Daniel vara bini'aha ada Deus
9
Hari. Oniaroa, Dario maina bivaka'da'diki ida Babilônia kaaraboni. Xerxes kaisai ada.2 Badara hoarani Dario ka'da'di hi'ina vani hovani Daniel vada oni'abakhiaja ida Deus athi kapapirani jiriki. Vada oni'a'ihi ida athi Jeremias kohana bivava'isohihijora'iki. Deua binava'isohi'bo'da'iki ada Jeremias kohana:
- Thararaki bana ida Jerusalem sidaji. Thararani naothinia badara 70 hiki ipohini hojani ni'ini - niha'bo'da'aha ada Deus. Okava'ibodivarani'iki ida badara 70 hiki ipohini anokhomini maakarini.
3 Oniaroa, vara oni'a'aha ada Deus. Kodivarani hiki ida Jeremias kohana athi. Okaimaha'ihi ida makari jarojaroki, hojai asohirikia abonoi ka'da'digariani kavarajomini ida makari jarojaroki kaimahavahani. Ovithirari'ihi siho ka'ofo'ofoni fori hiki kania. O'bairina ohoja'ina jaboni Deu-ra okanikhariadanoki'ihi.
4 Deu-ra oni'a'ihi:
- Deus, ivani idanoki i. Ifinahavahaki i. Ikaabokaki ida hahavi inofiki. Mahi 'bo'dakari inamonaha'iki ida va'isohihi a'bo'daki kadaija'ari-ra va'ora inava'iponi'imariniravini hiki. Ija'ari ira kanamasiviki, iathini-ra naabakivakadimoni ida va'isohihiinamonaha'iki. Ivani inaabaha'oadahaki ida iathini, ni-ikava'ipahinipa'itxiki. Haria inanokiahibakhiavini hiki ida haria inakaidivavini.
5 Harivani, anaabapa'itxirihi ida haria inava'isohivini hi'iki. Hojai asohirikia akahojaibakhiaki hari. Akajoniki ida iathini.
6 Va'ora ikaronabakhiaki adani iathini namoniva abono haria vakaabanivini afohanana. Vara va'ora vani'ahanana'aha adani akadiarabo kaija'arini vakadika'da'di, vahoariha ija'ari-ra vahonariafiahaki vihiki. Ni-vakamithapa'itxiki ida iathini, ni-akamithaki jaboni ida vakadikaabanahi athini.
7 Deus, ivani ijahaka'oaki i. Harivani ava'i aipahihiki hari. Harivani kadaija'ari arihiki hari. Haria iakarakhanakhama'iki i ibavi ipohikia. Asia hidakaba'i akhanina vani arihojaja. Iathini-ra akajonivini abosini hida ibavi ipohikia aakarafarakhamana.
8 Akadiarabo kaka'da'dini, vahoariha haria vavaka'da'diki, akadija'ari avikhananavaki, harivani afohahavi bada ani'abakhia'iki ida hojai ivajahariki, oniani ida ava'i-ra anaipahihi'ia iviahania.
9 Ivani, ija'ari-ra iva'adibakhiaki i. Ajaharina kaba'i, akadihojai asohiriki-ra ina'birabakhiaki i.
10 Deus, ni-anaabaki ida haria ihonariavini hi'iki. Ni-anaabaki ida iathini namoniva abono haria vanava'isohibakhiavini hiki. Kadahonai abono vihiki adani.
11 Harivani hahavi Israel kaija'ari arihiki hari. Akajoni'iki ida iathini-ra anaabavini, oniani ida haria vanajahariharivini va'ora iva'ahavini hi'ia. Ikarona'iki ida nahina hahavi jahariki haria inava'isohijoravini hi'iki. Moisés kohana binajiri'bo'da'iki ida pohimajahi kavaranihi iathini-ra vakajoniki vakadimoni. Kadahonai abono ada Moisés kohana. Asohiki ida iathini binajiri'iki.
12 Ivani, bada ini'a'iki ida haria inava'isohijoravini hi'iki, haria inava'isohijoravini hi'iki, haria inapohimajavini, va'ora inapohimaja'iki adani haria vavaka'da'diki. Karahoki ida jaharini akadiania namitha'iki. Jerusalém sidaji-ra vanihimavini iva'ahavini maniida ava'i-ra anaipahihija.
13 Onivani fori hija ida Moisés kohana athi afojora namitha'iki akadiania. Kaba'i, ni-akava'ipahinipa'itxiki ida akadihojai asohiriki. Ni-akaijo'a'iaki kaho ida iathini-ra anaabavini. Ni-akaijo'a'iaki kaho ida iva'ini-ra khai ani'avini.
14 Ivani, Deus, inaibavijaha'iki ida haria napohimajaki, ikarona'iki ida akadiania. Anokhomirihi ida kadamahi. AkadiDeus i. Asohika'oaki ida kadabadani hahavi akadiania, kaba'i akava'iradadaki ida haria inava'isohivini hi'iki.
15 Akadika'da'di i, akadiDeus i. Mahi 'bo'dakari inanokia'iki ida idanoni arafiaki, va'oraiani'iki adani akadija'ari avikhananavaki Egito kaarabonia. Ija'ari vaipohikia vakamithamaha'iki ida varani ihini oniaro kari. Asia mani ija'aria avigaja hida imonini. Kaba'i, badaani'aki ida badani ivajahariki.
