—Deus kaisai hina-ra kahiꞌbadaraki ada Jesus.

Jahaki ida abinina bana.

—Ivani judeus kaijaꞌari vakadikaꞌdaꞌdi mani i?

—Haꞌa,

kaꞌoa oamani ida iniꞌaki — Jesua biniꞌaha.

3 Sasidotxi vavakaꞌdaꞌdiva Jesu-ra avanaathidanoarariꞌiki Pilatos kania.

4 Pilatoa binanaꞌdohiꞌianaha ada Jesus:

—Jokoa igathaniria oni vaathi?

Ikamitharia ida ira avanaathidanoarariꞌahapikivini athini?

5 Ni-Jesua bigathaniꞌiki ida Pilatos athi.

Pilatoa bikavaꞌibodivaranikarahoꞌihi ida Jesua athi bigathaniravini.

6 Hari.

Páscoa ihinika kamahini Pilatoa bivaꞌahaki ada makhira hoarana cadeia kabodinia hojaki ajihina,

aihotara kaimoni.

Ihinika-ra vanamonahakia vanagathogathoꞌiki ada makhira hana hina cadeia okhaonanina vanofivini.

Pilatos hojana hiki ida makhira-ra arakhaonanivini.

7 Hari.

Hojaki ada Barrabás cadeia kabodinia.

Kaabiniki ada.

Barrabás kidipohi khama vaꞌora vidaha adani arabo kakaꞌdaꞌdini kahonai abono,

kidisorara vihiki.

Sorara vani vaꞌora vagathiha adani Barrabás,

vaꞌora avibaiꞌaha cadeia kabodinia.

8 Oniaroa,

Pilatos kania vajoroniꞌaha adani ijaꞌari vâipohiki.

Pilato-ra vaniꞌaha:

—Kadahojai ida makhira hoarana-ra iarakhavini akadiania,

cadeia kabodinia hojaki.

Anofiki ada hoarana-ra iarakhaonanivini — vaniꞌaha.

9 Vaꞌora niꞌaha ada Pilatos:

—Jesus judeus kaijaꞌari vakaꞌdaꞌdiva-ra avanaoniki-ra oarakhaonanivini-ra avanofimania koda bana?

10 Pilatos abono-ra niꞌavini:

—Ijaꞌari vaipohikia vavajahaki ada Jesus.

Jesu-ra avakabaiki adani sasidotxi vavakaꞌdaꞌdiva.

Vakadiꞌakabajahi oamani ida Jesu-ra avarakhavini hija kodiania — abono-ra niꞌaha ada Pilatos.

11 Sasidotxi vavakaꞌdaꞌdiva vaꞌora vara vaniꞌabakhiaki afodanoki adani ijaꞌari vaipohiki Barrabás arakhana-ra vakanikhariavini.

Oniania,

vanaabaꞌihi ida sasidotxi vavakaꞌdaꞌdiva vakadihonari.

12 Pilatos kanaꞌdohi-ra vagathaniꞌaha adani ijaꞌari vaipohiki:

—Iniani.

Anofiriha ada Jesus.

Anofiki bana ada Barrabás.

Oniaroa,

vaꞌora nanaꞌdohiꞌianaha ada Pilatos:

—Niha oniꞌaꞌaki koda ada Jesus,

judeus kaijaꞌari vakadikaꞌdaꞌdi avanaoniki?

13 Bodiꞌbarahia vaniꞌaha:

—Ivahonariahiꞌa akaꞌitapoamisahanaꞌina o Jesus,

ava akasanakhamakia abinira kaimoni — Pilato-ra vaniꞌaha.

14 Pilatos vaꞌora nanaꞌdohiꞌaha:

—Nahina kaimoni mani ida Jesu-ra ovahonariahivini hija abinina?

Nahina mani ida kidibadani jahariki hija?

— vaꞌora nanaꞌdohiꞌaha ada Pilatos.

