Sauloa bikamithaꞌiki ida Jesus athi hagihia
9
1-2 Jerusaléa asia hojaha ada Saulo,
vaꞌora najahariharihaꞌoadahamaniha adani Jesus vaipohihava abono,
vaꞌora naabinivini vaꞌora nofiha.
Binofiki vaꞌora gathivini adani Jesus vaipohihava abono sidaji hoariha vahojaki.
Oniania Jerusaléa ajihina viahania Sauloa bikanikhariaha ada sasidotxi vakadikaꞌdaꞌdi:
—Hora bana iathini kapapirania oavikhaki kaimoni.
Damasco sidajia okaikahihi,
papira vaꞌora onanokiahira kaimoni adani akadijaꞌari Deu-ra vara vaniꞌavini kagorani bodinia vahojaki,
avigaja kaimoni ida hora ikaronavini.
Papira athinia hora honaria bana vaꞌora ogathira kaimoni adani Jesus vaipohihava abono Damasco sidajia vahojaki.
Vaꞌora ogathiki bana adani makhira,
gamo vihiki,
vidabohana naothinia vaꞌora ovikhavini hida kadania — Sauloa biniꞌaha ada sasidotxi vakadikaꞌdaꞌdi.
Conversão de Saulo (Atos 9:1-19)
3 Hari.
Papira-ra gathaniha ada Saulo,
ajihiꞌaha.
Damasco sidajia okhaꞌaha.
Sidaji-ra anamaakariꞌaha,
nama gaariꞌihi ida safini vagana fori hiki.
Vagajorakihi Saulo iꞌoaria.
4 Adariha,
bikamithahi ida athii:
—Saulo,
Saulo,
nahina mani ida hora inajahariharivini hija?
5 Sauloa binanaꞌdohiha:
—Kaꞌdaꞌdi,
hana ihini mani i?
—Hovani mani Jesus ooniki ho.
Hora inajahariharibakhiaki i.
6 Gaaꞌa.
Damasco sidajia okhaꞌa.
Ikaikahini vani hoariha ira honariavini hiki-ra bada niꞌaꞌa bana — niha ada Jesus.
7 Vahoariha Saulo-ra vavaipohihaki vigaakosoana viso vakhaniꞌaha.
Athii-ra vakamithavini kabaꞌi,
ni-nahina-ra vanokiki.
8 Gaaꞌaha ada Saulo.
Nokho amaraꞌaha,
kamaodorohana ni-nahina-ra nokijanaki.
Oniaroa,
vahoariha vaagathihi ida Saulo saꞌa avakakavanamaꞌaha,
avavikhaꞌaha Damasco sidajia.
9 Mahi ahoarabakosikia kamaodorohaki ada Saulo.
Ni-ꞌbaiki.
Ni-nahina-ra aviki jaboni.
10 Hari.
Damascoa hojaha ada Jesus vaipohihava abono Ananias oniki.
Vadirina kabaꞌi vadami fori hikia Anania binokiha ada Jesus.
Biniꞌaha:
—Ananias.
Anania bigathanihi ida Jesus athi:
—Kodikaꞌdaꞌdi,
hida vani ohojaja.
11 Jesua biniꞌaha:
—Gaaꞌa mahija gora kahagihini asohimiki onikia iokhavini.
Judas gorana-ra nakoꞌdihaꞌa bana.
Judas gorana bodinia hojaha ada Saulo.
Tarso sidaji kaijaꞌarini ada.
Hidakabaꞌi hojaꞌiki ada hihida sidaji Damascoa.
Kidiania okhaꞌa.
Deu-ra vara niꞌaki ada Saulo.
12 Binokihi ida jaboni vadami fori hiki.
Vadami fori hikia ira nokiki bana ada Saulo.
Binokihi ida ikhajakosini kidiania,
nokho ikaabadaꞌaha,
avagahaꞌianaja kaimoni ida nokho — Anania-ra niꞌaha ada Jesus vadami fori hikia.
