TITO
Pauloa bikaronaki ida athi kapapirani Tito kania
Tito kaimoni hida Paulo athi kapapirani
1
Tito,
oathi hida onajirija kadaimoni.
Hovani Paulo ho.
Deus kabadani abono ho.
Jesus Cristo hora karonavini hiki athi oavaadahaonivini.
Deus hora nagathogathovini hiꞌiki vaꞌora oakodiara kaimoni adani kidijaꞌari,
danoja kaimoni ida vajariꞌdarina.
Deus vaꞌora nagathogathoꞌiki adani kidijaꞌari.
Deua binofiki ida vaꞌora okaꞌojomoꞌivini athia.
Kaꞌoa hini ida Deus athi ijaꞌari-ra navaꞌisohijahakivini hiki hojai asohiki binofikia.
2 Deus athi haria navaꞌisohijoravini hiki ida mahi anokhomiriki Deus kania anaviahanokhaja kaimoni.
Hahavi-ra namonahavini viahania Deua biniꞌaꞌiki:
—Ijaꞌari-ra onoꞌaki bana ho mahi anokhomirikia kodiania — niha.
Deua ni-bikorijanahaki ida ijaꞌari.
Kaꞌoa hiki ida mahi anokhomiriki varani hini.
3 Deua binofivini kamahini vani ijaꞌari-ra nanamithavini hiꞌiki ida mahi anokhomiriki varani hini.
Deus akadiꞌakavaꞌijoahi abono hora nanamithavini hiꞌiki hida mahi anokhomiriki varani hini,
hora honariavini hiki oananamithaonija kaimoni.
4 Tito,
ira oakaronavini hiki hida oathi kapapirani.
Jesus kania iabono gahinai inihaꞌavini ira oakodiavini mani ida kodisaia ira onaonivini hija.
Harivani Jesu-ra avakaijokaꞌbamakhamaki hari.
Onofiki ida Deus akadiabiꞌi,
Jesus Cristo khama ira vakajoamorahaꞌoadahavini,
ira vanoꞌavini jaboni vaꞌi jahajahania.
Akadiꞌakavaꞌijoahi abono ada Jesus Cristo.
Tito hojana oadani kajoviri Creta kaonikia
5 Creta kajoviri kakaarabonia ira onahojahaꞌiki ho,
iananokhomija kaimoni ida badani onamonahaꞌiariki,
inasohija kaimoni ida nahina asohiriki.
Ira ohonariavini hiꞌiki jaboni:
—Tito,
okhaꞌa bana Jesus Cristo-ra vanofiꞌiki vaibavia mahija Jesus kaijaꞌari navaꞌisohiva abono-ra vaꞌora ianagathogathonionivini.
6 Nimania bana hida Jesus kaijaꞌari navaꞌisohiva abono hojana jahaki.
Ijaꞌari vahoariha avakaraganaharia kaimoni ida hojai asohiriki-ra bada niꞌavini.
Gamo hoarani oavani-ra vahojara ada Jesus kaijaꞌari navaꞌisohiva abono.
Jesus kaijaꞌari navaꞌisohiva abono-ra inagathogathovini kamahini,
hariꞌa inagathogatho bana ada Deus athi-ra naabariki kaabiꞌi.
Hariꞌa inagathogatho bana ada badani jahariki-ra kavaꞌipahinipaꞌitxiriki kaabiꞌi.
Hariꞌa inagathogatho bana ada morobohariki fori hiki kaabiꞌi.
Jahaki ada makhira kidisai-ra navaꞌisohijahakivini-ra ogavini vahoariha vakanavaraniharara kaimoni.
7 Deus kabadani abono ada Jesus kaijaꞌari navaꞌisohiva abono.
Ovari vaꞌora akadavaꞌaꞌiki adani ijaꞌari.
Ijaꞌari vahoariha avakaraganaharia kaimoni ida hojai asohiriki-ra bada niꞌavini.
Ni-jahaki hida abono-ra vaboraborahavini.
Ni-jahaki ada vaipohina navaꞌisohiva abono aihamahijorakina,
ni-kahanoki,
ni-hoariha-ra dafiaki.
Ni-jahaki jaboni ida jiniro aꞌbaꞌdini-ra kavaꞌibodivaranihaꞌoadahavini.
8 Binofiki ida ijaꞌari-ra gathanijahakivini gorana.
Bivajahaki ida nahina jahaki hahavi-ra namonahavini.
