—Vaꞌora varajoma adani ijaꞌari kodiarabo hahavia vahojaki mahija vaꞌora oogavini nihafori vihina vaipohina — niha ada Augusto.

Vaꞌora varajomavini kari Síria kaaraboni kakaꞌdaꞌdini ada Cirênio oniki.

3 Oniaroa,

ijaꞌari hahavi avikhaki vakadiabiꞌi avikhananavakia vavaꞌbanaki ibavini afohanana.

4 Hari.

José kaabiꞌi okhananavaki ada arabo kakaꞌdaꞌdini Davi kohana oniki.

Davi kohana bivaꞌbanaki kasidajini Belém oniki.

Hari.

Galiléia kaarabonia hojaha ada José,

Nazaré sidaji onikia hojaha.

5 Oniaroa,

ajihiꞌaha,

Belém sidajia avikhaꞌaha Maria khama varajomara kaimoni.

José kagamo kaimoni ida Maria.

Biviꞌomapaꞌitxirina kabaꞌi vani kajahavidoꞌihi ida Maria.

Ijaꞌari vakadivada ibavini ijaꞌaria binajiꞌbinivini mani ida ꞌdaama kahidari vagorana Maria José khama vaꞌora nahojaja.

6 Hari.

Belém sidajia vahojana kabaꞌi kamaꞌdaꞌihi ida isai ꞌbanarahana.

7 ꞌBanaꞌaha ada kidisai ahivajaꞌi.

Bikarafoaꞌaha ada kidisai makaria.

ꞌDaama kahidari vakadiꞌbai bavinia bibarariꞌaha ada kidisai iꞌoarinia.

8 Hari.

Belém sidaji maakarinia amasia vahojaki adani ovilia avakadavaꞌava abono.

Joma oadani vaꞌora avakadavaꞌaki adani ovilia.

9 Oniaroa,

Deua bikaronaki ada ibavi kaijaꞌarini ovilia avakadavaꞌava abono vakadiania.

Nokiaki jaboni ida vagaki jahaki vakadiania.

Nama gaariꞌihi ida safini vagana fori hiki ovilia avakadavaꞌava abono vanamana,

oniani ida vaꞌora narapataꞌihi.

10 Deus ibavi kaijaꞌarini vaꞌora niꞌaha:

—Hariꞌa varapata!

Hora rakhaki hida moni jahakia aꞌonira okanamonihavini.

Ijaꞌari hahavi vakadimoni ida moni jahaki,

khai vakhanira kaimoni.

11 Hidakabaꞌi Belém sidajia ꞌbanaꞌiki ada isai Cristoa oniki.

Ijaꞌari hahavi vakadiꞌaihotahi abono kaimoni ada.

Avakadikaꞌdaꞌdi kaꞌoa ada Cristo.

12 Vaꞌora avakaragaki bana adani José,

Maria,

isai tanaki ꞌdaama kahidari vagorana.

Isai ꞌdaama kahidari vakadiꞌbai bavinia hojaki,

kidiamia iꞌoarinia.

Makaria bikarafoaki ada isai.

Nimania ida bana isai tanaki-ra avakaragavini,

oathi kaꞌoa hini-ra avarigaja kaimoni.

13 Hari.

Deus ibavi kaijaꞌarini vara vaꞌora niꞌavini kabaꞌi,

vanokiaꞌaha adani Deus ibavi kaijaꞌarini vahoariha vaipohiki.

Vaipohiꞌoamanira adani.

Deus kamoroa vaahiaꞌaha.

Vakadimoro kaathi hiki ida Deus jahana.

Vakhaniha:

14 —Jahaꞌoamanira ada Deus danoki nama hojaki!

Deus vaꞌora noꞌaki adani ijaꞌari vaꞌora nakaidivaki vaꞌi jahajahania,

vaabono avaakakariakakhamara kaimoni.

15 Oniaroa,

avajoisiꞌaha adani Deus ibavi kaijaꞌarini Deus kania nama.