16 Deus, ivani ivajahaki ida ija'ari-ra iva'adivini. Hari'a bana ikava'ijokojokoha'oadaha ida Jerusalém. Kadani ida sidaji, arabo mana hiki hararania hojaki. Hojai asohirikia akahojaibakhia'iki hari. Akadija'ari Jerusaléa vahoja'ina hojai asohirikia vakahojaibakhia'iki jaboni adani, oniani ida Jerusalém thararaninaothinia ija'ari maakaria vaibaviki kadaija'ari-ra va'ora avigarahavini hija.
17 KodiDeus, mithaini'a banahida kodivarani. Inaaba'a bana hida ira okanikhariavini hiki. onofiki ida ija'ari hahavi ira avigavini, avigaki bana ida haria ikajoamoravini. Haria kajoamora'a bana mahija igorani Jerusaléa hoja'iki amonaha'ianavini.
18 Mitha ini'a bana hida ira okanikhariavini hiki. Vada ini''a bana ida ava'i aipahihini, kadasidaji tharara'ini. Ajahana hirihi ida ira akanikhariavini hiki. Ija'ari-ra iva'adivini mani hida ira akanikhariavini hija.
19 Mitha ini'a bana. Ina'bira bana hida akadihojai asohiriki. inamonahajoraki'a bana hida okanikhariaki. Haria akariaka'a bana. Ivani akadiDeus i. Harivani kadaija'ari hari. Kadani ida Jerusalém sidaji. Ija'ari ira khai vani'avini ibavini ida Jerusalém. Haria ikajoamorahi; ija'ari hahavi akadiDeus ihini-ra avigaha - Deu-ra ni'a'aha ada Daniel.
Vara ni'aha ada Gabriel
20 Hari. Oniaroa, asia Deu-ra vara oni'a'ihi, Deu-ra onanamithavini hihi ida kodihojai asohiriki, kodija'ari Israel kaija'ari vakadihojai asohiriki hiki. Okanikhariavini jaboni ida Jerusalém sidaji-ra va'adivini.
21 Deu-ra vara oni'avini oadani, safini aadosina kaikahi'aha ada Deus ibavi kaija'arini Gabriel oniki. Ovari onoki'bo'da'iki kodivadami fori hiki hoariha. Kha'aha rabojoraki'ina hora namaakari'aha. Safini aadosina vani kaikahi'aha kodiania.
22 Gabriel hora ni'a'aha:
- Daniel, hora rakha'iki hida ira onava'isohivini vadami fori hiki-ra inoki'ikia.
23 Deu-ra vara ini'avini kama'dani vani ovaria bikamitha'ihi ida ikanikhariaki. Deus ira nakaidivavini arafiani mani ida hora karonavini hija kadania, ira onava'isohija kaimoni hida vadami fori hiki. Mih ini'a afojahaki hida bana oathi mahija nahina hini iogavini.
24 Daniel, ira onava'isohijora'iki ida namithaki kaimoni kadaija'ari vakadiania. Radahaki bana ida badara ipohiki. Radaharihi oadani ni-ihimiki bana ida hojai asohiriki, ija'ari Deu-ra vakajonivini hiki. Oniaroa, naothinia Deus vania binakama'daja banaida kidihojai sohika'oaki anokhomiriki ija'ari akadiania. Amonaha'ianaki bana ida Deus khaini'ana kagorani Jerusaléa. Oniaroa, a'diahiki bana hida vadami kavaranihi.
25 Daniel, mitha ini'a. Arabo kaka'da'dinia bihonariaki bana ida Jerusalém amonaha'ianahi. Radaha'iki ida badara ipohiki afo'iana. Jahariki bana ida ija'ari vakadimahi. Hojaki bana ida sidaji kavasiribanini nama hiki, sidaji kahagihini hiki afo'iana Jerusaléa. Naothinia khaki bana ada ka'da'di Deua binagathogatho'iki.
26 A'diahi'ihi ida badara ipohini deua bikanaahiki, vakahidaki bana ada ka'da'di Deua binagathogatho'iki. Asohiriki ida vakadibadani kidiania. Oniaroa, naothinia vikhaki bana adani arabo kaka'da'dini, kidisorara khama. Vanihima'ianaki bana ida sidaji, vanatharara'ianaki bana ida Deus khai ni'ana kagorani. Ija'ari vaipohiki vaabono vakodakhamaki bana. Deua bikanamahiki ida vapohimajara kaimoni.
27 Hari. Oniaroa, arabo kaka'da'dini hoariha binamonahaki ida va'isohiha'bo'daki badara 7 hiki oadani. Va'ora nava'ipohini'imariniki bana adani ija'ari vaipohiki. Badara ipohini jararinia binihimakii bana ida va'isohihi a'bo'daki. Biva'ahajanariki ida igitha abononi aha'dibakhiani Deu-ra khai vani'ara kaimoni. Binaibaviki bana ida nahina jaharika'oaki ija'aria vakaimajahapa'itxiriki Deu-ra khai vani'avini kagorani bodinia. Hari. Deua binapohimajaravini oadani ada ovari, hojaki bana ida nahina jaharika'oaki. Oniaroa, Deus vania binihimara bana ada. Nini vani namithaja ida Deus bikava'ibodivaranijora'iki. Hari. Anokhomiki ida Gabriel kavarani.