2 Vahojajabanaki adani Simão Pedro,

Tomé,

Natanael,

Zebedeu kaisai viꞌbamiki,

ipohina vahoariha viꞌbamiki vihiki.

Tomé onina hoariha Soi.

Caná sidaji kaijaꞌarini ada Natanael.

Galiléia kaarabonia hojaki ida Caná.

Hari.

Vahojajabanaki adani Jesus ipohina.

3 Simão Pedro vaꞌora niꞌaꞌaha:

—Oakatahafahaki ho.

—Harivani aokhaki hari jaboni kadania akatahafahana — vakhanihaha.

Oniaroa,

avikharafonihahaviꞌaha,

vakiꞌdamaꞌaha,

ai vakihiꞌaha.

Joma oadani vakatahafahaha,

ni-nahina-ra avakanagithiꞌiki.

4 Vagavagani vani safini irinikajomana ꞌdako vadini kakaasinia hojafonikosoaha ada Jesus.

Avanokimisiha,

ni-avigaki Jesus hina.

5 Jesus vaꞌora akananaꞌdohinaiꞌaha:

—Avakadaimanija?

—Iniani — avakaniꞌamisiꞌaha.

6 —Avakosonaꞌiana bana oni tahafa avakahagini kapitani aniaja.

Abaisana-ra avarakanagithiki bana aꞌoni — vaꞌora akaniꞌanaiꞌaha.

Hari.

Oniaroa,

avakosonaꞌianahi,

ni-vakaabokaki ida tahafa-ra vakaraꞌbanivini,

vakosamavini.

Abaisana tahafa-ra kanajiꞌbinivini mani ida tahafa-ra vakaabokaravini hija.

7 Hari.

Pedro-ra niꞌaꞌaha ada ipohina Jesua binofijahakiki:

—Hiꞌo akadikaꞌdaꞌdi Jesus o.

Arabana oadani Pedroa ni-bikaimahaki ida kidimakari hoariha.

Vakadikaꞌdaꞌdi varani hina-ra kamithavini vani Pedroa bikaimahaꞌihi ida kidimakari hoariha,

akiꞌdafiꞌaha,

okonahamisiꞌaha.

8 Avakakhamisisiagaꞌaha adani Pedro kaipohina.

Avakavavanamimisiꞌihi ida tahafa abaisana bikanajiꞌbiniki.

Napaja hipaꞌitxiki ida kaasi.

9 Avakoꞌomisiꞌina vigaimoriha,

vakanokihi ida siho kahaꞌdiki.

Siho kadaaraki kanamania hojaha ada abaisana.

Kahojaki jaboni ida pão siho kaꞌdihania.

10 Oniaroa,

Jesus vaꞌora niꞌaꞌaha:

—Vavikha o abaisana ꞌbamiki avarakanagithiꞌiki.

11 Hari.

Kiꞌdamaꞌaha ada Simão Pedro,

biakaraꞌbanimoriꞌihi ida tahafa kajiꞌbiniki abaisana.

153 hiki ipohina ada abaisana naꞌbahaki,

kabaꞌi ni-kaꞌbiraki ida tahafa.

12 Oniaroa,

Jesus vaꞌora niꞌaha:

—Vikhaꞌa mahija aꞌbaivini.

Vakaipahiki ida vananaꞌdohivini hana hina.

Avigaꞌiki ada vakadikaꞌdaꞌdi hina.

13 Maakariꞌaha ada Jesus,

bikanabiiniꞌihi ida pão vaꞌora noꞌavini kihiꞌihi.

Naothinia abaisana maina-ra ravinaꞌaha,

viꞌbaiꞌaha.

14 Hari.

Vanokibakhiaha ada Jesus ahokiꞌina naothinia.

Galiléia kaꞌdakoni avakhanona viahania ꞌbamija vanokiꞌaha ada Jesus.

Hari.

Oniaroa,

vanokiꞌianaha.

15 Viꞌbaina naothinia Jesua binanaꞌdohiꞌaha ada Simão Pedro.

João hoariha kaisai ada Simão.

—Simão,

hora inakaidivavini arafiamanija koda?

Kodipohi hora nakaidivavini-ra aradamanija koda ida hora inakaidivavini?

—Haꞌa,

ivani iogaki ida ira onofijahakivini — niha ada Simão Pedro.

