Oniaroa,

Estêvão abiniꞌina naothinia kamaꞌdaꞌihi ida Jesus Cristo kaijaꞌari vajaharihariꞌina Jerusalém sidajia.

Jesu-ra vakajariꞌdaki vaꞌora vanajaharihariꞌaha adani Jesus athi-ra vanaabaꞌiki.

Vaꞌora vanajahariharivini mani ida vaꞌora ai nihaꞌia,

vaꞌora akanahoaraharahanakhamaꞌia.

Ai vihiha,

Judéia kaarabonia avikhaꞌaha.

Samaria kaarabonia avikhaꞌaha adani vahoariha.

Jesus athi avavaadahaoniva abono kaꞌoa vani adani vahojaꞌaha Jerusaléa.

3 Oniaroa,

Sauloa binofiki vaꞌora nihimavini adani Jesus Cristo kaijaꞌari.

Vagorana okhajakosionina ada Saulo,

vaꞌora gathivini,

vaꞌora arahokaonaniꞌaha adani Jesus vaipohihava abono,

makhira,

gamo vihiki-ra vaꞌora osaꞌaha,

vaꞌora obaiꞌaha cadeia.

4 Jesus Cristo kaijaꞌari vajaharihariꞌina mani ida vaꞌora naꞌajihiꞌia.

Ai vihiꞌaha.

Avikhana kabaꞌi ibavi ipohikia vara vavaniꞌaꞌihi ida Jesus varani hina.

5 Hari.

Ajihiꞌaha ada Filipe jaboni.

Samaria sidaji onikia okhaꞌaha.

Jesus vaipohihava abono ada.

Sidaji kaijaꞌarini-ra vaꞌora navaꞌisohivini hiꞌihi ida Cristo varani hina.

6 Ijaꞌari hahavia mitha vaniꞌajahakihi ida Filipe athi.

Vakamithahi ida athi,

vanokihi ida Deus kabadani danoki bada biniꞌaꞌiki.

7 Vahararana vahojaki adani vakabajadiki.

Filipea bihonariavini afohanana ida bajadi ajihiꞌini.

Bajadi bodiꞌbarahahi,

ajihiꞌihi.

Jahaꞌihi ida ijaꞌari afohanana.

Filipe vaꞌora najahaꞌaha adani vajoꞌo abaꞌoronisiagaki,

vatonorohaki vaipohiki-ra vaꞌora anaihotaꞌaha,

8 oniani ida Samaria sidaji kaijaꞌarini-ra vaꞌora khai niꞌaja.

9 Hari.

Filipe kaikahina viahania hojaꞌboꞌdaꞌaha ada Simão.

Arabani ada.

Samaria kaijaꞌarinia vakavaꞌibodivaranikarahoki ida Simão kabadani.

Badani danoki ogava abono hina-ra kahivini ada Simão.

10 Vakamithajahakihi ida athi.

Vaniꞌahahaviꞌaha:

—Deus danona oamani hida hihada makhira bivahojaja — Samaria kaijaꞌarinia vaniꞌabakhiavini.

11 Badara ipohiki arabani kabadani danoki vaꞌora navaꞌibodivaranikarahovini,

oniani ida Simão athi-ra vakamithajahakivini hija.

12 Hari.

Kaikahiha ada Filipe,

vara vaꞌora niꞌaha adani Samaria kaijaꞌarini Jesus monina jahaki kavaranihia.

Vaꞌora niꞌaha:

—Deus vaꞌora vakaꞌdaꞌdiki adani athi naabani vihiki — niha ada Filipe.

Mitha vaniꞌahi,

ni-vakajariꞌdaki ida athi.

Jesus kania vaabono gahinai vanihavini naothinia Filipe vaꞌora kanaꞌaha adani makhira,

gamo vihiki vajariꞌdariki.

Jesus kaijaꞌari karajomini ida kanai.

13 Simão jariꞌdarina mani ida Filipea bikanavini hija jaboni.

Kanana naothinia Simãoa bivaipohihaꞌaha ada Filipe.

Vada biniꞌahi ida Deus kabadani danoki Filipea bada biniꞌaki.

