Deus kaijaꞌari avihiki aꞌoni
5
Arigamina,
hovani Cristo kaijaꞌari navaꞌisohiva abono ho.
Vaꞌora vara oniꞌaki adani Cristo kaijaꞌari navaꞌisohiva abono vahoariha ibavi ipohikia vahojaki.
Cristo imana ꞌbanani karaho-ra kamithavini vani vada oniꞌaꞌara ada.
Kidiania ovahojaki jaboni bana ida vagana,
danona jahaki,
Cristo nokiana kamahini.
2 Hari.
Deus aꞌonira nagathogathoꞌiki aꞌoni,
kidijaꞌari-ra vaꞌora avarakadavaꞌaja kaimoni.
Aꞌonira onavaꞌisohivini hiki vaꞌora avarakadavaꞌajahakivini bana.
Deua binofiki ida vaꞌora avarakadavaꞌavini avanofivini.
Hariꞌa avavaꞌini bodini vara niva:
—Vaꞌora oakadavaꞌavini vaꞌora onofiriha adani — hariꞌa niva ida avakadivaꞌibodivarani.
Hariꞌa avavaꞌini bodini vara niva jaboni:
—Jiniro-ra ogathanivini mani ida vaꞌora oakadavaꞌavini hija — hariꞌa nikia vakavaꞌibodivarani bana jaboni.
Vakhani bana:
—Vaꞌora onakaidivavini mani ida vaꞌora oakadavaꞌavini vaꞌora onofivini hija.
3 Hariꞌa nahina avanofikia vakabadanina vaꞌora avavadadami bana adani vaꞌora avarakadavaꞌaki.
Vaꞌora vavakaꞌdaꞌdijahaki bana mahija avakadihojai-ra vakabanafovini-ra vanofivini.
4 Cristo kaijaꞌari akadavaꞌava abono vakaꞌdaꞌdiva nokiana kamahini aꞌonira noꞌavini hiki bana ida vaꞌora avarakadavaꞌavini abosini.
Kajamari kajahakia aꞌonira noꞌahananaki bana ada.
Akaꞌboꞌdaki ida kajamari kavagani,
kajahani akarafiaki ida.
5 Hari.
Imaꞌinavi,
imakhinava avihiki,
aꞌonira vara oniꞌaki bana ho.
Vanaabaꞌa bana ida ijaꞌari vaꞌoaniaro miroꞌa vanamithaki vaathi.
Vara aꞌonira oniꞌahahaviki bana ho:
Avaabononi avakakakodiakhamavini oadani,
vakavaꞌibodivarani bana ida avakadibadani vahoariha-ra avakajoamoravini.
Deus athi kapapirani haria navaꞌisohivini nikia akahojaina:
“Deua biakodiaki ida ijaꞌari abononi vaboraborahariki.
Ijaꞌari abononi vaboraborahaki vani ida
Deus vaꞌi-ra fai aniꞌaja.”
Niki ida athii.
6 Deu-ra vaniꞌa bana:
—Ivani ikaabokaki ida hahavi inofiki.
Kadahonai abono ho,
nahina ohirihi iviahania — vakhani bana.
Hari.
Deua binofivini kamahini vahoariha vaviaha ira niꞌaki bana ada:
—Ovajahaki ida kadahojai iabononi ivaboraboraharavini — aꞌonira niꞌaki bana ada afohanana.
7 Deus kania avarakhaꞌa bana ida hahavi avavaꞌini-ra soko aniꞌaki.
Aꞌonira akadavaꞌaki ada ovari.
8 Hariꞌa avavadiki fori vihi!
Vanokimani bana!
Avavaꞌini ogairiva bana!
Jaharia binofiki ida aꞌonira napohimajavini.
Jomahi hiihiha fori hiki ada.
Adahani hiihihani ida jomahi,
ijaꞌari-ra nakoꞌdihavini biarija kaimoni.
Onivani fori hija ida Jahari kahojai,
ijaꞌari kamahi asohiki-ra napohimajavini-ra nofivini.
9 Vavakaijokahaꞌoadaha afodanoki bana ada Cristo.
Hariꞌa vakamitha bana ida Jahari aꞌonira kaborovini athini.
Vaꞌora vakavaꞌihoki bana adani avaigamini ibavi hahavia vahojaki.
Cristo-ra vavakaijokaki adani jaboni.
Vahoariha vaꞌora vanaimaꞌbanavini,
ijaꞌari aꞌonira vanaimaꞌbanavini fori hiki.
10 Badara ipohiriki ahokina oadani Deua bivaꞌahaki ida arimana ꞌbanani.
Deus haria baranahavini hiki ida Cristo kania aajahamisina,
akadimahi anokhomiriki-ra avahojaja kaimoni kidiania.
Vagana,
danona jahaki ada.
Jahani arafiaki ida Deus haria kajoamoravini.
Deus vania binajahabakhiaja ida akadimahi.
Binakaraki ida ajariꞌdarina.
Binadanoki ida akadivaꞌibodivarani,
akavaꞌipahiniria kaimoni ida Cristo-ra avakaijokavini.
11 Deus vania bikaabokaja ida hahavi hojaki afohaꞌoadaha.
Kaꞌoa hiki hida varani.
Pedro vaꞌora kaaminaꞌiki adani igamina
12 Arigamina,
Silas hora kakodiavini hiki hida oathi paꞌitxi kapapirani onajiriꞌiki avakadimoni.
Onakaidivaki ada oigamina Silas.
Jesus Cristo-ra kavaꞌipahinipaꞌitxiriha ada.
Onofiki hida oathi aꞌonira khai niꞌavini.
Oogaki ida Deus haria kajoamoravini kaꞌoa hini,
oniani ida avajahariharini oadani Deus aꞌonira kajoamoravini-ra avarigavini-ra onofivini hija.
Deu-ra vavakaijokahaꞌoadaha bana!
13 Hari.
Deus kaijaꞌari Babilônia sidajia vajoroniki aꞌonira vakaꞌivanitiki hadani.
Deus vaꞌora nagathogathoꞌiki adani jaboni.
Marcos jaboni aꞌonira kaꞌivanitiki aꞌoni.
Kodisai fori hiki ada.
14 Avaigamini-ra avakaꞌivanitihi,
avaabononi vananokiahivinihi bana ida avaabononi avakanakaidivakhamavini jaboni.
Onofiki ida avavaꞌini jahajahani.
Aꞌonivani hahavi Cristo kaijaꞌari aꞌoni.
Hari ida vani oamani Pedro athi anokhomiꞌini.