2 PEDRO
Pedroa bikaronaꞌianaki ida athi kapapirani
Pedroa bikaronaꞌiki ida athi kapapirani hoariha
1
Hovani Simão Pedro,
onajirija hida oathi papira hoariha.
Jesus Cristo kahonai abono ho.
Jesus Cristo athi avaadahaoniva abono ho jaboni.
Jesus Cristo kaijaꞌari,
avakadimoni hida oathi papira jiriki.
Deus aꞌonira kajoamoraꞌiki aꞌoni avavakaijokara kaimoni ada Jesus Cristo.
Onivani fori hija ida haria kajoamoravini jaboni.
Akajariꞌdaravini vani agahinahahaviꞌia kidiajoamorahia nahina jahani arafiaki.
Avakaijokaki ada Jesus Cristo,
ovari haria akavaꞌijoaꞌiki,
akadiDeus hina.
2 Oigamina,
Deu-ra akanikhariavini hiki aꞌonira kajoamorahaꞌoadahara kaimoni,
aꞌonira noꞌara kaimoni jaboni vaꞌi jahajahania.
Onofiki ida Deu-ra avarigavini avijavani.
Onofiki jaboni ida avijavani bana akadikaꞌdaꞌdi Jesu-ra avarigavini.
Avarigavini avijavani mani ida avavaꞌini jahajahani-ra anaꞌbaꞌdija.
Deus haria nagathogathoꞌiki hari
3 Hari.
Deus danona mani ida haria kajoamoravini hija kidihojai jahakaꞌoakia akahojaina,
oniani ida hojai bivajahakia akahojaina-ra akaabokavini hija.
Cristo-ra aogajahakivini mani ida kidihojaia haria noꞌavini hija.
Haria nagathogathovini hiki avahojaja kaimoni ida Cristo jahana arafiaki,
vagana hiki.
4 Akhanina vani haria noꞌavini hiꞌia ida kidihojai jahakaꞌoaki haria navaꞌiponivini hiꞌiki.
Vaꞌiga kaidivaki jahani arafiaki fori hiki ida danona.
Danona avahojavini mani ida hojai ijaꞌari-ra napohimajaki haria kaabokajanaravini hija,
oniani ida nahina jahariki Deu-ra vanofirikia vakavaꞌinofinofiki-ra anofijanaravini hija.
5-7 Nimania ida Cristo aꞌonira kajoamorakarahovini.
Oniaroa,
Cristo-ra avavakaijokahi;
vanofikaraho bana ida hojai asohikia avakahojaini.
Hojai asohikia avakahojaihi;
vanofikaraho bana ida Deu-ra avarigavini.
Deu-ra avarigavini avijavahi;
avaabononi vakaathiri bana hojai asohiriki-ra avakavaꞌinofinofivinia.
Avaabononi avakaathirivini hihi;
hariꞌa Cristo-ra vakavaꞌipahini bana.
Cristo-ra avakavaꞌipahinirihi;
Cristo kahojaia vakahojaikaꞌoa bana.
Cristo kahojaia avakahojaikaꞌoahi;
vaꞌora vanofijahakiꞌa bana adani Cristo kaijaꞌari.
Cristo kaijaꞌari-ra vaꞌora avanofijahakihi;
vaꞌora vanakaidiva bana adani ijaꞌari hahavi.
8 Niki vania avakahojaini jahaja bana.
Vavaꞌaha ada Jesus Cristo avavaꞌini-ra nahonariahihivini afojahaki mahija avakadihojai jahaki avijavani aꞌbaꞌdivini.
Akadikaꞌdaꞌdi Cristo-ra avarigajahakivini mani ida kidibadani binofikia aꞌonira kanabadanihaꞌoadahaja.
9 Hari.
Ijaꞌaria bivahojarihi hida hojai jahaki aꞌonira onavaꞌisohivini hiꞌiki,
nokhoni maromarohaki fori hihi hida ijaꞌari.
Biakavaꞌiꞌbiriniki fori hiki ida nahina kaimoni Cristoa kidihojai jahariki bianiꞌavini.
10 Oigamina,
avaabononi vanadano bana Deus kahojaia avakahojaini,
avarigajahakija kaimoni ida Deus aꞌonira baranahaꞌavini,
aꞌonira nagathogathoꞌavini jaboni,
oniani ida Cristo-ra avavakaijokavini-ra avakavaꞌipahiniravini hija.
