2 Oigamina,

nahina avavajahariki namithahi avakadiania,

avajahariharini,

avavaꞌini rogo inini hiki,

kabaꞌi,

khai vakhani bana.

Deua bivaꞌahaki bana ida aꞌonira kaijoꞌavini,

nokiaja kaimoni ida Deu-ra avavakaijokavini avavakaijokaravini.

3 Deus avajariꞌdarini-ra kaijoꞌavini kamahini avarigaki ida avakavaꞌipahiniravini,

avajariꞌdarini-ra nadanojahakiha.

4 Hariꞌa vavaꞌaha bana ida nahina jahariki avakadiania namithani aꞌonira najoiribaniravini mahija avakadimahi sohikaꞌoavini,

Cristo-ra avavakaijokavini avijavani jaboni,

hojai hahavi Cristoa bivajahaki-ra avakainamoravini jaboni.

5 Ijaꞌari avakadiania hojakia bikainamoki ida ogahai,

bikanikhariava bana ida ogahai Deus kania.

Jahaki ada Deus.

Kidiꞌogahaia binoꞌavini binofiki bana ida ijaꞌari afohanana.

Bivajahaki ida kagahinaina.

6 Deu-ra avakajariꞌdaravini vani,

Deu-ra vakanikharia bana avanofikia.

Hariꞌa avavaꞌini-ra kosakhamapaꞌitxiva bana.

Komini fori hiki ida ijaꞌari vaꞌini-ra kosakhamaki.

Sirisiriki danoki komini kanaꞌbahaki-ra kosonasonafarivini fori hiki ida ijaꞌari Deu-ra vakaijokajahakiriki vaꞌini bodinia.

7-8 Ijaꞌari nikia kahojaikia ni-biogaki ida nahina binofiki,

bianaabosibakhiaki ida kidivaꞌibodivarani,

bada nini bada nirini,

binofivini binofiravini.

Hariꞌa ijaꞌari nikia binokhava ida kidikanikhari-ra gathanivini Deus kania.

9 Hari.

Khai niva bana ida Cristo kaijaꞌari kanahinariki.

Deua binakaidivaki ida,

binoꞌavini hiki bana ida bikainamoki.

10 Onivani fori hija ida ijaꞌari kanahinaꞌahapikiki jaboni.

Deus kidinahina binihimavini kamahini jahaki ida khaii nini.

Kanahinaki kidinahina avisonijorakiki hogoi movani fori hini.

11 Safini afana bianaraꞌokhoki ida hogoi.

Voronihi ida movai,

nokiani jahani kabaꞌi ihimiꞌihi.

Onivani fori hija ida ijaꞌari kanahinaꞌahapikiki kamahi.

Kidibadania kabadanini kabaꞌi,

jorakia ihimiki bana ida kidimahi,

kidinahina ahapinia ni-biakodiaki abiniria kaimoni.

12 Hari.

Khai niva ida ijaꞌari Deua bikaijoꞌaki.

Nahina jaharikia vaꞌini rogo bianiꞌavini kabaꞌi,

hariꞌa Deu-ra kavaꞌipahiniva.

Nahina Deua bikaijoꞌavini hiki-ra ragariravini mani ida Deua binaabosivini hija.

Gahinaki bana ida kidimahi jahaki anokhomirikia Deus vaꞌora navaꞌiponiki adani nofina vihiki.

13 Ijaꞌari vaꞌini rogo inini kamahini kaborohirohi hiki vahabini bana ida.

Hariꞌa niva ida ijaꞌari:

Deus hora kaborovini,

oniani ida hojai asohirikia hora kanahojaija.

Hariꞌa nikia kavaraniva bana ida ijaꞌari.

Kaboroharohavahariha ada Deus hojai asohirikia kahojaina.

Ni-ijaꞌari-ra kaboroki jaboni.

14 Ijaꞌaria bikavaꞌinofinofihi ida hojai asohiriki.

Vaꞌini bodini vara ninia bianagithiki fori hiki ida ijaꞌari,

oniani ida kidivaꞌinofinofia aabononi kaborovini hija.

15 Ijaꞌaria binaababakhiahi ida kidivaꞌinofinofia bikaborovini,

oniani ida hojai asohirikia kanabadanini hija.

Hojai asohirikia kabadanibakhiani mani ida ijaꞌari-ra Deus kania arakharija.

