Deu-ra vara aniꞌavini varani hini
2
Hari.
Oniaroa,
vaꞌora ohonariaꞌimidiaki adani Jesus kaijaꞌari,
nahina vakainamoki-ra vakanikhariabakhiavini Deus kania.
Deu-ra vara vaniꞌabakhia jaboni.
Deu-ra vakanikhariabakhia jaboni vahoariha Deus vaꞌora kajoamorara kaimoni.
Deu-ra khai vaniꞌaꞌa bana hiꞌida aꞌonira noꞌavini hiꞌikia.
2 Deu-ra vakanikharia vaꞌora kajoamorara kaimoni adani arabo-ra vavakaꞌdaꞌdiki,
ijaꞌari vahonariafiahava abono vihiki,
avigaja kaimoni ida haria vavakaꞌdaꞌdijahakivini.
Deus vaꞌora kajoamoraha;
jahahi ida akadimahi,
ni-ijaꞌari vaabono vakanajahariharikhamaki.
Deus vaꞌora kajoamoraha;
badani Deua bivajahakia akabadanina-ra vavaꞌahaha.
Deu-ra avavaꞌihava jaboni.
3 Jahaki ida Deu-ra akanikhariabakhiavini vaꞌora akavaꞌijoara kaimoni adani ijaꞌari hahavi.
Deua bivajahaki ida vara aniꞌavini kidiania.
Harimiroꞌa Deus haria akavaꞌijoaꞌiki hari.
4 Binofiki ida ijaꞌari hahavi-ra vaꞌora akavaꞌijoavini jaboni.
Binofiki jaboni ida ijaꞌari hahavi Deus athi kaꞌoa hini-ra avigavini.
5 Hojaki ada Deus hoarana kaꞌoa ijaꞌari hahavi vakadi-Deus kaimoni.
Hojaki ada makhira hoarana kaꞌoa bikaabokaki ida ijaꞌari hahavi,
Deus khama vaabono vakanajahamisikhamavini.
Jesus Cristo oniki ada makhira.
6 Ovani ada abono-ra vaꞌahara abiniꞌina,
ijaꞌari hahavi-ra vaꞌora akavaꞌijoara kaimoni.
Deus abinina binofivini kamahini ada Jesus,
abiniꞌaha,
ijaꞌari hahavi vakadimoni hina,
ijaꞌaria avigaja kaimoni ida Deus haria akavaꞌijoahahavivini-ra nofivini.
7 Deus hora karonavini hiki athi oavaadahaonivini.
Ni-aꞌonira okorijanaharihi.
Kaꞌoa oamani hida kodivarani.
Judeus kaijaꞌari vihiriki vakadiania Deus hora karonavini hiki vaꞌora oakaꞌojomoꞌionira kaimoni,
Deus athi kaꞌoa hini-ra vakajariꞌdaria kaimoni.
8 Hari.
Onofiki ida ibavi hahavia makhira Deu-ra vara vaniꞌavini.
Hiꞌadani makhira badani jahakaꞌoakia vakabadaniki,
ni-vavaꞌi joko iniki,
ni-vaihamahiki.
Vakajariꞌdarihi ida vakanikhariakia Deus vaꞌora noꞌavini.
Vakhaniki adani makhira vasaꞌa-ra vakanabiinimananivini Deu-ra vara vaniꞌavini.
9 Onofiki jaboni ida gamo makari nokiani jahaki-ra vakaimahavini.
Ni-onofiki ida makari rioki-ra vakaimahavini,
ijaꞌari vaꞌini-ra anaipahihiria kaimoni.
Gamo abononi nabarovini arafiaki ni-jahaki.
Ni-jahaki ida nahina kaidivani arafiaki gamoa bikaimahavini,
bikanabidihavini,
bikamorobohavini jaboni.
Makhira-ra kaboroki fori hiki ida gamo.
10 Onofiki ida gamo Deu-ra nofidoroki hojai asohikia kahojaini.
Nimania ida gamo Deu-ra vanofidoroki vakadihojai jahaki varani hini.
11 Onofiki ida gamo vakaꞌojomoꞌihana kabaꞌi,
mitha vakhanijahakina,
ni-vara vakhaniki.
Vakapoariva ida ojomoꞌihi athini vahoariha vaꞌora vakaꞌojomoꞌivini hiki.
12 Jahaki ida gamo vara vakhanirina.
Ni-jahaki ida gamo kidimakhira-ra vakaꞌdaꞌdivini.
Ni-onofiki ida gamo makhira-ra nakamaꞌdavinia vakavaranina vakavaꞌojomoꞌihavini.
Ni-niki ida Deus athi papira hojaki.
13 Deus vania binamonahaꞌimidiaꞌara ada Adão naothinia Eva maina-ra namonahaꞌaha.
14 Adão ni-korijanahi hiꞌiki.
Eva vani ida Jaharia bikorijanahavini-ra kamithaꞌia.
Gamo vania binaabarija ida honari Deua bikaabanijoravini hiki.
15 Gamo Deu-ra vakaijokahi,
hojai Deua bivajahakia kahojaihi,
ijaꞌari-ra nofijahakihi,
vaꞌini bodini varani jahakihi jaboni,
oniani ida gamo ꞌbanani kamahini Deua bikajoamoravini hija.