—Hovani oa uva avani fori ohiki ho.

Hovani uva avani kaꞌoa ho.

Kodiabiꞌi uva avani akadavaꞌava abono fori hiki ada.

2 Uva vadini fori vihiki adani ijaꞌari avakaramisiki kodiania.

Ihiꞌai vadini avania bonoki fori vihiki adani vavaꞌi onahonariahihiki.

Vahoariha ni-vakapoariki ida vavaꞌi onahonariahihivini,

oniani ida ihiꞌai vadini avania bonoriki fori vaꞌora nihaja.

Hari.

Uva avani akadavaꞌava abonoa biavaꞌboaꞌihi ida vadini bonoriki vadini ꞌdamani akaramisini kania.

Ihiꞌai vadini hoariha bonoꞌini aꞌdiꞌihi,

biavaꞌboahi ida uva vadini,

moaꞌianahi,

jahaꞌianaja kaimoni ida vadini movaꞌianaki.

Bonoꞌianani kamasikoni aipohiꞌihi ida ihiꞌai.

3 Hari.

Kodiꞌojomoꞌihi athini aꞌonira onavaꞌisohivini hiꞌiki aꞌonira najahaꞌiki aꞌoni.

4 Kodiania avaakaramisihaꞌoadaha bana mahija avavaꞌini-ra onahonariahihivini.

Avakhanini vani oakaramisiki ho avakadiania.

Vadini uva avani akaramisihi;

bonohi.

Onivani fori hija ida namithaki avakadiania.

Kodiania avarakaramisihi;

kodihojai jahaki nokiahi avakadiania.

Avakaabokahi ida aꞌonira ohonariavini hiki.

5 Hovani uva avani fori ohiki ho.

Aꞌonivani uva vadini fori avihiki aꞌoni.

Kodiania akaramisihi ida kodijaꞌari,

kidiania oakaramisiki ho jaboni,

oniani ida nahina onofiki-ra kaabokavini hija,

oniani ida ihiꞌai vadini bonohahaviki fori aꞌonira nihaja.

Anosoroniki ida ihiꞌai bonojahakiki.

Kodiania avarakaramisirihi;

ava bonoriki fori avihihi.

Aꞌonira oakodiaravini oadani,

ni-kodihojai onofiki-ra avakaabokaki.

6 Ijaꞌaria bikapoaririhi ida vaꞌini onahonariahihivini,

ni-kodiania akaramisijanaki.

Ihiꞌai vadini araꞌokhoꞌiki fori hihi,

oniani ida ijaꞌaria biavaꞌboavini hija.

Binahokahihi ida vadini araꞌokhoꞌiki,

biosonaꞌihi siho kania ahaꞌdiꞌihi.

7 Kodiania avarakaramisihi;

avavaꞌini bodinia oathi hojahahaꞌoadahahi.

Avavaꞌini bodinia oathi hojahahaꞌoadahahi;

avagathanihi bana ida nahina hahavi avanofiki kodiabiꞌi kania avakanikhariaki.

8 Kodihojai-ra avanasohijahakihi;

ihiꞌai vadini bonohahaviki fori avihihi.

Ijaꞌaria khai vaniꞌaki ida kodiabiꞌi jahana danona nokiaki avakadiania,

avigaki ida oipohina avihini.

9 Kodiabiꞌi hora nakaidivavini vani fori hiki ida aꞌonira onakaidivavini jaboni.

Onivani fori hora vaniha.

Vakapoari bana ida avavaꞌini-ra onahonariahihivini mahija aꞌonira onakaidivahaꞌoadahavini.

10 Aꞌonira ohonariavini hiki-ra avanaabajahakihi;

aꞌonira onakaidivahaꞌoadahahi.

Onivani fori ohija,

kodiabiꞌi hora honariavini-ra onaabajahakivini,

oniani ida hora nakaidivahaꞌoadahavini hija.

11 Onofiki ida kodikhaiini avakadiania hojani,

oniani ida kodivarania aꞌonira onavaꞌisohivini hija,

hihavija kaimoni ida avakadikhaiini.

12 Nimania hida kodihonari avanaabaki kaimoni;

avaabononi vakanakaidivakhamahaꞌoadaha bana aꞌonira onakaidivajahakivini vani fori vihiꞌa bana.

13 Ijaꞌari abononi vaꞌahahi abinini vaꞌora akavaꞌijoara kaimoni adani kidivaꞌahi,

arafiaꞌoamanija ida vaꞌora nakaidivavini.

Ni-badani hoariha biaradaki ida abononi vaꞌahavini abinini vakadimoni.

14 Kodihonari-ra avanaabahi;

kodivaꞌahi avihihi.

15 Ni-kodihonai abonoa aꞌonira onaoniki.

Ni-kaꞌdaꞌdia binanamithaki ida kidivaꞌibodivarani kidihonai abono vakadimoni.

