—Aꞌonira onavaꞌisohijoravini hiki hida varani avakavaꞌipahiniria kaimoni ida hora avavakaijokavini.

2 Aꞌonira bana avakakojaonaniki bana adani hora vanofiriki Deu-ra vara aniꞌavini kagorani bodinia avajoijanaria kaimoni.

Khaki bana ida mahi ijaꞌari aꞌonira vanaabinivini-ra vanofivini kamahini.

Badani Deua binofikia vakabadaniki vaabono vavanihavini mani ida aꞌonira vanaabinivini hija bana.

3 Ijaꞌari hora avigariki,

ni-kodiabiꞌi-ra avigaki jaboni,

oniani ida aꞌonira vanapohimajavini hija bana.

4 Aꞌonira onavaꞌisohijoravini hiki ida namithaki kaimoni avakadiania,

oniani ida,

namithani kamahini,

kodivarani-ra avakavaꞌihokivini hija bana.

Hari.

Oniaroa,

asia vara niha ada Jesus:

—Hora avavaipohihabiininivini ni-aꞌonira onavaꞌisohijoravini hiki ida avajahariharini kavaranihi.

Avakadiania ohojahahaꞌoadahana mani ida aꞌonira onavaꞌisohiravini hija.

5 Naothinia ookhaki bana ho hora karonaꞌiki kania.

Ni-hora avananaꞌdohivini hiki ida hana ookhana.

6 Kodivarania aꞌonira onavaꞌisohijoravini mani ida avavaꞌini-ra mokara niꞌaꞌia.

Hariꞌa bana avavaꞌini soko iniva.

7 Kaꞌoa hiki hida oathi.

Jahaki bana ida oakaraꞌona avakadiania.

Ni-jahaki ida ohojahaꞌoadahana avakadiania.

Ai ohirihi;

ni-khaki ada Maꞌonahai Jahaki.

Ai ohihi;

khaki bana ada.

Okaronaki bana ada khana avakadiania.

Kakodiahi abono ada Maꞌonahai Jahaki.

8 Maꞌonahai Jahaki khana kamahini Deu-ra vanofiriki-ra vaꞌora navaꞌisohijahakiki bana ada.

Vavaꞌi bodinia vara vaꞌora niꞌaha,

avigaja kaimoni ida vakadivaꞌibodivarani asohirini Deus viaha.

Asohirini mani ida vakadivaꞌibodivarani,

hojai jahariki makhanirini-ra vakahivini hija.

Asohirini mani ida vakadivaꞌibodivarani,

hojai sohikaꞌoaki hana hini Deua binofiki-ra avigaravini hija.

Asohirini mani ida vakadivaꞌibodivarani,

Deus hojai asohiriki-ra naabosiravini-ra vakahivini hija.

9 Asohirihi ida hora vakajariꞌdavini.

Hora vakajariꞌdavini mani ida vakadihojai asohiriki makhaniriki vaabono vavanihavini hija.

10 Asohirihi ida vakadivaꞌibodivarani ojahakaꞌoarina-ra vakahivini.

Kodihojai asohikaꞌoarija vaha;

ni-kodiabiꞌi kania oajoisina-ra akaabokaki vaha.

Kodiabiꞌi kania oajoisina mani ida hora avanokijanaravini hija bana.

Kodiabiꞌi kania oajoisiꞌina mani ida vakadivarani asohiriki-ra nanokiaꞌia.

11 Asohirihi ida ijaꞌari kahojai jahariki Deua binaabosiravini-ra vakahivini.

Deu-ra vanofiriki vakadikaꞌdaꞌdi-ra naimaꞌbanakarahovini-ra kahiꞌboꞌdaki ada Deus.

Vaꞌora naimaꞌbanaki jaboni bana adani Deu-ra vanofiriki.

Jaharikia Deus vaꞌora arakhaki bana adani Ibavi Jaharikaꞌoakia.

12 Hojaki asia hida kodivarani oadaki aꞌonira onanamithavini hiki kaimoni.

Arafiaki ida.

Ni-avakaabokaki kaho ida mitha avaniꞌavini afohahavi.

13 Maꞌonahai Jahaki khaꞌina kamahini avavaꞌini bodinia aꞌonira nanamithavini hiki bana ada Deus niha ninina.

Kaꞌoa hiki ida kidivarani.

Kidivaꞌibodivarani hirihi ida vara bivaniꞌaja.

Kodiabiꞌi athi mani ida vara bivaniꞌaja bana.

Maꞌonahai Jahakia mitha biniꞌaꞌimidiaki ida Deua binavaꞌisohivini,

naothinia aꞌonira nanamithavini hiki ida nahina namithaki kaimoni Deua binavaꞌisohijoravini hiki.

14 Kodiania Maꞌonahai Jahakia bikamithaki bana hida oathi,

naothinia aꞌonira nanamithavini hiki bana ida.

Nimania hida ojahana,

odanona hikia aꞌonira nanokiahivini bana.

15 Maꞌonahai Jahakia bigathaniki bana ida akadivarani kodiabiꞌi khama.

Ovari maina aꞌonira navaꞌisohivini hiki bana ida omonina bikamithaꞌiki — ipohina-ra vaꞌora niꞌaha ada Jesus.

16 Hari.

Oniaroa,

Jesus vaꞌora niꞌaꞌaha adani ipohina:

—Mahi ipohiriki hora avanokijanarihi bana.

Radahahi ida mahi ipohiriki hora avanokiꞌianaki aꞌoni bana — vaꞌora niꞌaꞌaha.

