2 Timóteo,

Jesus kania iabononi gahinai inihavini ira oakodiaꞌavini mani ida kodisaia ira onaonivini hija.

Onofiki ida Deus akadiabiꞌi,

Jesus Cristo akadikaꞌdaꞌdi khama ira vakajoamorahaꞌoadahavini,

ira vanakaidivavini,

ira vanoꞌavini jaboni vaꞌi jahajahania.

3 Macedônia kaaraboni-ra oanikhahavini kari ira ohonariavini hiki Éfeso sidajia ihojaronini.

Éfeso sidajia vahojaki adani makhira ojomoꞌihi athini asohirikia vakavaraniki.

Vaꞌora kaabani bana mahija vahoariha-ra vaꞌora vakaꞌojomoꞌijanaravini.

4 Vaꞌora kaabani bana mahija vakadijaꞌari avikhananavaki kavarani ꞌboꞌda-ra vara vavaniꞌajanaravini.

Ni-jahaki jaboni ida ijaꞌari kohana avikhananavaki vaonina ipohikia vakavaranina.

Nimania ida vakadivarani,

kamaꞌdaꞌianaki ida ijaꞌari vaabono avakanaathidanoararikhamavini.

Ni-vaꞌora vaakodiaki adani vahoariha Deua binofiki-ra avigavini vakadiania.

Ijaꞌari Deu-ra vakaijokahi;

biogahi ida Deua binofiki kidiania.

5 Onofiki ida vahoariha-ra vanofidorovini aꞌbaꞌdini,

oniani ida kodikaabanahia vaꞌora onavaꞌisohivini hija.

Onofiki ida vavaꞌi bodini vara nini sohini,

Deu-ra vavakaijokakaꞌoavini jaboni,

aꞌbaꞌdija kaimoni ida vahoariha-ra vaꞌora vanofidorovini.

6 Makhira ojomoꞌihi athini asohirikia varagariki ida Deus athi.

Vakadiꞌojomoꞌihi asohirini mani ida varani sohirikia vaꞌora kanavaranija.

7 Vanofiki ida vahoariha-ra vakaꞌojomoꞌivini Deus kavaꞌisohihi jirikia.

Ni-avigaki ida nahina nini vaꞌora vakaꞌojomoꞌivini athini.

Vakavaꞌojomoꞌihavini kabaꞌi,

ni-avigaki nahina hini ida vara vavaniꞌabakhiaki.

Asohiki vavanihaki ida vakadiꞌojomoꞌihi.

8 Aogaki ida jahani Deus kavaꞌisohihi jiriki judeus kaijaꞌari-ra vaꞌora navaꞌisohiꞌboꞌdavini hiꞌiki.

Jahaki ida akavaꞌihokivini nahina kaimoni Deus vaꞌisohihia haria noꞌavini hiꞌiki.

9 Jahaki ida akavaꞌihokivini jaboni ijaꞌari hana vihina vakadimoni Deus kavaꞌisohihi jiriki.

Ijaꞌari hojai asohikia kahojaiki kaimoni hirihi ida Deus kavaꞌisohihi jiriki.

Ijaꞌari hojai asohiki-ra vakajoniki vakadimoni ida Deus kavaꞌisohihi jiriki.

Vaꞌisohihi jiriki-ra vakapoaririki,

Deus athi-ra vanaabariki jaboni vakadimoni ida Deus kavaꞌisohihi jiriki.

Ijaꞌari Deu-ra vakajoniki hojai asohirikia vakahojaiki jaboni,

vakadimoni ida Deus kavaꞌisohihi jiriki.

Ijaꞌari Deu-ra vifiniriki,

ijaꞌari Deus nahina hirina-ra vakahiki vakadimoni jaboni ida Deus kavaꞌisohihi jiriki.

Vakadinaꞌarihavi-ra vanaabiniki,

vakadimoni ida Deus kavaꞌisohihi jiriki.

Vakaabiniki jaboni vakadimoni ida vaꞌisohihi jiriki.

10 Makhira kidigamo hiriki khama vaabono vakaviꞌomakhamaki vakadimoni jaboni ida Deus kavaꞌisohihi jiriki.

Makhira badani kaipahivahakia vaabono vakanabadanihakhamaki,

gamo badani kaipahivahakia vaabono vakanabadanihakhamaki vakadimoni ida Deus kavaꞌisohihi jiriki.

Ijaꞌari ijaꞌari hoariha-ra vaboꞌdiaki pavakari vanihaki kaimoni,

vakadimoni jaboni ida Deus kavaꞌisohihi jiriki.

Korijanahi abono vakadimoni ida vaꞌisohihi jiriki.

Vahoariha-ra avakanisaninahihaki korijanahia vakadimoni jaboni ida Deus kavaꞌisohihi jiriki.

