3 JOÃO
Joãoa bikaronaꞌianaki ida athi kapapirani
1
Gaio kaimoni hida oathi kapapirani.
Hovani,
Jesus kaijaꞌari navaꞌisohiva abono ho,
onajiriki hida papira.
Kaꞌoa hiki hida ira onakaidivavini.
2 Kodivaꞌahi,
Deu-ra okanikhariabakhiavini hiki kadaimoni.
Onofiki ida kadamahi jahani avijavani.
Onofiki jaboni ida ikavamonirini ihojani.
Deus kania iajahamisijahakini vani kadamahi hahavi makhanirini-ra onofija.
3 Vakaikahiꞌaha adani arigamina kodiania.
Hora vakanamonivini hiꞌihi ida varani ihini.
Vakadivarani khai hora niꞌaꞌiki ho.
Hora vakanamonivini hiꞌiki ida Cristo monina kaꞌoa hini-ra inaabahahaꞌoadahavini,
ni-ikavaꞌipahinipaꞌitxiki ida Cristo kahojai.
4 Khai hora niꞌaꞌahapikiki ida kodisai fori vihiki vamonina-ra okamithavini,
Cristo kahojaia vakahojaijahakina.
Joãoa khai biniꞌaki ida Gaio kahojai asohiki
5 Kodivaꞌahi,
ira onakaidivaki ho.
Jahaki ida kadabadani.
Arabo hoariha kaijaꞌarini vihina kabaꞌi adani arigamina kadania vakaikahiꞌina,
vaꞌora ikajoamoraꞌiki adani.
Ni-ikavaꞌipahiniki ida Jesus ipohina-ra vaꞌora iakodiabakhiavini.
6 Jesus kaijaꞌari vajoroniki kania vakaikahiꞌaha adani Cristo monina-ra avavaadahaoniki.
Haria vananamithavini hiꞌiki ida varani ihini.
Vakadivarani hiki ida vaꞌora inakaidivavini.
Gaio,
vaꞌora bana kakodia hadani kadania vakaikahiki ibavi hoariha avikhaꞌianara kaimoni mahija Deua khai biniꞌavini.
7 Cristo kaimoni ida vakadibadani,
Cristo monina-ra avananamithaonivini.
Ai vihina viahania Cristo kaijaꞌari vihirikia vanofihi ida vakadiadahai vaakodiavini vakadinahina,
ni-vagathaniki.
8 Harivani Cristo kaijaꞌari arihiki hari,
jahaki ida avaadahaoniki-ra vaꞌora aakodiavini.
Vaꞌora aakodiaha adani makhira,
aakodiahi ida vakadibadani kaꞌoa hini jaboni Cristo kaimoni.
Diótrefes, Demétrio khama varani vihina hida
9 Onajiriꞌiki ida oathi paꞌitxi papira hoariha.
Okaronaꞌihi Jesus kaijaꞌari vajoroniki vakadiania.
Diótrefea binofiki ida Jesus kaijaꞌari-ra vaꞌora vakaꞌdaꞌdivini.
Ni-binaabavini binofiki ida oathi papira hojaki.
10 Okaikahina kamahini avakadiania okaabaniki bana ada Diótrefes.
Vara oniꞌavini hiki bana ida kidihojai asohiriki.
Vara ovaniꞌaki jaboni bana ida haria kanavaranihavini varani jahariki,
kidikorijanahi hikia.
Ni-arajomaki kidimoni hini ida kidivarani jahariki.
Diótrefes kania vakaikahiꞌaha adani Jesus vaipohihava abono vahoariha avaadahaoniki,
ni-vaꞌora gathaniꞌiki.
Vaꞌora nadabaki adani Jesus kaijaꞌari kidiania vahojaki,
vaꞌora vagathanirara kaimoni adani Jesu-ra vanofiki avaadahaoniki.
Diótrefes vaꞌora niꞌaha adani Jesus kaijaꞌari vajoroniki kidiania:
—Ni-ovajahaki ida avaadahaoniki-ra vaꞌora avakakodiavini.
Onofiki ida avarakaraꞌoni jaboni akadiania — niha.
Nimania hida Diótrefes kahojai asohiriki.
11 Hari.
Kodivaꞌahi Gaio,
ikabanafo bana ida hojai jahaki.
Hariꞌa bana ikabanafo ida hojai jahariki.
Deus kaijaꞌari hiki ida hojai jahakia kahojaiki.
Hojai jaharikia kahojaiki ni-Deu-ra ogaki.
12 Ijaꞌari hahavia vara vavaniꞌaki ida Demétrio kahojai jahaki.
Kaꞌoa hiki ida kidihojai.
Harivani jaboni vara avaniꞌaki ida kidihojai jahaki.
Avarigaki ida kaꞌoa hini akadivarani.
Anokhomiki ida João kavarani
13 Hida asia hojahi kodivarani oadaki ira onanamithavini hiki kaimoni.
Ni-onofiki ida kodivarani-ra onajirivini.
14 Onofiki ida ira onokijorakivini,
ariabono vara akaniꞌakhamaja kaimoni.
15 Onofiki ida ivaꞌini jahajahani.
Kadavaꞌahi hahavi akadiania vahojaki ira vakaꞌivanitiki hadani.
Vaꞌora kaꞌivaniti bana adani afohanana akadivaꞌahi kadania vahojaki.
Hari ida vani oamani kodivarani,
João athi hida.