Ijaꞌari vanavaꞌisohiva abono vaviaha hojaki ada Paulo
23
Hari.
Paulo vaꞌora vada niꞌaha adani judeus kaijaꞌari vanasohiva abono vavakaꞌdaꞌdiva vajoroniki,
vaꞌora niꞌaꞌaha:
—Oigamina,
ohokina oadani ni-bada oniꞌaꞌiaki kaho ida ovaꞌi kaabanahahani hora kaabaniki.
Ovaꞌi bodini Deua binokiki ida kodihojai asohiki.
Ni-bada oniꞌaki ida hojai Deua bivajahariki.
2 Sasidotxi vakadikaꞌdaꞌdi vaꞌora niꞌaha adani Paulo maakarina vahojaki:
—Vakapata oni Paulo bodi.
3 Pauloa biniꞌaha ada sasidotxi vakadikaꞌdaꞌdi Ananias oniki:
—Deus athi-ra avanaabavini-ra ikahiꞌbadaraki i.
Deus ira kapataki i bana.
Deus kavaꞌisohihi jiriki hirihi ida ijaꞌari kabadani ogavaharini kabaꞌi kapatahi hini.
Oniaja ivithariki,
iogaja kaimoni ida kodibadani.
Iogaravini kabaꞌi kapatahi ohini-ra ivahonariahiꞌiki i.
Kapatahi ohina-ra ivahonariahivini mani ida Deus kavaꞌisohihi jiriki-ra inaabaravini hija.
Inaabavini ikahivini kabaꞌi,
ni-inaabaꞌiki ida vaꞌisohihi jiriki — niha ada Paulo.
4 Vahoariha Paulo iꞌoaria vahojakia vaniꞌaha:
—Ni-jahaki ida sasidotxi vakadikaꞌdaꞌdi athi-ra ianaabosivini athii jaharikia.
Deus kahonai abono ada — vakhaniha.
5 Paulo vaꞌora niꞌaha:
—Oigamina,
ni-oogaki ada vara niki sasidotxi vakadikaꞌdaꞌdi hina.
Oogaja vaha;
ni-nini vara ovaniꞌaki vaha — niha ada Paulo.
Deus athi kapapirania hojaki ida kaabanahi athini:
“Hariꞌa ijaꞌari vakadikaꞌdaꞌdi athi-ra avanaabosi athii jaharikia.”
6 Hari.
Paulo vaꞌora nokiꞌaha adani judeus kaijaꞌari vanasohiva abono vavakaꞌdaꞌdiva.
Vahararana vahojamaniha adani farisio.
Vahojamaniha jaboni adani sadosio.
Pauloa biogaki ida farisio sadosio khama vaabono avakanaathidanoararikhamavini hiki ijaꞌari kohana ahokini ahokirini kavaranihia,
oniani ida athi ꞌbarakia Paulo vaꞌora niꞌavini hija:
—Oigamina,
farisio mani ho.
Farisio vihiki adani kodiabiꞌi,
kodiꞌarahoda.
Deus ijaꞌari-ra anahokivini-ra okajariꞌdaravini mani ida hida hora avagathivini hija,
hora avanaathidanoararivini hija — niha ada Paulo.
7 Paulo kavarani-ra vakamithaha adani ijaꞌari vanavaꞌisohiva abono,
vaabono vakanapitakhamaꞌaha.
Kamaꞌdaꞌihi ida farisio,
sadosio khama vaabono vaakaihamahikhamaꞌavini.
8 Sadosio vakadivarani hiki ni-hojaki ida Deus ibavi kaijaꞌarini.
Vakadivarani hiki jaboni ijaꞌari abinikaꞌoani,
abinini naothinia khajanarini.
Ni-nahina hojaki,
ni-abonoi hojaki,
ni-maꞌonahai hojaki.
Nimania ida sadosio vakadivarani.
Hoarihaki ida farisio vakadivarani.
Vakajariꞌdarihi ida abonoi hojani,
maꞌonahai hojani,
Deus ibavi kaijaꞌarini hojani.
Nimania ida farisio vakadivarani.
9 Hari.
Vaathi ꞌbarakia vaabono vaakajaꞌoriakhamaꞌaha.
Vigaamananiꞌaha adani judeus kaijaꞌari vakaꞌojomoꞌiva abono,
vaꞌoaniaro farisio vihiki vara vakhanidanokiꞌaha:
—Ni-jaharikia kabadaniki hada makhira.
Deus ibavi kaijaꞌarinia vahabini vara biniꞌaꞌiki ada Paulo.
Maꞌonahaia vahabini vara biniꞌaꞌiki ada.
Ni-aogaki.
Hariꞌa Deu-ra anajaharihariki fori arihiva.
10 Hari.
Vaabono vakavaꞌijokojokokhamakaꞌoaꞌaha adani farisio,
sadosio vihiki khama.
Sorara vakadikaꞌdaꞌdia bifiniki ida Paulo-ra vanaꞌbararaharahavini.
