Vadama'ianaki ada Nabucodonosor
4
Hovani, arabo kaka'da'dini Nabucodonosor ooniki ho. Onojiriki hida oathi kapapirani ija'ari arabo hahavia vahojaki, nação hahahvi kaija'arini vakadimoni. Athi hahavia avaathiki a'oni. Jahava bana ida avakadimahi.2 Khai oni'aki hida oathi vara a'onira oni'avini hiki. Deus danoki nama hojakia bada bini'a'iki ida kidibadani danoki hora kajoamorara kaimoni. Akava'ibodivaraniki ida kidibadani.
3 Kidibadani danokia bikarajomiki ida jahana.
Danoki ida kidibadani haria nava'ibodivarani'iki.
Anokhomirihi bana ida hahavi-ra va'ora vaka'da'divini.
Va'ora vaka'da'diki adani ija'ari hahavi vahokiki.
Va'ora vaka'da'diki bana adani ija'ari hahavi vanamitharonisiagaki mahi anokhomirikia.
4 Hovani, Nabucodonosor ooniki ho. Ogorana karahoa ohoja'iki ho. Ova'i jahajaha'iki ho. Ni-nahina-ra okainamo'iki.
5 Ovadama'iki ho. Kodivadami hida hora naofini'ia, ova'i-ra soko ani'aja. O'omana ovadi'ina ovadama'iki ho. Hora naimahida'iki ida onoki'iki. Jahari'oamani'ia ida kodivadami.
6 Hari. Oniaroa, va'ora obaranaha'aha adani oogavahariki-ra avigaki Babilônia sidajia vahojaki kodiania vikhana. Onofi'iki ida hora vanava'isohivini kodivadami nahina hinia.
7 Vakaikahi'aha adani oogavahariki-ra avigaki, arabani, nahina namitha'iariki-ra avigaki, boviri rajomi hina-ra avigaki, kaijorahi-ra avigaki vihiki. Vakaikahina vani va'ora onava'isohivini hi'ia ida kodivadami. Ni-vakaaboka'iki nahina hinia hora vanava'isohivini.
8 Oniaro, naothinia kha'aha ada Daniel kodiania. Onanamitha'ianahi ida kodivadami. (Daniel-ra onaonivini onii hoariha Beltessazar, kodideus onina ida. Deus vama'onahana jahaki hojaki kidiania.)
9 Oni'aha:
- Beltessazar, ivani ogahai abono vakadika'da'di. Oogaki ida deus vama'onahana jahaki hojani kadania. Ikaabokaki ida nahina hahavi ahojaki-ra ivava'isohihivini nahina hini. Vara ovani'aki bana hida kodivadami, hora ivava'isohija kaimoni nahina hinia.
10 O'omana kaba'i nimania ida oniki'iki. Vada oni'avini kaba'i, oniki'iki ida ava hoarini arabo bodi pania hojaki. Nama hi'oamani'ia ida.
11 Avijavaki ida ava karaho, karaki, nama-ra kaitonia'iki ida ava miini. Arabo hahavi nokiavahaki ida ava.
12 Nikiani jahaki ida afani. Nosoroki ida ava bononi, havahaki kaimoni ida ihi'ia jahaki. Ava vadini nabo'ania vaibaviki adani igitha araboa vahojaki. Igitha raboki vaipohiki hahavi vaagorahaki ava vadinia. Igitha hahavia vahaki ida ihi'ai.
13 O'omana vada onina kaba'i, onoki'iki ada athi vikhava abono khana kodiania. Nama kha'iki ada Deus ibavi kaija'arini.
14 Athii 'barakia bibaranahaki:
“Vanoba'a bana hida ava. Avava'boa'boahahavi bana hida ava vadini. Avanahokahihi vanahoaraharaha bana ida ihi'ai. Avigava bana adani igitha ava nabo'ania vahojaki. Araboa ida igitha raboki ava vadinia hojaki.
15 Hojava bana ida ava 'damani, 'damani abohani hiki. Hojava bana ida ava 'damani ferro, bronze hikia dabohani. Nami bodinia hojava ida ava 'damani hogoi hararania.”
Hari. Oniaroa, aabosiki fori hi'iki ida vadami. Vara ni'a'ianaha ada Deus ibavi kaija'arini:
“A'bava ada makhira ahakabara kapahania. Ibaviva ada, igitha hogoi hiki hararania.
16 Aabosiva ida kidiva'ibodivarani. Aniava ida makhira kava'ibodivarani. Bivahojava ida igitha kava'ibodivarani. Radahava bana ida badara 7 hiki ipohini.