Ijaꞌari vaipohiki-ra vaꞌora anaihotajahakivini mani ida Simão-ra navaꞌibodivaranikarahoja.

14 Oniaroa,

Jerusaléa vahojaha adani Jesus athi avavaadahaoniva abono.

Vakamithahi ida varani Samaria kaijaꞌarini Deus athi-ra vanofivinia,

oniani ida Pedro,

João vihiki-ra vaꞌora vakaronavini hija.

15-16 Samaria kasidajinia vakaikahiꞌaha adani Pedro.

Filipe vaꞌora navaꞌisohiꞌaha adani Pedro,

João vihiki:

—Vaꞌora okanaꞌiki adani Jesus monina-ra vakajariꞌdariki.

Jesus vakadikaꞌdaꞌdi hina-ra vanofiki adani.

Ni-vaꞌora aviꞌonaniꞌiaki kaho ada Maꞌonahai Jahaki — Filipe vaꞌora niꞌaha adani Pedro.

Oniaroa,

Deus kania vakanikhariaha bikaronara kaimoni ada Maꞌonahai Jahaki vikanaꞌiki vakadimoni.

17 Pedro,

João vasaꞌa-ra vakanaibaviꞌaha Samaria kaijaꞌarini vaꞌdaꞌdi aꞌania afohanana,

oniani ida Maꞌonahai Jahaki vaꞌora aviꞌonanivini hiꞌia.

18 Simão vaꞌora nokiha vasaꞌa-ra vakanaibavivini vahoariha vakadiania vaꞌora aviꞌonanira kaimoni ada Maꞌonahai Jahaki.

Binokihi binofiꞌihi ida vakadiꞌogahai bikapavakarivini jiniroa.

19 Simão vaꞌora niꞌaha adani Pedro:

—Onofiki bana ida hora inoꞌavini hini jaboni danona,

osaꞌa-ra okanaibavivini vahoariha vakadiania vaꞌora aviꞌonanira kaimoni ada Maꞌonahai Jahaki.

20 Pedroa biniꞌaha:

—Simão,

Ibavi Jaharikaꞌoakia okhaꞌa.

Iavikhaꞌa ida kadajiniro.

Ni-jahapaꞌitxiki ida Deus kaꞌogahai-ra jiniroa inaabosivini-ra inofivini.

21 Kadaimoni hirihi ida akadibadani.

Ni-jahapaꞌitxiki ida haria iakodiavini.

Deua biogaki ida kadavaꞌibodivarani asohiriki.

22 Iabono kaꞌdaꞌdigariavinihi ida kadavaꞌibodivarani jaharikaꞌoaki.

Deu-ra kanikhariaꞌa mahija kadavarani asohiriki-ra naꞌbiravini.

Akadibadani danoki-ra iakabaivini mani ida ira najaharija.

23 Bariokhana kaarapani fori hiki ida kadaꞌakabajahi jaharini.

Kadavaꞌibodivarani jahariki ira gathiꞌiki i — biniꞌaha.

24 Simão vaꞌora niꞌaha adani Pedro,

João vihiki:

—Onofiriki ida Ibavi Jaharikaꞌoakia ookhana.

Deu-ra kanikhariaꞌa kodimoni bana mahija iniꞌaꞌiki kodiania namitharavini — niha ada Simão.

25 Oniaroa,

Samaria kaarabonia vahojaha adani Pedro vara vavaniꞌahi ida Deus athi.

Samaria kaibavini ipohikia avaadahaonikia vara vavaniꞌahi ida Jesus monina jahaki.

Jerusaléa vajoina vaadahana kabaꞌi vahoariha-ra vakanamoniꞌaha Jesus varani hina.

26 Hari.

Oniaroa,

Filipe asia hojaha Samaria kaarabonia.

Deus ibavi kaijaꞌarini kaikahiꞌaha kidiania,

biniꞌaha:

—Filipe,

ibavijahahaꞌa bana mahija ai ihiꞌavini.

Gaza sidaji kahagihinia okhaꞌa bana.

Hiꞌida hagihi Jerusalém sidaji kamaꞌdaki ida — Filipe-ra niꞌaha ada Deus ibavi kaijaꞌarini.

Vaipohiriki adani ijaꞌari Gaza kahagihinia vaadahaki.

