Paulo-ra avanaathidanoarariki adani judeus kaijaꞌari
24
Hari.
5 mahi ipohini radahani naothinia sasidotxi vakadikaꞌdaꞌdi okhaꞌaha Cesaréia sidajia.
Ananias oniki ada.
Anania-ra vavaipohihaha adani ijaꞌari vanavaꞌisohiva abono.
Vakadiania jaboni okhaki ada Tértulo.
Tértuloa biogajahakiki ida ijaꞌari vavakaꞌdaꞌdiva vakadihonari jiriki.
Tértulo kabadani ida ijaꞌari akaathidanoarari athini-ra vara vaniꞌavini vaꞌora nasohikia bikamithaja kaimoni.
Hari.
Cesaréia vakaikahijabanaꞌaha,
arabo kaꞌdaꞌdini Félika oniki kania avikhaꞌaha,
Paulo-ra avanaathidanoarariꞌaha.
2 Félika bivahonariahiki ada Paulo anikhaꞌahi hiꞌina.
Paulo kaikahina naothinia Félika bihonariaha ada Tértulo Paulo-ra anaathidanoararivini.
Tértulo Félika-ra niꞌaha
—Ivaniti.
Ivani akadiarabo kakaꞌdaꞌdini jahaki i.
Iogajahakiki ida akadiarabo kaijaꞌarini-ra ihonariabakhiavini,
oniani ida badara ipohiki ariabono akavajahamisikhamavini hija,
ni-arabo hoariha kaijaꞌarini haria vidajanaki.
Ivani iakadavaꞌajahakiki ida akadiarabo kaijaꞌarini.
Haria ihonariavini oadani,
ni-nahina-ra akainamoki,
ni-makhaniki ida akadimahi akadiaraboa.
3 Khai haria niꞌabakhiaꞌiki ida agahinana hiꞌiki isaꞌani kabodinia.
Ibavi ipohiki kaijaꞌarini-ra vaꞌora ikajoamorabakhiavini mani ida khai haria niꞌaꞌia.
4 Onofirihi ida kodivarani oadakia kadabadani-ra onadabavini.
Mitha iniꞌa bana hida kodivarani paꞌitxi asohiki.
5 Hiꞌo makhira,
Paulo oniki,
ijaꞌari vaipohiki-ra vaꞌora anaihamahioniki o.
Ni-jahapaꞌitxiki.
Arabo ipohikia adahaꞌimajanina vaꞌora anaihamahionibakhiaꞌiki adani judeus kaijaꞌari kidiꞌojomoꞌihi kavaranihia.
Vaꞌora vakaꞌdaꞌdiki adani Jesus vaipohihava abono.
Nazaré sidajia avijavaki ada Jesus.
6 Pauloa bivakaajiriki ida Deu-ra khai aniꞌavini kagorani Jerusaléa hojaki.
Gora bodinia Paulo vaꞌora avikhajakosiꞌiki adani judeus kaijaꞌari vihiriki,
oniani ida Paulo Deu-ra khai aniꞌavini kagorani-ra najaharivini hiꞌia.
Oniani ida Paulo-ra agathivini hiꞌia.
Anofiki ida Paulo-ra vanokiꞌiki vakadivarani-ra akamithavini aogaja kaimoni ida kaꞌoa hini avanaathidanoararivini.
Akadijaꞌari avikhananavaki vakadihonari Pauloa bikajoniki;
jaharikia aarakhaki bana ada.
Ni-akamithaki ida Paulo-ra avanaathidanoararivini.
7 Khaꞌaha ada sorara vakadikaꞌdaꞌdi,
Lísias oniki,
vaꞌora honariaha adani kidisorara Paulo-ra visaarivini akadiania.
8 Lísias vaꞌora honariaꞌiki adani Paulo-ra avanaathidanoarariki kadania avikhara kaimoni.
Namithaꞌikia Paulo-ra inanaꞌdohihi;
akadivarani asohini-ra iogahi — niha ada Tértulo.
9 Judeus kaijaꞌari vahojakia vaniꞌaha ada Félika:
—Kaꞌoa hini ida Tértulo Paulo-ra anaathidanoararivini kavaranihi — vakhaniha.