13 Anania biniꞌaha:
—Jesus,
ofiniki ada.
Ni-onofiki ida ookhana kidiania.
Ijaꞌari vaipohiki hora vananamithavini hiꞌiki ada makhira badani jaharikia kabadanibakhiana,
vaꞌora najahariharibakhiaki adani kadaijaꞌari Jerusaléa vahojaki.
14 Hihida sidajia khaꞌaha ada Saulo jaboni vaꞌora nakoꞌdihavini.
Bivikhahi ida papira sasidotxi vakadikaꞌdaꞌdi binoꞌavini hiki kadaijaꞌari-ra vaꞌora gathira kaimoni,
vidabohana vaꞌora osara kaimoni Jerusaléa — Jesu-ra niꞌaha ada Ananias.
15 Jesua biniꞌaha:
—Okhaꞌa kidiania.
Onagathogathoꞌiki ada ovari kodihonai abono hira kaimoni.
Judeus kaijaꞌari vihiriki vakadiania vara bivaniꞌaki bana ida omonina.
Arabo ipohiki vavakaꞌdaꞌdiva vakadiania jaboni vara bivaniꞌaki bana ida omonina.
Israel kaijaꞌari vakadiania jaboni vara bivaniꞌaki bana ida omonina.
16 Hovani onavaꞌisohiki bana ada Saulo,
imana ꞌbanani-ra kamithara kaimoni kodimoni — Jesua biniꞌaha ada Ananias vadamia.
17 Oniaroa,
okhaha ada Ananias,
Judas gorana okhajakosiꞌaha.
Saulo nokho-ra kaabadaha,
biniꞌaha:
—Oigamina Saulo,
kodikaꞌdaꞌdi Jesus hora karonaꞌiki ho kadania okhana.
Ovani ada inokiꞌara hagihia ikhani kabaꞌi.
Hora honariavini hiki inokhoni avagahaꞌia kaimoni,
Maꞌonahai Jahaki ira aviꞌonaniki bana i jaboni.
18 Bikaabadavini kabaꞌi Saulo nokho ꞌbaꞌdani,
vararaꞌihi ida abaisana asafi fori hiki.
Avagahaꞌianahi ida nokho ꞌbaꞌdani.
Oniaroa,
Anania bikanaꞌaha.
19 Saulo kanana naothinia ꞌbaiꞌaha,
danoꞌianaha.
Damasco sidajia hojaki ada Saulo
Asia hojaha ada Saulo Damasco sidajia Jesus vaipohihava abono vakadiania.
20 Judeus kaijaꞌari Deu-ra vara vaniꞌavini kagorania okhaꞌaha vaꞌora nanamithavini hiꞌiki ida Jesus varani hina.
Vaꞌora niꞌaha:
—Deus kaisai ada Jesus.
21 Hari.
Saulo kavarani-ra mitha vaniꞌaha,
vaabono vara vakaniꞌakhamavini:
— Hada vani mani koda Saulo Jesus kaijaꞌari gathiva abono?
Akavaꞌibodivaranivini hiki ida nihanikia Jesu-ra nofijahakiꞌavini.
Jerusalém sidajia hojana kari ada Saulo,
vaꞌora nihimahahavivini vaꞌora nofiki adani Jesus vaipohihava abono.
Hihida sidajia khana vaꞌora nakoꞌdihavini.
Vaꞌora dabohavini naothinia binofiki vaꞌora osavini Jerusaléa sasidotxi vavakaꞌdaꞌdiva vakadiania — vaabono vakananaꞌdohikhamaha adani Saulo athi-ra mitha vaniꞌaki.
22 Damascoa hojana oadani Saulo vara vaꞌora niꞌabakhiaha adani judeus kaijaꞌari.
Vaꞌora navaꞌisohijahakivini hihi ida Deus athi papira hojaki.
Sauloa biniꞌavini:
—Jesus vani ada Cristo Deua bikaronaꞌara.
Ovani ada Deus athia vara bivaniꞌabakhiaꞌiki afojora — vaꞌora niꞌabakhiaha.
