—Amaakarini kabaꞌi ida oabinina,

hariꞌa avavaꞌini namokarava bana.

Hariꞌa avavaꞌini soko iniva bana.

Deu-ra vavakaijokaꞌa bana,

hora vavakaijokaꞌa jaboni.

2 Hojaki ida ijaꞌari ibavini ipohiki kodiabiꞌi gorana bodinia.

Kidiania ookhananavaki bana ho,

aꞌonira okaibavijahahivini hiki bana ida ibavi afohanana.

Hojarija vaha ida ibavi avakadimoni;

aꞌonira onanamithahi vaha.

3 Avaibavinia aꞌonira okaibavijahahivini naothinia,

ojoiki bana ho aꞌonira onikhavini bana,

ovahojaki kania avahojaja kaimoni.

4 Avarigaki ida oibavi kahagihini — vaꞌora niꞌaꞌaha.

5 Toméa biniꞌaꞌaha:

—Ni-aogaki ida hana iokhani bana.

Nihaniki vania aogaki ida hagihi iavikhaki kaimoni?

— Toméa binanaꞌdohiꞌaha.

6 Jesua biniꞌaꞌaha:

—Hovani oa ohoarana kodiabiꞌi gorana kahagihini fori ohiki ho.

Hovani kaꞌoa oamani ho.

Hovani oa onakamaꞌdaja ida ijaꞌari kamahi jaꞌdini anokhomiriki Deus kania.

Hovani oa hagihi hoarani kaꞌoa ho.

Ni-hojaki ida hagihi hoariha kodiabiꞌi kania kaikahiki — Tomé-ra niꞌaꞌaha.

7 Jesus vaꞌora niꞌaha:

—Avarigahi ida hana ohina;

kodiabiꞌi-ra avarigaki bana aꞌoni jaboni.

Kamaꞌdaki bana ida kodiabiꞌi niha ninina-ra avarigavini,

avanokiki ada jaboni.

8 Filipea biniꞌaha ada Jesus;

—Jesus,

haria nanokiahivinihi bana ada kadabiꞌi.

Anofiki ida kadabiꞌi-ra anokivini.

9 Jesua bigathaniꞌihi ida Filipe athi:

—Filipe,

mahi ipohiki avakadiania ohojana kabaꞌi,

iogaria koda ida hana ohina?

Ijaꞌari hora nokihi;

binokiha ada kodiabiꞌi jaboni.

Niha ninimania ida kadavarani:

Haria nanokiahivinihi bana ada kadabiꞌi.

Iniki i?

10 Kodiabiꞌi kania oakaramisiki ho,

kodiania akaramisiki jaboni ada kodiabiꞌi.

Ijaꞌari hoarani fori arihiki hari.

Filipe,

ikajariꞌdamanija hida kodivarani?

Oniaroa,

Jesus vaꞌora niꞌaꞌaha:

—Ni-okavaꞌibodivaraniꞌimidiaki hida kodivarani vara aꞌonira oniꞌavini hiki.

Kodiabiꞌi vani kodiania hojaki,

hora navaꞌisohivini hija ida varani,

ovaria bada biniꞌaꞌiki ida kidibadani danoki.

11 Hariꞌa vakajariꞌda bana hida kodivarani.

Kodiabiꞌi kania oakaramisiki ho,

kodiania akaramisiki jaboni ada kodiabiꞌi.

Vakavaꞌibodivaraniꞌa bana ida kidibadani danokia okabadanibakhiana mahija kidiania oakaramisina-ra avarigavini.

12 Kaꞌoa hiki hida kodivarani.

Hora vakaijokakia bada biniꞌaki bana ida badani danoki,

kodibadani danoki fori hiki.

Kodiabiꞌi kania oajoina mani ida kodibadania avakabadanini-ra oanarafiavini hija bana.

13 Avavaꞌini-ra onahonariahihivini vani aꞌonira onoꞌavini hiki bana ida kodiania avakanikhariaki.

Aꞌonira onoꞌavini hiki onanokiaja kaimoni ida kodiabiꞌi jahana danona.

14 Bada oniꞌaki bana ida oonina hora avakanikhariavini hiki avavaꞌini-ra onahonariahihivini oadani.

15 Hari.

Oniaroa,

asia vara niha ada Jesus:

—Hora avanakaidivahi;

vanaabaꞌa bana hida aꞌonira ohonariavini hiki.

16 Kodiabiꞌi-ra okanikhariahi Maꞌonahai Jahaki-ra karonavini;

bikaronamaniha ada Maꞌonahai Jahaki avakadiania.

Kakodiahi abono hoariha ada.

Kaꞌoa hiki ada.

Hojahahaꞌoadahaki bana ada avakadiania mahi anokhomirikia.

17 Ijaꞌari Deu-ra vanofirikia ni-vakaabokaki ida kakodiahi abono-ra vagathanivini.

Vanokiriha ada,

avigariha ada jaboni,

oniani ida vagathanivini vakaabokaravini hija.

Aꞌonivani avarigaki bana ada.

