Ijaꞌari-ra anaibavijahajahakivini niha ninini varani hini
2
Oigamina,
harivani avakaijokaki ada akadikaꞌdaꞌdi Jesus Cristo.
Deus jahana,
vagana,
danona kidiania hojaki.
Aꞌonivani avavakaijokahahaviki ada jaboni Jesus Cristo.
Oigamina,
avaabononi vakanaibavijahakhama bana.
Ni-asohiki ida avaigamini kanahinariki-ra avakaihiponiravini.
2 Vakavaꞌibodivarani bana hida rajomi kavaranihi.
Avavajoroniki kania bana okhajakosiki ada makhira makari kaidivaki-ra kaimahaki.
Saꞌa hojaki ada saꞌavithinahi kaꞌouroki.
Oniaroa,
okhajakosiki bana jaboni ada makhira kanahinariki.
Bikaimahaki ida makari akarabajahaki.
3 Avagathanijahakiki vahabini bana ada makhira makari kaidivaki-ra kaimahaki,
avaniꞌaki bana ada:
—Vithi bana hida.
Hojaki hida ibavi jahaki ivavithiki kaimoni.
Hari.
Makhira kanahinariki vani ada avaniꞌara vahabini bana avakaihiponiravini:
—Gaakosoa bana oniaja.
Avaniꞌaki vahabini bana ada jaboni:
—Vithiriamaꞌo bana oba namania — avaniꞌaki vahabini bana ada kanahinariki.
4 Hari.
Nikia avakahojaihi;
avanakaidivahi ida ijaꞌari kanahinakarahoki kaꞌoa;
avanakaidivariki ida hoariha kanahinariki.
Jahariꞌoamanija ida avakadivaꞌibodivarani,
oniani ida kanahinariki-ra avagathanijahakiravini hija.
5 Oigamina,
aꞌonira onakaidivaki aꞌoni.
Mitha vaniꞌa bana hida kodivarani.
Deus vani vaꞌora nagathogathora adani ijaꞌari vakanahinariki kidijaꞌari vihira kaimoni.
Jesus Cristo-ra vavakaijokavini mani ida Deus vajariꞌdarina bianaꞌbaꞌdivini hija.
Deus vaꞌora nagathogathoꞌiki adani vahojara kaimoni kidiania.
Deus vaꞌora navaꞌiponivini hiki adani nofina vihiki hahavi vaꞌora vakaꞌdaꞌdivini kania vahojana kidiania.
6 Ni-asohiki ida ijaꞌari vakanahinariki-ra vaꞌora avakaihiponiravini.
Vaꞌora vakavaꞌibodivarani bana adani vakanahinaꞌahapikiki niha aꞌonira vaniꞌaꞌavini.
Ijaꞌari vakanahinaꞌahapikiki aꞌonira vaboꞌdiabakhiaki aꞌoni.
Aꞌonira avavadadamiki adani ijaꞌari nasohiva abono vakadiania,
jaharikia aꞌonira avarakhara kaimoni.
7 Ijaꞌari vakanahinaꞌahapikikia vakanavaranihaki ida Cristo onina jahaki,
Deus aꞌonira noꞌavini hiꞌiki Cristo kaijaꞌari avihinia.
8 Vanaaba bana ida honari Deus akadikaꞌdaꞌdi kaꞌoa haria navaꞌisohivini hiꞌiki mahija avakadihojai asohivini.
Nimania hida vaꞌisohihi athini:
“Iabononi inakaidivavini vani fori vaꞌora niha
vaꞌoani ijaꞌari hahavi.”
Nihi.
9 Vada avaniꞌahi ida ijaꞌari vanokiana avarigaja kaimoni ida vaꞌora avagathanijahakivini vaꞌora avagathanijahakiravini;
nikia avakahojaihi,
hojai jaharikia avakahojaini-ra kahiha ada Deus.
Ni-avanaabaki ida Deus kavaꞌisohihi jiriki.
Aꞌonira osaniki ida vaꞌisohihi avanaabariki.
10 Ijaꞌari vaꞌisohihi jiriki hoarani-ra ragarihi;
vaꞌisohihi jiriki hahavi-ra ragarivini Deua bikahihi.
Ijaꞌari vaꞌisohihi jiriki hoarani-ra ragarihi;
Ibavi Jaharikaꞌoakia okhahi.
11 Deua bikaabanivini:
“Makhira,
hariꞌa kadagamo hiriki-ra vaviꞌoma bana.”
Bikaabanivini jaboni:
“Hariꞌa kaabini bana.”
Hari.
Oniaroa,
kadagamo hiriki-ra iviꞌomaravini kabaꞌi,
inaabinihi ida ijaꞌari hoariha,
Deus kavaꞌisohihi jiriki hahavi-ra iragarivini Deua bikahihi.
12 Hari.
Vanasohi bana ida avakadivarani,
avakadihojai hiki.
Avarigaki ida Deus avakadihojai,
avakadivarani asohini asohirini-ra kahivini bana.
Vavaꞌaha bana ida kidivaꞌisohihi jiriki asohikaꞌoaki avakadihojai-ra nasohivini mahija sohirini bikahiravini.
13 Deus ijaꞌari-ra nasohivini kamahini,
ni-bivaꞌadiki ida ijaꞌari,
ijaꞌari hoariha-ra vaꞌadiriki.
Bigathaniki bana ida hojai asohiriki abosini.
Hari.