17 Nimania ida athi vikhava abono kavarani. Deus ibavi kaija'arini vakadihonari hida athi. Namithaki kaimoni hida varani kidiania, ija'ari hahavia avigaja kaimoni ada Deus hoarana nama hojaki, ija'ari kamahi-ra vaka'da'diki. Deus makhira arabo kaka'da'dini hina-ra nofiha; ija'ari-ra vaka'da'divini-ra vahonariahiha. Deua binagathogathoki ada makhira hana hina binofiki. Makhira abono-ra vaboraborahavini-ra nofiriha; Deua binagathogathoha.”
18 Hari. Onivani fori hija ida kodivadami kavaranihi. Hovani Nabucodonosor, oniki'iki ida. Beltessazar, onofiki ida hora inava'isohivini kodivadami nahina hinia. Oogavahariki-ra avigaki kodiaraboa vahojaki-ra va'ora vara oni'avini hi'iki hida kodivadami, ni-vakaaboka'iki ida hora vanava'isohivini nahina hini. Ivani, ikaabokaki ida. Deus vama'onahana jahaki kadania hojani mani ida ikaabokavini hija.
Daniel vadami-ra vara vani'aki
19 Hari. Va'i soko iniha ada Daniel. Daniel onina hoariha Beltessazar. Kidiva'ibodivarania binaimahida'aha ada Daniel. Arabo kaka'da'dinia bini'aha:
- Beltessazar, hari'a bana vadami ira ka'barava. Hari'a bana vadami nahina hini ira ka'barava jaboni.
Beltessazar athi bigathani'aha:
- Kodika'da'di. Onofiki vanivaha ida vadami ija'ari ira vavajahariki vakadimoni hini! Onofiki vanivaha ida vadami nahina hini ira vakaimajahariki vakadimoni hini.
20 Ava ida inokija, avijava'iki ida nama hiki, karaki ida. Nama-ra kaitoniaki jaboni ida ava miini, arabo hahavia nokiavahaki ida.
21 Jahaki nokiani ida afani, nosoroki ida ihi'ai, igitha hahavia vahaki kaimoni. Ava amokhinini kania vahojaki adani igitha araboa vaadahaki, igitha nama varaboki, vagorahaki ava vadinia.
22 Ivani, Nabucodonosor ava nama hiki kaaraki inofiki'iki fori ihiki i. Va'ora ivaka'da'diki adani arabo hahavi kaija'arini. Ija'ari hahavia avigaki ida ionini, va'ora ikaabokaki adani.
23 Inoki'iki ada athi vikhava abono khana. Nama khaki ada Deus ibavi kaija'arini. Ikamitha'iki ida athi:
“Vanoba'a bana hida ava. Vanihima bana. Hojava ida ava 'damani ferro, bronze dabohani hogoi hararania. Hojava ida ava 'damani abohani nami imani bodinia. Kharariki bana ida ahakabara makhira namana a'bara kaimoni. Igitha araboa vaibaviki fori hiva ada makhira 7 badara ipohini.”
24 Kodika'da'di, ira onava'isohivini hiki bana ida vadami nahina hini. Deus nama hojaki ira nava'isohijoravini hiki bana ida namithaki kaimoni kadania.
25 Ija'ari ira avakakojaki bana i vakadiania. Iibaviki bana i igitha vahararana. Ihaki bana ida hogoi 'daama kahidari fori ihini. Ahakabara ira na'baki bana i. Nimania bana ida ihojani 7 badara ipohini. Radahahi ida badara ipohiki, iogaki bana ada Deus nama hojaki, ovari ka'oa arabo hahavi kaija'arini-ra va'ora vaka'da'diki. Ovari oa binagathogathora ada makhira hana hini binofiki, ipohina-ra va'ora vaka'da'dira kaimoni.
26 Hari. Deua bivahonariahiki ida ava 'damani, ava 'damani abohani hiki nami imani bodinia hojaroni'ini. Ira onava'isohivini hiki bana hida varani. Deus nama hojaki ija'ari hahavi-ra vaka'da'divini kavaranihinia ikavaranini kamahini, ovaria binajoiki bana hida badani kadania, ija'ari-ra ivaka'da'di'ianaja kaimoni.
27 Kodika'da'di, iva'aha bana hida a'onira onava'isohivini. Ikava'ipahinika'oa bana ida kadahojai Deua bivajahariki. Bada ini'a bana ida hojai asohiki jahaki. Hari'a bada ini'ajana bana ida hojai asohiriki. Va'ora naibavijahajahaki bana adani ija'ari vajaharihariki. Kadahojai-ra inajahahi; Deus kadamahi jahaki-ra na'oadahi.
