Ahokiꞌiki ada Jesus
28
Hari.
Avakoirina kamahini naothinia,
domingo vani,
mahi avagani kamaꞌdani avikhaꞌianaha adani Maria Madalena,
Maria hoariha khama abaꞌoi kaꞌdamahani kania vavanavanahaꞌaha.
2 Hari.
Jorakia hoꞌdohoꞌdodanokiꞌihi ida arabo.
Deus ibavi kaijaꞌarini gaariꞌaha nama.
Jesus kaꞌdamahana kania akhanorariꞌaha.
Bianiꞌihi ida jaꞌdi,
jaꞌdi hodi jamaꞌoki kaꞌoahajanaria kaimoni.
Bianivini naothinia,
vithiꞌaha jaꞌdi namania.
3 Bahi kabanabanahi nokiana fori hiki ida Deus ibavi kaijaꞌarini nokiana.
Vaforini arafiaki ida kidimakari.
4 ꞌDama kania vahojaki jaboni adani sorara.
Vaimahidakarahoꞌaha,
oniani ida vaꞌora nathararaja varaiꞌaꞌina,
vaabiniki fori vihiki adani.
5 Oniaroa,
ꞌdama kania avakhanoꞌaha adani gamo.
Gamo-ra vaꞌora niꞌaha ada Deus ibavi kaijaꞌarini:
—Hariꞌa vaimahida!
Oogaki ida Jesus ava akasanakhamakia akaꞌitapoamisahanaki-ra avanakoꞌdihavini.
6 Ni-hida hojajanariha ada.
Ada ahokiꞌaha.
Nimania ida abinina viahania aꞌonira navaꞌisohijoravini hiꞌiki.
Vada vaniꞌajakosi hida abaꞌona hojani ibavini — vaꞌora niꞌaha.
7 Vara niꞌaꞌianaha ada Deus ibavi kaijaꞌarini:
—Ai vihiꞌa mahija Jesus ipohina-ra vaꞌora avanavaꞌisohihavini,
vaꞌora vaniꞌa bana:
“Ada ahokiꞌaha Jesus.
Galiléia kaarabonia aꞌonira naviahanokhaki bana ada.
Idiaja avanokiki bana ada.
Onivani fori hija ida kidivarani aꞌonira niꞌajoravini hiki.”
Vaꞌora vaniꞌa bana — Deus ibavi kaijaꞌarini vaꞌora niꞌaha adani gamo.
8 Hari.
Kaꞌdamahi ibavinia jorakia vaꞌajihiꞌaha adani gamo.
Vaimahidakarahona kabaꞌi khai vakhanikarahoꞌaha jaboni.
Vakiꞌdarahahaꞌaha Jesus ipohina vakadiania vaꞌora vananamithavini hija kaimoni ida vanokiꞌiki,
vakamithaꞌiki hiki.
9 Oniaroa,
jorakia gamo vakadiania abono-ra nanokiaha ada Jesus.
Biniꞌaha:
—Deus aꞌonira noꞌaki aꞌoni vaꞌi jahajahania!
Jesu-ra vanamaakariꞌaha,
ꞌdama vakajaraꞌbaꞌbaꞌaha,
Jesu-ra vakanamasiviꞌaha.
10 Oniaroa,
vaꞌora niꞌaha ada Jesus:
—Hariꞌa vaofini!
Kodipohi kania avikhaꞌa bana.
Vaꞌora vanavaꞌisohi bana:
Galiléia kaarabonia avikhaꞌa bana,
idiaja oabono onanokiaki ho avakadiania.
Sorara vara vavaniꞌaki ida vanokiꞌiki
11 Hari.
Ai vihiꞌaha adani gamo.
Hagihia avikhana kabaꞌi,
ai vihiꞌaha adani ꞌdama-ra avakadavaꞌaki vaipohiriki.
