Timóteo,

ira oakodiaꞌiki i Jesus kania iabono gahinai inihavinia,

oniani ida kodisaia ira onaonivini hija.

Onofiki ida Deus akadiabiꞌi,

Jesus Cristo akadikaꞌdaꞌdi khama,

ira vakajoamorahaꞌoadahavini,

ira vanakaidivavini,

ira vanoꞌavini jaboni vaꞌi jahajahania.

3 Khai oniꞌabakhiaha ada Deus.

Ni-hojaki ida nahina asohiriki ovaꞌi kaabanahahani kania.

Niki vania ohojana Deus hora honariavini hikia okabadanibakhiaja.

Vakhanimanira adani jaboni kodijaꞌari avikhananavaki.

Joma,

mahi hikia Deu-ra vara oniꞌabakhiaꞌiki ho:

—Deus,

ivani ijahaki i,

Timóteo-ra ikajoamorabakhiaki i.

Timóteo-ra okavaꞌihokivini hiki ijahani kidimoni ihini,

oniani ida hora khai niꞌaja — Deu-ra oniꞌabakhiaki ho.

4 Timóteo,

okavaꞌihokiꞌiki ida iasaraꞌini,

oniani ida ira onokiꞌianavini-ra onofikarahovini hija.

Ira onokiꞌianavini-ra onofivini mani ida khai hora niꞌaja bana.

5 Okavaꞌihokiki jaboni ida Deu-ra ivakaijokakaꞌoavini.

Vakhanimanira adani kadaꞌarahoni Lóide oniki,

kadamia Eunice oniki khama,

Deu-ra vavakaijokakaꞌoavini jaboni.

Ni-okajariꞌdapaꞌitxiki ida vaꞌoaniaro fori ihini Deu-ra inofijahakivini.

6 Ira onavaꞌihokivini hiki ida iꞌdaꞌdini aꞌani namania osaꞌa-ra okanaibavivini kari Deus ira noꞌaꞌiki i danona,

ikaabokaja kaimoni ida kidibadania ikabadanini.

Siho-ra ikavakarojahavini vani fori iniha bana ida Deus ira noꞌavini hiki danona mahija ihimiravini.

7 Aipahihina kaimoni hirihi ida Deus Maꞌonahai Jahakia haria noꞌavini hija.

Maꞌonahai Jahaki haria aviꞌonanivini mani ida Deus danona-ra nahojaꞌia akadiania,

vahoariha-ra vaꞌora anofijahakivini hija,

ariabono anasohivinia haria kakodiavini hija jaboni.

8 Hariꞌa ikaipahi bana ida vahoariha vaviaha akadikaꞌdaꞌdi Jesus Cristo ira kajoamoravini kavaranihia ikavaranini.

Cristo varani hina okavaranina mani ida cadeia hora nahojabakhiaꞌia.

Hariꞌa hora kaipahi jaboni.

Ivani jaboni bana ira vanajahariharivini kabaꞌi,

Jesus monina jahakia kavaranibakhiaꞌa bana.

Deus ira noꞌavini hiꞌiki ida danona,

ikaabokaja kaimoni ida ijahariharini hofori ihini.

9 Deus haria akavaꞌijoaki hari,

haria kaboaꞌiki hari jaboni kidijaꞌari arihija kaimoni.

Ni-nahina jahaki hojajoraki akadiania,

Deus haria akavaꞌijoavini kabaꞌi.

Haria akavaꞌijoavini-ra nofivini mani ida haria akavaꞌijoavini hija.

Deus hahavi-ra nakamaꞌdavini viahania,

binofijoraꞌiki ida Jesus Cristo haria kajoamoravini,

oniani ida haria nagathogathovini hiꞌia kidijaꞌari arihija kaimoni.

10 Jesus Cristo kharina oadani,

ni-nahina biogaꞌiaki kaho ida Deus haria kajoamoravini-ra nofivini.

Akadiꞌakavaꞌijoahi abono Jesus Cristo khaꞌina kari Deus haria kavaꞌibodivaranijoravini-ra nanamithaꞌaha.

Ijaꞌaria ni-bikaabokaki ida abononi akavaꞌijoavini abiniria kaimoni.

Jesua binihimaki ida Abinia oniki danona.

Jesus vania bikaabokaja ida ijaꞌari abinirini.

Jesua binanamithavini hiki ida monina jahaki:

—Vaꞌora onoꞌaki adani oathi-ra vanaabaki mahi jahaki anokhomirikia kodiania — niha ada Jesus.

11 Deus hora karonavini hiki Jesus varani hina-ra oavaadahaonija kaimoni,

ijaꞌari-ra onanamithavini monina jahakia,

Jesus kaijaꞌari-ra vaꞌora okaꞌojomoꞌija kaimoni jaboni.

12 Deus athia vaꞌora okanamonivini mani ida vahoariha hora vanajahariharivini hija,

kabaꞌi,

ni-okaipahiki ida Jesus kaijaꞌari ohina.

Oogajahakiki ada Jesus.

Ovakaijokaki ida danona.

Jesua bikaabokaki ida nahina hahavi onoꞌavini hiꞌiki-ra akadavaꞌajahakivini,

joirina oadani.

13 Timóteo,

asia ikavaꞌihokihaꞌoadaha bana ida Deus athi ira okaꞌojomoꞌivini hiꞌiki mahija onivani fori inihavini.

Kaꞌoa hiki ida ojomoꞌihi athini.

Jesus Cristo kania iakaramisini vani ivakaijokahaꞌoadaha bana ada Deus,

inofijahakihaꞌoadaha bana.

14 Iakadavaꞌajahaki bana ida nahina jahaki Deus ira noꞌavini hiꞌiki.

Maꞌonahai Jahaki ira kakodiaki i,

nahina jahaki-ra iakadavaꞌavinia.

Avaꞌi bodinia ibaviki hada Maꞌonahai Jahaki.

15 Iogaꞌiki ida hora vakavaꞌipahinihahaviꞌavini adani Jesus kaijaꞌari Ásia kaarabonia vahojaki.

Arigamina Figelo,

Hermógenes khama hora vakavaꞌipahiniꞌiki jaboni.

16 Onesíforo vani ada ni-hora kavaꞌipahiniꞌiki.

Hora kajoamorabakhiavini mani ida khai hora niꞌaja.

Ni-bikaipahiki ida cadeia ohojana,

kabaꞌi hora navanavanahavini.

Deu-ra okanikhariabakhiavini hiki Onesíforo kaijaꞌari vagorana vahojaki vakadimoni,

Deus vaꞌora akadavaꞌajahakira kaimoni.

17 Roma sidajia kaikahiꞌaha ada Onesíforo,

hora karagaravini oadani,

cadeia hora anakoꞌdioniha.

18 Deu-ra oniꞌabakhiahi:

—Kodikaꞌdaꞌdi Jesus,

onofiki ida Onesíforo ivaꞌadivini-ra ogajahakivini,

ijoini kamahini.

Éfeso sidajia ohojana kari hora kakodiajahakiki ada afobakhia jaboni.

Iogaki ida kidibadani jahaki kodiania.