Vadama'iki ada Nabucodonosor
2
Badara 'bamiki Nabucodonosor arabo kaka'da'dini hina vani vadama'aha afobakhia. Biakava'isokoni'ihi ida kidivadami nahina hini biogariki. Ni-bikaabokaki ida vadina afojahaki.2 Kidivadami-ra akava'isokoniha, va'ora baranaha'aha adani kidihonai abono vaipohiki kidiania vikhana. Va'ora baranahaki adani oogavahariki-ra avigaki, arabani vihiki, namitha'iariki-ra avigaki, boviri rajomi hina-ra avigaki vihiki. Va'ora baranahavini hiki vananamithaja kaimoni ida kidivadami nahina hini.
3 Oniaroa, va'ora ni'a'aha ada Nabucodonosor:
Kodivadami ova'i-ra soko ani'aki. Oogaravini oadani hahina hini, ni'ova'i jahajahaki. Onofiki ida hora avananamithavini hini kodivadami nahina hini.
4 Boviri rajomi hiki-ra avigakia vagathani'ihi ida arabo kaka'da'dini athi aramaica athinia. Vani'aha:
- Akadiarabo kaka'da'dini i. Anofiki ida kadamahi anokhomirini. Haria nanamitha bana kadavadamia mahija nahina hinia ira anava'isohivini.
5 Arabo kaka'da'dinia bigathanihi ida vaathi:
- Oabono okava'ibodivaranivini hiki ida namithaki bana avakadiania. A'onira onamitharavini oadani, onofiki ida hora avanava'i sohivini nahina onoki'iki vadamia. Onofiki jaboni ida kodivadami nahina kaimoni hinia hora avanava'isohivini. Avakaabokarihi ida hora avanana'isohivini, ohonariaki bana ida vahoariha a'onira vanapitahatahavini. Avagorani jaboni ovahonariahiki bana thararani.
6 Hora avananamithavini hihi ida kodivadami onoki'iki, nahina kaimoni hini jaboni ida vadami, a'onira ono'avini hiki bana ida kodinahina kaidivaki ipohiki, a'onira onaabosijahakiki bana ho. Varani jahakia vara a'onira ovani'aki bana ho vahoariha, avigaja kaimoni ida ogahai abono jahaki avihini. Oniania, onofiki ida onoki'iki kodivadamia hora avananamithavini. Hora vananamitha bana jaboni kodivadami nahina hinia.
7 Vagathani'ianahi ida arabo kaka'da'dini athi:
- Haria nanamithavinihi bana ida kadavadami mahija nahina hinia ira anava'isohivini.
8 Arabo kaka'da'dini va'ora ni'a'aha:
- Oogaki ida hora avaragathinivini-ra avanofivini. Avarigaki ida a'onira onapohimajavini bana, oniani ida hora avaragathinivini-ra avanofivini hija.
9 Kodivadamia hora avananamitharihi; a'onira onapohimajahi. Kodivadami avarigariki abosini bana ida avapohimajani. Avaabononi vara avakani'akhamavini hiki ida hora avakorijanahavini, onahoarihaja kaimoni ida avapohimajani kavaranihi. Kodivadamia hora avananamithahi; ni-okajari'daki ida avarigavini jaboni.
10 Oogavahariki-ra avigakia vagathani'ianahi ida arabo kaka'da'dini athi:
- Ni-ija'ari hoarani araboa hojakia dikaabokaki ida haria ikanikhariavini hi'iki. Ni-arabo kaka'da'dini hoariha bikanikharia'iaki kaho kidihonai abono vakadiania ida haria ikanikhariavini hi'iki. arabo kaka'da'dini ija'ari vaipohiki-ra kaabokaki, sorara vaipohiki-ra va'ora vaka'da'diki jaboni ni-va'ora nana'dohiki adani oogavahariki-ra avigaki kidivadamia. Ni-va'ora nana'dohiki jaboni adani arabani, boviri rajomi hiki-ra avigaki, nahina namitha'iariki-ra avigaki vihiki nahina hini ida kidivadami.
11 Ni-nahina bikaabokaki bana ida haria ikanikhariavini hiki ira nava'isohivini. Deus vihiki ka'oa vakaabokaja ida. Deus vihiki ni-ija'ari vahararana vahojaki.
12 Hari. Vakadivarania binaihamahikaraho'aha ada arabo kaka'da'dini. Va'i joko ini'ahapikina mani ida vaabinina bivahonariahivini hija, hiva'oani ogahai abono hahavi Babilônia sidajia vahojaki.