Vajariꞌdana kabaꞌi,
ni-avigaki ida Saulo athi-ra avanaabosivini.
23 Hari.
Radahahi ida mahi ipohiki.
Vajoroniꞌaha adani judeus kaijaꞌari,
vaabono vara vakaniꞌakhamavini hiki vanofiki Saulo-ra vanaabinivini.
24 Sauloa biogaꞌiki ida vagathivini vanofivini.
Mahi,
joma hiki sidaji kavasiribanini kaathania vanokhaha.
Vanofiki ida okhaonanina vanaabinivini.
25 Saulo vaipohihava abono Saulo-ra vakajoamoraꞌavini.
Joma vani vahonariaha ada Saulo soꞌoro bodinia oꞌoina.
Sidaji kavasiribanini namanija avavikasiꞌaha,
avanahiririrarihi ida Saulo kasoꞌorona,
akhanorariꞌaha,
ajihiꞌaha ada Saulo.
Saulo Jerusaléa hojana
26 Hari.
Oniaroa,
ajihiꞌaha ada Saulo,
Jerusaléa okhaꞌaha.
Kaikahina vani Jesus vaipohihava abono vakadiania hojana-ra nofiꞌaha.
Ni-vanofiki vakadiania hojana.
Saulo-ra vifinivini hiki Jesus vaipohihava abono hina vakajariꞌdavini.
27 Hari.
Barnabéa bikajoamoraha ada Saulo,
Jesus athi avavaadahaoniva abono vakadiania biavikhaꞌaha.
Vaꞌora navaꞌisohivini hiha ada Saulo Jesus vaipohihava abono hiꞌina.
Vaꞌora niꞌaha:
—Sauloa binokiꞌiki ada akadikaꞌdaꞌdi Jesus Damasco kahagihinia.
Saulo-ra vara niꞌamaniha ada Jesus.
Damasco sidajia hojaꞌina ni-vaꞌora finiki adani Jesus athi-ra vakajariꞌdaki.
Saulo vaꞌora navaꞌisohijahakivini hiꞌihi ida Jesus monina kavaranihi — Barnabé vaꞌora niꞌaha adani Jesus athi avavaadahaoniva abono.
28 Oniaroa,
hojaha ada Saulo vakadiania.
Jerusalém kaibavini ipohikia adahana vakadiania jaboni.
Vara bivaniꞌabakhiaki ida Jesus varani hina.
Ni-vaꞌora finiki adani vajariꞌdaki.
29 Jerusaléa vahojaha adani judeus kaijaꞌari grego athinia vaathiki.
Saulo vaꞌora nanamithavini hihi ida Jesus varani hina.
Saulo-ra vakaihamahivini hiki kidivarani vakajariꞌdavini,
oniani ida Saulo-ra vanaabinivini-ra vanofivini hija.
30 Jesus vaipohihava abonoa vakamithahi ida vajariꞌdakia vanaabinivini vanofivini.
Ai vavanihaꞌaha ada Saulo,
sidaji hoariha Cesaréia onikia avavikhaꞌaha.
Avakhanoꞌaha,
vakaronaha ada Saulo Tarso sidajia okhaꞌina.
31 Oniaroa,
ni-vajahariharijanaki kaho adani Jesus Cristo kaijaꞌari Judéia kaaraboni,
Galiléia kaaraboni,
Samaria kaaraboni hikia vahojaki.
Vavaꞌi jahajahaꞌiki adani Jesus Cristo kaijaꞌari Jesu-ra vavakaijokadanokivini.
Maꞌonahai Jahaki vaꞌora kajoamoravini mani ida Jesus kaijaꞌari-ra vaꞌora anaipohibakhiaja.
Jesu-ra vanofivini mani ida athi vanaabajahakivini hija.
Pedro Lida sidajia okhaꞌiki
32 Hari.
Oniaroa,
adahaꞌaha ada Pedro ijaꞌari vaibavi ipohikia.
