Deus kahojaia vakahojaiꞌa bana
2
Hari.
Avakadimahi jaꞌdini-ra avagathaniꞌavini mani ida avakadihojai ꞌboꞌda-ra avakavaꞌipahinikaꞌoavini-ra ohonariavini hija.
Vakavaꞌipahinikaꞌoa bana ida hoariha-ra avanajahariharivini-ra avanofivini.
Vakavaꞌipahinikaꞌoa bana ida hoariha-ra avakorijanahavini.
Vakavaꞌipahini bana jaboni ida hoariha-ra avanofiꞌbadaravini.
Vakavaꞌipahinikaꞌoa bana jaboni ida avakadiꞌakabajahi.
Vakavaꞌipahinikaꞌoa bana jaboni ida onii jaharikia hoariha-ra avakanavaranihavini.
2 Hari.
Oniaroa,
isai tanaki kidiamia kajoho kaaꞌbani-ra kanofibakhiaki fori vihiꞌa bana.
Deus athi-ra vanofibakhiaꞌa bana!
Avakadiꞌbai kaꞌoa ida.
Avakadimahi jaꞌdini-ra navijavaki ida,
binadanoki jaboni ida,
oniani ida Deus aꞌonira akavaꞌijoavini hija bana.
3 Nimania ida Deus athi kapapirani haria navaꞌisohivini hiki:
“Akadikaꞌdaꞌdi-ra avavakaijokavini mani ida aꞌonira
nakaidivavini avarigavini hija.”
Niki ida Deus athi.
4 Arigamina,
vamaakariꞌa bana akadikaꞌdaꞌdi Cristo kania.
Jaꞌdi fori hiki ada Jesus Cristo.
Jahaki,
hokiki ida jaꞌdi.
Ijaꞌaria vakajoniki ada jaꞌdi fori hiki.
Ni-nahina kaimoni hina vakahiki.
Deus vania binagathogathoꞌara ada jaꞌdi fori hiki.
Kaidivana arafiani bikahiki ada jaꞌdi fori hiki hokiki.
5 Aꞌonivani jaboni,
jaꞌdi jahaki hokiki fori avihiki aꞌoni afohanana.
Avaabononi vavaꞌaha bana Deus aꞌonira anakaramisijahakivini mahija Deus gorana avihivini.
Deus gorana bodinia sasidotxi avihiki aꞌoni jaboni,
kidibadani abono avihiki aꞌoni.
Jesus Cristo aꞌonira kakodiava bana mahija avakadibadani,
avakadivarani,
avakadihojai hikia Deu-ra avakanavaꞌigaki fori avihivini,
Deua khai biniꞌaja kaimoni.
6 Hari.
Deus athi kapapirani haria navaꞌisohivini hiki ada Jesus Cristo jaꞌdi fori hina.
Niha ada Deus:
“Onaibaviꞌiki ida jaꞌdi
karaho arabo namahiki Sião onikia.
Onagathogathoꞌiki ida jaꞌdi
kaidivaki ogorana
dadani kaimoni,
kaaraja
kaimoni ida ogorana.
Ni-onavaꞌiponiꞌimariniki ida ijaꞌari jaꞌdi fori hiki-ra vakaijokaki.”
Niki ida Deus athi.
7 Jaꞌdi fori hiki-ra anakaidivakarahoki hari,
Cristo-ra avakaijokaki hari.
Vahoariha vani adani Cristo-ra vakajonira.
Vakadimoni hida hihida Deus athi:
“Hojaki ida jaꞌdi jahaki,
jaꞌdi kagorahi dadani
kaimoni.
Gora namonahava abonoa ni-vanofiki ida jaꞌdi karaho.
Jahani kabaꞌi ni-vanofiki ida jaꞌdi.
Vanofiravini kabaꞌi,
Deua binagathogathoꞌiki ida jaꞌdi karaho.”
8 Hari.
Deus athi kapapirani pitani hoariha haria navaꞌisohivini hiki jaboni:
“Hihida jaꞌdi ijaꞌari-ra
vaꞌora kaꞌdamanokhoki bana hida.
Ijaꞌari-ra vaꞌora naadariki
jaboni bana hida.”
Nihi ida Deus athi kapapirani,
Jesus Cristo-ra vara vaniꞌavini.
Cristo-ra vakajonikia vavakaijokarihi ida Deus athi,
oniani ida vaꞌora naadarikarahoꞌia.
