—Kodiabiꞌi,

ida kaikahiꞌihi vara oabono ovaniꞌavini hiki.

Kadaisai ohina mani ida hora ianahokivini hija bana.

Inanokia bana ida ojahana,

odanona,

ovagana hiki mahija ijahani,

idanoni,

ivagani hiki-ra onanokiavini jaboni.

2 Hora ihonariavini hiꞌiki ida ijaꞌari hahavi-ra vaꞌora ovakaꞌdaꞌdivini,

osaꞌa kabodinia vahojaꞌiki adani.

Hora inoꞌavini vihiki jaboni adani ijaꞌari kodipohi vihira kaimoni,

vaꞌora oakadavaꞌara kaimoni.

Mahi jaꞌdini anokhomirikia vaꞌora onoꞌara kaimoni adani vaꞌora oakadavaꞌaꞌiki.

3 Ijaꞌari kamahi ajaꞌdiki haria vakaijokaꞌikia biogaki ida kaꞌoa ihini,

Deus hoarana ihini.

Ni-hojaki ada Deus hoariha.

Biogaki jaboni ida hora ikaronaꞌavini,

Cristo ohina,

ijaꞌari hahavi vakadikaꞌdaꞌdi ohija kaimoni.

Nimania ida biogaki,

haria vakaijokavini,

oniani ida mahi ajaꞌdiki-ra vahojavini hija.

4 Ijaꞌari-ra vaꞌora onanokiahivini hiꞌiki ida ijahani,

idanoni hidiaja araboja.

Ida onaꞌdiahiꞌihi badani hora ihonariavini hiꞌiki.

5 Kodiabiꞌi,

arabo amonahani viahania ohojaꞌiki ho kadania.

Iibavinia ohojana kari jahani arafiaki ida ojahana,

odanona,

ovagana hiki.

Kadania ohojaꞌianaki bana ho.

Ivaꞌaha bana ida ojahana,

odanona,

ovagana hiki-ra ovahojaꞌianavini.

6 Ijaꞌari hahavi vahararana vahojaki adani ijaꞌari hora inoꞌavini vihiꞌiki,

vaꞌora oakadavaꞌara kaimoni.

Vaꞌora inamonahaꞌiki adani,

hora inoꞌavini vihiꞌiki adani,

kodijaꞌari vihira kaimoni.

Vaꞌora oanigahiꞌiki adani,

niha iniꞌinini ira avigara kaimoni.

Iathini-ra vanaabaꞌiki adani.

7 Hari.

Avigaki ida kodibadani,

kodivarani hiki oabono ohonariaravini.

Avigaki ida hahavi hora inoꞌavini hiꞌiki kadania khani.

8 Vaꞌora onanamithavini hiꞌiki ida iathini hora inavaꞌisohivini hiꞌiki.

Vakapoariꞌiki ida iathini.

Avigaki ida kadania okhana kavaranihi kaꞌoa hini.

Vakajariꞌdarihi ida hora ikaronaꞌavini.

9 Ni-okanikhariaki ida ira vanofiriki vakadimoni.

Vara ira oniꞌavini hiki vaꞌora ikajoamorara kaimoni adani vaꞌora oakadavaꞌaꞌiki.

Vaꞌora kajoamora bana adani kodipohi hora inoꞌavini vihiꞌiki.

Kadaijaꞌari vihina mani ida ira okanikhariavini hija vakadimoni.

10 Kadaijaꞌari hahavi adani oipohina.

Kodiani hahavi adani kadaijaꞌari.

Kodihojai jahakia vakahojaina mani ida ojahana,

odanona,

ovagana hiki-ra vananokiavini hija.

11 Kadania ookhaki bana ho.

Ni-ijaꞌari vakadiania ohojajanarihi bana.

Kodipohi vani adani vahojaronira bana ijaꞌari ira vanofiriki vakadiania.

Kodiabiꞌi,

ivani ijahakaꞌoaki i.

Ionini kaꞌoa vani ida danoja.

Hora inoꞌavini hiꞌiki ida ionini danoki.

Vaꞌora akadavaꞌa bana adani oipohina idanonia ijaꞌari hoarani fori vihira kaimoni.

Hovani,

ivani ijaꞌari hoarani fori arihiki hari.

Onofiki ida harifori vihina,

ijaꞌari hoarani fori vihira kaimoni.

12 Vakadiania ohojana oadani vaꞌora oakadavaꞌahahaꞌoadahaki adani ionini danoki hora inoꞌavini hiꞌikia.

Vaꞌora oakadavaꞌavini oadani kodiania akamadaki ada hoarana kaꞌoa.

Iathini kapapirania vara bivaniꞌajoraꞌiki ada ovari.