Bodiꞌbarahi vaniꞌaha:

—Ivahonariahi bana ava akasanakhamakia akaꞌitapoamisahanaꞌina.

15 Oniania,

Pilatoa bivahonariahiꞌaha ada Barrabás arakhana,

khai vakhanira kaimoni adani ijaꞌari vaipohiki.

Pilatos sorara-ra vaꞌora honariavini Jesu-ra vidafiahavini xikotxia.

Jaꞌdi sajoki vaꞌa ipohikia ahoki ida xikotxi oniki.

Pilatos kasorara vidafiahavini naothinia,

Pilatoa bivahonariahiha ada Jesus akaꞌitapoamisahanana ava akasanakhamakia abinira kaimoni.

16 Hari.

Avakaꞌitapoamisahanavini viahania,

sorara vania avavikhamiha ada Jesus ibavi hoariha Pilatos gorana bodinia.

Avavikhamiha,

vaꞌora vakaboaꞌiha adani sorara vaipohiki vajoronira kaimoni,

Jesu-ra avigarahara kaimoni.

17 Vaaniꞌihi ida kidikarahobi.

Avanaragarahivini hihi ida karahobi nadaraki.

Vakanamonahahi ida kajamari kajaroki.

Kaꞌdaꞌdia avakaragariꞌihi.

Vakadikaꞌdaꞌdi hina vakahiꞌbadaraꞌaha.

18 Jesu-ra vaniꞌahahaviha:

—Ivani judeus kaijaꞌari vakadikaꞌdaꞌdi i — vaniꞌabakhiaha.

19 Kaꞌdaꞌdi vakodafiaha ava.

Jesu-ra vakaiꞌbaiꞌaha.

Jesus viaha vakajoꞌatharariꞌaha,

vakanamasiviꞌbadaravini.

20 Oniaroa,

avigarahaꞌavini naothinia,

vaaniꞌihi ida karahobi nadaraki,

Jesu-ra vakanakarahobiꞌianara kaimoni kidikarahobia.

Oniaroa,

ai vavanihaꞌaha,

ava akasanakhamakia avakaꞌitapoamisahanara kaimoni ada Jesus.

21 Hari.

Ai vavanihaꞌaha.

Avikhana kabaꞌi,

vakaragarariꞌaha ada Simão.

Cirene sidaji kaijaꞌarini ada Simão.

Kidisai viꞌbamiki,

hoarana Alexandre oniki,

hoariha Rufo oniki.

Amasi kania khaki ada Simão.

Hari.

Sorara Simão-ra vanokiha,

vahonariaꞌaha:

—Ivani,

Jesu-ra kakaibaꞌahi hihida ava akasanakhamakia — sorara vaniꞌaha ada Simão.

22 Hari.

Bikaibaꞌiꞌihi ida ava akasanakhamaki.

Oniaroa,

Gólgota ibavi onikia Jesu-ra avisaꞌaha adani sorara.

Gólgota ibavi oniki ariathia kaꞌdaꞌdi kajaroni kaibavini ida.

Vakaikahiꞌaha.

23 Sorara Jesu-ra vanoꞌavini hini vanofihi ida vinho miha kabodiki,

imana ꞌbanani fai inija kaimoni.

Binofiravini mani ida bigathaniravini hija.

24 Hari.

Ava akasanakhamakia Jesu-ra avakaꞌitapoamisahanaꞌaha adani sorara.

Varagaamananivini ida ava akasanakhamaki nami khorahaki bodinia.

Hari hiꞌihi ida vakadibadani.

Oniaroa,

vakosonakhamaki ida jaꞌdi pitani jiriki,

avigaja kaimoni ida kidimakari ravinaꞌihi.

25 Safini namahikajomana vani Jesu-ra avakaꞌitapoamisahanaꞌaha.

26 Hari.

Jesus kaꞌdaꞌdi kanamania avakakaꞌitapoamisiꞌihi ida tábua kajiriki rajomi kaimoni,

ijaꞌaria avigaja kaimoni ida nahina kaimoni Jesu-ra vanaabinivini.