Nini vani Deua binofija ida vakadimoni.
9 Arigamina,
ni-vaꞌoaniaro fori avihirihi.
Deus aꞌonira nagathogathoꞌiki aꞌoni,
kidijaꞌari avihija kaimoni.
Deus akadikaꞌdaꞌdi kaꞌoa kasasidotxi avihiki aꞌoni.
Kidibadania avaabononi avavaniꞌahiꞌiki aꞌoni,
Deus kani aꞌoni.
Bakibakini fori hiki kania avahojani kari Deus aꞌonira baranahaꞌiki aꞌoni,
avarikhaonaniꞌihi,
avahojaja kaimoni Deus vagana jahaki kania,
avanamonija kaimoni ida kidibadani danoki ijaꞌari-ra navaꞌibodivaraniki.
10 ꞌBoꞌdakari ni-Deus kaijaꞌari avihiki.
Hari maha,
Deus kaijaꞌari avihiꞌiki aꞌoni.
ꞌBoꞌdakari ni-avarigaki ida Deus ijaꞌari-ra vaꞌadivini.
Hari maha,
Deus aꞌonira vaꞌadivini-ra avarigaꞌiki aꞌoni.
Hojai sohikia vakahojaiꞌa bana
11 Arigamina,
aꞌonira onakaidivaki aꞌoni.
Vakavaꞌihoki bana ida avaibavini kaꞌoa hirini hidiaja araboja.
Avakhanini vani aꞌonira okanikhariavini hiki ida nahina avakadimahi ꞌboꞌda bikavaꞌinofinofiki-ra avakavaꞌipahinikaꞌoavini.
Avakadihojai ꞌboꞌda binadanodanoki fori hiki ida avakadihojai jaꞌdini.
Avakadihojai ꞌboꞌda binofiki binihimavini ida avakadihojai jaꞌdini.
12 Hari.
Deu-ra avigariki vahararana avahojahi;
hojai asohikia vakahojaiꞌa bana.
Hojai asohirikia aꞌonira avakaraganahavini kabaꞌi,
vada vaniꞌahi ida avakadihojai asohiki,
avigaki ida vakadivarani kaꞌoa hirini.
Oniania,
Deus ijaꞌari kahojai-ra naabosivini kamahini,
Deu-ra vaniꞌaki adani:
—Deus,
ivani ijahaki i,
vajahaki jaboni adani kadaijaꞌari — vakhaniki bana adani.
13 Hari.
Vanaabaꞌa bana ada arabo honariava abono,
kaꞌdaꞌdi vahoariha vihiki vaathi.
Cristo kaijaꞌari avihini mani ida vaathi avanaabavinia aꞌonira ohonariavini hija.
Deua binaibaviki ada ijaꞌari hoarana arabo ipohiki honariava abono hira kaimoni.
Ovari vaꞌora vakaꞌdaꞌdiki adani arabo ipohiki kaijaꞌarini vakadikaꞌdaꞌdi.
14 Ovari vaꞌora nagathogathoꞌiki jaboni adani makhira vahoariha ijaꞌari vanasohiva abono vihira kaimoni.
Vakadibadani hiki ida hojai asohiriki abosini.
Hari.
Vara vaꞌora vaniꞌaki jaboni adani hojai asohiki-ra vanamonahaki,
vakadihojai jahani vakahivini.
Oniani ida kaꞌdaꞌdi athi-ra avanaabavinia aꞌonira ohonariavini hija.
15 Deua binofiki ida hojai asohikaꞌoakia avakahojaini,
viso nija kaimoni ida ijaꞌari aꞌonira vakanavaranihaki vaathi.
Vavaꞌihariki fori vihiki adani,
ni-nahina-ra avigaki.
16 Cristo aꞌonira anaihotaꞌiki aꞌoni,
avagathajanaria kaimoni.
Nahina jahaki-ra avanofihi;
bada avaniꞌahi.
Hariꞌa bana nikia vakavaꞌibodivaraniꞌa:
Ni-makhaniki ida hojai jaharikaꞌoaki-ra bada aniꞌavini.
Vavaꞌaha bana ida mahi hahavi Deus aꞌonira navaꞌihonariahihivini.
Kidihonai abono avihiki aꞌoni.
Kidijaꞌari kapavakarivahaki avihiki aꞌoni.