Abono-ra nasohiki ada Jesus kaijaꞌari navaꞌisohiva abono.
Kidibadani asohihahaꞌoadahaki ada.
Deua binofiki-ra namonahaki ada.
Kaborohirohi hina kabaꞌi vaꞌi kaabanahahamaniha.
9 Jesus kaijaꞌari navaꞌisohiva abonoa binofijahakiki ida akadiꞌojomoꞌihi athini,
ni-bikajariꞌdapaꞌitxiki.
Biogaki ida asohini Deus athi hini.
Nikia vaꞌora khai niꞌaki adani vahoariha Deus varani hina asohikia.
Binasohivini biogaki ida vahoariha Deus athi-ra vakajoniki vaathi asohiriki.
10 Hari.
Jesus kaijaꞌari vahararana vahojaki adani Deus athi kaꞌoa hini-ra vakajoniki.
Vakadivarania ijaꞌari-ra vakorijanahaki adani.
Cristo kaijaꞌari vihina-ra vakahiꞌbadaraki adani.
Judeus kaijaꞌari vaipohiki adani Cristo kaijaꞌari vihiꞌbadaraki.
11 Vakadivarani asohiki vavanihavini mani ida gora ipohiki kaijaꞌarini-ra vakaꞌojomoꞌivini hija.
Ni-asohiki ida vakadivarani,
oniani ida gora ipohiki kaijaꞌarini-ra vaꞌora vanadabavini hija.
Asohiriki ida vaꞌora vakaꞌojomoꞌivini,
vagathanija kaimoni ida jiniro.
Ni-vavaꞌi anaipahihipaꞌitxini hiki ida vahoariha vakadijiniro-ra vanofivini.
Ni-asohipaꞌitxiki jaboni ida vaꞌora vakaꞌojomoꞌivini abosini.
Ivani Tito,
Jesus kaijaꞌari navaꞌisohiva abono khama,
vaꞌora vahonaria bana adani Deus athi-ra avanasohiriki viso vakhanina.
12 Creta kajoviri kakaaraboni kaijaꞌarinia vara bivaniꞌaꞌiki ida kidiarabo kaijaꞌarini.
Niha ada vaathi namoniva abono:
“Korijanahia vakavaranihahahaꞌoadahaki adani Creta kajoviri
kakaijaꞌarini.
Tapoꞌija ijaꞌari-ra napohimajavini fori vihiki adani.
ꞌBai-ra vanofivini arafiaki
jaboni adani ijaꞌari
vakajoniahaki.”
Nimania ida vaꞌora ogava abono kidiarabo kaijaꞌarini vahojana-ra kanavaranihavini.
13 Kaꞌoa hiki ida varani vihina.
Oniania ira onavaꞌisohivini hiki:
Vaꞌora kaabanidanoki bana mahija Deus athi akajariꞌdariki-ra vanaabajahakivini.
14 Vaꞌora kaabanidanoki bana mahija varani asohiriki-ra vakavaꞌipahiniꞌavini.
Judeus kaijaꞌaria vanamonahaki ida varani ꞌboꞌda kaꞌoa hiriki.
Makhira vahoariha vanamonahaki ida honari ipohiki ijaꞌaria bivakaajiki kaimoni.
Varani asohiriki-ra vanamonahakia vakajoniki ida Deus athi kaꞌoa hini.
15 Deus ijaꞌari kavaꞌibodivarani-ra najahakaꞌoahi;
ni-hojajanaki ida nahina kaaji hiki,
vaꞌi bodini vara nini asohiriki hiki.
Ijaꞌari Deu-ra vakajariꞌdakia vakavaꞌibodivaranihahaꞌoadahahi ida varani asohiriki.
Ni-vakadikaaji-ra vanaabavinia binajahaki ida vakadivaꞌibodivarani.
Vakajoniki ida Deus athi.
Hojaki ida nahina asohiriki vavaꞌi kaabanahahani kania.
Vakadivaꞌibodivarani ni-asohiki jaboni.
16 —Deu-ra aogaki hari — vaabono vaniꞌaki adani.
Deu-ra avigara vaha;
ni-vakadihojai asohiriki-ra bada vaniꞌajanaki vaha.
Deua bikaramonaki ida vakadihojai.
Ni-vanaabaki ida Deus athi.
Varagariki ida Jesus kaijaꞌari vihina.