Paulo abono-ra kanikhariaꞌiki arabo ipohiki kakaꞌdaꞌdini kania okhana
25
Hari.
Oniaroa,
Cesaréia sidaji kaarabonia kaikahiꞌaha ada arabo kakaꞌdaꞌdini ajaꞌdina Festo oniki.
Mahi ahoarabakosiki hojana naothinia okhaꞌaha Jerusaléa.
2 Sasidotxi vavakaꞌdaꞌdiva,
judeus kaijaꞌari vavakaꞌdaꞌdiva khama vara vaniꞌaha ada Festo.
Vakadivarani hiki Paulo kidibadani asohiriki-ra namonahavini.
Festo-ra vakanikhariaꞌaha:
3 —Festo,
haria kajoamora bana.
Anofiki ada Paulo ivahonariahivini hihida Jerusaléa joina — vaniꞌaha ada Festo.
Vaabono vakanaaminakhamaꞌiki adani Paulo-ra vanaabinivini-ra vanofiki hagihia khana kabaꞌi.
4 Festo vaꞌora niꞌaha:
—Iniani.
Gathaki ada Paulo asia Cesaréia sidajia.
Mahi ꞌbamiki ohojaki ho hida naothinia Cesaréia oajoiki ho.
5 Aꞌonivani judeus kaijaꞌari vavakaꞌdaꞌdiva hora vavaipohihaꞌa bana mahija Cesaréia sidajia Paulo-ra avaranaathidanoararivini-ra okamithavini.
Jaharina vani avakahiha ada Paulo.
Ni-oogaꞌiaki ida badani asohiriki-ra bada niꞌavini — vaꞌora niꞌaha ada Festo.
6 Asia mahi 10 hiki ipohini hojaha ada Festo vakadiania Jerusaléa.
Ajihiꞌaha,
ajoiꞌaha Cesaréia sidajia.
Kaꞌafokajomani ijaꞌari vakadiꞌaathidanoararahi ibavinia okhaꞌaha ada Festo.
Vithiꞌaha,
bivahonariahiꞌaha ada Paulo anikhaꞌahi hijakosiꞌina.
7 Kaikahiꞌaha ada Paulo Festo vakadiania.
Paulo iꞌoaria vahojaꞌaha adani Jerusaléa vikhaꞌiki,
Paulo-ra avanaathidanoarariꞌaha.
Paulo kabadani asohirini arafiani-ra vakahiꞌaha.
Paulo-ra avanaathidanoarariꞌahapikivini kabaꞌi,
ni-vanasohivini avigaki ida vakadivarani,
ni-nahina binokiꞌiki ida Pauloa bada biniꞌavini vakahiki,
ni-vaꞌora avikhajakosiki adani judeus kaijaꞌari vihiriki judeus kaijaꞌari Deu-ra khai vaniꞌavini kagorani bodinia.
8 Oniaroa,
Paulo abono-ra vajariꞌdaꞌaha:
—Ni-asohiki hida hora vakanavaranihavini hiki.
Ni-okajoniki ida Deus kavaꞌisohihi Moisés kohana binajiriꞌiki.
Ni-Deu-ra khai aniꞌavini kagorani-ra ovakaajiriki.
Ni-okajoniki ida arabo ipohiki kakaꞌdaꞌdini kavaꞌisohihi-ra onaabavini — niha ada Paulo.
9 Hari.
Festoa binofiki ida judeus kaijaꞌari khai vakhanina,
oniania biniꞌaha ada Paulo:
—Paulo,
Jerusaléa iokhani-ra koda inofiria?
Avakadivarani-ra okamithaꞌianavini-ra onofiꞌianaki ho Jerusaléa.
Naothinia onasohiki bana ida avakadivarani — niha ada Festo.
10 Pauloa bigathanihi:
—Iniani.
Ivani arabo ipohiki kakaꞌdaꞌdini César oniki kahonai abono i.