17 Jesus ipohina vahoarahanana vaabono vakananaꞌdohikhamaꞌaha:

—Nahina mani ida kidivarani hija?

Haria navaꞌisohivini athini:

Mahi ipohiriki anokijanaravini-ra kahiki ada.

Radahahi ida mahi ipohiriki anokiꞌianavini-ra kahiki ada.

Kidivarani hiki jaboni ida:

Kidiabiꞌi kania okhana-ra kahivini,

oniani ida anokijanaravini hija.

18 Ni-aogaki ida biniꞌaki:

Radahahi ida mahi ipohiriki.

Nahina nimania ida vara bivaniꞌaki?

— vakhaniꞌaha.

19 Jesua biogaki ida vananaꞌdohivini vanofivini,

oniani ida vaꞌora niꞌavini hija:

—Aꞌonira onavaꞌisohijoravini hiꞌiki ida mahi ipohirikia hora avanokijanaravini.

Mahi ipohiriki radahani hora avanokiꞌianavini-ra okahiꞌiki ho.

Hihida kodivarani mani koda ida avaabononi avakananaꞌdohikhamavini hija?

—Kaꞌoa hiki hida kodivarani.

Avaasaraki bana aꞌoni avavaꞌini mokara nini.

Deu-ra vanofiriki vani adani khai vakhanira bana.

Mahi ipohiriki avavaꞌini mokara niki bana aꞌoni.

Jorakia aabosiki bana ida avavaꞌini mokara nini,

avavaꞌini khaii ninia.

21 Aꞌonira okavarajomivini hiki ida gamo ꞌbanarahaki.

Vaꞌini mokara niki ida gamo imani ꞌbanania.

Isai banini hini naothinia jorakia khaii niꞌiki ida gamo.

Jorakia biakavaꞌiꞌbiriniki ida imani ꞌbanani-ra kamithavini.

Khai biniꞌaki ida kidisai banini hiꞌini.

22 Avakhanimanija bana.

Hidakabaꞌi avavaꞌini mokara niki aꞌoni.

Aꞌonira onokiꞌianavini kamahini khai avakhanikarahoki bana aꞌoni.

Ni-nahina bikaabokaki ida avakadikhaiini-ra nihimavini.

23 Khaki ida mahi vara ovaniꞌaki,

ni-nahina hora avakanikhariaki bana.

Kaꞌoa hiki ida aꞌonira onavaꞌisohivini hiki bana:

Avavaꞌini-ra onahonariahihivini vani kodiabiꞌi-ra avakanikhariahi oonina,

aꞌonira noꞌaha avakanikhariakia.

24 Ni-oonina Deu-ra avakanikhariaꞌiaki kaho avanofikia.

Vakanikharia bana mahija avagathanivini,

hihavija kaimoni ida avakadikhaiini.

25 Hari.

Oniaroa,

asia vara niꞌianaha ada Jesus:

—Kodihojai hiki ida rajomi kavaranihia okavaranina aꞌonira onavaꞌisohija kaimoni.

Khaki bana ida mahi rajomi kavaranihia okavaranijanarina kamahini.

Aꞌonira okaꞌojomoꞌivini vani aꞌonira onavaꞌisohijahakivini hiki bana ida kodiabiꞌi varani hina avarigajahakija kaimoni.

26 Khaki bana ida mahi kodiabiꞌi kania aꞌonira okanikhariajanaravini kamahini.

Aꞌonimaina oonina avakanikhariaki bana ida avanofiki kodiabiꞌi kania.

27 Kodiabiꞌi aꞌonira nakaidivavini mani ida avakanikhariakia aꞌonira noꞌavini hija.

Hora avanakaidivaki aꞌoni,

Deus kania okhaꞌina-ra avakajariꞌdarihi jaboni,

oniani ida aꞌonira nakaidivavini hija.

28 Kodiabiꞌi kania ai ohihi,

okhaꞌihi ijaꞌari vakadiania.

Naothinia ai ohiki ho ijaꞌari vakadiania.

Kodiabiꞌi kania oajoisiki bana ho — vaꞌora niꞌaha.

29 Oniaroa,

kidipohia vaniꞌaha ada Jesus:

—Haria inavaꞌisohijahakiꞌiki i kadavarania.

Ni-rajomi kavaranihia ikavaranijanaki.

30 Aogaki ida hahavi-ra iogavini.

Aogaki ida ijaꞌari ira nanaꞌdohiravini oadani ijaꞌari kavaꞌibodivarani-ra iogavini,

oniani ida Deus kania ikhani-ra akajariꞌdaravini hija — Jesu-ra vaniꞌaꞌaha.

31 Jesus vaꞌora niꞌaꞌaha:

—Hora avavakaijokamanija koda?

32 Jorakia namithaki bana hida aꞌonira onavaꞌisohivini hiki.

Avaraganakhamaki bana aꞌoni avaibavinia.

Hora avanahojahaki bana aꞌoni.

Ni-ohoarana ohojaroniki bana,

hojahahaꞌoadahaki ada kodiabiꞌi kodiania.

33 Kodivarania aꞌonira onavaꞌisohiꞌiki ho afojora.

Hora avavakaijokahi;

kodiania avarakaramisihi,

oniani ida avavaꞌini-ra najahajahaja.

Ijaꞌari Deu-ra vakaimajahariki aꞌonira vanajaharihariki bana aꞌoni.

Hariꞌa vaofini.

Hora vavakaijoka bana.

Nahina hahavi Jaharia bivakaꞌdaꞌdiki-ra okananaboꞌajaꞌiki ho.