Honai abono vakadimoni hida vaꞌisohihi
6
Vara vaꞌora niꞌa bana adani kaꞌdaꞌdi kahonai abono kapavakarivahaki:
—Vakamitha bana ida avakadikaꞌdaꞌdi athi.
Vanaabaꞌa ida aꞌonira vahonariavini hiki mahija ijaꞌari Deu-ra nofiriki Deus onina-ra kanavaraniharavini,
akadiꞌojomoꞌihi athini-ra kanavaraniharavini jaboni.
2 Avakadikaꞌdaꞌdi Jesus kaijaꞌari hiha;
hariꞌa bana vakavaꞌipahini ida athi avakamithavini.
Jesus kaijaꞌari hiha ada avakadikaꞌdaꞌdi;
avaigamini avanofijahakiki hiha.
Bada vaniꞌajahaki bana ida badani aꞌonira honariavini hiki.
Kidibadani avanabadanivini mani ida kidinahina anaipohini hija.
Jahaki ida avaigamini kanahina-ra avaranaipohivini avakadibadania — vaꞌora niꞌa bana adani kaꞌdaꞌdi kahonai abono kapavakarivahaki.
Ojomoꞌihi kavaranihi asohiriki hida
Timóteo,
ivavaꞌisohihijahaki bana hida varani,
vaꞌora kaꞌojomoꞌijahakivinihi bana.
3 Avakadiania hojaki vahabini ida ijaꞌari ojomoꞌihi athini hoariha-ra kavaꞌojomoꞌihaki,
ni-binofiki jaboni ida akadikaꞌdaꞌdi Jesus Cristo varani hina asohiki,
ni-binofiki jaboni ida akadiꞌojomoꞌihi athini,
ni-nahina-ra ogarihi ida ijaꞌari niki.
4 Ogahania abononi vaboraborahavini mani ida kamaodorohaki fori nihani hija.
Binofivini arafiaki ida kamadiani.
Vara bivaniꞌahahaꞌoadahaki ida varani hana hini asohiki asohiriki,
oniani ida ijaꞌari vahoariha kidivarani kamithani vihiki vaabono avakakabaikhamavini hija,
vaabono vaakajaꞌoriakhamavini hija jaboni,
onii jaharikia vaabono vakaniꞌakhamavini hija jaboni,
nahina jaharikia vahoariha-ra avakaraganahavini hija jaboni.
5 Ni-anokhomiki ida vakadivarani ꞌbadara vaabono avakanaathidanoararikhamavini hiki.
Asohijanarihi ida vakadivaꞌibodivarani.
Avakavaꞌiꞌbiriniꞌiki ida ojomoꞌihi athini asohiki.
Deu-ra vanofivini-ra vakahiꞌbadaravini hiki,
aꞌbaꞌdija kaimoni ida vakadinahina,
jiniro hiki.
6 Hari.
Hiꞌadani Deu-ra vanofijahakiki,
arajomaꞌiki vakadimoni hini ida Deus vaꞌora noꞌavini hiꞌiki.
Aꞌbaꞌdiꞌoamanija ida vakadimahi jahaki.
7 Aꞌbanana anamithana,
ni-nahina-ra avikhaki.
Ariabinina kamahini,
ni-nahina-ra aavikhaki jaboni.
8 Arihokina oadani hojaki ida akadiꞌbai,
akadimakari hiki,
jahaki ida avaꞌi-ra vajahavini.
9 Kaborohirohi vihiki adani jiniro ahapini-ra vanofiki,
oniani ida tapajoa aviꞌoiki fori vaꞌora nihaja.
Vakavaꞌinofinofiki ida hojai asohiriki,
ijaꞌari vaꞌiharikia vanofivini fori hiki.
Vakadivaꞌinofinofi vaꞌora osaꞌiki fori vihiki vapohimajara kaimoni.
Ibavi Jaharikaꞌoaki kania vaabono jaharikia avarakhavini hija.
10 Ijaꞌari jiniro-ra vanofivini arafiani mani ida Jahari kabadani ipohikia vaꞌora kanabadanija,
vagathanija kaimoni ida jiniro.
Jesus kaijaꞌari vahoarahanana jaboni vanofivini arafiaki ida jiniro.
Jiniro-ra vanofivini mani ida Jesu-ra vakavaꞌipahinivini hija.
Jesus kani-ra varagarivini mani ida vaꞌora naimaꞌbanahaꞌoadahaja.
Ni-jahapaꞌitxijanaki ida vakadimahi.
Pauloa binavaꞌisohiki ada Timóteo
11 Ivani Timóteo,
Deus kabadani abono i.
