Egito kaaraboni, Síria kaaraboni hiki vakadika'da'di varani vihina hida
11
1-2 Hari. Oniaroa, makhira nokiana vagaki hora nava'isohijora'aha nahina namithaki kaimonia:- Vikhaki bana adani Pérsia kaaraboni kaka'da'dini avahoarabakosiki afohanana. Kasiagaki kanahina'ahapikiki bana ada. Bikapavakariki fori hiki ida danona kidijiniroa. Va'ora najoroniki bana adani kidisorara vaipohiki Grécia kaaraboni kaija'arini-ra va'ora vidara kaimoni.
3 Naothinia hojaki bana ada Grécia kaaraboni kaka'da'dini ihamahiki. Danoki ada. Nahina-ra nofiha; bada bini'ahi. Avijavaki bana ida danonna.
4 Ovari abinina naothinia pitani ako'bamakhamaki bana ida kidiarabo. Abini'iki kaisai vihiriha adani arabo vavaka'da'diva avako'bamahakhamaki. Vaanona kaba'i, ni-abini'iki danona fori hiki ida vadanona.
5 Oniaroa, Egito kaaraboni kaka'da'dini maina danoki. Danona kaba'i, kidisorara vakadika'da'dia biaradaki ida danona.
6 Hari. Radaha'ihi bana ida badara ipohiki. Egito kaaraboni kaka'da'dini, Síria kaaraboni kaka'da'dini khama vaabono vakanava'iponikhamaki bana adani, vakadivarani hiki vaabono vakodakhamajanarara kaimoni. Vaathi ka'oa hini karajomini ida Egito kaaraboni kaka'da'dini kidisaia bino'avini ada, ka'da'di hoariha kidigamo kaimni hini. Jahaki anivaha ida vakadiva'ibodivarani, ni-namithaki bana ida vanofiki. Vahoariha va'ora vanaabiniki bana adani gamo, kidimakhira, kidisai, vakadihonai abono vihiki.
7 Hari. Oniaroa, gamo abiniki ka'aajoa bikamithaki bana ida vamonina, oniania va'ora na'da'diabosiki bana ada. Siria kaarabonia avikhaki bana adani aajojahiki, kidisorara khama va'ora vanaabinihara kaimoni adani vakaabini'iki, vakadisorara vihiki.
8 Aajojahiki Egito kaarabonia ajoi'ina vani bisaariki bana ida Síria kaaraboni kaija'arini vakadinahina ipohiki kaidivaki, vakadideus amovana hiki. Hari. Ni-vaabono vakodakhamajanaki kaho bana adani egito kaaraboni kaka'da'dini, Síria kaaaboni kaka'da'dini vihiki.
9 Radahaki bana ida badara 'bamiki Síria kaaraboni kaka'da'dinia binofiki ida Egito kaaraboni-ra anahoroavini. Ni-bikaabokaki. Vigafanahana mani bana ida Síria kaarabonia va'ora anajoija.
10 Hari. Radaha'ihi bana ida kaaraboni kaka'da'dini kaisai vi'bamikiva'ora vavikhaki bana adani sorara vâipohiki, Egito kaarabonia avikhana, va'ora vanaabinihara kaimoni adani vakadisorara.
11 Ihamahikarahoki bana ada Egito kaaraboni kaija'arini vakadika'da'di, va'ora baranahaki bana adani kidisorara va'ora vanaabinihara kaimoni adani Síria kaaraboni kasorarani vikhaki. Vakadiaraboa avajoiki bana adani.
12 Oniaroa, Egito kaaraboni kaka'da'dini abono-ra vaboraborahaki bana ida va'ora vida'avini, sorara vâipohiki-ra va'ora vanaabinivini. Anokhomijorakiki bana ida danona.
13 Síria kaaraboni kaka'da'dini va'ora najoroniki bana adani sorara vahoariha vâipohiki. Badara 'bamiki radahani naothinia avikha'ianaki bana adani sorara vâipohiki vakasa'aiki va'ora vanaabinihara kaimoni adani Egito kaaraboni kaija'arini.