Vanajirivini athini:

Jesu-ra avanaathidanoararivini hiki judeus kaijaꞌari vakadikaꞌdaꞌdi hina-ra kahivini.

27 Hari.

Sorara vani vaꞌora vavikhaha adani daiki-ra avanahoroabakhiaki viꞌbamiki.

Vaꞌora avakaꞌitapoamisahanaꞌaha jaboni.

Vanaibaviꞌaha ada hoarana Jesus pitana aniaja,

vanaibaviꞌaha ada hoariha Jesus pitana kajasonija.

28 Deus athi kapapirania hojaꞌiki ida Cristo varani hina:

Oniani ida Jesu-ra vakanabadanihavini hija badani jaharikia.

Namithaꞌiki kidiania ida Deus athi kapapirania biniꞌaꞌiki.

29 Hari.

Ijaꞌari varadahaꞌaha avigarahaꞌaha ada Jesus.

Jesu-ra vakaihimoravini oamani ida varani niki-ra vara vavaniꞌavini hija.

Onii jaharikia Jesu-ra vaniꞌaha:

—Deu-ra khai aniꞌavini kagorani-ra inathararavini-ra ikahiki i,

mahi ahoarabakosikia ianajaꞌdivini ikahiki i.

30 Iabono akavaꞌijoa.

Iabono aniꞌa ava akasanakhamakia — Jesu-ra vaniꞌaha.

31 Jesu-ra avigarahaꞌaha jaboni adani sasidotxi vavakaꞌdaꞌdiva,

judeus kaijaꞌari vakaꞌojomoꞌiva abono khama.

Vaabono vakaniꞌakhamaꞌaha:

—Jesus vaꞌora akavaꞌijoaꞌiki adani vahoariha.

Ni-abono-ra maha akavaꞌijoavini-ra kaabokaꞌiki.

32 Jesu-ra vaniꞌaha:

—Deus ira nagathogathovini-ra ikahiki i.

Ivani Cristo,

akadijaꞌari vakadikaꞌdaꞌdi ihidorohi,

iabono aniꞌa ava akasanakhamakia.

Igarini-ra anokihi;

ni-ira akajariꞌdaki — vaniꞌaha.

Hiꞌadani viꞌbamiki avakaꞌitapoamisahanakia avigarahaki jaboni ada Jesus.

33 Hari.

Safini sohirarina vani bakibakini kamaꞌdaꞌihi ida arabo afohahavi.

Safini ajorana vani avagani kamaꞌdaꞌianahi.

34 Safini ajorana vani bodiꞌbarahaꞌaha ada Jesus athia:

—Eloí,

Eloí,

lemá sabactani?

— niha ada Jesus athia.

35 Ijaꞌari vahojakia vakamithahi ida kidibodiꞌbarai,

vakhaniha:

—Mitha vaniꞌa.

Elias kohana-ra baranahaki ada — vakhaniha.

Elias kohana-ra baranahaki vavanihaki ada Jesus.

36 Kiꞌdarahaꞌaha ida ijaꞌari athi-ra kamithaki,

bianathoranihi ida makari fori hiki vinho kaidivarikia.

Ava oadaki sanarahakia binahojaꞌihi.

Bivikhahi,

Jesus viaha biarakasihi,

Jesua binadomidomija kaimoni ida vinho aꞌbani.

Ava akasanakhamaki kania ijaꞌari-ra vaꞌora niꞌaha ada vinho-ra vikhaki:

—Hariꞌa kaho.

Ada kaho vahabini khaha Elias,

ava akasanakhamakia biakavaꞌijoara kaimoni ada Jesus.

Vada aniꞌava.

37 Oniaroa,

bodiꞌbaraꞌianaha ada Jesus,

abiniꞌaha.