Ivani akadivarani nasohiva abono i.
Jahaki ida hihida arihojana oadani akadivarani-ra inasohivini.
Ni-hoaranija badani jaharikia okabadaniki judeus kaijaꞌari vakadiania.
Iogajahakiki ida kaꞌoa hini oathi.
11 Arabo kakaꞌdaꞌdini kahonari-ra okajonija vaha;
ni-hora avanaabinivini-ra ovamakhaniki vaha.
Badani jaharikaꞌoaki arafiaki-ra bada oniꞌaja vaha;
oabinina jahamanihi vaha.
Ni-kaꞌoa hiki ida vakadivarani.
Ni-jahaki ida vakadiania hora iarakhavini.
Oniaroa,
oabono okanikhariavini hiki César kania Roma sidajia hora ikaronavini — niha ada Paulo.
12 Hari.
Vaabono vakanaaminakhamaꞌimidiaꞌaha adani Festo,
kidivaꞌisohihi abono khama.
Festoa biniꞌaha ada Paulo:
—César kania iokhani-ra ikanikhariavini mani ida bana kidiania ira arakhavini hija.
Festoa vara biniꞌaha ada Agripa
13 Hari.
Oniaroa,
radahaꞌihi ida semana ꞌbamiki.
Cesaréia sidajia vakaikahiꞌaha adani Agripa,
kidigamo khama.
Arabo hoariha kakaꞌdaꞌdini ada Agripa oniki.
Kidigamo onini Berenice.
Cesaréia avikhaꞌaha,
Festo-ra vakaꞌivanitivini hiki kidiania vavaaꞌahahana.
14 Mahi hoariha Festoa vara bivaniꞌaꞌihi ida Paulo varani hina.
Arabo kakaꞌdaꞌdini-ra niꞌaha:
—Agripa,
hojaki ada makhira gathaki kodiania.
Ajihiha ada Félika,
Paulo-ra nahojahaꞌaha.
15 Jerusaléa ookhaꞌiki ho,
vara hora vaniꞌaꞌiki adani sasidotxi vavakaꞌdaꞌdiva,
ijaꞌari vanavaꞌisohiva abono vihiki khama.
Paulo-ra avanaathidanoarariꞌahapikivini hiki hora vakanikhariavini Paulo abinina-ra ovahonariahivinia.
16 Ogathanihi ida vaathi:
“Roma sidaji kaijaꞌarini kahojai hirihi ida ijaꞌari abinini-ra ovahonariahivini,
oogaravini oadani ida kidibadani asohini asohirini.
Gathakia bikamithaꞌimidiava ida vakadiꞌaathidanoarari.
Bikamithavini naothinia
gathaki maina abono-ra
vajariꞌdaha.
Vakadivarani hahavi
okamithavini naothinia
onasohiꞌihi.
Nimania ida arihojana.”
Vaꞌora oniꞌavini hiꞌiki.
17 Hari.
Okaikahina vani hida,
vakaikahiꞌaha adani jaboni Paulo-ra avanaathidanoarariꞌiki.
Ni-okajoniki ida vakadivarani okamithavini.
Kaꞌafokajomani ijaꞌari akaathidanoarari ibavinia ovithiꞌihi.
Ohonariaha ada kodisorara Paulo-ra anikhavini.
18 Vigaamananiꞌaha adani Paulo-ra avanaathidanoarariki.
Badani asohiriki arafiaki-ra bada niꞌaki ovanihavini ada Paulo.
Ni-nini okamithaki ida vakadivarani.
19 Judeus kaijaꞌari kahojai Pauloa bikajonivini vakahiki.
Vara vavaniꞌaꞌaha ada makhira hoariha Jesus oniki.
Abiniꞌina vakahiha ada Jesus.
Pauloa ahokina vani bikahiꞌaha ada Jesus.
20 Hari.
Ni-oogaꞌiki ida vakadivarani onasohivini.