17 Ijaꞌari hahavi-ra vaꞌora vavavaꞌiha bana.
Vaꞌora vanakaidivaꞌa bana adani avaigamini Jesus Cristo-ra vavakaijokaki.
Vifini bana ada Deus.
Vavavaꞌiha bana ada makhira arabo ipohiki vakaꞌdaꞌdiva.
Vaꞌi rogo inini varani hini hida
18 Hari.
Kaꞌdaꞌdi kahonai abono vara aꞌonira oniꞌaki bana ho jaboni.
Vanaabahahaꞌoadaha ida avakadikaꞌdaꞌdi vaathi hahavi.
Vaꞌora vavavaꞌiha bana.
Vanaaba bana afohanana ida avakadikaꞌdaꞌdi aꞌonira vanakaidivaki vaathi.
Aꞌonira vakajoamoraki adani.
Vanaabahanana bana jaboni ida avakadikaꞌdaꞌdi vahoariha aꞌonira vanajaharihariki vaathi jaboni.
19 Jahani kabaꞌi ida avakadibadani,
avakadikaꞌdaꞌdi aꞌonira naimaꞌbanaki vahabini aꞌoni.
Asohirini kabaꞌi ida avavaꞌini-ra namokaravini,
nini vani Deua bivaꞌahaja ida.
Avavaꞌini-ra namokaraꞌavini kabaꞌi,
Deu-ra avakajonirihi;
aꞌonira kajoamoraha.
20 Hari.
Vahoariha vahabini aꞌonira vidafiavini hiki ida hojai asohirikia avakahojaini.
Asohiki ida aꞌonira vanaimaꞌbanavini avakapoarivini.
Avakapoarivini kabaꞌi,
ni-Deus aꞌonira naabosiki kidinahina jahaki.
Ni-asohiki ida hojai bivajaharikia avakahojaini.
Vahoariha aꞌonira vidafiahi,
hojai asohirikia avakahojairini kabaꞌi.
Asohirini kabaꞌi ida aꞌonira vanaimaꞌbanavini,
kabaꞌi jahaki ida avaraihamahirini avakapoarivini.
Nini namithahi avakadiania;
Deus aꞌonira naabosihi kidinahina jahakia.
21 Deus aꞌonira nagathogathovini vani binofija ida avaraihamahirini avajahariharini kamahini.
Jesus Cristoa bikamithaꞌiki jaboni ida imana ꞌbanani akadimoni.
Ovari haria nanokiahivini hiki ida niha ninina jahariharina kabaꞌi ihamahirina.
Binofiki ida ovari fori arihina.
22 Ni-hoaranija hojai asohiriki-ra bada niꞌaki ada Jesus Cristo.
Ni-hoaranija vara bivaniꞌaki ida korijanahi kavaranina.
23 Ijaꞌaria varani jahariki arafiakia vakanavaranihaha,
ni-Jesus Cristoa bigathaniki ida vaathi varani jaharikia.
Ijaꞌaria vanaimaꞌbanaha;
ni-binofiki ida abono-ra naꞌdaꞌdiabosivini.
Bivakaijokahaꞌoadahaki ada Deus.
Asohikaꞌoaki ida niha ninini Deus ijaꞌari vakadihojai asohiriki-ra naabosivini,
oniani ida Jesus Deu-ra vakaijokahaꞌoadahavini hija.
24 Ava akasanakhamaki kania Cristo abiniꞌina vani bivajadojadoki fori hija ida akadihojai Deua bivajahariki.
Bikamithaꞌiki ida imana ꞌbanani karaho,
agathaniria kaimoni ida akadihojai asohiriki abosini,
oniani ida hojai asohiriki-ra akajonikaꞌoavini-ra nahojaja.
Hojai asohikaꞌoaki vania akahojaina jahaja.
Cristo abono hahavi siini-ra vaꞌahavini mani ida haria anaihotaja.
25 ꞌBoꞌdakari ovilia akamadaki fori arihiki hari.
Ni-ariadahaki hagihi asohikia.
Ariadahaꞌimajaniki hari.
Hari maha,
ovilia akadavaꞌava abono fori hiki haria karagaꞌiki hari.
Haria vajoiꞌaha.
Oniaroa,
naothia akasiagaꞌihi.
Ovari haria bananihahaꞌoadahaki,
haria akadavaꞌavini.