Ovilia avakadavaꞌava abono vaabono vakaniꞌakhamaꞌaha:

—Aokhava bana Belém sidajia!

Anavanavanahava ida Deus haria navaꞌisohivini hiꞌiki.

16 Hari.

Jorakia avikhaꞌaha avakhanoꞌaha,

vaꞌora vakaragaꞌaha adani José,

Maria khama vanokiꞌaha ada isai tanaki ꞌdaama kahidari vakadiꞌbai bavini bodinia omana.

17 Ovilia avakadavaꞌava abono vaꞌora vananamithaꞌaha adani Maria,

isai monina Deus ibavi kaijaꞌarinia vara bivaniꞌajoraꞌikia.

18 Ovilia avakadavaꞌava abono vaathi-ra vakamithaꞌaha adani ijaꞌari,

vakavaꞌibodivaranikarahoꞌihi ida isai monina.

19 Maria jaboni bikavaꞌibodivaraniꞌihi ida namithaꞌiki.

Vaꞌini bodinia abononi vara niꞌahi kidisai monina Deus vara bivaniꞌaꞌikia.

20 Hari.

Ai vihiꞌaha adani ovilia-ra avakadavaꞌaki,

amasia avajoiꞌaha.

Vaadahana kabaꞌi vaahiaꞌaha,

Deu-ra vaniꞌaha:

—Ivani ijahaki i,

akadimoni ihini!

Haria inanamithaꞌiki isai monina.

Haria inanokiahivini hiki ada isai jaboni,

Deus ibavi kaijaꞌarini haria vara vaniꞌavini hiꞌiki.

21 Hari.

Semana hoarani radahaꞌihi,

José,

Maria khama avavikhaꞌaha ada isai,

vakarajomira kaimoni siikosida rajomia.

Isai banini hiꞌina viahani,

Deus ibavi kaijaꞌarini Maria-ra navaꞌisohijoraꞌiki isai-ra Jesus vania vanaonira kaimoni,

oniani ida vakadisai-ra vanaonivini hija Jesua.

22-24 Hari.

José,

Maria khama avavikhaꞌaha ada Jesus Jerusalém sidajia.

Vanamonahaꞌimidiaki ida ihinika ijaꞌari abononi sokovini jahaja kaimoni Deus viaha,

vanaabaja kaimoni ida Deus kavaꞌisohihi jiriki.

ꞌBoꞌdakari Moisés kohana bivavaꞌisohihiꞌiki Deus kavaꞌisohihi jirikia:

“Deus kaimoni ada makhira isani ahivajaꞌi.

Hari.

José Jesu-ra avavikhaha Deu-ra khai vaniꞌavini kagorania,

Deus kania gahinai vanihara kaimoni ada Jesus.

25 Hari.

Jerusalém sidajia ibaviki ada makhira Simeão oniki.

Oniaroa,

Deu-ra khai vaniꞌavini kagorania vakaikahina vani kaikahiꞌaha ada Simeão jaboni.

Deu-ra nofijahakiki ada,

athi binaababakhiaki jaboni ada.

Maꞌonahai Jahaki Simeão vaꞌi-ra nahonariahihivini.

Simeão binokhahahaꞌoadahaki ada aihotahi abono Deua bikaronaki,

Israel kaijaꞌari-ra akavaꞌijoaki kaimoni.

26 Maꞌonahai Jahakia biniꞌaꞌboꞌdaꞌiki:

—Simeão.

Iabinini viahania,

inokiki bana ada aihotahi abono Cristoa oniki Deua bikaronaki — Simeão-ra niꞌaꞌiki ada Maꞌonahai Jahaki.

27 Oniaroa,

Maꞌonahai Jahakia binavaꞌisohiꞌaha ada Simeão Deu-ra khai vaniꞌavini kagorania okhana.

Hari.

Okhaꞌaha.