Jesua biniꞌaꞌaha:

—Vaꞌora akadavaꞌa bana adani kodiꞌovilia.

Ovilia fori vihiki adani kodijaꞌari.

16 Jesua binanaꞌdohiꞌianaha ada Simão Pedro:

—Simão,

hora inakaidivamanija?

—Haꞌa,

ivani iogaki ida ira onofijahakivini — Jesu-ra niꞌaha ada Pedro.

—Vaꞌora akadavaꞌa bana adani kodiꞌovilia — niha ada Jesus.

17 Hari.

Jesua binanaꞌdohiꞌianaha ada Pedro:

—Simão,

hora inofijahakimanija?

Ahoarabakosikia Jesus Pedro-ra nanaꞌdohivini hiki ida nofijahakina hina.

Pedro vaꞌi-ra mokara niꞌaꞌiki ida Jesua binanaꞌdohibakhiavini.

Pedroa bigathanihi ida Jesus kanaꞌdohi:

—Ivani iogahahaviki ida.

Iogaki ida ira onofijahakivini.

Jesua bihonariaꞌianaha:

—Vaꞌora akadavaꞌa bana adani kodijaꞌari,

ovilia fori vihiki adani.

18 Imakhinava ihini kari iadahani-ra inofihi,

iibavijahahahi,

ibavi hana hinia iokhani-ra inofihi;

iokhahi.

Kaꞌoa hiki hida vara ira oniꞌavini hiki bana.

Naꞌarihavi ihiꞌini kamahini iakanaviraki bana oni isaꞌani,

hoariha bikodabomisiki bana ida.

Ibavi inofirikia ira osaki bana ada — niha ada Jesus.

19 Nimania hida Jesus Pedro-ra navaꞌisohijoravini hiꞌiki abinina niha ninini.

Abinina kamahini vakhaniki bana adani ijaꞌari:

—Deus Pedro-ra nadanovini mani ida abinina abono-ra vaꞌahavini hija Jesus kaimoni — vakhaniki bana adani ijaꞌari.

Hari.

Asia kaasia vahojaha Pedro-ra niꞌaꞌaha ada Jesus:

—Hora vaipohihaꞌa bana.

20 Hari.

Oniaroa,

roiribaniꞌaha ada Pedro,

mathaja binokiꞌaha ada ipohina Jesua binofijahakiki.

Hiꞌada ipohina Páscoa koꞌbaini-ra vahavini kari Jesus ꞌdihana vithiꞌiki ada.

Ovari Jesu-ra namaakarimiꞌiki,

binanaꞌdohiꞌiki:

—Jesus,

hana hina ada ira arakhara bana ira vavajahariki vakadiania?

21 Hari.

Pedroa binokiribaniꞌara ada ipohina.

Oniania,

Pedro Jesu-ra nanaꞌdohivini hiꞌaha:

—Nahina koda ida bana namithaja oipohina kania?

—Ojoirina oadani hokihahaꞌoadahana onofiha;

ojoiꞌina kamahini hokina okaragaha.

Abinina onofiha;

ojoina kamahini ni-hokijanaki bana.

Hariꞌa ikavaꞌibodivarani ida abinina abinirina.

Ivani,

hora vaipohihaꞌa bana.

23 Oniaroa,

okhaꞌokhaoniꞌihi ida moni Jesus ipohina vaabono vara vakaniꞌakhamaki vakadiania:

—Ni-abiniki bana ada Pedro ꞌbamina Jesus joirina oadani — vakhaniha.

Ni-niki hida Jesus kavarani.

Ni-Jesua biniꞌaki:

—Abiniriha bana ada.

Kidivarani hiki ida:

—Ojoirina oadani hokihahaꞌoadahana onofiha;

ojoiꞌina kamahini hokina okaragaha.

Hariꞌa ikavaꞌibodivarani ida abinina abinirina — nihaki ada Jesus.

24 Ovaria vara bivaniꞌaki ida Jesus varani hina,

ovaria binajiriki jaboni hida varani.

Aogaki ida Jesus ipohina kavarani kaꞌoa hini.

25 Ida asia mani hojahi Jesus kabadani ipohiki jiririki.

Jirija vaha ida kidibadani afohahavi afohanana;

ni-arajomaki vaha ida ibavini arabo hahavia ibavijahaja kaimoni ida papira jiriki;

arafiaꞌoamanihi vaha ida Jesus varani hina papira jiriki.