Nahina Jaharia bivakaꞌdaꞌdiki-ra aakananaboꞌajararivini varani hini hida
5
Aihotahi abono hada Jesus,
Deua bihonariaki ada kaꞌdaꞌdi hina.
Deus kaisai mani ida ijaꞌari Jesu-ra kajariꞌdariki aihotahi abono hina.
Anakaidivaha ada isai kaabiꞌi;
vaꞌora anakaidivaha jaboni adani kidisai.
2 Deu-ra anakaidivahi;
athi anaabaha jaboni,
oniani ida Deus kaisai-ra vaꞌora anakaidivavini-ra aogavini hija.
Arigamina vihiki adani.
3-4 Deu-ra anakaidivahi;
kidihonari anaabaha.
Deus kaisai hahavia vakaabokaki ida nahina Jaharia bivakaꞌdaꞌdiki-ra akananaboꞌajararivini,
oniani ida Deus kahonari-ra anaabavini-ra akaabokavini hija.
Jesu-ra avakaijokavini mani ida nahina Jaharia bivakaꞌdaꞌdiki-ra aakananaboꞌajararivini-ra akaabokavini hija.
5 Hana hini vania bikaabokaja ida nahina Jaharia bivakaꞌdaꞌdiki-ra akananaboꞌajararivini?
Ijaꞌari Jesus Deus kaisai hina-ra kajariꞌdarikia bikaabokaki ida nahina Jaharia bivakaꞌdaꞌdiki-ra akananaboꞌajararivini.
Jesus Deus kaisai hina varani hina hida
6 Deus kaisai oamani ada Jesus Cristo.
Jesus Deus kaisai hina abono-ra kavarajomivini ida paha kanaꞌina.
Jesus Deus kaisai hina abono-ra kavarajomivini jaboni ida amana ahovariꞌini abiniꞌina.
Rajomi ꞌbamakhama ida paha,
amana hiki.
Maꞌonahai Jahaki Jesus vaꞌi-ra nahonariahihivini vani badani danoki ipohikia kabadanira ada Jesus,
oniani ida Deus kaisai hina Maꞌonahai Jahaki haria nanokiahivini hija.
Kaꞌoa hiki ada Maꞌonahai Jahaki,
oniani ida nahina kaꞌoa hini-ra nanokiavini hija.
7 Rajomi ahoarabakosikia karajomiki hida Jesus Cristo varani hina kaꞌoa hini,
Deus kaisai hina.
8 Rajomi ada Maꞌonahai Jahaki Jesus kania hojaki.
Rajomi ida Jesus kanaꞌina paha.
Rajomi jaboni ida Jesus amana ahovariꞌini.
Ahoarabakosiki hida rajomi.
Rajomi ahoarabakosikia binanokiaki ada Jesus Deus kaisai hina.
9 Hari.
Ijaꞌari nokiva ogava abono haria navaꞌisohivini hiki ida binokiꞌiki;
ni-akajariꞌdaki.
Asohiki ida nokiva ogava abono athini-ra akajariꞌdaravini.
Nokiva ogava abono kaꞌoa ada Deus.
Asohini arafiaki ida Deus athi-ra akajariꞌdaravini.
Kaꞌoa oamani ida Deus athi.
Ovaria vara bivaniꞌaki ada Jesus Cristo kidisai hina.
10 Ijaꞌari Deus kaisai-ra kajariꞌdarikia biogaki ida varani kaꞌoa hini vaꞌini bodinia.
Ijaꞌari hoariha vani ida Jesus Cristo Deus kaisai hina kavaranihi-ra kajariꞌdaja.
Korijanahi kavaranihi bivanihaki ida Deus kidisai-ra vara vaniꞌavini,
oniani ida bikajariꞌdavini hija.
11 Nimania hida Deus athi haria navaꞌisohivini hiꞌiki:
Deus haria noꞌavini hiꞌiki ida mahi jaꞌdini anokhomiriki kidiania.
Deus kaisaia binakamaꞌdaꞌiki ida ijaꞌari kamahi jaꞌdini anokhomiriki.
12 Ijaꞌaria bivahojaha ada Deus kaisai,
kidiꞌaihotahi abono hina,
bivahojahi jaboni ida mahi jaꞌdini anokhomiriki.
Ijaꞌaria bivahojariha ada Deus kaisai,
kidiꞌaihotahi abono hina;
ni-bivahojaki jaboni ida mahi jaꞌdini anokhomiriki.
Ijaꞌari kamahi jaꞌdini anokhomiriki varani hini hida
13-14 Hari.
Deus kaisai-ra avakajariꞌdariki,
avakadimoni hida oathi onajiriki,
avarigaja kaimoni ida avakadimahi jaꞌdini anokhomiriki-ra avavahojaꞌavini,
oniani ida Deu-ra avanamaakarivini-ra avifiniravini hija,
vara avaniꞌara kaimoni.
Deu-ra akanikhariavini hihi ida nahina haria noꞌavini hini binofiki;
aogajahakihi ida akadikanikhari-ra kamithaꞌavini.
15 Aogaki ida akadikanikhari-ra mitha niꞌavini,
oniani ida akanikhariakia haria noꞌavini-ra aogavini hija.
16 Hari.
Avanokihi bana ida arigamina hojai asohirikia kabadanini,
Deu-ra vakanikharia bana bikajoamoraja kaimoni.
Hojaki ida hojai asohiriki,
ijaꞌaria bada biniꞌavini kabaꞌi,
asia binofiki ida Jesus ipohina hini,
Deus kania okhani.
Deu-ra vakanikharia bana,
arigamina bikavaꞌipahinija kaimoni ida kidihojai asohiriki.
Deua bikamithaki bana ida avakadikanikhari,
binaꞌbiraki bana ida hojai asohiriki,
binajahaꞌianahi ida arigamina kamahi.
Hari.
Hojaki ida hojai asohiriki hoariha ijaꞌari-ra najoiribaniriki,
okhajanaria kaimoni Deus kania.
Abaꞌoki fori hiki ida ijaꞌari.
Ni-binofiki ida okhani,
bikajoniki ida Deus kakajoamorahi.
Ni-aꞌonira ohonariavini hiki ida Deu-ra avakanikhariavini ijaꞌari nikia kahojaiki kidihojai asohiriki aniani.
17 Deua bivajahariki ida hojai jahariki hahavi,
ijaꞌari abaꞌoki fori nihaki.
Kabaꞌi,
ni-hojai asohiriki hahavia binajoiribaniki ida ijaꞌari Deus kania okharia kaimoni.
18 Aogaki ida hojai asohirikia akahojaibakhiarina,
Deus kaisai arihiki hari.
Jesus,
Deus kaisai hina haria akadavaꞌaki ada afohaꞌoadaha.
Ni-Jaharia bikaabokaki ida haria saarivini Deus saꞌa kabodinia.
19 Harivani,
aogaki ida Deus kaijaꞌari arihina.
Jahari vavaꞌi binahonariahihiki adani ijaꞌari hahavi Cristo-ra vanofiriki.
20 Aogaki ida Deus kaisai khaꞌina ijaꞌari vakadiania,
haria noꞌaꞌiki ada kidiꞌogahaia,
aogara kaimoni ada Deus kaꞌoa.
Deus kaꞌoa kania akaramisiki hida akadimahi.
Kidisai Jesus Cristo kania akaramisiki jaboni hida akadimahi.
Kaꞌoa hiki ada Deus.
Kaꞌoa hiki hida ijaꞌari kamahi jaꞌdini anokhomiriki.
21 Kodisai,
hariꞌa vavakaijoka ada deus kaꞌoa hiriki.