Deua bivaꞌadiki bana ida ijaꞌari ijaꞌari hoariha-ra vaꞌadiki.
Ni-Deua binahokahiki bana Ibavi Jaharikaꞌoakia.
Badani jahakia kabadaniva ida Deu-ra vakaijokaki
14 Oigamina,
ijaꞌaria bada biniꞌaravini oadani ida badani jahaki Deus bihonariaki,
ni-nahina kaimoni hiki ida ijaꞌari kavarani:
—Deu-ra okajariꞌdarihi.
Deu-ra ovakaijokaki ho.
Nokiarini oadani ida badani jahaki Deua binofiki,
ni-arajomaki ida Deu-ra vakaijokavini-ra kahivini.
Ni-Deua biakavaꞌijoaki kaho ida ijaꞌari.
15 Vakavaꞌibodivarani bana hida rajomi kavaranihi.
Avahararania vahojaki vahabini adani avaigamini makari-ra vakainamoki,
vakadiꞌbai-ra vakainamoki jaboni.
16 Vaꞌora vakajoamora bana.
Vaꞌora avanoꞌaravini oadani vakadinahina vakainamokia,
ni-nahina kaimoni vaꞌora avaniꞌaki:
—Onofiki ida Deus aꞌonira kajoamoravini.
Vakaimaha bana ida avakadimakari.
Viꞌbaihajahakiꞌa bana — avakhaniki vahabini aꞌoni.
17 Hari.
Ni-nahina kaimoni Deu-ra avakaijokavini-ra akahiki,
anabadaniravini oadani ida badani Deua bihonariaki.
Avakaijokadoroha;
bada aniꞌahi.
18 Niki vahabini ida ijaꞌari avahararania hojaki nihahi:
—Ivani ivakaijokaki ada Deus.
Hovani ni-ovakaijokaki.
Kabaꞌi,
jahaki ida kodibadani,
hoariha-ra okajoamorabakhiavini — niki vahabini ida ijaꞌari.
Ogathaniki bana hida athini:
—Hora nanokiahivinihi bana ida Deu-ra ivakaijokavini,
badani jahakia ikabadanirini kabaꞌi.
Ni-ikaabokaki.
Hovani,
ira onanokiahivini hiki bana ida Deu-ra ovakaijokavini,
badani Deua binofikia okabadanina.
19 Ni-ikajariꞌdaki ada Deus hoarana kaꞌoa hojaki.
Kaꞌoa oamani ida.
Ni-arajomaki ida ijariꞌdarini Deus ira akavaꞌijoaja kaimoni.
Jahari kahonai abono vanokiarikia vakajariꞌdarihi jaboni ida.
Kabaꞌi,
vatharararaki adani,
vaimahidana.
Ni-Deus vaꞌora akavaꞌijoaki,
ni-bada vaniꞌaki ida badani Deua binofiki.
20 Ikabajadiꞌoamanija.
Iogaria koda hida kodivarani?
Bada iniꞌaravini oadani ida badani Deua binofiki,
ni-nahina kaimoni Deu-ra ikajariꞌdaravini-ra ikahiki.
21 Vara ovaniꞌaki bana ada akadijaꞌari okhananavaki Abraão kohana.
Deus Abraão sohikaꞌoana-ra kahiꞌiki.
Abraão Deu-ra kajariꞌdaravini mani ida Deus athi-ra naabavini hija.
Deus Abraão-ra kaijoꞌavini hiki ada kidisai Isaque.
Deu-ra kanavaꞌigakamarivini hina.
22 Iogaria koda hida kodivarani?
Abraãoa bivakaijokaki ada Deus,
bada biniꞌaki jaboni ida Deua bihonariavini hiki.
Deus athi-ra naabavini mani ida Deu-ra vakaijokavini najahakaꞌoani hija.
23 Oniania,
namithaki ida athii Deus athi kapapirania hojaki:
“Abraão Deu-ra vakaijokavini mani ida kidimahi sohikaꞌoani Deua
bikahivini hiꞌia.”
Oniaroa,
Deus Abraão-ra vara vaniꞌaki:
“Kodivaꞌahi ada Abraão.”
24 Hari.
Avarigaki ida ijaꞌari Deu-ra vakaijokavini arajomarini.
Badani Deua bihonariakia kabadanihi jaboni,
oniani ida Deua kidimahi sohikaꞌoani bikahivini hija.
25 Hari.
Onivani fori hija ida namithaꞌiki jaboni Raabe kohana kania.
Gamo makhira-ra odoraoniki ida.
Kabaꞌi,
Raabe vaꞌora kajoamoraꞌaha adani Israel kaijaꞌari Canaã kaarabonia vavanavanahaki.
Vaꞌora anaihotaki Raabe vaꞌora kakodiavini hagihi hoariha avikhana.
Vaꞌora kakodiavinia kabadanini mani ida Deu-ra kajariꞌdaravini-ra nanokiavini hija,
oniani ida kidimahi sohikaꞌoani Deua bikahivini hija.
26 Hari.
Hojarihi ida ijaꞌari maꞌonahani kidiania;
abaꞌoki ida ijaꞌari.
Onivani fori hija ida ijaꞌari Deu-ra vakaijokaꞌbadaraki.
Bada biniꞌaravini kabaꞌi ida badani jahaki Deua binofiki,
Deu-ra vakaijokavini-ra kahihi;
bivakaijokaꞌbadaraki ada.
Abaꞌoki fori hiki ida Deu-ra vakaijokavini.