Timóteo khama vaꞌora akaꞌivanitiki bana adani arigamina igorania vajoronibakhiaki.

Akaꞌivanitiki jaboni ida arigamina Áfia oniki.

Akaꞌivanitiki jaboni ada arigamina Arquipo oniki.

Akadiania hojana kari akadibadani ipohini ada Arquipo,

haria kakodiaꞌiki ada.

3 Vaꞌora okanikhariaki adani Deus akadikaꞌdaꞌdi Jesus Cristo khama aꞌonira vakajoamoravini,

aꞌonira vanoꞌavini jaboni vaꞌi jahajahania.

4-5 Oigamina Filemom,

ira onakaidivaki ho.

Deu-ra vara oniꞌabakhiavini vani ira okavaꞌibodivaraniꞌiki i.

Deu-ra oniꞌaki:

—Deus,

ivani ijahaki i.

Ikajoamorajahakiki ada oigamina Filemom.

Okamithaꞌiki ida varani hina,

kadaijaꞌari hahavi-ra vaꞌora nofijahakivini,

bivakaijokajahakiki ada Jesus Cristo.

6 Filemom khama akajariꞌdariha ada Jesus,

oniani ida ariabono akanajahamisikhamavini hija.

Ajariꞌdarina mani ida haria anigahivinia ira akanikhariavini hija.

Aogajahakivini anofiki ida kadabadani jahaki akadiania,

niha ninini haria iakavaꞌijoavini,

haria ikajoamoravini,

haria iakodiavini hiki.

7 Oigamina Filemom,

ira onakaidivaki ho.

Vaꞌora inakaidivaki adani Deus kaijaꞌari hahavi,

vaꞌora ikajoamorabakhiaꞌiki,

vavaꞌi bodini-ra vanadanovini vajariꞌdarina,

oniani ida hora navaꞌikhaiinikarahoja,

inakaraki ida ojariꞌdarina.

8-10 Hovani Paulo ho.

Cadeia hora avibaivini hiki Cristo kabadania okabadanina.

Cristo kahonai abono ohina mani ida kidijaꞌari navaꞌisohiva abono hora nihaja.

Oigamina Filemom.

Asohini kabaꞌi ida ira oavadadamivini badani onofiki-ra bada iniꞌaja kaimoni,

ni-onofiki ida ira oavadadamivini.

Ira onakaidivaki ho,

oniani ida badani onofikia ira okanikhariakaꞌoavini hija bana.

Deus kaijaꞌari-ra vaꞌora inakaidivavini mani ida vara ira oniꞌavini hija.

Kodivarani hiki ada kadahonai abono gathaki Onésimo oniki.

Cadeia ohojana oadani,

Onésimo-ra onanamithavini hiki ida Jesus monina.

Jesus kania abono-ra gahinai nihavini mani ida kodisaia onaonivini hija.

Kidiabiꞌi fori ohiki ho.

11 Hari.

Onésimo kadania hojana kari,

ni-ira kakodiajahakiki.

Ni-nijanarihi ida kidihojai afojana.

Kidihojai ꞌboꞌda-ra kavaꞌipahinivini mani ida ira kakodiajahakivini hija bana.

Hora kakodiaꞌiki ada jaboni.

12 Okaronaki ada Onésimo kadania ajoina.

Okavaꞌibodiki ada ovari,

onakaidivaki ada.

13-14 Filemom,

kodiania ihojaja vaha;

hora ikajoamoramanihi vaha.

Kodiania ihojarihi;

ni-ikaabokaki ida hora ikajoamoravini.

Oniani ida kadahonai abono Onésimo kodiania hojaꞌina-ra ovajahavini hija,

cadeia ohojana oadani hora kajoamorara kaimoni.

Cristo kabadania okabadanina mani ida cadeia hora avibaivini hija.

Kodihonai abono hiriha ada Onésimo,

oniani ida kadania ajoina ohonariavini hija.

Ivaꞌahaha bana ada Onésimo,

ovajahaki ida kodiania hojana.

Ivaꞌahariha;

ni-hora ikajoamoravini-ra oavadadamivini-ra onofiki.

Ira okanikhariakaꞌoahi bana.

15 Jahaki vahabini ida masiko ipohiriki Onésimo akaraꞌoꞌimidiana kadania,

oniaroa,

kadania joiꞌaha hojahahaꞌoadahara kaimoni.

16 Oniaro kari,

kadahonai abono gathaki ada Onésimo.

Hidakabaꞌi kadahonai abono hina kabaꞌi,

iigamini ada jaboni.

Jesus Cristo-ra kajariꞌdaravini mani ida oigamina-ra onakaidivavini hija.

Inakarahoki bana ida iigamini Onésimo-ra inakaidivavini kadahonai abono hina,

Cristo igamina hina jaboni.

17 Hora ikavaꞌibodivaranivini kadaꞌbami ohina.

Hora igathanivini vani fori hiva ida Onésimo joina-ra igathanijahakivini bana.

18 Kadania hojana kari,

hojai jaharikia kahojaiꞌiki vahabini ada.

Kadanahina-ra boꞌdiaꞌiki vahabini ada.

Hora navaꞌisohi bana.

Hovani ira onaabosihahaviki i.

19 Filemom,

hovani homaina onajirija hida papira athini pitani osaꞌa.

Hovani Paulo kaꞌoa ira onaabosiki ida Onésimo ira naabosiravini hiki.

Oogaki ida nahina namithaꞌiki kadania ikavaꞌihokijahakiꞌiki.

Ira oakodiavini hiꞌiki kadamahi jaꞌdini anokhomiriki-ra igathanivini,

Cristo-ra ivakaijokabiininivini,

oniani ida hora inaabosiravini fori nihani hija.

20 Oniani ida oigamina,

Cristo kahonai abono i.

Ira okanikhariaki bana Onésimo-ra igathanijahakivinia.

Cristo igamina arihina mani ida ovaꞌi-ra khai iniꞌavini-ra onofivini hija.

21 Okaronavini kabaꞌi hida oathi,

oogaki kodikanikhari-ra inaabavini.

Oogaki jaboni ida ianarafiavini kodikanikhari-ra ikamithavini.

22 Ira okanikhariavini hiki jaboni hora ikaibavijahahijoravini bana vada ibavinia.

Okavaꞌibodivaraniki ida avakadikanikhari Deus bikamithaki bana avakadiania oajoina-ra vaꞌahavini.

23-24 Aꞌonira vakaꞌivanitiki ada Epafras.

Kodiania hojaki ada.

Jesus monina-ra anamonionivini mani ida cadeia avibaivini hija jaboni.

25 Onofiki ida akadikaꞌdaꞌdi Jesus Cristo aꞌonira kajoamoravini afohaꞌoadaha.

Hari ida vani oamani kodivarani.