Sidajia avajoiꞌina sasidotxi vavakaꞌdaꞌdiva vakadiania avikhaꞌaha,
vaꞌora vananamithavini hiꞌihi ida vanokiꞌiki ꞌdama kania.
12 Oniaroa,
sasidotxi vavakaꞌdaꞌdiva vaꞌora vakaboaꞌiꞌaha adani judeus kaijaꞌari vanavaꞌisohiva abono vajoronina.
Vaabono vakanavaꞌisohikhamaꞌaha:
—Vaꞌora anoꞌaki bana adani sorara jiniro karahoa vananamithajanaria kaimoni ida vanokiꞌiki vahoariha vakadiania — vakhaniha.
13 Oniaroa,
vaꞌora vaniꞌaha adani sorara:
—Aꞌonira anoꞌavini hiki hida jiniro karaho Jesus monina-ra vara avavaniꞌajanaravini abosini.
Vahoariha vakadiania vaniꞌa bana:
“Joma vania avadina kabaꞌi,
vikhaꞌaha adani Jesus
ipohina,
abaꞌoi-ra vaboꞌdiahaꞌaha.”
Vaniꞌa bana.
14 Pilatoa vahabini bikamithaki bana ida varani avihini,
haria nanaꞌdohivini hiki ida avavadini varani hini.
Pilato-ra anaariakaki bana hari avakadimoni,
jaharikia aꞌonira arakharara kaimoni — sorara-ra vaniꞌaha adani sasidotxi vavakaꞌdaꞌdiva.
15 Hari.
Sorara vagathaniꞌihi ida jiniro,
sasidotxi vavakaꞌdaꞌdiva vaathi-ra vanaabaꞌaha,
ni-vara vavaniꞌaꞌiki ida vanokiꞌiki.
Vara vavaniꞌaꞌihi ida sasidotxi vavakaꞌdaꞌdiva vaꞌora vahonariavini hiki.
Judeus kaijaꞌari vaipohikia vakamithaꞌihi ida sorara vakadikorijanahi.
Asia mani judeus kaijaꞌari vaipohiki vakadikorijanahi-ra vakajariꞌdariha.
Kidipohi vakadiania abono-ra nanokiaꞌiki ada Jesus
16 Hari.
Galiléia kaarabonia avikhaꞌaha adani Jesus ipohina 11 vihiki.
Arabo namahiki Jesua bivavaꞌisohihijoraki kania avikhaꞌaha.
17 Avakhanoꞌaha,
Jesu-ra vanokiꞌaha,
vakanamasiviꞌaha.
Vahoariha vanokivini kabaꞌi vavaꞌi kosakhamani hini.
18 Hari.
Jesus vaꞌora anamaakariꞌaha,
vaꞌora niꞌaꞌaha:
—Ogathaniki ida ogahai danoki hahavi ovakaꞌdaꞌdija kaimoni ida hahavi namajaja hojaki,
arabo hojaki jaboni.
Okaabokaki ida hahavi onofiki.
19 Oniani ida arabo hahavi kaijaꞌarini vaibavia avarikhani-ra ohonariavini hija.
Vara vavaniꞌa bana hida omonina mahija oathi-ra vanaabavini,
oipohina vihira kaimoni.
Vaꞌora vikana bana adani kodiania vaabono gahinai vanihaki.
Vaꞌora avikanavini kamahini vidioni bana ida Deus akadiabiꞌi onina,
vidioni jaboni hida oonina,
Deus kaisai ohina,
vidioni jaboni ida Maꞌonahai Jahaki onina mahija Deus kaijaꞌari vihina.
20 Vaꞌora vakaꞌojomoꞌivinihi bana hida kodihonari hahavi-ra vanaabavini.
Vakavaꞌihokihaꞌoadahaha bana ida avakadiania ohojana mahi hahavi.
Mahi anokhomirini oadani ohojahahaꞌoadahaki bana ho avakadiania — vaꞌora niꞌaha ada Jesus.
Hari ida vani oamani Mateus kavarani anokhomiꞌini.