13 Akarafarakhama'ihi ida arabo kaka'da'dini kahonari ogahai abono hahavi vapohimajana kaimoni. Va'ora vakaronaki adani makhira vahoariha va'ora vanako'dihara kaimoni adani Daniel kidiva'ahi khama, va'ora vanapohimajara kaimoni jaboni.
Deua binava'isohiki ada Daniel arabo kaka'da'dini kavadamia
14 Hari. Oniaroa, Daniea binako'diha Arioque. Nabucodonosor kasorara vakadika'da'di ada Arioque. Ovaria bigathani'ihi ida honari kidika'da'di kania va'ora napohimajara kaimoni adani ogahai abono.
15 Hari. Vajaforia athii forakia Daniea binana'dohi'aha ada Arioque:
- Nahina mani ida arabo kaka'da'dini apohimajana-ra vahonariahivini hi'ia?
Arioquea binava'isohi'aha ada Daniel namitha'ikia.
16 Oniaroa okhami'aha ada Daniel arabo kaka'di'dini kania. Bini'a'aha:
- Kodika'da'di, iva'aharia koda ida mahi hoariha haria inapohimajavini. Haria naviahanokha bana mahija kadavadami nahina hini-ra onako'divini. Oogavini naothinia kadavadamia ira onava'isohiki bana ho-hina ada Daniel.
17 Hari. Ajoi'aha ada Daniel vagorana, va'ora nava'isohi'aha adani kidiva'ahi Ananias, Misael, Azarias vihiki nahina namitha'ikia.
18 Va'ora kanikhariadanokiha:
- Deus nama hojaki-ra vakanikharia bana mahija haria kajoamoravini. Vanana'dohi bana ida ka'da'di kavadami nahina hini mahija haria napohimajaravini ogahai abono vahoariha vapohimajana kamahini va'ora ni'aha ada Daniel.
19 Oniaroa, joma vania Deua binanokiahi'aha ada Daniel vadami fori hikia, biogaja kaimoni ida nahina arabo kaka'da'dinia binoki'iki. Oniaroa, Daniea khai bini'a'aha ada Deus.
20 Ni'aha:
- “Mahi anokhomiriki khai ani'ava ida Deus onina. Oogahaki ada.
Danoki ada.
21 Deua bivahonariahiki ida mahi, badara hiki.
Ovaria binoaki ada arabo kaka'da'dini danona, bikaabokaja kaimoni ida arabo kaija'arini-ra va'ora vaka'da'divini.
Ovari jabonia biani'iki ida danona, arabo kaka'da'dini hijanarara kaimoni.
Ovaria bino'aki ida ija'ari kidiogahaia ogahaja kaimoni.
Ovaria bino'aki ida ija'ari hoariha kidi'ogahai ija'aria biogaja kaimoni ida nahina hini, nahina kaimoni hini.
22 Ovaria binanamithaki ida nahina oogavahariki, nahina ahojaki hiki, ija'aria avigaja kaimoni.
Ovaria biogaki ida nahina ahojaki namitha'iariki bakibakiki kania. Vaga'oamanira ada Deus.
23 Deus, ivani ijahaki i. Khai ira oni'aki i. Kodiabi'i avikhananavaki vakadiDeus i.
Hora ino'avini hi'iki ida kada'ogahai, idanoni hiki. Hora inanokiahivini hi'iki ida akanikharia'iki.
Hora inanamithavini hi'iki ida arabo kaka'da'dini kavadami nahina hini.”
Niha ada Daniel.
Daniea vara bivani'a'iki ida vadami
24 Hari. Oniaroa, Arioque kania okha'aha ada Daniel. Arioquea bigathani'iki ida arabo kaka'da'dini kahonari, va'ora naabinira kaimoni adani ogahai abono Banilônia kaarabonia vahojaki. Daniea bini'aha ada Arioque:
- Hari'a bana va'ora naabini adani oogahariki-ra avigaki Babilônia sidajia vahojaki. Arabo kaka'da'dini kania hora avikhami bana mahija kidivadamia onava'i sohivini.
25 Jorakia arioquea biavikhami'aha ada Daniel vakadika'da'di kania. Bini'aha:
- Ovikhaki hada makhira kadania. Judá kaaraboni kaija'arini gathaki hada. Ira nanamithaki bana hada kadavadami nahina hini, nahina kaimoni hini ida kadavadami.
