Mahi anokhomiki hida
12
Hari. Oniaroa, asia hora ni'a'aha ada makhira nokiana vagaki:- Naothinia, khaki bana ada Deus ibavi kaija'arini Miguel oniki. Judeus kaija'ari akadava'ava abono ada. Asia bana hojaki ida mahi jaharika'oaki. Karaho'oamanija ida ija'ari vava'i rogo inini. Ija'ari kabiinini kari ni-namitha'iaki kaho ida mahi jahariki hihida mahi jahariki fori hiki. Kaba'i, Deus va'ora akava'ijoaki bana adani kidija'ari ka'oa, hiva'oani ija'ari vaonina jiriki hojaki afojora Deus kapapira kania.
2 Hari. Ija'ari vaipohiki vaabini'iki, vaka'damaha'iki, avahokiki bana adani. Vahoariha vagathaniki bana ida mahi jahaki anokhomiriki. Vahoariha vani adani mahi jahariki-ra vagathaniha'oadahara bana. Ni-anokhomiki ida vaa'i rogo inini.
3 Hi'adani ija'ari avigahakia vagathaniki bana ida vakadibadani jahaki abosini. 'Bo'dakari va'ora vaka'ojomo'iki adani ija'ari vahoariha hjai asohikia vakahojaiki. Vavagaki bana adani mahi anokhomiriki, boviri ipohiki vagana fori vihiki adani.
4 Ivani, Daniel, hari'a kaho inanamitha bana hida adami fori hiki hahavi inoki'iki. Inaibavi bana ida athanani vadami hahavi kapapirani ihinia arabikhajaharia kaimoni hida papira. Mahi anokhomini amaakarini kaimoni hida va'isohihi afojora. A'bo'daki kaimoni hida papira athini mahi ihimirini oadani. Ija'ari avaadahaoniki bana oogahai-ra vanoko'diha'imarinivini - hora ni'a'aha ada makhira nokiana vagaki.
5 Hari. Oniaroa, va'ora onoki'aha adani ija'ari vi'bamiki pasapasania vigaakosoana. Hoarana hidiaja hoja'iki. Hoariha nobanija hoja'iki.
6 Pasapasania hojakia binana'dohi'aha ada ovari vadami fori fiki nahina hinia hora nanamitha'iki. Ovari makari jahaki-ra kaimahaki. Vaini kapahani namania hoja'iki ada. Pasapasania hojakia binana'dohi'aha:
- Mahi hana hini vani namithaja bana ida hahavi inanokia'iki?
7 Ovari vaini kapahani namania hojakia bikanabiinimanani'ihi ida sa'a afo'bamakhama nama. Deus onina-ra dionivini vani bivava'iponihija ida namithaki kaimoni. Niha:
- Anokhomiriki bana ida Deus kamahi. Ovari viaha ovava'isohihiki bana ida badara ahoarabakosiki, badara jararini hiki, vajahaka'oaki ihimiariki bana ida vadanona, naothinia vava'i rogo inini Deua biananokhomiki bana, va'ora akava'ijoaki bana adani.
8 Hari. Oogavahajahakivahariki ida athi, oniani ida onana'dohivini hija:
-Hora nanamitha'a bana namithaki anokhomini niha nininia?
9 Kodina'dohi-ra gathani'aha:
- Arajomaki hida akadivarani. Ahojaki bana varani anokhomini. Mahi anokhomiki amakarini kaimoni hojaki bana hida varani oogavahariki.
10 Iogaravini kaba'i hida varani ahojaki, vahoariha vajahariharikia avigaki bana ida nahina hini. Avigavini vani Deus vakadimahi binajahaka'oaja bana, vakadihojai binasohika'oaki jaboni bana. Vahoariha ni-avigapa'itxiki. Hojai jaharikia vakahojaiki adani. Hojai asohiriki-ra vanofivini mani ida hojai asohirikia va'ora kanahojaija bana. Ija'ari avigahakia avigaki bana hida varani nahina hini.
11 Hari. Nokiaki bana ida nahina jaharika'oaki ija'aria vakaimajahapa'itxiriki Deus khai ni'ana kagorani bodinia, ihimiki jaboni ida igitha abononi aha'diki Deu-ra khai vani'avini kaimoni. Oniania, kama'daki bana ida mahi jahariki. Radahaki bana ida mahi 1.290 hiki ipohini.
12 Khai vakhaniki bana adani ija'ari Deu-ra vavakaijokaha'oadahaki mahi 1.335 hiki ipohini hojani oadani.
13 Ivani, Daniel, Deu-ra vakaijokaha'oadaha bana. Iabiniki bana i. Kaikahiki bana ida mahi anokhomiki. Oniania iahokiki bana i. Igathaniki bana ida Deus ira kaibavijahahijoravini hiki.
Hari ida vani oamani Daniel kavarani anokhomini.