Ijaꞌari kamahi ajaꞌdini kavaranihi hida
4
Hari.
Avarigaki ida Cristo imana ꞌbanani-ra kamithaꞌavini avakadimoni.
Aꞌonivani jaboni avaabononi vavaꞌaha bana aꞌonira vanaimaꞌbanavini Cristo imana ꞌbanani fori hikia.
Ijaꞌari imani ꞌbanani-ra kapoariki afobakhia Cristo kaimoni,
oniani ida bikavaꞌipahinikaꞌoavini hija hojai asohiriki vaꞌini nahonariahihini hini.
2 Hari.
Vanaabaꞌa bana ida Deus athi avahokini oadani.
Vavaꞌaha bana ida Cristo aꞌonira bananivini.
Hariꞌa bana vavaꞌaha ida avakadivaꞌinofinofi kaipahivahaki aꞌonira bananivini.
3 Cristo-ra avarigaravini kari avanamonahabakhiaꞌiki ida badani Deu-ra avigarikia vavajahaki.
Oniaro kari,
vaꞌora avaviꞌomabakhiaꞌiki adani gamo,
avakadigamo vihirina kabaꞌi.
Bada avaniꞌaꞌiki ida avakadivaꞌikhaiini jaharikia bivajahaki.
Avakahanobakhiaꞌiki aꞌoni.
Kavi ijaꞌari-ra kanabajadiki kania avaadahaꞌiki aꞌoni.
Avakanamasivibakhiaꞌiki ida avakadideus amovana ipohiki.
Deus kaꞌoa hina bikaramonaki ida.
4 Hari.
Ni-nikia avakahojaijanaki.
Ni-avajoronijanaki hojai nikia vakahojaiki vakadiania.
Deu-ra vanofiriki asia vavaꞌihariki fori vihiki adani.
Asia vaꞌora avidoraonibakhiaki adani gamo,
makhira vihiki badani kaipahivahakia.
Vakadiania avajoronijanarini mani ida aꞌonira vakavaꞌibodivaranivini hija,
oniani ida varani jaharikia aꞌonira vakanavaranihabakhiavini hija jaboni.
5 Hari.
Vakavaꞌihoki bana ida namithaki kaimoni vakadiania,
Deus ijaꞌari vahokiki,
ijaꞌari vaabiniꞌiki vihiki-ra naabosivini kamahini.
Deu-ra vananamithavini hiki bana ida afohanana vakadivarani,
vakadibadani,
vakadihojai hiki niha ninini,
naothinia vagathaniki bana ida nahina jahariki,
vakadihojai asohiriki abosini.
6 Ijaꞌari hahavi araboa vahojakia vagathaniki bana ida vakadihojai asohiriki abosini,
oniani ida ijaꞌari-ra vaꞌora naabinija.
Vaabinirina oadani ijaꞌari Cristo monina jahakia vara vaꞌora vaniꞌavini hija.
Monina jahaki-ra vakapoariha;
mahi anokhomiriki jahaki-ra vagathaniha.
Abinihi ida abonoi,
hokihahaꞌoadahahi ida vamaꞌonahana,
Deus kamahi fori hiki.
Amaakariki bana ida hahavi anokhomini kamahini
7 Hari.
Amaakariki bana ida hahavi anokhomini kamahini.
Avaabononi avakavaꞌigairi bana,
avakadivaꞌibodivarani-ra avakadavaꞌa jaboni bana mahija Deu-ra vara avaniꞌavini-ra avakaabokavini.
8 Arigamina,
Deua binofivini arafiaki ida avaabononi avakanakaidivakhamavini afohaꞌoadaha.
Avaabononi avakanakaidivakhamahi;
avarakavaꞌiꞌbirinihi ida vahoariha vakadihojai asohiriki ipohiki jaboni.
9 Vaꞌora vagathanijahaki bana adani vahoariha avagorania.
Hariꞌa avavaꞌini bodinia ijaꞌari-ra avakaathirivini-ra vanofi!
10 Arigamina,
Deus aꞌonira noꞌavini hiꞌiki ida kidiꞌogahai danoki paꞌitxi hoarahanana.
Aꞌonira ohonariavini hiki ida ogahai danokia avakabadanihananani afojahaki,
vahoariha-ra vaꞌora avakajoamoraja kaimoni.