26 Arabo kaka'da'dinia vara bini'aha ada Daniel. (Daniel onina hoariha Beltessazar.) Binana'dohi'aha:
- Ikaabokamanija ida kodivadami oniki'ikia hora inanamithavini? Ikaabokamanija jaboni ida nahina hora inava'isohivini?
27 Daniea bigathani'ihi ida athi:
- Ni-ogahai abono, ni-namitha'iariki ogava abono, ni-ija'ari hoariha bikaabokaki ida ira nava'isohivini hini athi ogavahariki ikanikhariaki.
28 Kaba'i, hojaki ada Deus nama, ovaria bikaabokaki ida hahavi oogavaharikia ira nava'isohivini. Ovari ira nava'isohijoravini hi'iki ida namithaki kaimoni. Ira nava'isohiki bana ada vadami inoki'ikia, vadami fori hiki ikava'ibodivarani'iki joma i'oma'ini kaba'i.
29 Kodika'da'di, i'omani kaba'i ikava'ibodivaraniki ida mahi khaki namitha'iariki. Ovari, nahina oogavaha'iariki-ra vava'isohihiki ira nanokiahivini hi'iki ida namithaki kaimoni.
30 Kodika'da'di, Deus vani hora anigahivini hija ida namithaki kaimoni iniki'iki. Ni-kodi'ogahai ija'ari hoariha aagahai-ra aradaki. Deua binofiki ida kadavadami nahina hini-ra iogavini, nahina namitha'iariki-ra iogavini jaboni, oniani ida kadava'ibodivarania hora nava'isohijoravini hi'ia.
31 Kodoka'da'di, ivani vada ini'avini kaba'i, inofiki'iki ida makhira amovana. Nama hiki ida. Karahoki, vagaki ida. Finahavahaki ida makhira amovana gaani hoja'iki.
32 Ouro kabodirikia kamonahaki ida ka'da'di. Prata amonahaki ida makho'ini, vadi hiki. Bronzea amonahaki ida jarari, jaha bodini, kabaha kihiki.
33 Ferroa amonahaki ida avana. Ferro nami kabodikia kamonahaki ida 'dama.
34 Vada inini oadani inoki'iki ida arabo nama hiki. Oniani oa khaonani'ihi ida ja'di karaho. Ni-ija'ariabikabadaki ida ja'di. Ja'di karahoa bikavigari'ihi ida makhira amovana 'dama. Bikana'boro'boro'ihi ida 'dama ferro namia kabodihadihakia kamonahaki.
35 Hari. “Boro'borojaraki'ihi ida ferro, nami, bronze, prata, ouro hiki, khomakhoma'ihi. Ija'aria biaka'diririvini ida trigo 'ba'dani aniaja kaimoni ida asafini, onivani fori hija ida khomakhomani aniani. Hari. Sirisirikia biakarafoki ida makhira amovana khomakhomani, biavikhahi, ni-nokiajanaki. Hi'ida ja'di karaho inoki'iki akaraho'iki ida, arabo nama hiki hi'ihi, arabo hahavi-ra naja'bini'ihi.
36 Nimania ida vadami inoki'iki. Kodika'da'di, ira onava'isohivini hiki bana ida nahina hini.
37 Ivani, Nabucodonosor, arabo kaka'da'dini hahavi-ra ivaka'da'diki i. Deus nama hojaki ira no'avini hi'iki ida danona, va'ora ikaabokara kaimoni adani ija'ari hahavi. Idanoki i. Nikiani jahaki ida kadanahina, kadamakari ikaimahaki hiki. Kaidivani afiaki ida nahina hahavi ivahojaki.
38 Isa'ani kabdinia Deua biodai'iki ida ija'ari hahavi, igitha adahaki vahojaki, ivani ivaka'da'diki ida vaibavi. Ivani ouro kaka'da'dihi fori ihiki i.
39 Iabinini naothinia arabo kaka'da'dini hoariha aja'dina ihiki'i. Danona kaba'i, ni-idanoni fori hiki bana. Prata fori hidki ada Ovari abiina naothinia kasiagaki bana ada arabo kaka'da'dini hoariha. Arabo hahavi kaabokaki bana ada. Bronze fori hiki bana ada.