27-28 Hari.

Safini sohirarina akhanoꞌaha ada Filipe hagihia.

Adahana kabaꞌi bikanokiꞌihi ida carruagem.

Carruagea kaadahaha ada kaꞌdaꞌdi kahonai abono.

Etiópia kaaraboni kaijaꞌari ada makhira.

Kidiarabo vakaꞌdaꞌdiva kahonai abono ada.

Gamo ida Etiópia kaaraboni vakaꞌdaꞌdiva Candace oniki.

Kaꞌdaꞌdi kahonai abono kabadani kaꞌoa ida kidiarabo vakaꞌdaꞌdiva kajiniro-ra akadavaꞌavini.

Deu-ra nofijahakiki ada.

Jerusaléa arakhana hiki Deu-ra kanamasivira kaimoni.

Hari.

Filipea bianokiꞌaha ada kaadahaki kajoiꞌina kidiaraboa.

Kaadahana kabaꞌi vada biniꞌahi ida Isaías kohana athi Deus athi kapapirania hojaki.

Deus athi namoniva abono ada Isaías kohana.

29 Oniaroa,

Maꞌonahai Jahakia biniꞌaha ada Filipe:

—Carruagem kania maakariꞌa mahija ikanajoikahihaꞌoadahavini — biniꞌaha.

30 Kiꞌdarahahaꞌaha,

akhanoꞌaha kidiania.

Filipea bikamithaha ada kaadahaki Deus athia athina.

Vara biniꞌahi ida Isaías kohana athi papira hojaki.

Filipea bikamithahi,

binanaꞌdohiha:

—Iogamanija ida papira athini nahina nini vada iniꞌaki?

— niha ada Filipe.

31 —Iniani,

ni-nahina hora kaꞌojomoꞌiki.

Ni-nahina nini oogajahakiki — Filipe-ra niꞌaha.

Kaadahakia bikaboaꞌiꞌaha ada Filipe kidiania kiꞌdamaꞌina,

vithiꞌina.

32 Kiꞌdamana viahania kaadahakia vada biniꞌaki ida Deus athi kapapirani athini pitani:

34 Kaadahakia binanaꞌdohiꞌaha ada Filipe:

—Hora nanamithaꞌa bana.

Hana hina mani ada Isaías kohana vara bivaniꞌara?

Abono-ra vara vaniꞌaki ada Isaías kohana?

Hana hina ada ovari?

35 Filipea biniꞌaha:

—Jesus mani ada Isaías kohana vara bivaniꞌara.

Filipea vara bivaniꞌaꞌimidiaki ida Isaías kohana athi Deus athi kapapirania hojaki.

Naothinia binavaꞌisohivini hihi ida Jesus kavaranihi afohahavi.

36 Vakaadahaha ꞌdako paꞌitxia avakakhanoꞌaha.

Kaꞌdaꞌdi kahonai abonoa biniꞌaha:

—Vada iniꞌa oni hiꞌoni paha.

Nahina hora kaathiririhi hora ikanavini?

37 —Jesu-ra ikajariꞌdarihi,

kidiania iabono gahinai inihahi;

jahaki ida ira okanavini — niha ada Filipe.

—Okajariꞌdariha ada Jesus Cristo Deus kaisai hina — Filipe-ra niꞌaha.

38 Kaꞌdaꞌdi kahonai abonoa bihonariaha ada badani abono carruage-ra kanadaanivini.

Avigariha,

avakiꞌdafafoniꞌaha.

Filipea bikanaha ada makhira.

39 Avigaimoriꞌaha,

Maꞌonahai Jahakia biavikhaꞌaha ada Filipe ibavi hoariha.

Makhira ni-binokijanaki ada Filipe.

Jesu-ra gathanivini mani ida khai niꞌana hija.

Kaꞌajihiꞌianaha.

40 Hari.

Azoto sidaji onikia jorakia hojaꞌaha ada Filipe.

Ajihiha,

sidaji ipohikia aadahaoniꞌaha.

Ijaꞌari ibavini aadahaonina kabaꞌi binamonihi ida Jesus monina jahaki kavaranihi.

Cesaréia sidaji onikia kaikahiꞌaha.