Onofiꞌiki oogajahakivini ida vakadivarani,
oniani ida Paulo-ra onanaꞌdohivini hija:
“Paulo,
inofimania koda ida Jerusaléa iokhani?
Okamithajahakivini onofiki ida avakadivarani naothinia onasohiꞌihi.”
“Iniani.
Onofiki hora ikaronavini arabo ipohiki kakaꞌdaꞌdini kania
Roma sidajia,
ovaria binasohija kaimoni hida akadivarani.
Hora ikaronaravini oadani onofiki hida ogathana ohojana.”
Hora niꞌaha ada Paulo.
Oniaroa sorara-ra vaꞌora ohonariaꞌihi:
“Roma sidajia okaronaravini oadani
iakadavaꞌa bana hada Paulo.”
— Festoa biniꞌaha ada Agripa.
22 Oniaroa Agripa biniꞌaꞌaha ada Festo:
—Hovani,
okamithavini bana onofiki ida Paulo kavarani — niha ada Agripa.
Festoa bigathaniꞌihi ida athi:
—Afokajoma ikamithaki bana ida kidivarani.
23 Kaꞌafokajomani vakaikahiꞌaha adani Agripa,
kidigamo Berenice oniki khama.
Vakaimahaki ida makari jâhaki,
kâidivaki.
Vahoariha vanaꞌithovini hiki ida vakadiꞌithohi vaꞌora vakaꞌivanitivini.
Kaꞌdaꞌdi gorana karahoa vakaikahiha,
avikhajakosiꞌaha.
Avikhajakosiki jaboni adani sorara vavakaꞌdaꞌdiva,
sidaji vavakaꞌdaꞌdiva vihiki.
Hari.
Festo Paulo anikhana-ra vahonariahiꞌaha.
24 Festo vaꞌora vara niꞌaha adani Agripa,
vahoariha vajoroniki vakadiania:
—Ivaniti,
arabo kakaꞌdaꞌdini Agripa.
Ijaꞌari hahavi akadiania vajoroniki,
aꞌonivaniti.
Vada vaniꞌa o hiꞌo makhira Pauloa oniki.
Judeus kaijaꞌari vaipohiki vara hora vaniꞌavini hiꞌiki ida Paulo kahojai jahariki.
Jerusaléa ohojaꞌina hora vanavaꞌisohiꞌiki adani.
Hihida Cesaréia sidajia jaboni hora vanavaꞌisohivini hiha adani judeus kaijaꞌari Paulo-ra vakanavaranihavini.
“Ivahonariahiꞌa abinina.”
Hora vaniꞌabakhiaha.
25 Hari.
Okamithaꞌiki ida vakadivarani,
onakoꞌdiꞌiki ida nahina asohiriki bada biniꞌaꞌiki,
abinina ovahonariahira kaimoni.
Ni-nahina asohiriki-ra okaragaki kidiania.
Paulo hora kanikhariavini Roma sidaji kakaꞌdaꞌdini kania okaronavini,
oniani ida okaronavini hija bana.
26 Paulo-ra okaronavini kamahini okaronaki jaboni bana ida oathi jiriki,
Césa-ra onavaꞌisohivini hiki ida Paulo kabadani.
Ni-oogaꞌiaki kaho ida Paulo varani hina onamonahaki kaimoni papira onajirivini.
Agripa,
Paulo-ra ovikhaꞌiki ho hida avakadiania,
avakamithaja kaimoni hida kidivarani.
Agripa,
onofiki ida Paulo-ra inanaꞌdohivini kidibadania,
oniani ida papira athini-ra onamonahavini-ra oogavini hija bana.
27 Ni-jahapaꞌitxiki ida papira jiriki-ra onamonaharavini oadani Paulo-ra okaronavini.
Onofiki ida Césa-ra onavaꞌisohijahakivini vakadiꞌaathidanoararia — Agripa-ra niꞌaha ada Festo.