Ahokiꞌiki ada Jesus
16
Hari.
Avakoirina kamahini naothinia,
misai fori hiki-ra vakapavakariꞌaha adani Maria Madalena,
Salomé,
Maria hoariha vihiki.
Hiꞌida Maria hoariha Tiago vakadiamia ida.
Jesus abaꞌona-ra vakavamisaihara kaimoni misai fori hikia.
Vahojana oamani ida abaꞌoi-ra vakavamisaihavini.
2 Kaꞌafokajomani domingo vani mahi avagani kamaꞌdani abaꞌoi kaꞌdamahani ibavini kani-ra avanikhahaꞌaha.
Safini anadaranimananikajomana vani avakhanoꞌaha jaꞌdi hodijamaꞌoki kania.
3-4 Avakhanorina oadani vaabono vakananaꞌdohikhamaꞌaha:
—Nahina vania koda bianiki ida jaꞌdi hodijamaꞌoki katapani akadimoni?
Avakhanona,
vada vakhaniha,
vanokiꞌihi ida jaꞌdi hodini kaathani katapajanarini.
Aniaꞌiki ida jaꞌdi.
Kâraho oamani ida jaꞌdi.
5 Jaꞌdi hodijamaꞌoki bodinia aviꞌoiꞌaha,
vanokiꞌaha ada imakhinava Deua bikaronaꞌiki hodi kaꞌaniajania vithina.
Bikaimahaki makari vaforiki,
oadaki.
Vanokiha,
vaimahidaꞌaha.
6 Imakhinava vaꞌora niꞌaha:
—Hariꞌa vaimahida!
Oogaki ida Jesus ava akasanakhamakia akaꞌitapoamisahanaki-ra avanakoꞌdihavini.
Ni-hida hojajanariha ada.
Ada ahokiꞌaha.
Vada vaniꞌajakosi hida abaꞌona bivahojaꞌiki ibavini — vaꞌora niꞌaha.
Vada avaniꞌajakosihi ida abaꞌona hojani ibavini.
7 Vara niꞌianaha ada imakhinava:
—Ai vihiꞌa!
Pedro Jesus ipohina vahoariha-ra vaꞌora vanavaꞌisohihaꞌa:
“Ada ahokiꞌaha Jesus.
Galiléia kaarabonia aꞌonira
naviahanokhaki bana ada.
Idiaja avanokiki bana ada.
Onivani fori hija ida
kidivarani
aꞌonira niꞌajoravini hiꞌiki.”
Vaꞌora vaniꞌa bana — niha ada imakhinava.
8 Oniaroa,
kaꞌdamahi ibavinia vikhaonaniꞌaha.
Avigaꞌina,
vakiꞌdarahahaꞌaha.
Vaimahidaꞌaha,
ni-vahoariha-ra vara vaniꞌaꞌiki hagihia,
vaofinina.
Ahokina naothinia abono-ra nanokiaꞌiki ada Jesus
9 Hari.
Domingo vagavagani vani ahokiꞌaha ada Jesus.
Oniaroa,
Maria Madalena miroꞌa kania abono-ra nanokiaha ada Jesus.
ꞌBoꞌdakari kabajadiki ida Maria Madalena.
7 bajadi vaipohina Jesus vaꞌora honariaꞌiki avakaraꞌoꞌina kidiania,
ni-kabajadijanaki.
Hari.
Maria miroꞌa binokiꞌaha ada Jesus ahokiꞌina naothinia.
10 Ajihiꞌihi,
Jesus ipohina vakadiania okhaꞌihi.
Vavaꞌi mokara niꞌani hiki Jesu-ra vakaasaravini.
Kaikahiꞌihi ida Maria,
vaꞌora niꞌahi:
—Hariꞌa vaasarajana!
Ada ahokiꞌaha Jesus.
11 Mitha vaniꞌahi ida Maria kavarani,
Jesus ahokina kavaranini.
Vakajariꞌdamaniꞌihi.
Ipohina viꞌbamiki vakadiania abono-ra nanokiaꞌiki ada Jesus
12 Hari.
Oniaroa,
amasia avikharimananiꞌaha adani viꞌbamiki.
Vakadiania abono-ra nanokiaꞌaha ada Jesus.
Jesu-ra vanokiꞌaha,
ni-ovari nokiana fori hijanaki.
13 Avajoiha adani viꞌbamiki,
vara vavaniꞌaꞌaha ada Jesus,
ipohina vahoariha vakadiania.
Vakadivarani vakajariꞌdamaniha.
Kidipohi vahoariha vakadiania abono-ra nanokiaꞌianaki ada Jesus
14 Hari.
Oniaroa,
kidipohi 11 vihiki vakadiania abono-ra nanokiaꞌaha ada Jesus.
Vakoꞌbaikosoana kabaꞌi abono-ra nanokiaha.
Jesus vaꞌora kaabanivini hiki ida ahokina kavaranihi vakajariꞌdavini.
Vaꞌora niꞌaha:
—Jahariꞌoamanija ida avakadijariꞌdi.
Hora vanokiha adani vahoariha.
Aꞌonira vananamithaꞌiki jaboni ida oahokina,
kabaꞌi avakajariꞌdahi — vaꞌora niꞌaha ada Jesus.
15 Hari.
Oniaroa,
vaꞌora honariavini adani ipohina:
—Arabo hahavia avikhaꞌa bana!
Ijaꞌari hahavi-ra vara vaꞌora vaniꞌa bana omonina jahakia.
16 Vaꞌora ohonariaki adani hora vakajariꞌdariki vikanana,
oniani ida vaꞌora oakavaꞌijoavini hija bana.
Vaꞌora onavaꞌisohivini hiki adani hora vakajariꞌdaki vakadihojai asohiriki abosini-ra vagathanivini bana — vaꞌora niꞌaha ada Jesus.
17 Jesus vaꞌora navaꞌisohiki adani kidipohi:
—Hora vakajariꞌdarikia vakaabokaki jaboni ida kodibadani danoki.
Hora vakajariꞌdarikia vakaabokaki ida bajadi akaraꞌoni-ra vahonariavini.
Vaniꞌavini:
“Bajadi,
Jesus ira
honariavini,
akaraꞌoꞌa bana.”
Hora vakajariꞌdarikia vakaabokaki bana ida athii ogavaharikia vaathina.
18 Hora vakajariꞌdarikia vakaabokaki ida makha-ra vagathivini,
vaꞌora ananiha ni-ꞌbanaki.
Hora vakajariꞌdariki veneno-ra viꞌaviha,
ni-vamakhaniki.
Hora vakajariꞌdariki ijaꞌari vakavamoniki-ra vaꞌora vakaabadaha,
avaihotaha — vaꞌora niꞌaha ada Jesus.
Deus kania okasiꞌiki ada Jesus
19 Hari.
Jesus kavarani anokhomini naothinia,
Deua bigathaniꞌaha ada Jesus.
Deus pitana kaꞌaniajania vithiꞌaha,
kaꞌdaꞌdi hiꞌina.
20 Oniaroa,
ai vihiꞌaha adani Jesus ipohina.
Ibavi hahavia vara vavaniꞌaꞌihi ida Jesus monina.
Vakadikaꞌdaꞌdi ada Jesus,
oniani ida vaꞌora kakodiavini hija.
Badani danoki-ra vakaabokavini hiki,
Jesus vaꞌora kakodiavini.
Jesus kabadani danoki-ra vanokiki adani vahoariha oniania,
vakhanihaꞌaha:
—Kaꞌoa oamani ida Jesus monina vara haria vaniꞌavini hiki.
Hari ida vani oamani Marcos kavarani anokhomiꞌini.