Kidivaꞌahi vani adani vaꞌora nanamithara.

Honai abono fori avihirihi.

Kodivaꞌahi oamani aꞌoni.

Aꞌonira onanamithahahavivini hiki hida varani kodiabiꞌi hora navaꞌisohivini hiꞌiki,

oniani ida kodivaꞌahia aꞌonira onaonivini hija.

16 Ni-hora avanagathogathoꞌiki avakadivaꞌahi ohija kaimoni.

Hovani aꞌonira onagathogathoja kodivaꞌahi avihija kaimoni.

Aꞌonira oaniꞌiki ho bada avaniꞌaja kaimoni ida aꞌonira ohonariavini hiꞌiki.

Aꞌonira ohonariavini hiki-ra bada avaniꞌahi;

ihiꞌai vadini bonohahaviki fori avihihi.

Avavaꞌini-ra onahonariahihivini oadani badani avanamonahaꞌiki aꞌboꞌdaꞌiki.

Oniania kodiabiꞌi aꞌonira noꞌavini hiki bana ida nahina oonina avakanikhariaki kidiania.

Kodibadania avakabadanini mani ida aꞌonira noꞌavini hija bana.

17 Nimania hida kodihonari avanaabaki kaimoni,

avaabononi vakanakaidivakhamaꞌa bana.

18 Hari.

Oniaroa,

Jesus vaꞌora niꞌaha adani ipohina:

—Deu-ra vanofiriki aꞌonira vakaimajaharihi;

vakavaꞌihoki bana ida aꞌonira vakaimajaharavini viahania,

homiroꞌa hora vakaimajaharavini.

19 Deu-ra vanofiriki fori avihija vaha;

aꞌonira vanofijahakimaniha,

vakadijaꞌari avihihi vaha jaboni.

Aꞌonira onagathogathoꞌiki ho Deu-ra vanofiriki vahararana.

Ni-vakadijaꞌari fori avihijanarihi,

oniani ida aꞌonira vakaimajaharavini hija.

20 Vakavaꞌihoki bana hida kodivarani.

Kaꞌdaꞌdia bivakaꞌdaꞌdiki ada honai abono.

Ni-honai abonoa bivakaꞌdaꞌdiki ada vakaꞌdaꞌdina hiki.

Ijaꞌaria binaibavijahajahakiha ada kaꞌdaꞌdi;

binaibavijahajahakiha jaboni ada kaꞌdaꞌdi kahonai abono.

Deu-ra vanofiriki hora vanajaharihariha;

aꞌonira vanajaharihariha jaboni.

Vahoariha oathi-ra vanaabaha;

avaathini-ra vanaabaha jaboni.

21 Oipohina avihini mani ida aꞌonira vanajahariharivini hija bana.

Avigariki ida Deus hora karonaꞌavini,

oniani ida aꞌonira vanajahariharivini hija bana.

22 Vakadihojai asohirikia vaꞌora vara oniꞌaꞌiki adani.

Vakadihojai asohirini-ra avigaravini-ra vakahiꞌimariniki adani.

Avigaki ida.

Vaꞌora vara oniꞌarara vaha;

ni-Deus vaꞌora kaihamahiki vaha hora vakajonivinia.

23 Ijaꞌari hora kaimajaharihi;

bikaimajahariha jaboni ada kodiabiꞌi.

24 Bada oniꞌaꞌiki ida badani danoki vakadiania vahoariha vakaabokariki.

Badani danokia okabadanirija vaha;

ni-Deus vaꞌora kaihamahivini hiki vaha ida hora vakajonivini.

Hojai jahariki ida hora vakajonivini.

Vanokivini kabaꞌi ida kodibadania okabadanina,

hora vakaimajahariha,

oniani ida kodiabiꞌi-ra vakaimajaharavini hija jaboni.

25 Deua bivavaꞌisohihijoraꞌiki ida vakadihojai.

Vakadivaꞌisohihi jiriki kapapirania hojaki hida athii:

26 Hari.

Khaki bana ada Maꞌonahai Jahaki.

Kakodiahi abono ada.

Ovari ijaꞌari-ra anigahijahakiki,

avigaja kaimoni ida Deus niha ninina.

Kodiabiꞌi kania hojaha ada Maꞌonahai Jahaki.

Kodiabiꞌi kania oajoisina kamahini okaronaki bana ada avakadiania khana.

Kaikahina vani avakamithaki bana ida Maꞌonahai Jahaki athi avavaꞌini bodinia vara hora vaniꞌavini.

27 Aꞌonivani jaboni vara avavaniꞌaki bana ida varani ohina vahoariha vakamithaja kaimoni.

Kodibadani kamaꞌdani vani hora avavaipohihaꞌia,

oniani ida varani ohina-ra avarigajahakivini hija.