14-19 Hari. Oniaroa, ija'ari vaipohikia vakajoniki bana ada Egito kaaraboni kaka'da'dini. Vahararana vahjaki adani Israel kaija'ari vaihamahiki. Vakadika'da'di-ra vakajonivini kaba'i, ni-vakaabokaki ida ka'da'di-ra vaanivini. Siria kaaraboni kaka'da'dini, kidisorara vaipohiki khama va'ora vidaki bana adani Egito kaaraboni kaka'da'dini, kidija'ari vihiki khama. Va'ora vanapohimajavini naothinia Israel kaija'ari maina-ra va'ora vidaki bana adani Síria kaaraboni kasorara. Síria kaaraboni kaka'da'dinia bikaabokaki ida hahvi binofiki. Asia ibavi ipohikia okhaki bana ada ka'da'di ija'ari-ra napohimajahara kaimoni. Arabo napaja hojana oadani ija'ari nasohiva abono v'i-ra anaipahihi'aha. kama'daki bana ida danona ofiararini. Joiki bana ada Síria kaarabonia, ihimiki bana ida danona.
20 Ovari naothia hojaki bana ada Síria kaaraboni kaka'da'dini hoariha maina. Bikaronaki bana ada honai abono imposto kadinironi-ra aanikhaonivini kidiarabo kajinironi kaimoni. abinijorakiki bana ada ka'da'di.
Makhira jaharika'oaki Síria kaaraboni-ra vaka'da'diki bana
21-24 Hari. Oniaroa, kama'daki bana ida mahira jaharika'oaki Síria kaaraboni-ra vaka'da'divini. Ni-kidiabi'i arabo kaka'da'dini hiki. Kidimoni hiriki ida badani. Ovaria bisaariki ida vahoariha vadanona, ka'da'di hira kaimoni. Ija'ari-ra va'ora korijanahavini vani bisaarija ida arabo kaka'da'dini danona. Vakadiva'ahi hi'badaraki bana ada, oniani ida danona anarafiani hija. Va'ora nihimaki bana adani arabo hoariha kasorarani vaipohiki. Egito kaaraboni kaija'arini kidai vihina-ra vanaviahanokharavini vani ovari va'ora vidaki bana adani, va'ora nihimaki adani. Ovaria biravinaki bana ida nahina ipohiki biaariki, ija'ari vaipohiki vakadimoni vavajahara kaimoni.
25-28 Hari. Oniaroa, abono-ra vakaijokavini Egito kaarabonia okha'ianaki bana ada makhira jaharika'oaki Síria kaaraboni-ra vaka'da'diki. Kidisorara vaipohiki vaabono vakanadanodanokhamaki bana adani Egito kaaraboni kasorarani khama. Vaabini'ahapikiki bana adani Egito kaaraboni kasorarani. Naothinia Síria kaaraboni, Egito kaaraboni hiki vakadika'da'di vi'bamiki vara vakhaniki bana adani. Vaabono vaakorijanahakhamaki bana adani. Vaabono vaakajari'dakhamaki adani. Ni-nahina kaimoni hiki ida vakadivarani, nikha'iaki kaho ida mahi Deua bikanamahivini vakadidanodanoi ihimini kamahini. Oniaroa, joiki bana ada ka'da'di Síria kaarabonia radahaki bana ada. Binofiki ida Deu-ra vavakaijokaki-ra va'ora nihimavini.
