Ijaꞌari hahavi vakadibadani abosini varani hini
4
Deus,
Jesus Cristo khama vaviaha vara ira oniꞌaki bana i,
Timóteo.
Mitha iniꞌajahaki bana hida kodivaꞌisohihi.
Khaki bana ida mahi Jesus Cristo ijaꞌari hahavi vakadihojai-ra nasohivini kamahini.
Ijaꞌari hokiki,
ijaꞌari vaabiniꞌiki vihiki-ra vaꞌora naabosivini kamahini.
Asohini asohirini-ra kahivini vani vagathaniki bana ida vakadihojai abosini.
Joiki bana ada Jesus Cristo ijaꞌari hahavi-ra vaꞌora vakaꞌdaꞌdira kaimoni,
oniani ida,
2 Timóteo,
Jesus varani hina-ra vara ivaniꞌabakhiavinia ira ohonariavini hija.
Hariꞌa ikajoni ida vara ivaniꞌavini.
Ijaꞌaria vakamithavini vanofihi;
vaꞌora nanamitha bana.
Ijaꞌaria vakamithavini vanofiravini kabaꞌi,
asia vaꞌora nanamitha bana.
Vaꞌora navaꞌisohijahaki bana mahija Jesus varani hina-ra vakajariꞌdaravini.
Vaꞌora kaabanibakhia bana adani ijaꞌari Jahari kabadania vakabadaniki mahija vakavaꞌipahinivini.
Vara vaꞌora niꞌa bana adani Jesu-ra avavajahamisijanariki mahija Jesu-ra khai vaniꞌajahakiꞌianavini.
Vaꞌora kaꞌojomoꞌi bana adani ijaꞌari hahavi.
Hariꞌa vaꞌora akaihamahijoraki bana adani ijaꞌari avigahajorakiriki.
Avigaravini oadani,
vaꞌora kaꞌojomoꞌiꞌiana afobakhia bana.
3 Khaki bana ida mahi ijaꞌari ojomoꞌihi asohiki athini-ra vakamithavini-ra vanofijanaravini kamahini.
Ni-vakavaꞌipahinivini vanofiki bana ida vakadivaꞌinofinofi kaipahivahaki.
Jaharini kabaꞌi,
khai vaniꞌaki ida vahojana hiki.
Vaꞌora vakaboaꞌiki bana adani ijaꞌari vaipohiki ojomoꞌihi athini asohirikia vakavaraniki.
Vaꞌora vakaabaniravini hiki vakadivarani vavajahavini.
Vakadiꞌojomoꞌihi athini ida varani vakamithavini vanofiki.
4 Ni-vakamithavini vanofijanaki ida varani kaꞌoa hini.
Vanofiki ida vakadijaꞌari avikhananavaki kavarani ꞌboꞌda-ra vakamithavini.
5 Ivani Timóteo,
iabono akavaꞌigairijahaki bana mahija kaborohirohi ihiravini.
Ikapoari bana ida ivaꞌini rogo inini.
Vara ivaniꞌabakhia bana ida Jesus varani hina mahija vahoariha vaabono gahinai vanihavini Jesus kania.
Badani,
varani hana hini Deus ira honariavini hiki-ra naabahahaꞌoadahaꞌa afohahavi bana mahija kidibadani abono jahaki ihivini.
6 Vara oabono ovaniꞌaki ho bana.
Ipohijanarihi ida mahi hora vanaabinivini kamahini kaimoni.
Ijaꞌaria vanaabinihi ida igitha Deu-ra vakanavaꞌigavini kaimoni,
onivani fori hija bana ida oabinina kamahini,
kodimahia Deu-ra okanavaꞌigavini.
Ijaꞌari ajihini kamahini amaakarini fori hiki bana ida oabinina kamahini.
7 Bada onihaꞌoadahaꞌiki ho oadodohaꞌoadahana,
bada oniꞌajahakija kaimoni ida hahavi Deus hora honariavini hiꞌiki.
Onabadanihahaviꞌiki ida Deua binofiki bada oniꞌavini.
Ojoiribanirina vani Deus athi-ra onaabaꞌia.
8 Kidiania okaikahina,
ogahinaki bana ho Deus kodimoni hini binaibavijahakia.
Kaꞌdaꞌdi kakajamari kajahaki fori hiki ida kodimahi jahakaꞌoania ogahinaki bana ho.
Asohikaꞌoaki ida akadikaꞌdaꞌdi kabadani ijaꞌari-ra nasohivini.
Biogahahaviki ida athi naabani vihiki vakadihojai,
oniani ida hojai abosini asohikia vaꞌora noꞌahananavini hija bana.
Kodimoni kaꞌoa hirihi ida hojai abosini Deua binaibavijahaki.