11 Avakhanini vani akadikaꞌdaꞌdi Jesus Cristoa khai biniꞌaja bana ida Ibavi Jahakaꞌoakia avariꞌoini kidiania.
Anokhomirihi ida akadiꞌaihotahi abono haria vakaꞌdaꞌdivini.
12 Hari.
Oniaroa,
oigamina,
avarigavini kabaꞌi hida varani vara aꞌonira oniꞌavini hiꞌiki,
avavakaijokaki jaboni ida Deus athi kaꞌoa hini-ra avakaꞌojomoꞌivini,
kabaꞌi onofiki ida aꞌonira onavaꞌihokibakhiavini.
13 Oniania,
okavaꞌibodivaraniki ida asohiki,
ohokina oadani,
Cristo kahojai jahakia aꞌonira onavaꞌihokivini,
avarakavaꞌiꞌbiriniria kaimoni.
14 Hari.
Oogaki ida oabinina kamahini ipohijanarini.
Onahojahaki bana hida oasafi araboja.
Gora ꞌboꞌda fori hiki ida.
Akadikaꞌdaꞌdi Jesus Cristo hora navaꞌisohijoravini hiꞌiki ida kodimahi hidiaja ipohijanarini.
15 Onofikarahoki ida oathi-ra papira onajirivini,
avakavaꞌihokija kaimoni hida nahina Deua binofiki avakadiania.
Oabinina naothinia,
asia avavahojaja kaimoni hida Cristo monina onajiriki.
Oipohina khama anokiꞌiki ida Jesus Cristo jahana vagana danona hiki
16 Hari.
Aꞌonira onavaꞌisohivini hiꞌiki hida varani:
Joiki bana ada akadikaꞌdaꞌdi Jesus Cristo.
Ijaꞌari hahavia vanokiki bana ida danona arafiaki joina kamahini.
Kaꞌoa hiki hida akadivarani.
Ni-moni asohiriki ijaꞌaria vanamonahaꞌikia aꞌonira akanamonirihi.
Harivani Jesu-ra avaipohihaꞌiki,
anokiꞌiki ida Cristo jahana danona arafiaki hiki.
17 Mahi ꞌboꞌdakari kidiania arihojana vani Deus akadiabiꞌia binanokiaja ida danona,
jahana,
vagana Jesus Cristo kania.
Deus jahana vagana arafiaki kania kamithavahaki hida athi.
Akamithaꞌiki ida kidisai-ra niꞌavini:
—Hiꞌo kodisai,
onofijahakiki o.
Hora khai niꞌakarahoki o — niha ada Deus.
18 Harivani akamithaꞌiki ida athi nama khaki,
arabo namahiki Jesus Cristo kania arihojana kari.
Deus hojana mani ida ibavi-ra najahakaꞌoaja.
19 Akhanina vani aogaja ida Deus athi namoniva abono vakadivarani kaꞌoa hini afojora,
Deus kaijaꞌari avikhananavaki-ra vaꞌora vanavaꞌisohiꞌboꞌdavini hiꞌiki.
Jahaki ida vakadivarani avakamithajahakivini.
Vakadivarani lamparina bakibakini-ra navagavini fori hiki ida.
Nokiarina oadani ada boviri karaho vagavagania,
vagaki ida lamparina.
Vakadivarania binavagaki fori hiki ida akadivaꞌibodivarani,
nokiarina oadani ada Jesus Cristo.
20 Hari.
Vakavaꞌihoki bana hida Deus athi namoniva abono vakadivarani,
vaꞌora vanavaꞌisohijoravini hiki adani ijaꞌari.
Deus athi kapapirania hojaki hida vaathi:
“Maꞌonahai Jahaki ijaꞌari-ra kakodiaravini oadani,
ijaꞌaria ni-biogavini bikaabokaki hida Deus athi
namoniva abono
vakadivarani Deus athi
kapapirania hojaki.”
21 Ijaꞌari kaꞌoa kavarani hirihi hida Deus athi namoniva abono vakadivarani hija.
Maꞌonahai Jahaki vavaꞌi binahonariahihivini oadani varani Deua binofikia vakavaraniha,
oniani ida Deus athia ijaꞌari-ra vakanamonijoravini hiꞌia.