40 Hari. Ovari naothinia kasiagaki bana ada arabo kaka'da'dini hoariha. Kaaraki, danoki ida ferro. Onivani fori hija bana ida arabo kaka'da'dini ija'ari-ra honariafiahaki-ra va'ora kaabokavini. Ferroa bi'daniki ida nahina hoariha. Ferroa bina'boro'boroki jaboni ida nahina hahavi. Onivani fori hija bana ida arabo kaka'da'dini kabadani. Binihimaka'oaki bana ida arabo hahavi vakadika'da'di vadanona.
41 Ikanoki'iki ida makhira amovana 'dama ferro, nami kabodikia. Onivani fori hija ida arabo-ra vavaka'da'diki vadanona. Vaabono vakanapitakhamavini mani ida va'ora nadanorija.
42 Kakabodiki jaboni ida 'dama ferro, nami hikia. Arabo kaka'da'dini danona pitani karaki, pitani sakaki.
43 Niha vakhaniki bana adani ija'ari, vakadiarabo kaka'da'dini vihiki. Ni-hihaviki ida vakadiva'ibodivarani, ni-vaabono vaakanajahakhamaki. Ferro, nami hiki ni-aakarakhamaki, onivani fori vihina adani ija'ari-ra va'ora vavaka'da'diki vaabono vakanajahakhamajahakiravini.
44 Hari. Ija'ari-ra vavaka'da'divini kamahini, Deus vania binakama'daja bana ida arabo hahavi-ra vaka'da'divini anokhomiriki. Ni-ihimiki bana ida arabo kaija'arini-ra va'ora vaka'da'divini. Ni-ija'ari hoariha bigathiki bana ida arabo hahavi bivaka'da'diki kaimoni. Arabo kaka'da'dini ka'oa ada ja'di karaho fori hiki. Ovaria binihimaki bana ida arabo hahavi vakadika'da'di vadanona vavahoja'iki. Bia nanokhomika'oaki ida ija'ari-ra vavaka'da'divini. Ovari ni-anokhomiki kidimahi.
45 Onivani fori hija ida ja'di karaho inoki arabo nama hiki kania okhaonaniki. Ni-ija'aria biani'iki. Ja'dia bina'boro'boro'iki ida ferro, bronze, nami, prata, ouro hiki. Hari. Deus danoki ira nava'isohijaravini hi'iki ida namithaki kaimoni. Ka'oa hiki ida vadami. Vakaijokavahaki bana ida vadami kavaranihi - niha ada Daniel.
Daniea bigathaniki ida vadami varani hini abosini
46 Hari Daniel athi-ra mitha ni-avini naothinia ada Nabucodonosor, aasirari'aha Daniel viaha, anokhorari'aha. Oniaroa, bivava'iha'aha. Noathinia va'ora honaria'aha adani kidihonai abono:
- Avanaha'di'a bana ida incenso Daniel viaha. Vanaabini ida igitha Danie-ra khai ani'aja kaimoni. Jahaki hada. Ogahai abono danoki hada.
47 Oniaroa, Nabucodonosoa bini'aha ada Daniel:
- KadaDeus va'ora kaabokaki adani deus hahavi. Ovari va'ora vaka'da'diki adani arabo kaka'da'dini hahavi. Ovaria bivava'isohihijoraki ida hahavi oogavaha'iariki nahina hini, oniani ida kodivadami oogavaharikia hora inava'isohivini hi'ia.
48 Hari. Nabucodonosoa bihonariaki ada Daniel ka'da'di hina, kidihonai abono vahoariha-ra va'ora vaka'da'divini. Bino'aha nahina kaidivaki ipohikia. Bini'aha:
- Daniel, onofiki ida kodiarabo Babilônia kaaraboni oniki-ra ivaka'da'di'avini, arabo kaija'arini vihiki jaboni. Va'ora honariafiaha bana adani oogavahariki-ra avigaki hora vaakodiabakhiaki.
49 Hari. Daniea bikanikharia'aha:
- Koika'da'di, va'ora iva'aharara koda adani kodiva'ahi hora vaakodiavini kadarabo-ra ovaka'da'divinia? Va'ora onofiki adani Sadraque, Mesaque, Abede-Nego vihiki va'ora vahonariafiahara kaimoni adani kadarabo kaija'arini.
Oniaroa, Daniel hoja'aha arabo kaka'da'dini kania. Kidiva'ahi va'ora vahonariafiaha'aha adani ija'ari, arabo kaka'da'dini kabadani-ra vaakodiavini kidimoni.