Makhira amovana amonahani varani hini
3
Oniaroa, masiko ipojhiki radahana naothinia Nabucodonosoa bivahonariahiki ida makhira amovana ooroa amonahani. Nama hiki ida makhira amovana. 27 metros hiki ipohini nama hina. 3 metros hini amakariki ida makhira rabodina. Amonahani naothinia varagaamanani'ihi ida amovana arabo sohifiaki kania Durá onikia. Babilônia kaarabonia hojaki ida Durá ibavi.2 Nabucodonosoa bikanamahiki ida mahi kidihonai abono hahavi vajoronira kaimoni makhira amovana ouro amonahaki kania, khai vani'aja kaimoni ida makhira amovana. Va'ora kaboa'iha adani kidiarabo pitani karaho vavaka'da'diki, kidiarabokadidajini kaija'arini-ra va'ora vavaka'da'diki vikhana. Va'ora kaboa'iha jaboni kidijiniro, arabo kajinironi hiki-ra avakadava'akivikhana. Va'ora kaboa'iha jaboni adani ija'ari nasohiva abono, sorara vavaka'da'diva vihiki vikhana. Kidihonai abono hahavi vihiki adani. Arabo kaka'da'dini kabadanihia vakabadaniki adani.
3 Oniaroa, vajoroni'aha adani Nabucodonosor kahonai abono vaipohiki makhira amonava ouro amonahakia viaha. Vigaakosoa'aha adani ija'ari vaipohiki, vanaaabaja kaimoni ida vakadika'da'di athi, khai vani'aja kaimoni ida makhira amonava a'diahini kaihinikani.
4 Hari. Athii 'barakia athi vava'isohivava abono va'ora ni'a'aha:
- A'onivani ija'ari avajoroni'iki, nação ipohiki kaija'arini a'oni. Athi ipohikia avaathiki a'oni, mitha vani'a bana.
5 Avakamithaki bana ida kasivanahi ithoni ipohiki. Trombeta, flauta, afo'afo, harpa, nahina hoariha ipohiki ithoki bana. Kasivanahi ithoni-ra avakamithavini vani makhira ouroa amonahaki amovana viahania vakajo'atharari'a bana. Akadika'da'di makhira amovana amonahani-ra hnaria'iki, khai avani'aja akimoni. Binofiki ida makhira amovana-ra avakanamasivinini deus hina.
6 Ija'aria bikajonihi ida makhira amovana-ra khai ni'avini, hokahiki bana ada siho kakaraho kabavini bodinia niha.
7 Oniaroa, kasivanahi ipohiki ithoni-ra vakamitha'aha, jorakia vakajo'atharari'aha makhira amovana viahania. Khai vani'a'ihi ida makhira amovana Nabucodonosor gaamananini bivahonairahi'iki.
Va'ora avanaathidanoarari'aha adani Daniel kava'ahi
8 Hari. Oniaroa, Nabucodonosor kania vamaakari'aha adani boviri rajomi hina-ra avigaki, vaipohina vihiki khama. Va'ora vakanavaraniha'aha adani judeus kaija'ari.
9 Vani'a'aha ada Nabucodonosor:
- Akadika'da'di, anofiki ida kadamahi anokhomiriki.
10 Ivani, va'ora ihonaria'iki adani ija'ari hahavi kasivanahi ipohiki ithoni-ra vakamithaki makhira amovana viahania vakajo'atharari'ina, khai vani'aja kaimoni.
11 Ija'aria bikajonihi ida aasiararini, khai bini'arihi ida makhira amovana kidideus hina, hokahiki bana ida ija'ari siho kakaraho kabavini bodinia. Nimania ida iathini haria inava'isohivini hi'iki.
12 Akadika'da'di, vahojaki adani judeus kaija'ari kadaraboa vaonina Sadraque, Mesaque, Abede-Nego vihiki. Va'ora ihonaria'iki adani Babilônia kaaraboni pitani-ra vavaka'da'divini. akadika'da'di, ni-iathini-ra vanaaba'iki adani makhira. ni-khai vani'akiida deus amovana. Ni-avaasiarariki makhira amovana ouroa amonahaki viahania, vakanamasivija kaimoni vakhani'aha.
13 Hari. Va'i jokojokokarah'aha ada Nabucodonosor. Bivahonariahihi ida Sadraque, Mesaque, Abede-Nego baranahi vihina kidiania vikhana. Oniaroa va'ora vavikha'aha kaka'da'dini viaha.
14 Nabucodonosor va'ora nana'dohi'aha:
- Sadraque, Mesaque, Abede-Nego. Ka'oa himanija hida athi kodideu-ra avakanamasiviravini? Khai avani'aria ida makhira amovana?
15 Avanofiria ida koda avakajo'atharari'ini makhira amovana viahania, khai avani'aja kaimoni? Kasivanahi ipohiki ithoni-ra avakamithahi; makhira amovana viahania avakajo'athararini avakanamasivivini jahahi. Khai avani'arihi ida makhira amovana, ovahonariahihi ida jorakia avahokahini siko kakaraho kabavini bodinia. Hana hina deua bikaabokaja ida a'onira akava'ijoavini osa'a kabodinia?
