Makhira kidigamo khama vaabono vakavahojakhamavini varani hini
3
1-2 Gamo,
vara aꞌonira oniꞌaki bana ho.
Vanaabaꞌa bana ida avakadimakhira vaathi mahija avakadihojai jahaki-ra vanokivini.
Deus athi-ra vakajariꞌdaki vahabini adani.
Vavajahaki bana ida vaathi avanaabavini.
Vavajahaki jaboni ida hojai asohikia avakahojaini.
Vavajahavini mani ida Deus athi-ra vakajariꞌdajanaravini hija.
Cristo monina avakavaranirini kabaꞌi,
Cristo-ra vavakaijokavini-ra vanofiki bana adani.
3-4 Hari.
Oniaroa,
jahani kabaꞌi ida avabarohani,
jahani arafiaki ida nahina jahaki avavaꞌini bodinia hojaki avanokiani-ra najahaki.
Jahani kabaꞌi ida avakaꞌdaꞌdini kaafani-ra avakakamaiꞌdavini,
hariꞌa avanarafia bana.
Hariꞌa avanarafia bana jaboni ida kasoro-ra avakanabidihavini,
saꞌavithinahi-ra avakasaꞌahavini jaboni.
Hariꞌa vakaimahabakhia bana jaboni ida makari kaidivani arafiaki.
Vavaꞌaha bana ida nahina jahaki avavaꞌini bodinia hojaki avanokiani-ra najahavini.
Nikia avakahojaihi;
avanokiani-ra najahakaꞌoahi.
Aꞌboꞌdaki bana ida avanokiani jahaki vara ovaniꞌaꞌiki.
Ijaꞌari vaꞌini akaꞌirini,
vaꞌini foraforani hojani mani ida ijaꞌari nokiani-ra najahaja.
Deua binakaidivaki ida ijaꞌari vaꞌini bodini nini hojaki.
5 Vakhanimanira adani gamo ꞌboꞌdakari vahokiki Deu-ra vavakaijokaki.
Vavaꞌahaꞌiki ida nahina jahaki vavaꞌi bodinia hojaki vanokiana najahani hiꞌiki.
Vaꞌoaniaroa vanaabaꞌiki ida vakadimakhira vaathi afohanana.
6 Nimania ida Sara kohana jaboni.
Sara binaabaꞌiki ida kidimakhira Abraão kohana athi.
Binaonivini “Kodikaꞌdaꞌdi”.
Hojai jahakia avakahojaihi;
Sara kohana fori avihihi.
Avavaꞌini soko inirihi;
Sara fori avihihi.
Sara kahojai fori hihi ida avakadihojai,
oniani ida kidisai fori aꞌonira nihaja bana.
7 Hari.
Makhira aꞌonimaina,
vara aꞌonira oniꞌaki bana ho.
Kodivarani hiki ida avakadigamo-ra avavahojavini niha ninini jahani.
Avarigavini onofiki ida avadanoni avakadigamo vadanona-ra aradamivini,
oniani ida vaꞌora avanakaidivavini ohonariavini hija.
Avakadimahi jaꞌdini anokhomirikia Deus aꞌonira noꞌavini vaꞌora noꞌaki jaboni adani avakadigamo,
oniani ida vaꞌora avanaibavijahajahakivini ohonariavini hija.
Nihi ida avakadihojai,
ni-nahina binadabarihi bana ida Deu-ra vara avaniꞌavini.
Cristo kaijaꞌari vajahariharina kavaranihi
8 Hari.
Oniaroa,
onaꞌdiahiki hida vara aꞌonira oniꞌavini.
Aꞌonira ohonariavini hiki ida avakadivaꞌibodivarani ijaꞌari hoarani kavaꞌibodivarani fori hini.
Igamini vaꞌini rogo inini,
vaꞌini khaiini fori hiva ida avavaꞌini rogo inini,
avakadivaꞌikhaiini hiki jaboni.
Avaabononi vakanakaidivakhama bana,
avaigamini aꞌoni.
Avaigamini-ra avanakaidivakarahovini vani vaꞌora vanaibavijaha bana.
Avaabononi vakavaꞌibodivarani bana afohanana:
—Oigamina kahonai abono ho.
9 Hariꞌa avaabononi vanaꞌdaꞌdiabosi hoariha kahojai jaharikia,
hojai jahariki jabonia.
Ijaꞌari aꞌonira avanaathidanoarariki aꞌoni,
avahojani jaharini-ra vakahiꞌbadaravini,
hariꞌa bana avaabononi vanaꞌdaꞌdiabosiꞌa kidivarani fori hikia avakavaraninia.
Deu-ra vakanikharia bana mahija vaꞌora kajoamoravini.
Nimania bana hida ijaꞌari aꞌonira vakaimajahariki-ra avaranaabosivini bana.
Deus aꞌonira nagathogathovini vani,
aꞌonira kajoamoravinia aꞌonira navaꞌiponiꞌiki ada.
10 Hari.
Deus athi kapapirania hojaki hida athii:
“Ijaꞌaria binofihi ida kidimahi-ra khai niꞌavini;
varani jaharikia kavaranini-ra kavaꞌipahinihi.
Ijaꞌari kidimahi jahani-ra nofihi;
korijanahia kavaranini-ra kavaꞌipahinihi.