Oniaroa,

vakaikahiꞌaha adani José,

Maria khama,

Jesu-ra avavikhajakosiꞌaha vanaabaja kaimoni ida Deus kavaꞌisohihi jiriki.

28 Simeãoa bigathaniꞌaha ada Jesus.

Deu-ra vara niꞌaꞌaha ada Simeão athi jahakia:

29-30 — Deus Kodikaꞌdaꞌdi.

Hidakabaꞌi hora inanokiahivini hiꞌiki ada aihotahi abono,

oniani ida ovaꞌi-ra najahaꞌia.

Aihotahi abono-ra onokiravini oadani,

ni-onofiki kaho ida oabinina.

Onokiꞌiki ada aihotahi abono,

ni-makhanijanaki ida oabinina.

31 Onokiꞌiki ada aihotahi abono ikaronaꞌiki ijaꞌari hahavi-ra akavaꞌijoara kaimoni.

32 Mahi vagani fori hiki ada.

Vaꞌora kaꞌojomoꞌiki bana adani judeus kaijaꞌari vihiriki avigaja kaimoni ida Deus kania avikhana.

Kadaijaꞌari mani adani Israel kaijaꞌari.

Vahoariha khai vaniꞌaki bana ida Israel kaijaꞌari vakadiani miroꞌa aihotahi abono-ra ikaronavini — niha ada Simeão.

33 José,

Maria khama vakavaꞌibodivaranikarahoki ida Simeão isai-ra vara vaniꞌavini.

34-35 Oniaroa,

Simeãoa biniꞌaꞌaha ada Deus:

—Deus,

vaꞌora kajoamora bana hadani Maria.

Jesus kaamia maina-ra vara niꞌaha ada Simeão:

—Deus vania binagathogathoꞌara hada hihada isai.

Israel kaijaꞌari vaipohikia vavajahariki bana hada kadaisai.

Deus vaꞌora nihimaki bana adani kadaisai-ra vanofiriki.

Ivaꞌini mokara niki bana i.

Hado sajoki ivaꞌini-ra nahadoki fori hiki bana ida ivaꞌini mokara nini karahoni.

Israel kaijaꞌari vahoariha vani adani kadaisai-ra vanofira bana.

Deus vaꞌora akavaꞌijoaki bana adani.

Deua binanokiaki bana ida ijaꞌari vaꞌini bodini vara nini,

kadaisai-ra vanofivini vanofiravini — niha ada Simeão.

36 Hari.

Deu-ra khai vaniꞌavini kagorani bodinia hojaki jaboni ida Deus athi namoniva abono Ana oniki.

Naꞌarihavi hiꞌiki ida.

Kidiabiꞌi kohana onina Fanuel.

Kidiꞌarahoda okhananavaki Aser oniki.

Kamakhiraꞌiki ida Ana.

7 badara ipohini bivahojaꞌiki ada kidimakhira,

oniania,

abiniꞌaha,

kaariha hiꞌihi.

37 Ana bivahojaki ida 84 badara ipohini.

Deu-ra khai vaniꞌavini kagorani kavasiribanini bodinia hojahahaꞌoadahaki ida Ana,

ni-khaonaniki.

Mahi,

joma hikia,

Deu-ra kanamasivibakhiaki ida.

Kidihojai hiki ida.

Mahi ipohiki ni-ꞌbaiki ida,

Deu-ra vara niꞌabakhiaꞌoamanija kaimoni.

38 Hari.

Oniaroa,

José,

Maria vakadiania khamiꞌihi.

Deu-ra khai niꞌavini hiki aihotahi abono-ra karonaꞌavini.

Deu-ra niꞌaꞌihi ida Ana:

—Deus,

ijahaki i akadimoni ihini.

Aihotahi abono-ra ikaronaꞌiki i akadimoni.

Naothinia Ana vara vaꞌora niꞌaha adani ijaꞌari:

—Aꞌonivani avanokhaki ada aihotahi abono Deua bikaronaꞌiki akadijaꞌari-ra akavaꞌijoara kaimoni.