16 Arabo kaka'da'dini athi-ra vagathani'aha adani Sadraque:
- Akadika'da'di, ni-anofiki ida ariabono avajari'davini. ka'oa hiki ida kadavarani.
17 Deus kahonai abono arihiki hari. Ivahonariahihi ida ahokahina siho kabavini kakaraho bodinia; Deus haria akava'ijoavini-ra kaabokaki hari. Bikaabokaki bana ida haria akava'ijoavini isa'ani kabodinia.
18 Akadika'da'di. Haria akava'ijoaravini kaba'i ada akadiDeus, iogavini anofiki ida kadadeu-ra khai ani'aravini, ni-akanamasiviki ida makhira amovana.
19 Hari. Oniaroa, Nabucodonosor va'ora kaihamahikaraho'aha adani Sadraque, ni-va'ora vavajahapa'itxiki. Va'ora honariaha adani kidihonai abono siho kakaraho kabavini-ra avakanafavini. Kaafakaraho'ihi ida siho kabavini.
20 Va'ora hoanaria'aha adani kidisorara vadanoki Sadraque, Mesaque, Abede-nego vihiki-ra va'ora vidabohavini, va'ora avisonajakosivini siho kakaraho kabavini kabodinia.
21 Vakaimahavini kaba'i ida vakadimakari kaidivaki jahaki nokiani, sirora, makari vaka'da'dihaki hiki. Va'ora vidaboha'aha adani makhira. Va'ora vidabohavini naothinia va'ora avisonajakosi'aha siho kakhororoki kaafani akarafiaki kabodinia.
22 Hari. Arabo kaka'da'dini va'ora honariadanoki'aha adani kidisorara, jorakia vanaaba'ihi ida athi. siho kaafani akarafiani mani ida sorara-ra va'ora nakaija. Vaabini'aha adani sorara Sadraque, Mesaque, Abede-Nego vihiki-ra va'ora avibaihaki siho kania.
23 Vidabohana kaba'i avavoronijakosi'aha siho kabavini kakaraho kabodinia.
24 Hari. Gaamananijoraki'aha ada Nabucodonosor. Va'i bodini varani karaho'aha, va'ora nana'dohi'aha adani nava'isohiva abono:
- Avahoarabakosimanira adani makhira vidabohaki, siho kabodinia vahokahi'iki?
- Hai oamani vakhani'aha adani nava'isohiva abono.
25 Nabucodonosor va'ora ni'aha:
- Vada va'ora avani'ijakosi! Va'ora onokiki adani makhira avako'bamahakhamaki siho kabodinia vaadahana. Ni-vidabohajanaki. Ni-vamakhaniki. Hi'o hoariha, Deus kaisai nokiana fori hiki o.
26 Hari. Nabucodonosoa bikanamakari'ihi ida siho kakhororoni kabavini kabakathani, va'ora baranaha'aha:
- Sadraque, Mesaque, abede-Nego. Avakanamasivi'oamanira ada Deus danoki nama hojaki, kidihonai abono a'oni. Vikhaonani bana. Hida vikhami. Oniaroa, siho kabodinia vikhaonani'aha adani Sadraque, Mesaque, Abede-Nego vihiki.
27 Vajoroni'aha adani arabo pitani karaho-ra vavaka'da'diki, arabo pitani pa'itxi-ra vavaka'da'diki, arabo vaka'da'diva nava'isohiva abono vihiki. Vada va'ora vani'aha adani makhira siho kabodinia vahoja'iki. Ni-vamakhaniki. Ni-vaasafi namani khoroniki, ni-vaka'da'di kaafani akaha'di'iki, ni-aha'diki ida vakadimakari. Ni-kahojaki ida siho kajahani vakadiania.
28 Oniaroa Nabucodonosoa bini'aha:
- Khai oni'aki ada Sadraque, Mesaque, Abede-Nego khama vakadiDeus. Ovaria bikarona'iki ada ibavi kaija'arini va'ora akava'ijoara kaimoni adani kidihonai abono. Deu-ra vavakaijokavini mani ida kodihonari-ra vakajonivini hi'ia. Ni-vavamakhaniki ida vakadimahi pohimajani vakadiDeus kaimoni. Ni-vanofipa'itxiki ida deus hoariha viaha vakajo'athararina, khai vani'ara kaimoni.
29 Ovava'isohihiki bana ida kodihonari hoariha, ija'ari hahavia vanaabaja kaimoni. Nação hahavi kaija'arini, athi hahavia vaathiki adani. Nimania hida honari athini:
- Ija'aria bikanavaranihaki ada Sadraque, Mesaque, Abede-Nego vihiki vakadiDeus, kidivarani jahariki abosini ida ija'ari imani pitahatahani, thararaki bana ida gorani. Ni-hojaki ada deus hoariha ija'ari-ra akava'ijoavini siho kabodinia.
30 Oniaroa, arabo kaka'da'dinia biana'ba'diki ida Sadraque ija'ari-ra va'ora vavaka'da'divini kabadanahi.