariꞌini.
12 Makari fori hiki bodinia hojahi ida igitha ipohiki kabodihadihaki,
arabo kahijava,
nama kahijava,
tapoꞌija hiki.
13 Simão Pedroa bikamithaꞌihi ida athii:
—Pedro,
gaaꞌa mahija igitha-ra inaabinivini kadaꞌbai kaimoni.
14 Pedroa biniꞌaha:
—Kodikaꞌdaꞌdi,
jokoa onaabinirihi oni igitha.
Ni-igitha havahaki kaimoni-ra onokirihi.
Ni-hoaranija ohaꞌiaki ida igitha kaaji hiki — niha da Pedro.
15 Athii-ra kamithaꞌianaha ada Pedro:
—Deua kaaji hirini bikahivini kabaꞌi,
hariꞌa kaaji hini ikahi.
Ni-makhaniki havahani.
16 Ahoarabakosikia Pedroa binokihi ida makari fori hiki.
Ahoarabakosikia jaboni bikamithahi ida athii,
oniani ida athii hiꞌianahi bikamithaꞌianahi.
Naothinia nama Deua bianajoisiꞌianahi ida makari fori hiki.
17 Pedroa biakavaꞌisokonivini bikavaꞌibodivaraniki ida nahina kaimoni Deua binanokiahivini igitha.
Bikavaꞌibodivaranivini kabaꞌi,
vamaakariꞌaha adani Cornélio vaꞌora karonaꞌiki.
Ijaꞌari-ra vananaꞌdohiꞌaha:
—Ida hanaja vania hojahi Simão gorana?
18 Vakaragaꞌihi,
gora kaathani banininija vahojana vibaranahaꞌaha:
—O hojamaniha Simão Pedro onia?
19 Pedro asia bikavaꞌibodivaranihi ida binokiꞌiki.
Abono-ra nanaꞌdohiꞌaha:
—Nahina kaimoni mani koda ida Deus hora nanokiahivini hija vadami fori hikia?
Maꞌonahai Jahakia biniꞌaha:
—Mitha iniꞌa.
Gora banininija vahojaha adani makhira avahoarabakosiki ira vanakoꞌdiki.
20 Gaaꞌa,
ogariꞌa mahija vakadiania iokhavini.
Hariꞌa iabono niꞌa:
“Judeus kaijaꞌari vihiriha adani.
Ni-oogaki ida jahani jaharini vakadiania ookhana.”
Okhaꞌa bana.
Vaꞌora okaronaki hadani hida vikhana — Pedro-ra niꞌaha ada Maꞌonahai Jahaki.
21 Oniaroa,
ogariꞌaha ada Pedro,
vaꞌora niꞌaha adani makhira:
—Hora avanakoꞌdimanija?
Hida vania ohojaja.
Nahina mani hida avanikhaja hida?
— vaꞌora nanaꞌdohiha ada Pedro.
22 —Akadikaꞌdaꞌdi Cornélio oniki haria honariavini mani hida haria rakhaja hida.
Sorara vaipohiki-ra vaꞌora honariabakhiaki ada Cornélio.
Jahaki ada.
Deu-ra kanamasiviki ada.
Judeus kaijaꞌari hahavia vavajahaki ada akadikaꞌdaꞌdi.
Hari.
Deua bikaronaꞌiki ada ibavi kaijaꞌarini Cornélio kania.
Biniꞌaha:
“Cornélio,
Simão Pedro-ra kaboaꞌiꞌa igorania khana mahija kidivarani
mitha iniꞌavini.”
Vakhaniha adani Cornélio kahonai abono.
23 Oniaroa,
Pedro vaꞌora akaboaꞌijakosiha gora bodinia.
Joma hoarani vahojaha.
Kaꞌafokajomani vani ibavijahahaꞌaha ada Pedro,
vaꞌora vaipohihaꞌaha.
Jesus vaipohihava abono 6 vihiki vaipohina vaꞌora vavaipohihaꞌiki jaboni.
Jope sidaji kaijaꞌarini adani.
24 Hari.
Afokajoma Cesaréia sidajia vakaikahiꞌaha.
Cornélio gorana vahojaha adani kidijaꞌari,
kidivaꞌahi vihiki.
Cornélio vaꞌora kaboaꞌiꞌaha Pedro kaikahina-ra vanaviahanokhara kaimoni.
25 Pedro okhajakosina vani Cornélioa binamaakariha,
Pedro-ra kaꞌivanitiꞌaha.
