Ijaꞌari kaabanahani varani hini hida
5
Hariꞌa bana athi khanakia ikaabani ada ovari miroꞌa avijavaki.
Inavaꞌisohijahaki bana.
Kadabiꞌi-ra ikaabanivini vani fori iniha,
ikaabanivini ada makhira ovari miroꞌa avijavaꞌiki.
Kadakajoꞌo-ra ikaabanivini vani fori vaꞌora niha adani imakhinava vaꞌora ikaabanivini.
2 Kadamia-ra ikaabanivini vani fori iniha ida gamo oniaro miroꞌa avijavaki-ra ikaabanivini.
Kadakajoꞌo-ra ikaabanivini vani fori vaꞌora niha adani imaꞌinavi vaꞌora ikaabanivini.
Inofi bana ida hojai asohiki kaꞌoa vakadiania.
Kaariha kajoamorahani varani hini hida
3 Vaꞌora kajoamora bana adani kaariha kidisai maakarinia vahojariki.
Ni-nahina vaꞌora kajoamoraki.
4 Kaariha kaisai kabadani ida kidiamia-ra kaijahitavini.
Kaariha kahanodi kabadani jaboni ida kidiꞌarahoni-ra kaijahitavini.
Jahaki ida ijaꞌari vakadiamia kaariha hiki-ra vakaijahitavini-ra avigavini.
Vakhanina vani vanaabosija ida vagahinabakhiana hiꞌiki vakadinaꞌarihavi vihiki vaꞌora noꞌavini hiꞌiki.
Deua bivajahaki ida vaꞌora vakaijahitavini.
5 Oniani kaꞌoa hojaki ida kaariha kidisai maakarinia vahojariki.
Ni-hojaki ida kidijaꞌari kajoamorani hiki kaimoni.
Kidisai vahojarina mani ida Deua bikajoamoravini-ra nokhavini hija.
Joma,
mahi hikia Deu-ra kanikhariabakhiavini hiki bikajoamoraja kaimoni.
6 Hari.
Kaariha hoariha kahojai hiki hida hojai kaipahivahakia kahojaini,
oniani ida hokini kabaꞌi abiniki fori nihani hija.
7 Timóteo,
vaꞌora navaꞌisohi bana adani Jesus kaijaꞌari mahija vakadiamia,
vakadiꞌarahoni kaariha-ra vakaijahitavini.
Vaꞌora vakaijahitaha;
ni-ijaꞌari vahoariha vaꞌora avanaathidanoarariki.
8 Ijaꞌari kidinaꞌarihavi,
kidisai,
igamini vihiki-ra vaꞌora kaijahitarihi;
Deus athi akajariꞌdariki-ra kavaꞌipahinihi.
Asohiriꞌoamanija ida Jesus kaijaꞌari kidinaꞌarihavi-ra kajoamorariki kabadani.
Biaradamiki ida Jesu-ra nofiriki kahojai asohiriki.
9 Ira onavaꞌisohivini hiki bana ida kaariha hana hini avakaijahitaki kaimoni.
Papira kania inajiri bana ida kaariha vaꞌora avakaijahitaki vaonina.
Hariꞌa bana vanaibavi ida kaariha kabadarani 60 hiꞌiariki kaho onini kaariha vahoariha vaonina kapapirania.
Nimania bana hida kaariha kahojai,
inaibavi bana ida onini.
Kaariha bivavaꞌihaki ida kidimakhira hokina oadani.
10 Vaꞌora navijavajahakiki adani kidisai.
Vahoariha kidibadani jahaki,
ipohini vakahiki ida kaariha.
Kidihojai hibakhiaki ida ijaꞌari kaikahiꞌiki-ra gorania kajoamoravini.
Kidihojai hibakhiaki jaboni ida Jesus kaijaꞌari-ra vaꞌora kajoamoravini.
Vaꞌora kakodiabakhiaki jaboni adani nahina-ra vakainamoki.
Niki ida kaariha kabadani jahaki,
inajiri bana ida onini kaariha vaonina kapapirania mahija gahinabakhiavini kidinahina avakadiania.
11 Hariꞌa bana inajiri ida kaariha naꞌarihavi vihiꞌiariki vaonina kaariha vahoariha vaonina kapapirania.
Kaariha vahabini biniꞌaha ada Cristo:
—Ohokina oadani okamakhirana-ra onofijanarihi.
Ivani kaꞌoa ira onofiki ho — Cristo-ra niꞌahi ida kaariha.
Kaariha naꞌarihavi hirikia binofiꞌianaki vahabini bana ida kamakhiraꞌianani.
12 Kamakhiraꞌianani-ra nofivini mani ida Cristo-ra navaꞌiponiꞌimarinivini hija.
Deus viaha asohiriki ida kidihojai.
13 Kaariha naꞌarihavi vihiꞌiarikia vanofiki ida avaadahaonikaꞌoana,
ni-vanofiki ida vakadibadani hikia vakabadanina.
Vakajoniahaki adani.
Kamaꞌdaꞌiki ida korijanahia vahoariha-ra vaꞌora vakanavaranihavini,
hoariha kanahina-ra vakanabadanihavini.
Vara vavaniꞌaki jaboni ida varani vara vaniꞌavahariki kaimoni.
Nimania bana ida kaariha naꞌarihavi vihirina oadani vahojana varani hini,
oniani ida vaonina hojani onofiravini hija kaariha vahoariha vaonina kapapirania.