Pauloa bigathaniki ida avanaathidanoararivini
10 Hari.
Oniaroa,
arabo vakaꞌdaꞌdiva saꞌa bihonariaha ada Paulo maina vara nina.
Pauloa biniꞌamaniha:
—Félika,
ivaniti.
Badara ipohiki judeus kaijaꞌari nasohiva abono i,
oniani ida oabono ovajariꞌdavini athini ikamithavini khai hora niꞌaja,
iogaja kaimoni ida asohirini hora vakanavaranihavini.
11 Vaꞌora inanaꞌdohiha;
ira vanavaꞌisohiha mahi ipohiriki Jerusaléa ohojaꞌina.
12 mahi ipohini ohojaꞌiki ho okaikahiꞌina Jerusaléa Deu-ra okanamasivivini.
12 Ni-judeus kaijaꞌari hora vakaragaki ijaꞌari-ra onaihamahivini kodivarania Deu-ra khai aniꞌavini kagorani kavasiribanini bodinia.
Ni-vaꞌora obaranahaki adani ijaꞌari vaipohiki vajoronina judeus kaijaꞌari Deu-ra vara aniꞌavini kagorani,
sidaji kaibavini hoariha hikia,
ni-vaꞌora onaihamahiki kodivarania.
13 Ni-bada oniꞌaꞌiki ida hora avanaathidanoararivini hiꞌiki.
Ni-ijaꞌari hora vanokiꞌiki Deu-ra khai aniꞌavini kagorania akadijaꞌari hiriki-ra vaꞌora oaviꞌoivini.
Ni-vaꞌora oaviꞌoiki.
14 Ira onanamithavini hiki Jesus vaipohihava abono ohina.
Jesus kaijaꞌari kahojai asohirini-ra vakahivini adani hora avanaathidanoarariꞌiki,
kabaꞌi akadijaꞌari avikhananavaki vakadiDeu-ra okanamasivibakhiahi Jesus fori ohina.
Okajariꞌdarihi ida Deus kavaꞌisohihi Moisés kohana binajiriꞌiki.
Deus athi namoniva abono kohana vakadipapira jirini-ra okajariꞌdarihi jaboni.
15 Deus ijaꞌari abiniꞌiki-ra anahokivini kamahini-ra vanokhaki adani judeus kaijaꞌari.
Hovani jaboni onokhaki ida mahi.
Okajariꞌdarihi ida Deus ijaꞌari hahavi-ra anahokivini.
Hojai jahakia kabadaniki bianahokiki,
hojai jaharikia kabadaniki bianahokiki jaboni,
16 oniani ida hojai asohiriki-ra onofiravini hija.
Kodihojai-ra vada vaniꞌahahaꞌoadahaꞌiki adani Deus,
ijaꞌari khama,
onofiki ida hojai jahaki-ra vanokivini.
17 Pauloa asia vara biniꞌaha ada Félika:
—Hari.
Badara ipohikia Jerusaléa ohojajanarina,
oniaroa oajoiꞌianahi.
Oajoiꞌina oavikhaꞌihi ida jiniro judeus kaijaꞌari vahoariha-ra vaꞌora onoꞌavini kaimoni.
Ovikhaki ida jaboni Deu-ra okanavaꞌigavini kaimoni.
18 Deu-ra khai aniꞌavini kagorani kavasiribaninia hora rakhaki bada oniꞌaja kaimoni ida ira oniꞌavini hiꞌiki.
Oabono onajahaꞌiki ho akadijaꞌari kahojai fori hikia.
Vaipohiriki adani ijaꞌari kodiania vahojaꞌiki.
Ni-ijaꞌari-ra onaihamahiki.
Ni-saa akhaniki.
Hari.
Deu-ra khai aniꞌavini kagorani kavasiribanini bodinia vahojaha adani judeus kaijaꞌari Ásia kaarabonia avakhanoꞌiki.
Kodibadani aꞌdiahiꞌini hora vanokiꞌaha.