Vakadihojai ida Deus viaha kajoꞌatharari,
oniani ida Pedro viaha nakajoꞌathararina hija.
26 Pedroa biniꞌaha:
—Gaaꞌa.
Makhira kaꞌoa ho,
ifori ohiki ho.
Deus ohirihi.
27 Avikhajakosiꞌaha,
vaabono vara vakaniꞌakhamaꞌaha.
Gora bodinia Pedro vaꞌora nokiha adani ijaꞌari vaipohiki vajoroniꞌiki.
28 Pedro vaꞌora niꞌaha:
—Aꞌonivaniti.
Hovani judeus kaijaꞌari ho.
Avarigajahakiki ida akadijaꞌari kahojai.
Ni-ariadahaki judeus kaijaꞌari vihiriki vakadiania.
Ni-vagorana aoꞌoiki.
Akadijaꞌari kaꞌoa vakadiania arihojana vani jahaja.
Deus vani hora navaꞌisohija vadami fori hikia,
jahapaꞌitxirihi ida ijaꞌari hoariha-ra kaaji fori onihavini.
“Deus kaaji fori vihirina
bikahivini kabaꞌi adani judeus kaijaꞌari vihiriki,
hariꞌa kaaji vihina vaꞌora kahi.”
Deus hora niꞌaꞌiki ho.
29 Hora rakhaꞌiki kadania hora ibaranahavini.
Ni-okajoniki ida okhana hida.
Nahina mani hida hora avaranikhavini hija?
30 Cornélioa biniꞌaha ada Pedro:
—Hidanija hoariha ogorana ohojaꞌina.
Safini aadosina vani Deu-ra vara oniꞌaja.
Deu-ra vara oniꞌavini kabaꞌi onokijorakiꞌiki ada makhira.
Vagaꞌoamanija ida makari vaforiki bikaimahaki.
31 Hora niꞌaha:
“Cornélio,
Deua bikamithaꞌiki ida vara iniꞌavini.
Bikavaꞌibodivaraniki ida
vakanahinariki-ra ikajoamoravini.
32 Jope sidajia vaꞌora karonaꞌa adani kadahonai abono
mahija Simão Pedro-ra avanikhavini.
Ada Simão hoariha gorana hojaha.
Igitha asafini aniaki anaꞌbakova abono ada Simão.
ꞌDako karaho kajokiraki
vadinia
hojaki ida Simão gorana.”
Hora niꞌaha ada Deus ibavi kaijaꞌarini.
33 Oniaroa,
okaronajorakihi ida oathi ikhajorakija kaimoni.
Jahaki ida ikhaꞌini hida akadiania.
Deus viaha haria ajoroniꞌiki hari,
akamithahahavija kaimoni ida varani Deus ira honariavini hiꞌiki — Cornélio Pedro-ra niꞌaꞌaha.
Pedro vaꞌora kanamoniꞌiki adani Jesus varani hina
34 Hari.
Oniaroa,
Pedro vaꞌora niꞌaha adani Cornélio:
—Hidakabaꞌi oogaꞌiki ida ijaꞌari hahavi Deua binakaidivavini afohahavi.
35 Deua bikapoariki ida ijaꞌari athi naabani hiki,
nofina hiki judeus kaijaꞌari hirini kabaꞌi.
Arabo hoariha kaijaꞌarini hini kabaꞌi,
Deu-ra nofijahakihi;
Deua bikapoarihi.
36 Deua bikaronaꞌiki ida athi judeus kaijaꞌari vakadiania,
vaꞌora navaꞌisohivini hiki ida moni jahaki,
Jesus Cristo ijaꞌari-ra noꞌavini vaꞌi jahajahania.
Ijaꞌari hahavi kakaꞌdaꞌdi ada.
37 Avarigaki ida Judéia kaarabonia aakhanakhamaꞌini ida Jesus varani hina.
João Batista vara bivaniꞌaꞌimidiaꞌiki ida kanai karajomihi.
Ovani vaꞌora kanaꞌiki adani vakadihojai asohiriki-ra vakavaꞌipahiniꞌiki.
Naothinia Galiléia kaarabonia kamaꞌdaꞌihi ida Jesus kabadani.
38 Nazaré sidaji kaijaꞌarini ada Jesus.
Deus vania bikaronaꞌara ada Maꞌonahai Jahaki Jesu-ra aviꞌonanira kaimoni,
bivahojaja kaimoni jaboni ida Deus danona.