14 Onofiki ida vakamakhiraꞌianana,
vaisaꞌianana jaboni,
vagorana bodinia bada vakhaniꞌianara kaimoni.
Jahahi ida kaariha vahojana,
ni-ijaꞌari vahoariha haria avanaathidanoarariki vahojana jaharikia.
15 Vahojaki adani kaariha vajoiribaniki Jahari ipohina vihira kaimoni,
oniani ida kaariha varani vihina ira vara oniꞌavini hija.
16 Vaꞌora vaniꞌa bana adani gamo Jesu-ra vanofiki:
—Kadamia,
kadaꞌarahoni kaariha vihiꞌaha;
vaꞌora avakaijahitavini jahaki.
Aꞌonivani oa vaꞌora vakaijahita.
Ni-Jesus kaijaꞌari vakadibadani hirihi ida vaꞌora vakaijahitavini.
Jahaki ida Jesus kaijaꞌari kaariha vahoariha-ra vaꞌora vakaijahitavini,
vakadisai maakarinia vahojariki — vaꞌora niꞌa bana adani Jesus kaijaꞌari.
Jesus kaijaꞌari navaꞌisohiva abono varani vihina hida
17 Vaꞌora vanaibavijahajahaki bana adani Jesus kaijaꞌari navaꞌisohiva abono aꞌonira avakadavaꞌaki.
Karaho ida vakadibadani avakadiania.
Jesus varani hina aꞌonira vanavaꞌisohibakhiaki adani,
aꞌonira vakaꞌojomoꞌibakhiaki adani jaboni Cristo varani hina.
Jahahi ida vakadibadani;
vanadoroni bana ida vakadibadani abosini.
18 Deus athi kapapirania hojaki hida vaꞌisohihi:
“Ivaadahaha ada kadaꞌdaama kahidari trigo namania bikadaꞌahaꞌahaja kaimoni,
hariꞌa bana idabo ida ꞌdaama kahidari bono mahija itxani bihavini.”
Vaꞌisohihi hoariha Deus athi kapapirania hojaki:
“Jahaki ida badani abono kidibadani abani-ra
gathanivini.”
Niha ada Deus.
Deua bivavaꞌisohihivini ida Jesus kaijaꞌari navaꞌisohiva abono kabadani-ra avanaabosivini.
ꞌDaama kahidari daboharina fori vihiki adani Jesus kaijaꞌari vanavaꞌisohiva abono.
19 Ijaꞌari hoarania binofiki ida Jesus kaijaꞌari navaꞌisohiva abono-ra anaathidanoararivini,
ikajariꞌda bana ida kidiꞌaathidanoarari athini.
Ijaꞌari viꞌbamiki ijaꞌari avahoarabakosikia vanokihi ida Jesus kaijaꞌari navaꞌisohiva abono Jahari kabadania kabadanina;
kaꞌoa hini iogahi ida avanaathidanoararivini hiki.
Vanokirihi;
ikajariꞌda bana ida vaathi.
20 Jesus kaijaꞌari vajoronina kamahini vaꞌora kaabanidanoki bana adani Jahari kabadani-ra vakavaꞌipahiniriki,
vahoariha-ra vaꞌora vanavaꞌibodivaranija kaimoni.
21 Hari.
Deus,
Jesus Cristo,
Deus ibavi kaijaꞌarini vihiki vaviaha vara ira oniꞌaki bana i,
Timóteo.
Inaabahahavi bana hida kodivaꞌisohihi athini.
Vakadiꞌaathidanoarari ikamithajahakivini viahania,
hariꞌa bana ikavaꞌibodivarani ida ijaꞌari hana hini asohiki asohiriki.
Ijaꞌari inakaidivakia bada biniꞌahi ida nahina asohiriki,
hariꞌa bana ivajariꞌdavinihi ida kidihojai asohiriki.
22 Hariꞌa bana jorakia isaꞌani-ra kanaibaviꞌa makhira ꞌdaꞌdi aꞌani namania inahoarihara kaimoni ada makhira,
Jesus kaijaꞌari navaꞌisohiva abono kaimoni hina.
Jorakia inahoarihaha ada makhira;
iogaravini kabaꞌi ida kidihojai jahariki-ra kavaꞌipahiniravini,
vahoariha kidihojai jahariki ivajahaki vavanihahi.
Hojai asohiki kaꞌoa iabono vaꞌaha.
23 Hariꞌa bana paha kaꞌoa-ra aviꞌa.
Ikavamonibakhiani mani ida vinho paꞌitxi-ra iꞌavivini-ra najahaja,
inaihaja kaimoni ida ivaꞌini namani kakavamonini.
24 Nokiaki ida Jahari kabadani ijaꞌari vahoarahanana vakadibadani hiki.
Deus ijaꞌari kahojai-ra naabosivini kamahini viahania nokiajahakiki ida vakadihojai asohiriki.
Ahojaki ida ijaꞌari vahoariha vakadihojai asohiriki.
Ni-nahina biogaki kaho.
Deus ijaꞌari kahojai-ra naabosivini kamahini,
bona,
nokiaki bana ida vakadihojai asohiriki,
ni-ahojajanaki.
25 Niki jaboni ida ijaꞌari vakadihojai asohiki.
Nokiajahakiki ida ijaꞌari vahoarahanana vakadihojai asohiki.
Vahoariha avanahojaki ida vakadibadani jahaki.
Nokiaki bana ida vakadihojai asohiki,
ni-ahojahahaꞌoadahaki.