38 Hari.

Abinina kabaꞌi ꞌbiraꞌihi ida makari katokihi Deu-ra khai vaniꞌavini kagorani kaꞌoahafianihiki.

Makaria bikatapafiaki ida gora pitani Ibavi Katokini Jahakaꞌoaki oniki ijaꞌari oꞌoiria kaimoni.

Khiorarini akapitakhamaꞌihi.

39 Oniaroa,

Jesus abaꞌona naboꞌani viahania hojaha ada sorara kakaꞌdaꞌdi.

Jesus bodiꞌbarana-ra kamithaha,

Jesus abinina-ra nokiꞌaha,

biniꞌaha:

—Deus kaisai oamani hada hihada makhira.

40-41 Hari,

vahojamaniha adani gamo ava akasanakhamaki kania.

Abinina vanokivini napaja paꞌitxia.

Galiléia kaarabonia Jesus hojana kari Jesu-ra vavaipohihabakhiaꞌiki adani Maria Madalena,

Salomé,

Maria hoariha vihiki.

José,

Tiago vihiki vakadiamia ida Maria hoariha.

Kajoꞌojahiki ada Tiago.

Gamo vani vaꞌora vakoꞌbaihaꞌara adani,

vaꞌora vakaijahitaꞌara adani Jesus,

ipohina khama.

Ai vihiha adani Jesus Galiléia kaarabonia,

ai vihiꞌiki jaboni adani gamo avahoarabakosiki,

gamo vahoariha khama.

42-43 Hari.

Avakoirina kamahini viahani vani abiniꞌara ada Jesus.

Ihinika koꞌbaini amonahani kamahini vani abiniꞌara ada.

Jesus abiniꞌina-ra ogaꞌaha ada José de Arimatéia.

Ijaꞌari navaꞌisohiva abono ada José de Arimatéia.

Jahana vani vakahiha ada José.

Joséa binokhaꞌiki ida mahi Deus ijaꞌari hahavi-ra vaꞌora vakaꞌdaꞌdivini.

Hari.

Pilatos kania okhaꞌaha,

Pilato-ra finivini kabaꞌi biniꞌaha:

—Pilatos,

ivaꞌaha bana ida Jesus abaꞌona-ra oanivini ava akasanakhamaki kania,

okaꞌdamahaja kaimoni?

44 Pilatoa bikavaꞌibodivaraniꞌiki ida Jesus abinijorakiꞌina monini.

Bivahonariahiꞌaha ada sorara vakadikaꞌdaꞌdi anikhaꞌahi hina.

Khanoꞌaha ada sorara,

Pilatoa binanaꞌdohiꞌaha:

—Ada abinimaniꞌaha Jesus?

—Haꞌa,

ada abiniꞌaha — niha ada sorara.

45 Pilatoa biniꞌaha ada José:

—Haꞌa.

Ba ianiha ida Jesus abaꞌona.

46 Oniaroa,

Joséa bikapavakarihi ida makari vaforiki jahaki.

Ava akasanakhamaki kania biavikhaꞌihi.

Bianikhaꞌihi ida Jesus abaꞌona,

bikarafoaꞌihi makaria.

Kaꞌdamahi ibavinia biavikhaꞌihi.

Jaꞌdi hodijamaꞌoki bodinia biobaihaꞌihi ida Jesus abaꞌona.

Vakadihojai hiki.

Hari.

Jesus abaꞌona-ra obaivini naothinia,

vakaꞌoahaꞌihi ida jaꞌdi hodini kaathani,

jaꞌdi karahoa.

Ajihiꞌaha ada José.

47 Kidibadani Maria Madalena,

Maria hoariha khama vada vaniꞌaki.

Abaꞌoi biaviꞌoiki ibavini-ra vanokiꞌiki adani gamo.

Tiago,

José vihiki vakadiamia ida Maria hoariha.