Hariꞌa bana inofi ida vaꞌoaniaro fori ihini.
Ivani,
hojai asohiki Deua bivajahakia kahojaiꞌa bana.
Deu-ra ivakaijokavini vani athi inaabaꞌa bana.
Vaꞌora nakaidiva bana adani ijaꞌari hahavi.
Athii forakia kavaraniꞌa bana vahoariha vakadiania.
Ijoiribanirihi;
Deus kania iokhaki bana i.
12 Ijaꞌari gahinani-ra nofiki,
abononi nadanoki gahinaja kaimoni nahina jahakia.
Ivani,
iabononi nadano bana Deu-ra ivakaijokajahakivinia mahija mahi jahaki anokhomirikia igahinavini.
Deus ira baranahavini hiki mahi anokhomirikia igahinaja kaimoni kidiania.
Deus ira baranahavini kari ijaꞌari vaipohiki vaviaha vara vaꞌora iniꞌaꞌiki i:
—Onofiki ada Deus hora vakaꞌdaꞌdira kaimoni.
13 Timóteo,
vara ira oniꞌaki bana ho,
Deus,
Jesus Cristo khama vaviaha.
Deua binahokiki ida nahina hahavi.
Jesus Cristoa vara bivaniꞌaꞌiki ida varani asohiki Deua binofiki Pôncio Pilatos viaha.
14 Timóteo,
akadikaꞌdaꞌdi Jesus Cristo joirina oadani inaabahahaꞌoadaha bana hida vaꞌisohihi ira onavaꞌisohivini hiki.
Hariꞌa iragari bana ida badani Deus ira honariavini hiꞌiki.
15 Deua binanokiavini binofivini kamahini joiki bana ada Jesus Cristo.
Jahaꞌoamanira ada Deus.
Kaꞌdaꞌdi kaꞌoa ada Deus hoarana.
Ovani ada kaꞌdaꞌdi vakadikaꞌdaꞌdi hira.
Ovari vaꞌora honariafiahaki jaboni adani ijaꞌari vaipohina-ra vaꞌora vahonariafiahaki.
16 Deus hoarana hokihahaꞌoadahaki.
Ni-kamaꞌdaki ida kidimahi,
ni-anokhomiki.
Vagaꞌoamanija ida Deus ibavi kani.
Ni-ijaꞌaria bikaabokaki ida Deu-ra namaakarivini.
Ni-ijaꞌaria binokiki ada Deus.
Ni-bikaabokaki ida Deu-ra nokivini.
Jahaki ida ijaꞌari Deu-ra khai vaniꞌakaꞌoavini,
vakadikaꞌdaꞌdi jahaki hina vakahivini.
Ovari mahi anokhomirikia ijaꞌari-ra vakaꞌdaꞌdiki ada.
Nimania hida Deua binofiki.
17 Timóteo,
vara vaꞌora niꞌa bana adani ijaꞌari vakanahinaꞌahapikiki.
Vaꞌora niꞌa bana:
—Hariꞌa avakadinahina-ra vavaboraboraha bana.
Hariꞌa bana vavakaijoka ida avakadijiniro,
avakadinahina hiki aꞌonira kakodiavini.
Jorakia ihimiki bana ida.
Vavakaijoka bana ida Deus aꞌonira kakodiavini.
Ovari haria noꞌakarahovini hiki ida akadinahina khai aniꞌaja kaimoni.
18 Badani jahakia vakabadani bana,
vanaipohi bana ida avakadibadani jahaki.
Khai vaniꞌa hida avakadinahina-ra avakavagahinaivini vakanahinariki vakadimoni hini.
19 Avakhanini vani nahina jahakia avaabononi avavidorahaja Deus kania.
Ni-ihimirihi ida avidoraki kidiania.
Nimania ida avakadihojai,
mahi jahakia avagahinani — vaꞌora niꞌa bana adani ijaꞌari vakanahinaꞌahapikiki.
20 Timóteo,
iakadavaꞌajahaki bana ida Deus kadania biarakhaki inaibavijahaja kaimoni.
Ikajoni bana ida varani ꞌbadara Deua bivajahariki.
Ikajoni jaboni bana ida varani ijaꞌari vaabono avakanaathidanoararikhamavini hiki.
Vakadivarania vanaoniꞌbadaraki ida varani ogavahaki.
21 Ijaꞌari vahoarahanana avigahana-ra vakahiꞌbadaraki.
Vakavaꞌipahiniꞌiki ida Deu-ra vavakaijokavini,
oniani ida Deus kahagihi-ra varagarivini hija.
Onofiki ida Deus aꞌonira kajoamorahahavivini.
Paulo athi hida.