Vaꞌora honariaha adani sorara:
—Paulo vakadiania avikhamiꞌa mahija Paulo-ra avarakavaꞌijoavini.
Agorana avisaꞌiana o Paulo.
11 Hari.
Joma vani Pauloa binokiha ada kidikaꞌdaꞌdi Jesus iꞌoaria gaana.
Jesua biniꞌaꞌaha ada Paulo:
—Paulo,
hariꞌa ofini.
Vaꞌora vara iniꞌavini hiꞌiki hida omonina hihida Jerusaléa.
Roma sidaji maina bana vara ivaniꞌaki hida bana omonina — Jesua biniꞌaha ada Paulo.
Paulo-ra vanaabinivini-ra vanofiki
12 Hari.
Kaꞌafokajomani vajoroniꞌaha adani judeus kaijaꞌari vahoariha.
Vaabono vakanaaminakhamavini hiki Paulo-ra vanaabinivini-ra vanofivini.
Vaniꞌaha ada Deus:
—Deus,
jokoa ira anavaꞌiponiꞌimarinirihi.
Ikamithaki hida ariabono akanaaminakhamavini.
Paulo abinirina oadani jokoa aꞌbairihi,
ni-nahina-ra aꞌaviki jaboni — Deu-ra vaniꞌaꞌaha.
13 Hivaꞌoani vakaabinina-ra vanofiki 40 vihiki vaipohina.
14 Oniaroa,
avikhaꞌaha,
vaꞌora vanavaꞌisohira kaimoni adani sasidotxi vavakaꞌdaꞌdiva,
judeus kaijaꞌari vanavaꞌisohiva abono vihiki.
Vaꞌora vaniꞌaha:
—Paulo-ra anaabiniravini oadani jokoa aꞌbairihi,
ni-nahina-ra aꞌaviki.
Ni-Deu-ra anavaꞌiponiꞌimariniki bana ada.
Anaabinimaniki bana ada Paulo.
15 Sorara vakadikaꞌdaꞌdi vakadiania avaathini-ra vakarona bana mahija Paulo-ra vavikhavini avakadiania.
Vakorijanaha bana ada sorara vakadikaꞌdaꞌdi.
Vaniꞌa bana:
“Ikarona bana ada Paulo
akadijaꞌari vanasohiva abono vavakaꞌdaꞌdiva vakadiania afoꞌiana mahija
vara nina vakamithajahakivini.”
Vaniꞌa bana.
Hari.
Jokoa kaikahiriha ada hida.
Khana kabaꞌi vani anaabiniki bana ada — vakhaniha adani vakaabinina-ra vanofiki.
16 Oniaroa,
Paulo kabihadia bikamithahi ida varani Paulo-ra vanaabinivini-ra vanofivini.
Sorara vagorana okhaha,
okhajakosiha,
Paulo-ra kanamoniꞌaha.
17 Paulo-ra kanamonivini naothinia Pauloa bibaranahaha ada sorara,
hiꞌada vaꞌora honariafiahaki adani 100 vihiki vaipohina.
Pauloa biniꞌaha:
—Iosami bana hada hihada imakhinava avakadikaꞌdaꞌdi kania mahija omonina-ra vara vaniꞌaꞌavini — niha ada Paulo.
18 Sorara bigathiha ada Paulo kabihadi,
biosamiꞌaha kidikaꞌdaꞌdi kania.
Biniꞌaha:
—Hiꞌada Paulo cadeia kabodinia hojaki hora baranahaki.
Hora honariavini ovikhavini kadania hada imakhinava.
Binofiki vara ira niꞌavini — biniꞌaha.
19 Sorara vakadikaꞌdaꞌdia biagathihi ida imakhinava saꞌa,
biavikhamipaꞌitxiꞌaha,
vahoariha vakamitharia kaimoni ida vakadivarani.
Binanaꞌdohiꞌaha:
—Nahina mani ida hora inanamithavini hini inofija bana?
20 —Hiꞌadani judeus kaijaꞌari vavakaꞌdaꞌdiva vaabono vakanaaminakhamavini,
ira vakanikhariavini bana Paulo-ra avarisaja kaimoni judeus kaijaꞌari vanasohiva abono vavakaꞌdaꞌdiva vakadiania.
Ira vaniꞌaki bana adani:
“Paulo kabadani,
kidivarani hiki
aogajahakivini anofiki.”
Nimania bana ida ira vakorijanahavini athini.
21 Hariꞌa bana ikamitha ida vaathi.
40 makhira vaipohina avahojaki hagihi vadinia Paulo-ra vanokhavini.
Deu-ra vaniꞌaꞌiki adani 40 vihiki vaipohina:
“Paulo-ra anaabiniravini
oadani jokoa aꞌbairihi,
ni-nahina-ra aꞌaviki
jaboni.”
Deu-ra vaniꞌamaniꞌara adani.
Hiꞌadani 40 vihiki vaipohina vanokhaki ida iathini-ra ikaronavini — niha ada imakhinava.
