Saul, kidisai khama vaabiniki danodanoi kania
31
Hari. Oniaroa, filisteus va'ora vanigafaniha adani Israel kasorara. Oniaroa, aviga'aha adani Israel kasorara. Vaipohiki vaabiniki arabo namahiki Gilboa onikia.2 Oniania, filisteus va'ora vanajoikahi'aha adani Saul, kidisai khama. Va'ora vanaabini'aha adani Saul kaisai Jônatas, Abinadabe, Malquisua vihiki.
3 Oniaroa, Sau-ra vanajoikahidanoki'aha. Filisteus kasorarani biavini'aha abiha, binasii'aha ada Saul.
4 Oniaroa, Saua bini'aha ada kidisa'ai kaiba'iva abono:
- Ivani ka'oa hora naabini kadasa'aia. Ni-va'ora onofiki adani ija'ari Deu-ra avigariki hora vanaabinivini. Ni-onofiki ida vajaforia hora vanaabinivini - niha ada Saul. Sa'ai kaiba'iva abonoa ni-binofiki ida Sau-ra naabinivini. Imahidana mani ida Sau-ra naabiniravini hija. Oniania Saua bigathi'ihi ida kidisa'ai, ovani oa abono-ra nabini'aha.
5 Oniaroa, sa'ai kaiba'iva abonoa binoki'aha ada Saul abono-ra naabinivini, abono-ra naabini'aha jaboni.
6 Nikia Saul, kidisai avahoarabakosiki, kidisa'ai kaiba'iva abono, kidisorara vaipohiki vihiki vaabiniki.
7 Hari. Oniaroa, Israel kaija'ari arabo vahafonini pitanija vahojaki, ija'ari vaina Jordão oniki pitanija vahojaki vihiki va'ora vanoki'aha adani Israel kasorara avigana. Vagamithaki jaboni ida Saul, kidisai khama vaabinina monini, oniani ida vakadisidaji-ra vanahojahavini hija. Filisteua vanokihi ida sidaji kanahinarini, oniani ida vava hojavini hi'ia.
8 Ka'afokajomani filisteus avikha'aha, vaabini'iki vakadimakari-ra vaanihara kaimoni. Vakaragaha'ihi ida Saul, kidisai vihiki vaba'ona arabo namahiki Gilboa onikia.
9 Oniania avakava'boa'ihi ida Saul ka'da'di. Vaaniki jaboni ida kidisa'ai, kidimakari 'dakhaki hiki. Oniaroa, va'ora vahonaria'aha adani athi avikhava abono filisteus vakadiarabo hahavi kania va'ora vakanamonira kaimoni Saul vaabini'ina. Oniaroa, vakadideus amovana hahavi kagorania avikha'aha, va'ora vakanamonira kaimoni adani filisteus kaija'arini.
10 Oniaroa avavikha'ihi ida Saul kasa'ai vakadideus Astarote oniki gorana. Oniania viro vani'a'ihi ida Saul aba'ona Bete-Seã sidaji oniki kavasiribanini namahikia.
11 Hari. Oniaroa jabes sidaji kaija'arinia vakamitha'ihi ida filisteus moni Saul aba'ona-ra viro vani'avini sidaji kavasiribaninia.
12 Oniania makhira vaofiniriki avikhaki Bete-Seã kania. Joma kaba'i vaadahaha. Vakaikahi'aha, vaani'ihi ida Saul, kidisai vihiki vaba'ona. Avavikha'ihi ida vaba'ona Jabes sidajia. Avanaha'di'ihi ida Saul vaba'ona. Nimania ida vakadihojai.
13 Oniaroa vaka'dama'ihi ida vajarona aha'di'iki ihi'ai avani nabo'ania. 7 mahi va'ora no'bairiki va'ora vanakaidivakarahovini adani Saul kohana, kidisai kohana khama.