Hada vani isai aihotahi abono kaimoni — vaꞌora niꞌahi ida Ana.

39 Oniaroa,

sasidotxi kania vavikhaha ada Jesus,

Deus kania gahinai vanihara kaimoni.

José,

Maria khama vanaabaꞌihi ida Deus kavaꞌisohihi jiriki.

Oniaroa,

Galiléia kaarabonia avajoiꞌaha,

Nazaré sidajia hojaki ida vagorana.

40 Hari.

Avijavaꞌina danomaniꞌaha ada Jesus,

karahomanihi ida kidiꞌogahai.

Deua bikajoamorahaꞌoadahamaniꞌaha.

41 Hari.

Badara hahavi avikhaꞌaha adani Jesus kaamia,

kidibadia vihiki Jerusalém sidajia,

vanakanorija kaimoni ida judeus kaijaꞌari vakadihinika Páscoa oniki.

42 Hari.

12 badara ipohini-ra vahojavini vani kidiamia avavikhaꞌaha ada Jesus Jerusaléa.

43 Hari hiꞌihi ida ihinika,

ai vihiꞌaha vagorana avajoiꞌaha.

Jesus vani ada hojaroniꞌaha Jerusaléa.

José,

Maria khama ni-avigaꞌiki ada Jesus hojaroniꞌina.

Vakadijaꞌari vakadiania avajoiꞌaha.

44 Hojaki vavanihaha ada Jesus vakadijaꞌari vakadiania,

oniani ida mahi oadani vaꞌora naadahaja.

Mithani vani Jesu-ra vanakoꞌdiꞌaha vakadijaꞌari vakadiania.

45 Vakaragaravini mani ida Jerusaléa vaꞌora anajoija.

46 Mahi ahoarabakosiki vani vanakoꞌdiꞌaha.

Deu-ra khai vaniꞌavini kagorania vakaragaꞌaha ada Jesus.

Judeus kaijaꞌari vakaꞌojomoꞌiva abono vahararana vithiki ada Jesus.

Mitha biniꞌaꞌiki ida vakadivarani,

vaꞌora nanaꞌdohibakhiaki jaboni ada Jesus.

47 Isai hina kabaꞌi ada Jesus,

biogajahakiki ida Deus athi,

vakadinaꞌdohi bigathanivini biogajahakiki jaboni,

oniani ida Jesus athi-ra vakamithakia vakavaꞌibodivaranikarahovini hija.

48 Hari.

Jesu-ra vanokiꞌaha adani kidiamia,

kidibadia khama,

vakavaꞌibodivaranikarahoꞌaha jaboni.

Kidiamia biniꞌaha:

—Kodisai,

niha inimanija Jerusaléa ihojaroniꞌiki?

Kadabadia khama ira akavaꞌisokonikarahovini hiki iavisonini.

Ira anakoꞌdiꞌiki hari akadijaꞌari vakadiania.

49 Oniaroa,

Jesua biniꞌahi ida kidiamia:

—Mamai,

nahina mani ida hora avanakoꞌdihavini hija?

Avarigaria koda ida kaikahiꞌini mahi kodiabiꞌi-ra khai vaniꞌavini kagorania ohojana kaimoni?

50 Jesus kavarani-ra mitha vaniꞌavini kabaꞌi,

ni-avigaki ida nahina nini vara vaꞌora niꞌavini hiki.

51 Oniaroa,

José,

Maria vakadiania ajoiꞌaha ada Jesus,

Nazaré kasidajinia avikhaꞌaha.

Binaabaꞌihi ida kidiamia,

kidibadia vihiki vaathi.

Kidiamia bikavaꞌibodivaraniꞌihi ida namithaꞌiki Deu-ra khai vaniꞌavini kagorani bodinia.

52 Karahoꞌaha ada Jesus,

kidiꞌogahai karahoꞌiki jaboni.

Deus,

ijaꞌari hahavi khama vavajahaki ada Jesus.