19 Hiꞌadani hora vanokiꞌiki Deu-ra khai aniꞌavini kagorani kavasiribanini bodinia ni-vikhaꞌiki hida.
Vaꞌoaniani vikhana jahara adani vakaikahina iviahania,
hora avanaathidanoararira kaimoni.
20 Hihadani akadiania vahojaki hidakabaꞌi vakamithaꞌiki ida kodivarani judeus kaijaꞌari vanasohiva abono vavakaꞌdaꞌdiva vajoroniꞌiki-ra vaꞌora vara oniꞌaꞌavini Jerusaléa.
Ira vanavaꞌisohiva kodibadani vavajahariki vakaragakia.
21 Hoaranija vahabini odioniꞌiki ida varani vavajahariki.
Vaviaha ogaana ohojaꞌina athi ꞌbarakia oniꞌiki ho:
“Deus ijaꞌari-ra anahokivini-ra okajariꞌdaravini
mani ida hida hora
avagathivini hija,
hora avanaathidanoararivini hija jaboni.”
Vaꞌora oniꞌaꞌaha.
22 Hari.
Jesu-ra nofiravini kabaꞌi ada Félika,
biogajahakihi ida Jesus varani hina,
Jesus vaipohihava abono vakadihojai hiki.
Biananokhomiꞌihi ida vakadivarani,
vaꞌora niꞌaha:
—Sorara vakadikaꞌdaꞌdi Lísias oniki kaikahina,
onasohiki bana ida avakadivarani — vaꞌora niꞌaha ada Félika.
23 Bihonariaha ada sorara Paulo-ra akadavaꞌaki:
—Gora karahoa iobaiꞌiana o Paulo.
Sorara biakadavaꞌavini kabaꞌi jakaho adahava gora bodinia.
Vaꞌora vaꞌaha bana adani kidivaꞌahi Paulo-ra vakaijahitavini — niha ada Félika.
Félika-ra vara niꞌaha ada Paulo
24 Hari.
Oniaroa,
mahi hoariha vakaikahiꞌianaha adani Félika,
kidigamo khama.
Kidigamo onini Drusila.
Judeus anani ida Félika kagamo.
Félika bihonariaha ada sorara Paulo-ra anikhavini.
Binofiki ida Paulo vara nina-ra kamithaꞌianavini.
Paulo kavarani hiki ida Cristo-ra kajariꞌdariki athi naabani hini.
25 Niha ada Paulo:
—Deus haria honariavini hojai jahakia akahojaina.
Ijaꞌaria binofivini kabaꞌi ida badani Deua bivajahariki,
ni-bada biniꞌaꞌiki,
vaꞌini kaabanahahamanihi.
Khaki bana ida mahi ijaꞌari hahavi vakadihojai-ra naabosivini kamahini.
Deua bihonariaki bana ida athi naabani hiriki imai ꞌbanani karaho-ra kamithavini.
Deus athi-ra kapoarikia bigathaniki bana ida kidihojai jahaki abosini Deus kania — niha ada Paulo.
Hari.
Paulo athi-ra kamithaꞌaha,
imai ꞌbanani karaho kavaranihi-ra finimaniꞌaha ada Félika,
biniꞌaha:
—Ba ajihiꞌa.
Badani hoariha-ra ovahojaravini kamahini ira obaranahaꞌianaki bana i,
kadavarani-ra okamithaꞌianaja kaimoni — niha ada Félika.
26 Félika binokhahi ida jiniro Paulo ajihina abosini kaimoni.
Ni-Pauloa binoꞌaki jiniroa.
Jiniro-ra nokhavini mani ida Félika Paulo-ra baranahabakhiavini hija vara vakhanira kaimoni.
27 Radahaꞌihi ida badara ꞌbamiki,
asia mani gathana hojaha ada Paulo.
Félika binofiki ida judeus kaijaꞌari-ra khai vaꞌora niꞌavini,
oniani ida Paulo-ra nahojahavini hija cadeia kabodinia.
Félika ajihiꞌina naothinia ajaꞌdiꞌina ada arabo kakaꞌdaꞌdini Pórcio Festo onikia.
Hojajanarina kabaꞌi ada Félika,
asia hojaha ada Paulo cadeia.