2 JOÃO
Joãoa bikaronaꞌianaki ida athi kapapirani
1
Oigamina.
Kadaimoni hida oathi onajiriꞌiki,
kadaisai vihiki khama.
Hovani onajirija hida hihida oathi papira.
Jesus kaijaꞌari navaꞌisohiva abono ho.
Aꞌonira onakaidivaki ho.
Kaꞌoa hida aꞌonira onofijahakivini.
Vahoariha jaboni aꞌonira vanakaidivaki,
hivaꞌoani Deus athi kaꞌoa hini-ra vakapoariki.
2 Deus athi kaꞌoa hini-ra akapoarivini mani ida aꞌonira anakaidivavini hija.
Hojahahaꞌoadahaki ida Deus athi kaꞌoa hini akadiania.
3 Aogaki ida Deus athi kaꞌoa.
Anakaidivaki ida ijaꞌari hoariha,
oniani ida Deus akadiabiꞌi,
kidisai Jesus Cristo khama haria vakajoamoravini hija,
haria vavaꞌadivini hija,
haria vanoꞌavini hija jaboni vaꞌi jahajahania.
Kaꞌoa hiki hida Deus haria nakaidivavini
4 Hari.
Khai oniꞌakarahoꞌiki ida kadaisai vahoarahanana varani vihina-ra okamithaꞌavini.
Vanaabajahakiꞌiki ida akadiabiꞌi athi kaꞌoa haria honariavini hiꞌiki.
5 Oigamina,
ira okanikhariavini hiki ariabono akanakaidivakhamavini afohahavi.
Honari jaꞌdini hirihi hida onajirija.
Deus athi-ra akamithabiininivini vani akamithaꞌia hida honari,
ijaꞌari abononi kanakaidivakhamajahakivini.
6 Deu-ra anakaidivahi;
kidihonari anaabaha.
Deu-ra anakaidivarihi;
ni-kidihonari anaabajahakiki.
Deus athi-ra avakamithabiininivini vani avakamithaꞌia hida honari.
Deu-ra vanakaidivahaꞌoadaha bana,
vahoariha-ra vaꞌora vanakaidiva jaboni afohaꞌoadaha bana.
Nimania hida Deua binofiki akadiania.
7 Hari.
Arabo hahavia avakakhanakhamaha adani korijanahi abono vaipohiki.
Vakadivarani hiki ida Jesus Cristo makhira ihirina.
Korijanahi abono kavarani hida varani.
Cristo-ra vakaimajahapaꞌitxiriha adani.
8 Avaabononi avakavaꞌigairi bana mahija vakadikorijanahi avakajariꞌdavini.
Vakadikorijanahi avakajariꞌdarihi;
avakadibadani abani akamadahi;
ni-avagathaniki bana ida avakadibadani abosini.
Vakadikorijanahi avakajariꞌdahi;
avagathanihahavihi ida avakadibadani abosini Deus aꞌonira noꞌavini hiki kaimoni.
9 Ijaꞌari Cristo kaꞌojomoꞌihi athini-ra naabahi;
Cristo,
kidiabiꞌi khama vahojaha kidiania.
Ijaꞌari Cristo kaꞌojomoꞌihi athini-ra naabarihi;
bianahoarihahi ida Cristo athi;
ni-Deus hojaki kidiania.
10 Avakadiania kaikahihi ida ijaꞌari Cristo monina jahaki-ra nasohiriki,
hariꞌa bana vagathaniꞌa avagorania.
Hariꞌa bana vaniꞌa ida ijaꞌari Cristo athi-ra nasohiriki:
—Onofiki ida vaꞌi jahajahani hojani ivaꞌini bodinia.
11 Vaꞌi jahajahani hojani-ra avanofihi kidiania,
avagorania oꞌoini avakaboaꞌihi jaboni,
oniani ida kidihojai jaharikaꞌoakia kahojainia avakakodiavini hija bana.
João athi anokhomini hida
12 Hojaki hida kodivarani oadaki aꞌonira onavaꞌisohivini hiki kaimoni.
Ni-onofiki hida oathi papira onajiriki-ra onaꞌoadavini.
Onofiki ida avakadiania ovaaꞌahahana,
aꞌonira onokivini vara ariabono akaniꞌakhamaja kaimoni,
oniani ida khai ariabono akaniꞌakhamavini-ra nahihavija bana.
13 Aꞌonira vakaꞌivanitiki hadani kadadia kaisai.
Deua binagathogathoꞌiki hida kadadia jaboni.
Hari ida vani oamani kodivarani,
João athi hida.