22 Sorara vakadikaꞌdaꞌdia bigathaniꞌihi ida imakhinava athi:
—Hariꞌa bana hoariha-ra nanamitha hora inavaꞌisohivini hiꞌikia.
Oniaroa,
bihonariaꞌaha ada imakhinava ajihiꞌina.
Félika kania Paulo-ra karonaki ada
23 Hari.
Oniaroa,
sorara vakadikaꞌdaꞌdi vaꞌora baranahaꞌaha adani sorara viꞌbamiki.
100 vihiki vaipohina-ra vaꞌora vahonariafiahaki adani afoꞌbamakhama.
Vaꞌora niꞌaha:
—Vaꞌora vahonaria adani 200 sorara vaipohina vakatarasaraki vaibavijahana.
Vaꞌora vahonaria adani jaboni 70 sorara vaipohina vaibavijahana cavaloa vaadahaki kaimoni.
Vaꞌora vahonaria jaboni adani 200 vaipohina vakasaꞌaiki vaibavijahana.
Hihida joma ꞌboꞌdahiꞌdahini ai vihira kaimoni adani sorara.
Onofiki Paulo-ra avarisavini Cesaréia sidajia.
24 Vaꞌora vanaibavijaha bana adani cavalo viꞌbamiki Paulo vaꞌora vaadahaki kaimoni.
Paulo-ra avakadavaꞌajahaki bana,
arabo vakaꞌdaꞌdiva Félika oniki kania avisaꞌa — vaꞌora niꞌaha adani sorara viꞌbamiki.
25 Vaꞌora honariavini naothinia sorara vakadikaꞌdaꞌdia binajirihi ida athi avavikhaki kaimoni.
Papira athinia biniꞌaha:
26 —Papira jirini-ra namonahaki onina Cláudio Lísias.
Félika,
ivaniti.
Ivani akadiarabo vakaꞌdaꞌdiva jahaki i.
27 Okaronavini hiki hida oathi kapapirani ira onavaꞌisohivini hiki ida Paulo varani hina.
Judeus kaijaꞌaria vagathiꞌiki ada Paulo,
vanaabinikamariꞌiki ada.
Hoariha hora navaꞌisohivini Roma sidaji kaijaꞌari hina,
oniani ida Paulo-ra aakavaꞌijoavini hija,
kodisorara khama.
28 Oogavini onofiki ida Paulo-ra avanaathidanoararivini nahina hini,
oniani ida judeus kaijaꞌari vanasohiva abono vavakaꞌdaꞌdiva vaviaha Paulo-ra aavikhavini hija.
29 Okamithaꞌiki ida Paulo-ra avanaathidanoararivini,
oniani ida badani asohiriki-ra bada niꞌaravini aogavini hija.
Ni-jahaki ida cadeia hojana ovahonariahivini.
Ni-jahaki ida abinina ovahonariahivini jaboni.
Ni-bikajoniki ida Roma sidaji kakaꞌdaꞌdini kavaꞌisohihi.
Judeus kaijaꞌari vakadivaꞌisohihi jiriki vani ida Pauloa bikajonivini vakahija vakadijaꞌari vanavaꞌisohiva abonoa.
30 Hari.
Hoariha hora kanamonivini hiki ida judeus kaijaꞌari vakadivarani,
Paulo-ra vanaabinivini-ra vanofivini,
oniani ida kadania Paulo-ra okaronavini hija.
Vaꞌora onavaꞌisohiꞌiki adani Paulo-ra avanaathidanoarariꞌiki kadania avikhana,
vakadivarani ikamithaja kaimoni.
Hari ida vani oamani kodivarani vara ira oniꞌavini hiꞌiki.
31 Oniaroa,
sorara vanaabaꞌihi ida vakadikaꞌdaꞌdi athi.
Paulo-ra avanikhaꞌaha.
Joma vania ai vavanihaꞌaha,
Antipátride sidajia avavikhaꞌaha.
32 Kaꞌafokajomani avajoiꞌaha adani sorara vaadahaki vagorana Jerusaléa hojakia.
Sorara vaacavalokia avisaꞌaha ada Paulo.
33 Cesaréia sidajia avavikhaha,
avavakhanoꞌaha.
Arabo vakaꞌdaꞌdiva-ra vanoꞌaꞌaha papira jirikia,
Paulo-ra avarakhaꞌaha jaboni kidiania.
34 Arabo vakaꞌdaꞌdiva vada biniꞌahi ida papira jirini athini,
Paulo-ra nanaꞌdohiꞌaha:
—Hana hini arabo kaijaꞌarini mani i?
—Cilícia kaaraboni kaijaꞌarini mani ho — niha ada Paulo.
35 —Vakaikahiki bana adani ira avanaathidanoarariki,
avakadivarani-ra okamithaki bana ho.
Oniaroa,
vaꞌora honariaha adani sorara Paulo-ra avakadavaꞌavini.
Vanahojahaꞌaha ada Paulo gora karahoa.
Iroji kohana gorana ida bivahojaꞌia.