Avakadiania ibaviki bana ada,

avavaꞌini-ra nahonariahihiki bana ada,

oniani ida avarigavini hija bana.

18 Ai ohina kabaꞌi,

ni-aꞌonira okavaꞌipahinirihi bana.

Ni-kamaboa fori avihirihi bana.

Ojoiki bana ho avakadiania.

19 Hari.

Mahi ipohiriki hora vanokijanariha bana adani Deu-ra vanofiriki.

Aꞌonivani hora avanokiꞌianaki bana aꞌoni.

Oahokiki bana ho,

oniania ida aꞌonira nahokihahaꞌoadahaja Deus kania bana.

20 Oahokina kamahini avarigaki bana ida kodiabiꞌi kania oakaramisihaꞌoadahana.

Avarigaki jaboni ida kodiania avarakaramisijahakini,

avakadiania jaboni oakaramisijahakina.

21 Ijaꞌaria bikapoarihi ida oathi ohonariavini hiki,

binaabahi jaboni ida oathi,

oniani ida hora nakaidivavini-ra nanokiavini hija.

Kodiabiꞌi vania binakaidivaja ida ijaꞌari hora nakaidivaki.

Hovani jaboni onakaidivaki ida ijaꞌari hora nofijahakiki,

kidiania ookhaki ho,

oabono onanokiaja kaimoni.

22 Jesu-ra vara niꞌaꞌaha ada Judas hoariha.

Judas Iscariotes hiriha ada Jesu-ra vara niꞌaꞌiki.

Biniꞌaha:

—Vahoariha ira vanofiriki vakadiania iabono inanokiaravini kabaꞌi,

nihaniki vania iabono inanokiaki i akadiania?

—Hora nakaidivakia binaabaki ida oathi okaꞌojomoꞌivini hiꞌiki.

Kodiabiꞌia binakaidivaki jaboni ida oathi-ra naabaꞌiki.

Aokhaki hari kodiabiꞌi khama arihojaja kaimoni aribaviꞌina kidiania.

24 Hora nofirikia ni-binaabaki ida oathi okaꞌojomoꞌivini hiꞌiki,

oniani ida kidiania oabono onanokiaravini hija.

Nimania hida kodiabiꞌi athi vara aꞌonira oniꞌabakhiavini hiꞌiki.

Kodivarani hirihi hida.

Kodiabiꞌi kavarani hida.

25 Hihida varani aꞌonira onavaꞌisohivini hiꞌiki ohojana oadani avakadiania.

26 Naothinia Maꞌonahai Jahaki maina aꞌonira kakodiaja bana.

Oathi hahavi nahina hinia aꞌonira kaꞌojomoꞌiki bana ada.

Kodiabiꞌia bikaronaki bana ada Maꞌonahai Jahaki onaothi ajaꞌdini kaimoni avavaꞌini bodinia hojara kaimoni.

Ovari aꞌonira navaꞌihokivini hiki bana hida oathi aꞌonira onavaꞌisohivini hiꞌiki.

27 Kodivaꞌijahajahaia aꞌonira onoꞌaki bana ho.

Deu-ra ogariki athini fori hirihi hida oathi.

Deu-ra ogariki ijaꞌari hoariha vaꞌini-ra najahajahavini vani fori hirihi hida avavaꞌini-ra onajahajahavini.

Aꞌonira onoꞌavini hiki ida ovaꞌi jahajahani.

Hariꞌa avavaꞌini soko iniva.

Hariꞌa vaofini.

28 Avakamithaꞌiki ida vara aꞌonira oniꞌavini hiꞌiki:

Ai ohiki bana ho kodiabiꞌi kania ookhana.

Naothinia ojoiki bana ho avakadiania.

Ai ohina-ra okahivini mani ida avavaꞌini-ra soko aniꞌaja.

Hariꞌa avavaꞌini soko iniva.

Hora avanakaidivahi;

khai avaniꞌahi ida kodiabiꞌi kania ookhana.

Jahani arafiaki ida kodimoni hini kodiabiꞌi kania ohojaꞌianana bana,

oniani ida kidiania oajoina-ra khai avaniꞌavini-ra najahaja.

Kodiabiꞌi kaꞌogahai danokia biaradamiki ida kodiꞌogahai danoki.

29 Aꞌonira onavaꞌisohijoravini hiki hida ai ohina kavaranihi namitharini oadani.

Aꞌonira onavaꞌisohijoravini hiki ida namithani kamahini avakajariꞌdaria kaimoni.

30 Mitihini khaki bana ada Deu-ra vanofiriki vakadikaꞌdaꞌdi,

oniani ida vara aꞌonira oniꞌavini-ra onaꞌoadavini-ra okaabokaravini hija bana.

Ni-ovaꞌi-ra nahonariahihiriha ada Jahari.

Ni-hora kaabokaki.

31 Onaabahahaviki ida kodiabiꞌi athi hora honariavini hiki,

ijaꞌaria avigaja kaimoni ida Deu-ra onakaidivavini.

Hari.

Ai arihiꞌava hihida ibavia — vaꞌora niꞌaha ada Jesus.