Ibavi Jaharikaꞌoakia okhana mani ida bana kodiania anakamadana hija,

oniani ida ivavaꞌisohihijoravini nanamithani hija kidiania.

13 Hari.

Ivahojaki kania ookhaꞌianaki bana ho.

Ijaꞌari vakadiania ohojana oadani,

vara ovaniꞌaꞌiki hida oathi,

hihavija kaimoni ida kodikhaiini oipohina vavaꞌi bodinia.

14 Kodiabiꞌi,

vaꞌora onanamithaꞌiki adani oipohina kadavarania,

hofori vihira kaimoni,

oniani ida ira vanofiriki vaꞌora vakaimajaharavini hija.

Oipohina vakadivaꞌibodivarani fori hirihi ida ira vanofiriki vakadivaꞌibodivarani,

oniani ida oipohina-ra vaꞌora vakaimajaharavini hija.

Onivani fori ohija jaboni.

Ni-kodivaꞌibodivarani vakadivaꞌibodivarani fori hiki.

15 Kodiabiꞌi,

ni-ira okanikhariavini hiki ida vaꞌora ianivini ira vanofiriki vahararana.

Ira okanikhariavini hiki ida vaꞌora iakadavaꞌavini Jahari vaꞌora namakhanirara kaimoni.

16 Kodivaꞌibodivarani fori hirihi ida ira vanofiriki vakadivaꞌibodivarani.

Onivani fori vihira adani oipohina,

vakadivaꞌibodivarani fori hirihi jaboni ida ira vanofiriki vakadivaꞌibodivarani.

17 Kaꞌoa hiki ida kadavarani hahavi.

Vaꞌora anigahi bana mahija kadaijaꞌari kaꞌoa vaꞌora inihavini,

oniani ida hojai inofikia vaꞌora kanahojaija.

18 Kodiabiꞌi,

hora ikaronaꞌiki ho ira avigariki vakadiania ookhana.

Onivani fori vihira adani oipohina,

vaꞌora okaronavini ira avigariki vakadiania avikhana.

19 Oabono gahinai onihaꞌiki ho kadania nahina inofikia okabadanija kaimoni,

vaꞌora oakavaꞌijoara kaimoni.

Onofiki ida kadania oipohina vaabono gahinai vanihavini jaboni,

oniani ida oabono gahinai onihakaꞌoavini hiꞌia.

20 Kodiabiꞌi,

ira okanikhariavini hiki vaꞌora ikajoamorara kaimoni adani oipohina.

Oipohina omonina-ra vara avavaniꞌaoniki bana vahoariha vakadiania.

Vaꞌora kajoamora bana adani jaboni omonina-ra vakajariꞌdariki.

21 Kodiabiꞌi,

ira okanikhariavini hiki hiꞌadani vajariꞌdariki hahavi ijaꞌari hoarani fori vihira kaimoni.

Kodiania iakaramisiki i,

kadania oakaramisiki ho jaboni.

Onivani fori vihina vaꞌora onofira adani akadiania avakaramisiꞌiki adani,

ijaꞌari hahavia vakajariꞌdaria kaimoni ida hora ikaronaꞌavini.

22 Ijahani,

idanoni hikia hora inoꞌaꞌavini vani vaꞌora onoꞌaꞌara adani jaboni ijaꞌari hoarani fori vihira kaimoni.

Onofiki ida harifori vihina ijaꞌari hoarani fori vihina.

23 Vakadiania oakaramisiki ho,

kodiania iakaramisiki i jaboni,

vaabono vakanakaramisikhamajahakira kaimoni,

ijaꞌari hahavia avigaꞌia kaimoni ida hora ikaronaꞌavini,

avigaja kaimoni jaboni ida vaꞌora inakaidivavini hora inakaidivavini vani fori hini.

24 Kodiabiꞌi,

hora inoꞌavini vihiꞌiki adani oipohina.

Onofiki ida kadania ohojana,

oipohina vahojana jaboni bana kodiania,

vanokija kaimoni ida ovagana,

ojahana,

odanona hiki.

Hahavi amonahani viahania hora inakaidivaki i,

oniani ida ovagana,

ojahana,

odanona hikia hora inoꞌavini hiꞌia.

25 Kodiabiꞌi,

ivani ijaꞌari nasohiva abono jahaki i.

Ijaꞌari ira vanofiriki ni-ira avigaki,

hovani kaꞌoa ira oogaki ho.

Oipohina avigaki ida hora ikaronaꞌavini.

26 Vaꞌora oanigahiꞌaha kadahojai niha nininia,

avigaja kaimoni ida hoariha-ra avanakaidivavini,

hora inakaidivavini vani fori hini,

vakadiania oakaramisija kaimoni — kidiabiꞌi-ra niꞌaha ada Jesus.