Jesus joina-ra vanaviahanokhahahaviki vakadimoni afohanana ida kaꞌdaꞌdi kakajamari kajahaki fori hiki Deua binaibavijahaꞌiki.
Paulo abono-ra vara vaniꞌavini
9 Kodiania khaꞌa bana jorakia hora inavanavanahavini.
10 Demas kidinahina-ra anaꞌbaꞌdivini-ra kavaꞌibodivaranihaꞌoadahavini mani ida hora kavaꞌipahiniꞌavini hija.
Tessalônica sidajia okhaꞌaha.
Oipohina Crescente oniki Galácia kaarabonia okhaꞌiki.
Oipohina Tito vani ada Dalmácia kaarabonia okhaꞌaha jaboni.
11 Lucas vani hada ahoaraniꞌaha kodiania hojana.
Inakoꞌdihaꞌa bana ada Marcos mahija ivikhavini kodiania.
Onofiki ada Marcos hora kakodiavini Deus kabadania akabadanija kaimoni.
12 Okaronaꞌiki ada Tíquico Éfeso sidajia okhana.
13 Trôade sidajia ikaikahini vani ianikha bana ida kodimakari odoki oigamina Carpoa biakadavaꞌaꞌiki.
Ianikha jaboni bana ida papira onajiriꞌiki,
papira hoariha hiki mahija ivikhavini kodiania.
Onofiꞌoamanija ida igitha asafini kapapirahi-ra ivikhavini.
14 Alexandre vani ada hora najaharihariꞌara.
Ovari kabadani kaꞌoa ida hado amonahani,
siꞌaha kamonahani hiki.
Alexandre hora najahariharivini mani hida akadikaꞌdaꞌdi Jesus hora naꞌdaꞌdiabosivini hija bana.
15 Alexandre-ra naihamahikarahoꞌiki ida Deus athi-ra vara ovaniꞌaꞌavini.
Iabono akavaꞌigairi jaboni bana mahija ira najaharihariravini.
16 Ijaꞌari kavarani nasohiva abono kania hora avavikhabiininiꞌiki adani hora vagathiꞌiki,
hora avanaathidanoararira kaimoni,
ni-kodivaꞌahi hoarana hojaki kodiania.
Vaofinina hora vanahojahahahaviꞌiki adani.
Hora vanahojahavini kabaꞌi,
ni-onofiki ida Deus vaꞌora naabosivini.
17 Vahoariha hora vanahojahavini kabaꞌi,
ni-Deus hora nahojahaki.
Kodiania hojahahaꞌoadahaki ada.
Hora kakodiavini mani ida athi hahavi onamonijahakivini hija,
judeus kaijaꞌari vihirikia vakamithaja kaimoni.
Ijaꞌari Deu-ra vanofirikia vanofiki ida jomahi hiihiha koꞌbai hora vanihavini.
Deus vani ada hora akavaꞌijoaꞌara.
18 Khaꞌianaki bana ida kodiania nahina hahavi jahariki,
Jesus hora akavaꞌijoaꞌianaki bana ho ijaꞌari vajaharikaꞌoaki vasaꞌa kabodinia.
Jesus hora kajoamoraki bana ho.
Kidijaꞌari hahavi bivakaꞌdaꞌdiki vakadiania hora osaki bana ada Jesus nama.
Jesus kania ajoronina kamahini,
aniꞌaki bana ada Jesus:
—Jesus,
ijahaꞌoamanija.
Haria iakavaꞌijoaꞌiki i,
haria iakadavaꞌajahakiꞌiki hari afohaꞌoadaha,
akadimahi-ra inajahaꞌiki i jaboni,
oniani ida mahi anokhomirikia ijahani-ra khai aniꞌavini hija afohaꞌoadaha — Jesu-ra aniꞌaki bana hari.
Nimania ida anofiki.
Paulo vaꞌora kaaminaꞌaha adani kidivaꞌahi
19 Vaꞌora kaꞌivaniti bana adani Áquila,
Priscila khama kodimoni.
Vaꞌora kaꞌivaniti bana jaboni adani Onesíforo gorana kaijaꞌarini.
20 Hojahaꞌaha ada Erasto Corinto sidajia.
Trófimo kavamonina mani ida Mileto sidajia onahojahavini hija.
21 Onofiki ida paha ajiꞌbini viahania ikaikahini kodiania.
Arigamina akadiania vahojaki,
Êubolo,
Prudente,
Lino,
Cláudia vihiki,
vahoariha khama,
ira vakaꞌivanitiki hadani.
22 Timóteo,
onofiki ada akadikaꞌdaꞌdi Jesus Cristo kadania hojahahaꞌoadahana.
Onofiki jaboni ida Deus aꞌonira kajoamorahaꞌoadahavini.
Paulo athi anokhomiꞌini hida.