16 Oigamina,

aꞌonira onakaidivaki ho.

Hariꞌa vavaꞌaha bana ida avakadivaꞌinofinofi aꞌonira korijanahavini.

17 Jahakaꞌoani,

asohiki ida nahina hahavi agahinana hiki Deua bikaronaki.

Ovaria binamonahaꞌiki ada safini,

masiko,

boviri hiki vagana.

Vagaꞌoamanira ada Deus.

Jahaꞌoamanira ada afohaꞌoadaha.

Ni-nahina jahariki hojaki kidiania.

Ni-hoarihapaꞌitxiki ada Deus.

18 Deus vania binakamaꞌdaja ida haria akavaꞌijoavini kavaranihi.

Binofivini mani ida akadimahi jaꞌdinia haria noꞌavini hiꞌia.

Binofiki ida kidijaꞌari jahani kidiamonahi hahavi hoariha jahani-ra aradavini.

19 Oigamina,

aꞌonira onakaidivaki aꞌoni.

Vakavaꞌibodivarani bana hida varani.

Jahaki ida avahihavini ijaꞌari hoariha athini-ra mitha avaniꞌaꞌimidiavini.

Vakavaꞌibodivaranijahakiꞌimidia bana ida athini,

avagathanivini viahania.

Hariꞌa aꞌonira navaꞌijokojokojorakiva.

20 Ijaꞌari vaꞌini jokojokoni kabaꞌi,

ni-bikaabokaki ida badani asohiki Deua binofiki.

21 Hari.

Vakavaꞌipahinikaꞌoa bana ida hojai kaipahivahaki hahavi-ra avakavaꞌinofinofivini.

Vakavaꞌipahinikaꞌoa bana jaboni ida hojai hahavi Deua bikaimajahariki.

Vavaꞌaha bana ida Deus athi avakadimahi-ra nasohibakhiavini.

Deua biobaiki ida kidivarani avavaꞌini bodinia.

Kidivarani avakapoarikia bikaabokaki ida aꞌonira akavaꞌijoavini.

22 Hariꞌa korijanahia avaabononi vaniꞌa bana.

Hariꞌa mitha vaniꞌaꞌimarini ida Deus athi.

Vanaabaꞌa bana ida Deus aꞌonira honariavini hiki.

23 Ijaꞌari abononi nokhoni hiki-ra hikoria vada niꞌajorakivini vani fori hija ida ijaꞌari Deus athi-ra mitha niꞌaꞌimariniki.

Vada biniꞌaki ida nokhoni niha ninini jahani jaharini,

ni-abononi najahaꞌiaki.

24 Vada nini naothinia,

ajihiꞌihi jorakia biakavaꞌiꞌbiriniꞌihi ida niha ninini nokiani.

Ni-nahina kaimoni nokhoni-ra vada niꞌaki.

25 Hari.

Ijaꞌari hoariha vajaforia vada biniꞌajahakiki ida Deus kavaꞌisohihi jiriki asohikaꞌoaki,

bikavaꞌibodivaraniꞌihi,

oniani ida asohiriki-ra nasohivini-ra vaꞌahavini hija.

Athi naabani hiki ida ijaꞌari,

ni-biakavaꞌiꞌbiriniki ida Deus athi bikamithaꞌiki,

oniani ida kidibadani hahavi bada biniꞌaki Deua bikajoamoravini hija.

26 Hari.

Hojamanija ida ijaꞌari abononi niꞌaki Deu-ra nofivini-ra kahiki?

Ijaꞌaria bikaabokarihi ida kidivarani jahariki-ra nadaanivini,

ni-nahina kaimoni Cristo kaijaꞌari hini-ra kahiki.

Cristo kaijaꞌari jahaki hini abononi kavaꞌibodivaraniꞌimariniki ida.

27 Cristo kaijaꞌari hidorokia bada biniꞌaki ida Deus akadiabiꞌia binofiki.

Nimania hida Cristo kaijaꞌari kahojai:

vaꞌora kaijahitaki adani kamaboa,

kaariha vihiki,

vakadinahina-ra vakainamoki vaꞌora kajoamoraki jaboni.

Ni-vaꞌora vaipohihaki adani Deu-ra vanofiriki vakadihojai asohiriki.

Nimania hida hojai Deua binofiki.