HEBREUS
Deus kaisai varani hina hida
1
Hari.
Mahi ꞌboꞌdakari Deus abono-ra nanokiabakhiaha athi namoniva abono vakadiania afohanana.
Vahoariha vakamithahi ida Deus vara nibakhiana,
vahoariha vanokihi ida vadami fori hiki,
vahoariha vanokibakhiahi ida kidibadani danoki.
Onivani fori hija ida Deus vaꞌora navaꞌisohibakhiavini kidihojai,
jahana,
danona niha nininia.
Deus vaꞌora karonabakhiaꞌaha adani athi namoniva abono afohanana,
vaꞌora vanavaꞌisohira kaimoni adani akadijaꞌari avikhananavaki.
Vara vavaniꞌahananaꞌihi ida Deus athi pitani itxani,
ijaꞌaria avigaja kaimoni ida Deus hojana niha ninini.
2 Hari.
Oniaroa,
arihokina oadani,
Deua bikaronamainaꞌaha ada kidisai,
haria navaꞌisohira kaimoni afojahaki Deus hojana niha nininia.
Hari.
Hahavi amonahani kari Deua binavaꞌisohiꞌaha ada kidisai binofiki niha nininia hahavi amonahaki kaimonia,
oniani ida kidisaia binamonahavini hiꞌia.
Deua biniꞌaha:
—Kodisai,
kadaimoni kaꞌoa bana ida nahina hahavi,
ivahojaki kaimoni — niha ada Deus.
3 Kidisai vagana,
danona,
jahana binanokiaki ida Deus vagana,
danona,
jahana niha ninini.
Deus kahojai oamani ida kidisai hojana hija.
Deus kaisai athi danonia bikahinanikaki ida hahavi hojaki,
hojahahaꞌoadahaja kaimoni.
Deus kaisaia binaꞌdiahiꞌimidiaꞌiki ida kidibadani ijaꞌari vakadiania,
Deua bikaabokaja kaimoni ida ijaꞌari kahojai asohirikaꞌoaki-ra naꞌbiravini.
Naothinia Deus kaisai kaꞌdaꞌdi danoki kavithi ibavinia nama vithiꞌaha Deus pitana aniaja.
Deua bikaabokaki ida hahavi binofiki.
Danona arafiaki ada Deus kaisai
4 Hari.
Deus kaisai gahinaki kaꞌdaꞌdi danoki kabadania.
Ovari vaꞌora aradakarahoki adani Deus ibavi kaijaꞌarini.
Deua binaonivini “kodisai”,
oniani ida onina jahani ibavi kaijaꞌarini vaonina jahani-ra aradavini hija jaboni.
5 Deua biniꞌaha ada kidisai:
“Ivani,
kodisai i.
Hidakabaꞌi kadabiꞌi ohina-ra okahiki ho.”
Ni-nikia Deus vaꞌora vara niꞌaki adani ibavi kaijaꞌarini.
Kidisai vani ada Deua biniꞌara.
Deua vara bivaniꞌaꞌaha jaboni ada kidisai:
“Kidiabiꞌi kaimoni bana ho.
Kodisai kaimoni ada.”
Ni-nikia kavaraniriha ada Deus,
ibavi kaijaꞌarini vakadimoni.
Kidisai vani ada Deua biniꞌara.
6 Hari.
Kidisai hoarana-ra karonavini viahania ijaꞌari vakadiania,
niha ada Deus:
“Vaꞌora ohonariaki bana
adani oibavi kaijaꞌarini
hahavi vajoronina kodisai-ra
vakanamasivira kaimoni.
Hora vakanamasivivini vani
fori vanihara bana ada kodisai.”
Niha ada Deus.
7 Ibavi kaijaꞌarini-ra vaꞌora vara vaniꞌavini vani Deua biniꞌaꞌaha:
“Sirisiriki fori vihina vani vaꞌora onamonahara adani oibavi kaijaꞌarini.
Siho akahaꞌdiki fori vihina vani vaꞌora onamonahara adani oibavi
kaijaꞌarini,
kodihonai abono vihiki adani.”
Nihi ida Deus athi.
8 Hari.
Ni-nikia Deua vara biniꞌaki ada kidisai.
Kidisai vani ada Deua biniꞌara:
“Ivani Deus i.
Mahi anokhomirikia vaꞌora ivakaꞌdaꞌdiki adani
ijaꞌari hahavi.
Asohikaꞌoaki ida iathini
vaꞌora ihonariafiahavini,
vakadikaꞌdaꞌdi ihiki i.
9 Ivajahaki ida hojai hahavi asohikaꞌoaki.
Ikaimajahariki ida hojai
hahavi asohiriki,
oniani ida hovani,
kadaDeus ohina,
ira onagathogathovini hija.
Kaꞌdaꞌdi kaꞌoa ihini
ira okahiki ho.
Oanarafiaki ida kadakhaiini,
iipohini vakadikhaiini
aradamini hija kaimoni.”
10 Deua biniꞌaha ada kidisai jaboni:
“Ivani kaꞌdaꞌdi kaꞌoa i.
Nahina hojarini kari ivani oa inamonahaꞌia ida arabo,
nama hiki.
Isaꞌania inamonahaꞌiki ida.
11 Ivani,
ihojahahaꞌoadahaki i.
Ihimiki bana ida
kadamonahi.
Makari ꞌboꞌda ꞌbirani vani fori hija bana ida nama,
arabo hiki ihimini.
12 Ijaꞌari makari ꞌboꞌda-ra
naroaroavini vani fori hija bana ida nama,
arabo hiki-ra inaroaroavini.
Ijaꞌari kidimakari ꞌboꞌda-ra anaabosivini vani fori hija bana ida nama,
arabo hiki-ra ianaabosivini.
Ivani kadahojai ni-aabosiki,
ni-iꞌboꞌda hiki.”
13 Deus kidisai-ra niꞌaꞌaha jaboni:
“Vithi oꞌdihana aniaja
kaꞌdaꞌdi kavithi ibavinia.
Iꞌdamani kanaboꞌania vaꞌora oobaiki bana adani ira vavajahariki,
vaꞌora ikadaꞌahaꞌahaki fori vihira kaimoni.
Vaꞌora onihimahahaviravini oadani vithi bana opitana aniaja kaꞌdaꞌdi ihini kodiania.”
Niha ada Deus.
Ni-nikia kavaraniriha ada Deus,
ibavi kaijaꞌarini vakadimoni.
Kidisai vani ada biniꞌara.
14 Hari.
Oniaroa.
Nahina mani ida Deus ibavi kaijaꞌarini vakadibadani hija?
Deus kahonai abono vihiki adani.
Maꞌonahai nokiariki adani.
Deus vaꞌora karonabakhiaha adani ibavi kaijaꞌarini,
vaꞌora vaakodiara kaimoni adani ijaꞌari Deus vaꞌora akavaꞌijoaꞌiki kaimoni.