11 Avarigahi ida vahoariha-ra vaꞌora avanavaꞌisohivini,
vara vavaniꞌa bana ida Deus athi.
Avarigahi ida vahoariha-ra vaꞌora avakakodiavini,
Deus aꞌonira nadanovini vaꞌora vaakodia bana.
Avakhanini vani Deu-ra khai avaniꞌaja,
Jesus Cristo aꞌonira kajoamoravinia.
Jahakaꞌoaki,
danoki,
vagaki ada Jesus Cristo afohaꞌoadaha.
Kaꞌoa hiki hida varani.
Cristo kaijaꞌari jahariharini kavaranihi
12 Arigamina,
aꞌonira onakaidivaki aꞌoni.
Hariꞌa aꞌonira kaꞌbarava bana ida nahina jahariki namithaki avakadiania.
Aꞌonira kaijoꞌavini ida avavaꞌini rogo inini,
avajahariharini hiki.
Avakadiani kaꞌoa namitharihi hida.
Nini vani namithaja ida Cristo kaijaꞌari hahavi vakadiania.
13 Nimania ida Cristo imana ꞌbanani-ra kamithaꞌavini.
Khai vaniꞌa bana ida Cristo fori arihina nahina namithaki kidiania,
avakadiania namithaki jaboni.
Oniani ida Cristo jahana,
vagana nokiani kamahini aꞌonira khai niꞌaꞌahapikija bana.
14 Ijaꞌari varani jaharikia aꞌonira vakanavaranihavini hiki Cristo kaijaꞌari avihini,
Deus aꞌonira kajoamoraki bana aꞌoni.
Nini vani namithaja ida avakadiania,
avarigaki ada Deus Maꞌonahana Jahakaꞌoaki vagana,
danona avakadiania ibavina.
15-16 Ijaꞌaria vanaimaꞌbanakarahoki ida kaabiniki,
boꞌdi abono hiki.
Vanaimaꞌbanakarahoki jaboni ida ijaꞌari hojai jaharikaꞌoakia kabadaniki.
Vanaimaꞌbanaki jaboni ida ijaꞌari vahoariha vakadimahi-ra vakanabadanihaki.
Hariꞌa bana nikia vakabadani mahija hojai asohiriki abosini-ra avagathaniravini vakadiania.
Ni-makhaniki ida aꞌonira vanaimaꞌbanavini Cristo kaijaꞌari avihinia.
Nini vani namithaja ida avakadiania,
hariꞌa avavaꞌini aipahihiva.
Cristo kaijaꞌari avihini-ra vakahiha,
oniania Deu-ra khai vaniꞌa bana.
17 Hari.
Kamaꞌdahaꞌiki bana ida Deus ijaꞌari hahavi vakadihojai-ra naabosivini kamahini.
Deus kaijaꞌari vaꞌoaniaro miroꞌa bana vagathaniki ida vakadihojai abosini.
Nahina jahaki-ra gathaniki ida hojai asohikia kahojaiki.
Nahina jahariki-ra gathaniki ida hojai asohirikia kahojaiki.
Arafiaki bana ida vaimana ꞌbanani ijaꞌari Deus monina-ra vakajonikia vagathaniki.
18 Hojaki ida athii Deus athi kapapirania:
“Deus nofina vihiki-ra
vaꞌora akavaꞌijoaki
kidiania vakaikahira kaimoni.
Vakamithaki ida vavaꞌi rogo inini,
vaimana ꞌbanani hiki
hidiaja,
kabaꞌi Deus vaꞌora kajoamoraki adani.
Hari.
Jaharini arafiaki ida
Deu-ra vakajoniki vakadimoni,
hojai Deua bivajaharikia vakahojaiki vakadimoni jaboni.
Jokoa Deus vaꞌora
akavaꞌijoariha adani.”
Niki ida athi.
19 Hari.
Deus vaꞌora vaꞌahabakhiaki adani kidijaꞌari vaimana ꞌbanani.
Avaimani ꞌbanani kabaꞌi,
hariꞌa vakavaꞌipahini bana ida hojai asohiki.
Deu-ra vavakaijoka bana.
Aꞌonira namonahaꞌiki aꞌonira noꞌahahaꞌoadahaki bana ida nahina hahavi jahaki aꞌonira navaꞌiponijoravini hiꞌikia.