Ni-hojakaꞌoaki Jerusaléa.
Lida sidajia okhaꞌaha,
vaꞌora navanavanahaha adani Jesus athi-ra vanaabaꞌiki.
33 Lida sidajia kaikahiha,
binokiha ada Enéias oniki joꞌo abaꞌoronisiagaki.
8 badara ipohini adaharina hojaki ada jorana namania.
Hari.
Pedroa binokiha,
biniꞌaha:
34 —Enéias,
Jesus Cristo ira anaihotaki i.
Gaaꞌa.
Ijorani-ra naibavijahaꞌa.
Gaajorakiꞌaha jahaꞌina.
35 Enéias adahaꞌina-ra vanokiꞌaha adani Lida sidaji kaijaꞌarini,
Sarom sidaji kaijaꞌarini vihiki.
Jahaꞌina vanokivini mani ida vaipohiki Jesus kania vaabono gahinai vanihavini hija.
Pedro Jope sidajia okhaꞌiki
36 Hari.
Oniaroa,
Jope sidajia hojahi ida Jesus vaipohihava abono onini Tabita.
Tabita onini grego athinia Dorcas,
ariathia onini Hotairi.
Tabita bada biniꞌaki ida badani jahaki ipohiki.
Kanahinariki-ra kajoamoravini,
hoariha-ra kakodiavini.
Nimania ida kidibadani hibakhiaki.
37 Hari.
Kavamoniꞌihi ida Tabita,
abiniꞌihi.
Kidivaꞌahia visokohi ida abaꞌoni.
Visokovini naothinia gora kaꞌobani kakanamajakhamakia avavikasiꞌihi.
Vakadihojai oamani ida abaꞌoi sokoani.
38 Lida sidajia asia hojaha ada Pedro.
Lida sidaji kanapajahikhamarihi ida Tabita bivaabiniꞌiki Jope ibavi oniki.
Jesus vaipohihava abonoa vakamithahi ida Pedro varani hina,
Lida sidajia hojana.
Oniania,
Pedro kania vaꞌora vakaronaha adani makhira viꞌbamiki.
Avikhaꞌaha,
Pedro-ra vaniꞌaha:
—Ida abiniꞌihi Tabita.
Haria vahonariavini hiki adani Jesus vaipohihava abono kadania akhana.
Ira vanofivini iokhajorakini vakadiania.
39 Oniaroa,
jorakia ibavijahaꞌaha ada Pedro,
okhaꞌaha vakadiania.
Tabita abaꞌoni kagorani kania vakaikahiꞌaha.
Avavikasiꞌaha ada Pedro gora kaꞌobani kakanamajakhamakia.
Abaꞌoi kania vahojaha adani kaariha vaipohiki vaasaraki.
Oꞌoiha ada Pedro,
kaariha hahavia vanajoraha ada Pedro,
vaniꞌaha:
—Inokiꞌa hida makari,
karahobi hiki.
Tabita kohana binamonahaꞌiki hida akadimoni hini.
40 Pedro vaꞌora honariaꞌaha avikhaonanina.
Bikavahojakosoaꞌihi ida Tabita abaꞌoni.
Kajoꞌatharariꞌaha,
Deu-ra vara niꞌaꞌaha.
Vara nina naothinia roiribaniꞌaha,
abaꞌoi-ra niꞌaha:
—Tabita,
gaaꞌa.
Mara iniꞌihi ida Tabita nokhoni,
Pedro-ra vada niꞌaꞌihi,
gamaꞌihi.
41 Pedroa saꞌani biagathihi,
biakodiaꞌihi,
gamaꞌihi,
gaaꞌihi.
Gaani naothinia Pedro vaꞌora kaboaꞌiha adani Jesus athi-ra vanaabaꞌiki,
kaariha vihiki vikhajakosiꞌianana.
Vikhajakosiꞌaha,
Pedro vaꞌora niꞌaha:
—Vanokiꞌa hida Tabita ahokiꞌiki.