29-35 Hari. Oniaroa, Deua binofivini kamahini okha'ianaki bana ada makhira jaharika'oaki Síria kaaraboni-ra vaka'da'diki Egito kaarabonia. Kidisorara khama va'ora vida'ianaki bana adani Egito kaaraboni kaija'arini. Badara radahaki vakadidanodanoi fori hirihi ida. Ni-vakaabokaki ida Egito kaaraboni kaija'arini-ra va'ora vanapohimaja'ianavini. Vikhaki bana adani Roma sidaji kaija'arini vkadisorara vakasa'aiki barco kaipohikia vadanodanora kaimoni, oniani ida Judéia kaarabonia makhira jaharika'oaki, kidisorara vihiki-ra va'ora anajoija. Ihamahina vani va'ora vanigafaniki bana adani Israelkaija'ari. Binaabaki bana ida Deu-ra vakava'ipahinika'oaki vakadivarani. Kidipohi khama vanajahariki ida Deus khai ni'ana kagorani. Vanadabaki bana ida Deu-ra vanofiki igitha abononi-ra avanaha'divini. Vanaibaviki bana ida nahina jaharika'oaki ija'aria vakaimajahapa'itxiriki Deus khai ni'ana kagorani kania. Ovari jaharika'oaki va'ora kaboroborobakhiaki bana adani Deu-ra akava'ipahiniki. Vahoariha vani adani Deu-ra vavakaijokajahakira bana. Vakajoniki bana ida ka'da'di jahariki athi. Vahojaki banaadani ija'ari avigahaki. Deus kaija'ari ka'oa vihiki adani. Va'ora vanava'isohiki bana adani vahoariha Deu-ra vaakaijokavinia. Vajaharihariki bana adani ija'ari avigahaki. Vahoariha vaabinina sakahi vihina. Vahoariha vaabinina siho kabodinia. vahoariha vagathana osahi arabo hoariha. Vahoariha vakadinahina vanakaidivaki saarahi hini vakadiania. Deua biva'ahaki ida vajahariharina, va'ora kanapitakhamara kaimoni adani kidija'ari ka'oa, kidija'ari vihina vakahi'badaraki. Vajahariharina mani ida Deus kaija'ari ka'oa-ra va'ora nihaka'oaja bana, ajari'darina-ra nadanoja.
36-39 Hari. Oniaroa, ka'da'dia bada bini'aki bana ida binofiki. Abono-ra kava'ibodivaraniki bana ada deus hina. Abono-ra vaboraborahavini hiki ida kidiogahai deus vahoariha vakadi'ogahai-ra aradavini. Varani jaharika'oakia bikanavranihaki ada Deus ka'oa. Hi'ada Deus deus hahavi-ra vaka'da'diki. Ka'da'dia ni-bikanamasiviki bana ada deus amovana, deus hoariha hiki kidija'ari avikhananavakia vakanamasiviki. Kidideus fori hiki ida ija'ari abononi kodakhamaki. Bino'avini hiki bana ida ouro, prata, ja'di kaidivaki hiki, kidideus fori hiki-ra naabosivini. Ija'aria vakapoariki ada ka'da'di, ovari va'ora naabosiki bana jiniro, danoi, arabo hikia.
40-45 Hari. Oniaroa, kaikahiki banaida mahi anokhmini kamahini Egito kaka'da'dinia binigafaniki bana ada ka'da'di jaharika'oaki Síria kaarabonia hojaki. Ovari va'ora najoroniki bana adani kidisorara vaipohiki, vakadisa'ai hiki. Vahoariha cavalo namana avikhaki. Vahoariha carruagem kabodinia avikhaki. Vakhanina vani avikhara adani sorara Egito kaarabonia. Israel kaija'ari vakadiarabo-ra vanaji'biniki adani sorara jaboni. Vâipohi'oamanira bana adani ija'ari vaabiniki. Hi'adani arabo kaija'arini Edom, Moabe, Amom vihiki ni-vamakhaniki bana. Va'oaniaroa vaakodiaki ada ka'da'di jaharika'oaki. Ovaria bisaariki bana ida ouro, prata, nahina hoariha kaidivaki hiki Egito kaarabonia hojaki. Hari. Oniaroa, Síria kaaraboni kaka'da'dinia bikamithaki ida moni finahavahaki kidiaraboa khaki. Ihamahina vani avajoira bana adani kidisorara khama. Binofiki ida ija'ari vaipohiki-ra va'ora naabinivini. Vakanavada'ibavinihaki bana ida Jerusalem paha kajokiraki kahararakhamani. Abiniki bana ada. Ni-nahina bikaabokaki ida bana biakaa'ijoavini - hora ni'a'aha ada makhira nokiana vagaki.