Namitha'iki ida vadami kavaranihi
28 Hari. Namithahahavi'ihi ida vadami kavaranihi Nabucodonosor kania.
29 Radaha'aha ada 12 masiko ipohinia, vadami-ra nokivini naothinia. Adahamiha ada arabo kaka'da'dini gorana karaho 'da'dini a'ani sohifiaki namania.
30 Abono-ra ni'aha:
- Hovani ka'oa ovahonariahi'iki hida sidaji karaho jahaki amonahani kodimoni. Jahaki hida Babilônia sidaji oibavi kaimoni hini Arabo kaka'da'di'dini gorana karaho-ra ovahojaki ho, vahariha vanokihi, avigahi ida odanona, okanahina'ahapikina. Ni-hojaki ida ija'ari hoariha hofori hiki.
31 Vara nina oadani, Kamithavahaki ida athi nama khani:
- Arabo kaka'da'dini Nabucodonosor ioniki i. Namithaki bana ida kadania Deus ira nava'isohijoravini hi'iki. Ka'da'di ihijanarihi bana. Ania'iki kadania hida ka'da'di kabadani.
32 Ija'ari ira vaakojaki bana i vakadiania. Iibaviki bana i igitha vahararana, Ihaki bana ida hogoi 'daama kahidari fori ihini. Radahaki bana ida 7 badara ipohini. Radahani naothinia vara ivani'aki bana ada Deus. Kadavarani hiki bana ada Deus hoarana ka'oa arabo hahavi kaija'arini-ra vaka'da'divini. Ovari oa binagathogathora ada makhira hana hina binofiki ipohina-ra va'ora vaka'da'divini - nihi ida athii.
33 Jorakia namitha'iki ida varani Nabucodonosor kania. Ija'ari vaakoja'aha vakadiania hojajanarara kaimoni. Biha'ihi ida hogoi 'daama kahidari fori hi'aha. Ahakabara bina'ba'iki ada. Kokoi na'bahaha bihi oadani fori hiki ida ka'da'di kaafani ka'oadani. Sa'a kanako'dini ka'oadani igitha raboki 'damani kanako'dini ka'oadani fori kihiki.
34 Hari. Anokhomi'ihi ida badara hora nava'isohijora'avini hiki. Hovani, Nabucodonosor, vada oni'amanani'ihi ida nama, sohi'ianaki ida kodiva'ibodivarani. Oniania khai oni'a'aha ada Deus nama hojaki. Varani jahakia vara ovani'aki ada Deus. Anokhomiriki ida kidimahi. Ovava'iha'iki ada Deus jahaki danoki. Anokhomiriki ida hahavi-ra vaka'da'divini. Va'ora vaka'da'diki adani ija'ari vahakiki hahavi. Va'ora vaka'da'diki adani ija'ari vanamitharonisiagaki mahi anokhomirikia.
35 Nahina vihiriha adani ija'ari hahavi araboa vahojaki vadanoriki. Nahina Deua binofihi; bada bini'ahi. Va'ora honariafihaki adani ija'ari vadanoki nama vahojaki, ija'ari araboa vahojaki vihiki. Ni-ija'aria bikaabokaki ida Deua binofiki-ra nadabavini. Ni-ija'aria bikaabokaki ida Deus-ra kaabanivini:
“Asohiriki ida bada ini'aki.”
36 Hari. Kodiva'ibodivarani sohi'ianani vani ija'ari hora vavikha'ianahi vakadiania oibavina. Ohoja'ianana ogorana jahaki kania. Ija'aria khai vani'a'ianahi ida ohojana, varani jahakia vara hora vavani'aha. Okaimaha'ianahi ida kodimakari kaidivaki jahaki. Kodihonai abono, ogahai aaono, sorara vavaka'da'diva vihiki hora vanofi'ianaki va'ora ovaka'da'dira kaimoni. Ovithi'ianaki ho arabo kaka'da'dani kavithi ibavini jahakia. Jahani arafia'iki ida kodimahi va'ora ovaka'da'divini.
37 Hari. Hovani, Nabucodonosor vara ovani'aki ada Deus nama hojai. Khai oni'aki ida kidibadani hahavi asohiki jahaki. Onofiki ida danona, jahana vahoariha avigavini. Ovaria bikaabokaki ida ija'ari abononi vaboraborahaki va'ini-ra anaipahihivini.
Hari ida vani oamani Nabucodonosor varani hina.