11 Ikavaꞌipahinikaꞌoa bana ida hojai jahariki.
Bada iniꞌa ida hojai jahaki.
Vahoariha-ra vakaathifora mahija avaabononi avakakaimajahakhamavini.
12 Akadikaꞌdaꞌdi kaꞌoa vada vaꞌora niꞌajahakiha
adani ijaꞌari hojai asohikia vakahojaiki.
Bikamithahi ida vaathi
jaboni kidiania
vakanikhariavini.
Ijaꞌari hojai asohirikia vakahojaiki vani adani Deus vaꞌi-ra fai avaniꞌara.”
Niki ida Deus athi.
13 Avanofihi ida badani asohiki-ra bada avaniꞌavini,
vahoariha aꞌonira vanaimaꞌbanamanija koda?
Iniani.
14 Kabaꞌi,
badani asohiki-ra bada avaniꞌavini vani vahoariha vahabini aꞌonira vanajaharihariki bana aꞌoni.
Niki avakadiania namithahi;
Deus aꞌonira kajoamoraki bana aꞌoni.
Hariꞌa bana vaꞌora vifini adani aꞌonira vanaimaꞌbanaki.
Hariꞌa avavaꞌini soko iniva.
15 Vavakaijoka bana ada Cristo avavaꞌini bodinia.
Athi vanaabaꞌa bana,
avakadikaꞌdaꞌdi ada.
Ijaꞌari aꞌonira nanaꞌdohivini hiki vahabini bana ida nahina kaimoni Cristo-ra avavakaijokavini.
Avaabononi vanaibavijahajora bana afohaꞌoadaha mahija hoariha kanaꞌdohi-ra avagathanivini-ra avarigajoravini.
16 Kidinaꞌdohi avagathanivini athi forakia.
Hariꞌa avavadadami bana ida ijaꞌari jariꞌdaki.
Hojai asohikia vakahojaiꞌa bana mahija nahina asohiriki avavaꞌini bodinia hojarini-ra avarigavini.
Ijaꞌari aꞌonira vakanavaranihaki bana.
Cristo kaijaꞌari avihini mani ida avakadihojai jahaki-ra vakanavaranihavini hija.
Jaharini vakahiki bana ida avakadihojai.
Hojai sohirikia avakahojairini mani ida aꞌonira vakanavaranihavini vavaꞌi anaipahihini hija.
17 Ijaꞌari vahabini haria vanaimaꞌbanavini hiki ida hojai asohirikia akahojaina.
Ijaꞌari vahabini haria vanaimaꞌbanavini hiki hojai asohikia akahojaina.
Deua bivaꞌahaki ida.
Haria vanajahariharivini kabaꞌi,
Deua binofiki ida hojai asohikia akahojaina.
Ni-binofiki ida hojai asohirikia akahojaina.
18 Hari.
Cristo jahana kabaꞌi,
vanaimaꞌbanaꞌiki ada akadimoni.
Abiniꞌiki ada hoaranija ijaꞌari hahavi vakadimoni hina,
aniaja kaimoni ida vakadihojai asohiriki.
Makhira jahakaꞌoaki hina abiniꞌaha ijaꞌari vajaharikaꞌoaki vakadimoni,
vaꞌora bananira kaimoni Deus kania.
Ijaꞌari imani hina abiniꞌiki ada.
Deus vania bianahokiꞌia ida maꞌonahana.
19 Maꞌonahai hina vani okhaꞌaha ada Cristo ijaꞌari vaabiniꞌiki vamaꞌonahana gathaki kania,
monina jahakia kavaranira kaimoni vakadiania.
20 Hivaꞌoani ijaꞌari vaabiniꞌikia vanaabarihi ida Deus athi.
Noé avaꞌdoro-ra kanamonahavini oadani kari,
ni-Deus vaꞌi vidavidahaki vaꞌora naviahanokhahaꞌoadahaki adani ijaꞌari.
Vaipohiriha adani ijaꞌari avaaniꞌiki.
8 vihiki vaipohina kaꞌoa avaaniꞌiki.
Ni-avahidaꞌiki paha bodinia.
Avaꞌdoro kaꞌdoromananiki vania Deus vaꞌora akavaꞌijoara adani.
21-22 Onivani fori hija ida Cristo kaijaꞌari kanani rajomi hini.
Paha Noé-ra vaꞌora akavaꞌijoaꞌiki varani hini biarajoꞌinanavaki fori hiki ida kanai karajomihi.
Ijaꞌari makamakani aniani kaimoni hirihi ida kanai karajomihi.
Avikanani vani avananokiaja ida Deu-ra avakanikhariavini avakadivaꞌibodivarani-ra nasohivini,
oniani ida Deus aꞌonira akavaꞌijoavini hija.
Aꞌonira akavaꞌijoaꞌiki ida Jesus Cristo ahokiꞌina,
nama okhaꞌina,
hojaꞌina Deus pitana aniaja.
Jesus Cristo vaꞌora vakaꞌdaꞌdiki adani Deus ibavi kaijaꞌarini,
ijaꞌari hahavi vanokiariki vadanoki nama vahojaki vihiki.
Kaꞌdaꞌdi vihina kabaꞌi adani vaꞌoaniaro,
Cristo vaꞌora vakaꞌdaꞌdihahaviki adani.