Jesus aadahaoniꞌiki ibavi hahavia ijaꞌari-ra kajoamoravini.
Jaharia binajaharihi ida ijaꞌari,
Jesus vania bianaihotaꞌihi.
Deua biakodiavini mani ida ijaꞌari-ra vaꞌora anaihotavini hija.
39 Anokiꞌiki ida kidibadani hahavi jahaki,
Judéia kaarabonia bada biniꞌaꞌiki,
Jerusaléa bada biniꞌaꞌiki anokiꞌiki jaboni.
Anokivini mani ida vahoariha-ra vaꞌora ananamithavini hija.
Ava akasanakhamakia avakaꞌitapoamisahanavini vanaabiniꞌaha ada Jesus.
40 Mahi ahoarabakosiki radahani,
Deus vania bianahokiꞌaha.
Deus vani haria nanokiahivini hira ada Jesus ahokiꞌina.
41 Ni-ijaꞌari hahavia binokijanaki.
Harivani oa anokiꞌianaha.
Mahi ꞌboꞌdakari Deus haria nagathogathoꞌavini mani ida haria nanokiahivini hija,
vara avaniꞌaja kaimoni ida ahokiꞌina kavaranihi.
Jesus ahokiꞌina naothinia aꞌbaiꞌihi,
akoꞌavahaꞌihi Jesus khama.
42 Jesus haria honariavini ijaꞌari hahavi-ra ananamithavini monina kavaranihi jahakia.
Deua binagathogathoꞌiki ada Jesus ijaꞌari nasohiva abono kaimoni hiꞌina.
Jesus vaꞌora noꞌaki bana adani ijaꞌari hahavi vahokiki,
vaabiniꞌiki vakadihojai asohiki asohiriki abosinia.
Jesus haria honariavini hiki jaboni ijaꞌari-ra ananamithavini ijaꞌari nasohiva abono hina kavaranihia.
43 Asia Pedro vaꞌora vara niꞌaha adani Cornélio:
—Deus athi namoniva abono kohana hahavia vara vavaniꞌaꞌiki ada Jesus.
Vakadivarani hiꞌiki ida Deua binaꞌbiravini badani jaharikaꞌoaki Jesu-ra kajariꞌdarikia bada biniꞌaꞌiki.
Jesu-ra kanikhariahi ida ijaꞌari;
Deua biakariakahi.
Maꞌonahai Jahaki Cornélio-ra vaꞌora aviꞌonaniꞌiki
44 Vara nina kabaꞌi ada Pedro,
Maꞌonahai Jahaki vaꞌora aviꞌonaniꞌaha adani Pedro athi-ra vakamithaꞌiki,
hiꞌadani judeus kaijaꞌari vihiriki.
45 Hari.
Vavaꞌi bodini vara nikarahoꞌaha adani Jesus vaipohihava abono Jope sidajia vikhaki,
Pedro-ra vavaipohihaki.
Pedro-ra vaꞌora navaꞌibodivaranikarahoki ida Deus Maꞌonahai Jahaki-ra karonavini judeus kaijaꞌari vihiriki vakadiania.
46 Maꞌonahai Jahaki vaꞌora aviꞌonanivini mani ida arabo hoariha kaijaꞌarini athini ogavaharikia vaꞌora naathija.
Khai vakhanina,
vara vavaniꞌaki jaboni ida Deus jahana.
Pedroa vakamithaꞌiki ida Cornélio vakadivarani.
Vakavaꞌibodivaraniꞌihi ida Maꞌonahai Jahaki Deua bikaronavini vakadiania.
47 Hari.
Pedroa biniꞌaha:
—Maꞌonahai Jahaki-ra agathanivini vani fori vanihaha vagathanivini ada Maꞌonahai Jahaki.
Vaathi hiki jaboni ida arabo hoariha kaijaꞌarini athini.
Nahina koda vaꞌora kaathirirara hadani kanai karajomihia?
— niha ada Pedro.
48 Oniaroa,
Pedro vaꞌora honariaha adani ipohina:
—Vaꞌora vikanaꞌa adani Cornélio,
kidijaꞌari vihiki.
Jesus Cristo kaijaꞌari vihira kaimoni — niha ada Pedro.
Vaꞌora vikanavini naothinia Cornélioa bikaboaꞌiha ada Pedro vakadiania hojara kaimoni.
Mahi ꞌbamiki hojaꞌaha.