Ijaꞌari Deus kaꞌojomoꞌihi asohiki-ra vanaabariki vakadimoni jaboni ida Deus kavaꞌisohihi jiriki.

11 Kodivarani hiki ida ojomoꞌihi kavaranihi Deus ijaꞌari-ra kanamonivini hiꞌiki.

Hora navaꞌisohivini hiki monina jahaki oananamithaonira kaimoni.

Jahana arafiakaꞌoaki ada Deus.

Ijaꞌari kajoamorava abono ada.

12 Khai oniꞌavini hiki ada akadikaꞌdaꞌdi Jesus Cristo hora nagathogathoꞌavini monina jahaki oananamithaonivini.

Biogaki ida hora honariaha,

ookhahi,

oniani ida hora honariavini hija.

Khai oniꞌavini hiki jaboni ada Jesus oananamithaonivinia hora kakodiavini.

13 ꞌBoꞌdakari varani jaharikia Jesus Cristo-ra okanavaranihaꞌiki ho,

kidijaꞌari vaꞌora onajaharihariꞌiki ho.

Jesu-ra okavaꞌijokojokokarahohaꞌoadahaꞌiki ho,

kabaꞌi hora nofiha,

monina jahaki oananamithaonira kaimoni.

Jesus Cristo-ra okajariꞌdavini mani ida kodihojai asohirini-ra oogaravini hija.

Nimania ida kodihojai ꞌboꞌda,

kabaꞌi Deus hora vaꞌadihi.

14 Akadikaꞌdaꞌdi hora kajoamorajahakiꞌiki ho.

Kidiania oakaramisiꞌiki ho,

oniani ida Jesu-ra ovakaijokajahakivini hija,

onofijahakivini hija jaboni.

15 Kaꞌoa bana hida ojomoꞌihi athini ijaꞌaria vakajariꞌdariki kaimoni.

Jahaki hida ojomoꞌihi athini-ra vakapoarijahakivini.

Nimania bana hida ojomoꞌihi kavaranihi:

Hovani mahi ꞌboꞌdakari kodihojai asohirini arafiakaꞌoaki ho.

Kodihojai asohirikia biaradamiki ida vahoariha vakadihojai asohiriki.

16 Kodihojai jaharini kabaꞌi,

Jesus Cristo hora vaꞌadiꞌiki ho.

Ni-ihamahijorakiki ada Jesus.

Binofiki ida ijaꞌari hahavia avigavini,

kodihojai jaharini kabaꞌi,

hora kaihamahijorakiravini.

Jesua binofiki ida nofirina vihikia avigavini hora vaꞌadiꞌavinia.

Jesua binofiki ida vaꞌora vaꞌadivini jaboni avigavini.

Jesus kania vaabono gahinai vanihavini kamahini vagahinaha jaboni bana mahi jahaki anokhomirikia Deus kania.

17 Hari.

Kaꞌdaꞌdi ada Deus.

Ni-anokhomiki bana ida Deus ijaꞌari-ra vakaꞌdaꞌdivini kamahini.

Hahavi kamaꞌdani viahania hojaki ada Deus.

Hokihahaꞌoadahaki ada.

Nokiariha ada.

Hoarana kaꞌoa ada Deus,

ni-hojaki ada Deus hoariha.

Jahaki ida ijaꞌari hahavi Deus jahana-ra vara vavaniꞌavini,

vakadikaꞌdaꞌdi jahaki-ra khai vaniꞌahahaꞌoadahavini.

Nimania ida Deua binofiki.

18 Timóteo,

kodisai i.

Ira ohonariavini hiki kodivaꞌisohihia vaꞌora inavaꞌisohijahakivini,

vanaabaja kaimoni.

Ikavaꞌihoki bana ida Deus athi namoniva abono kavarani ira navaꞌisohijoravini hiꞌiki mahi ꞌboꞌdakari.

Kidivarani khai ira niꞌava bana mahija kidivarani kadasaꞌai fori hivini,

Jahari-ra ikavasaꞌaivini fori hija kaimoni.

19 Ikapoarihahaꞌoadaha bana ida ojomoꞌihi athini asohiki.

Inaabaꞌa bana ida kadavaꞌibodivarani ira kaabanivini mahija badani asohiki kaꞌoa ikabadanivini.

Vahoariha vaipohiriki vani adani ni-vakadivaꞌibodivarani vaꞌora kaabanivini-ra vanaabaki,

oniani ida Deu-ra vakavaꞌipahinivini hija,

oniani ida Deus kahagihi-ra varagarivini hija.

20 Vakhanimanira adani makhira viꞌbamiki Himeneu,

Alexandre vihiki.

Deu-ra vakanavaranihabakhiaki adani viꞌbamiki varani jaharikia,

oniani ida vaꞌora oarakhavini hiꞌia Satanás saꞌa kabodinia,

avigaja kaimoni ida Deu-ra vakanavaranihavini-ra vakavaꞌipahinivini.