Daniea binoki'ihi ida vadami fori hiki hoariha
10
Hari. Oniaroa, Deua bikarona'ianahi ida moni hoariha kodiana. Hovani Daniel ooniki ho. Oonina hoariha Belessazar. Deus vara nina-ra okamithavini kari arabo kaka'da'dini Ciro oniki ija'ari-ra vaka'da'divini kari. Badara ahoarabakosikia va'ora vaka'da'di'aha. Ka'oa hini kaba'i ida Deus athi, oogavahajahakiriki hida moni. Vadami fori hikia okamitha'iki ida moni.2-3 Oniaro kari oabono okaathirivini hiki ida 'bai jahaki, baimana, vinho hiki. Ni-oka'da'di-ra oakamai'daki. Semana ahoarabakosiki ohoja'ina Deu-ra vara oni'ajahakija kaimoni.
4 Hari. Oniaroa, vaini karaho Tigre oniki pasapasania ohoja'ihi.
5 Jorakia onoki'aha ada Deus ibavia khaki makhira nokiana fori hiki. Bikaimahaki ida makari nokiani jahaki. Bikaimahaki jaboni ida ouro kacinturãohi jararia.
6 Vagaki ida abono ja'di kaidivaki vagani fori hiki. Vagaki ida nokho, bahi korikorihana fori hiki ida. Ajava aha'diki fori hiki ida nokho 'ba'dani. Vagaki ida vadi, avana hiki bronze ginigini'iki vagani nokiani fori hiki ida. 'Baraki ida athi, ija'ari vaipohiki vajoroniki vakadivarani 'barani fori hiki ida.
7 Hari. Hovani oa onoki'ia hida vadami fori hiki. Ni-nahina-ra anoki'iki adani oipohina, Kaba'i varapata'aha, aviga'aha, vaaboni avanahoja'aha.
8 Hovani ogaakosoa'ihi, vada oni'a'ihi ida vadami fori hiki vagani. Onokho amari'ihi oimahida'ina, ojarona fajafajahakaraho'ihi.
9 Okamitha'ihi ida makhira vara nina, oniaroa orai'a'ihi, ova'irari'ihi.
10 Hari. Okamitha'ihi ida sa'a hora kadasavini hora nadadavini. Asia okajo'atharari'ina osa'a hora nadadama'o'aha.
11 Makhira hora ni'a'aha:
- Daniel, Deus ira nakaidivavini arafiaki i. Hora karona'iki ada kadania okhana. Gaa'a bana. Mitha ini'ajahaki bana hida oathi. Oniaroa, ogaamanani'ihi. Ogaana vani oabono hahavi thararara'ihi.
12 Vara hora ni'a'ianaha:
- Daniel, hari'a iimahida bana. Kama'da'iki ida Deu-ra ikanikhariadanokivini hi'iki iogaja kaimoni ida namitha'iariki, kadavarani-ra kamitha'iki ada Deus. Binokiki ida kadahojai iabono inavai'amivini, oniani ida kadania okhana hora karonavini hi'ia.
13 Hari. Okhana oadani hora nadaba'aha ada ma'onahai jahariki Persia kaaraboni-ra akadava'aki. Mahi 21 hiki ipohini hora nadanodano'aha okaikahiria kaimoni kadania. Ohoarana odanodanona kaba'i, kha'aha ada Deus ibavi kaija'arini Miguel oniki hora kakodiara kaimoni. Oniaroa, Pérsiakaaraboni-ra vavaka'da'diki vamaakarina ohoja'ihi, ni-ma'onahai jaharikia bikaabokajanaki ida hora agathinivini.
14 Hari. Hora rakhaki hida ira onava'isohivini hiki bana ida namithaki kaimoni kadaija'ari vakadiania - hora ni'a'aha.
15 Vara hora ni'avini oadani vada onirarina, ni-okaaboka'iki ida ovaravarana.
16 Jorakia kha'ihi ida ija'ari makhira hoariha nokiana fori hiki, bikadasa'ihi ida oihi. Oniaroa, kama'da'ihi ida vara onina, oni'aha ada makhira ovari miro'a oviaha hojaki:
- Kodika'da'di, ova'i jahari'oamanija. Vadami fori hiki hida hora naimahidaja. Odanori'oamanija ho.
17 Ni-okaabokaki ida kadania vara onina. Danori'oamanija hida oimana, ojarona hiki. Ova'i harorohani pa'itxi.
18 Ija'ari makhira nokiana fori hiki hora kadasa'ianahi, hora nadano'aha.
19 - Hari'a ofini, Deus ira nakaidivavini arafiaki i. Iva'ini jahajaha bana. Iva'ini khai iniva - hora ni'a'aha. Oniaroa, kidiarani ova'i-ra khai ni'a'ihi. Binajaha'ihi ida ova'i bodini. oni'a'aha:
- Ba vara hora ni'a. Hora inadano'ianaki i.
20-21 Oniaroa, hora ni'a'aha:
- Iogamanija ida nahina kaimoni okhana ira vara oni'avini? Vara ovani'aki bana hida athi ka'oa hini Deus kapapira hojaki. Ai ohina vani okaragarari'ianara bana ada ma'onahai jahariki Pérsia kaaraboni kaija'arini-ra va'ora vaka'da'diki. Onadanodano'ianaki bana ada. Naothinia khaki bana ada ma'onahai jahariki hoariha Grécia kaaraboni-ra vaka'da'diki. Va'ora onadanodanovini vani ni-hojaki bana ada Deus ibavi kaija'arini hoariha hora kakodiaki kaimoni. Miguel vani ada hora kakodiara. Ovariva'ora akadava'aki adani Israel kaija'ari. Hora kakodiabakhiaki ada, hora kajoamora bakhiakinjaboni ada.