Jesu-ra vakavaꞌipahiniki varani vihina hida
4
Maꞌonahai Jahakia vara bivaniꞌajorahi ida mahi anokhomini kamahini amaakarini.
Nihaha:
—Jesus kaijaꞌari vahoarahanana vakavaꞌipahiniki bana ida Deus athi akajariꞌdariki.
Vakamithaki bana ida maꞌonahai jahariki kakorijanahi vavaꞌi bodinia vara niꞌani hini.
Vanaabaki ida bana korijanahi kaꞌojomoꞌihi Jahari kahonai abono vanokiarikia vara vavaniꞌaki.
Jahari kahonai abono vanokiariki vihiki adani maꞌonahai jahariki.
2 Jesu-ra vakavaꞌipahiniki maꞌonahai jaharikia vavaꞌi binahonariahihivini vani bana vakaꞌojomoꞌija ida korijanahi kaꞌojomoꞌihi asohiriki.
Cristo kaijaꞌari vihiꞌbadaraki adani Jesu-ra vakavaꞌipahiniꞌiki.
Abiniki fori vihiꞌiki adani,
ni-vakamithajanaki ida vavaꞌi kaabanahahani.
Ni-vavaꞌi anaipahihini hiki ida vakadihojai kaipahivahaki.
3 —Asohirihi ida makhira gamo khama avakarana — nimania hida Cristo kaijaꞌari vihiꞌbadaraki vakadivarani asohiriki.
—Ni-ꞌbai hahavi havahani jahaki — korijanahia vakhaniha.
Hari.
Deua binamonahaki ida ꞌbai hahavi ijaꞌari vajariꞌdarikia vahaki kaimoni.
Vaꞌoaniaroa avigaki ida Deus athi kaꞌoa hini.
Viꞌbaina viahania Deu-ra khai vaniꞌavini hiva ida ꞌbai vaꞌora noꞌavini hiki.
4 Jahaki ida hahavi Deua binamonahaꞌiki.
Ni-jahaki ida ijaꞌari kaaji hini bikahivini.
Jahaki ida Jesus kaijaꞌari ꞌbai-ra vagathanivini,
Deu-ra khai vaniꞌavini.
5 Deus athi ida ꞌbai hahavi havahaki kaimoni.
Deu-ra khai niꞌavini naothinia ꞌbaihi ida ijaꞌari.
Deua bivajahaki hida nikia kahojaiki.
Jesus Cristo kahonai abono jahaki varani hina hida
6 Kodivaꞌisohihia vaꞌora kaꞌojomoꞌi bana adani arigamina Jesus kaniaja mahija Jesus Cristo kahonai abono jahaki ihivini.
Kadaꞌbai fori hiva bana ida Deus kaꞌojomoꞌihi athini asohiki akajariꞌdariki.
Deus athi-ra naabajahaki bana mahija Deu-ra inofivini avijavavini.
7 Ijaꞌari avikhananavaki kavarani ꞌboꞌda vakavaraniꞌbadarana oadani,
vakadivarani kania akaraꞌo joraki bana.
Iabono kaꞌojomoꞌi bana mahija kadamahi jaꞌdini avijavavini.
8 Jahaki ida ijaꞌari abononi naadahavini,
danoja kaimoni ida jaroni,
abononi hahavi,
imai fajafajaria kaimoni.
Jahaꞌoamanija ida ijaꞌari abononi kaꞌojomoꞌivini Deus athi-ra naabavinia,
danoja kaimoni ida kidimahi jaꞌdini,
oniani ida mahi anokhomiriki-ra vagathanivini hija.
Kidimahi jaꞌdini kamaꞌdaki hidiaja naothinia Deus kania bivahojahahaꞌoadahaki ida.
9 Kaꞌoa hida ojomoꞌihi athini.
Deua binofiki ida akajariꞌdaravini,
akapoarijahakivini,
10 oniani ida ariabono aavadadamivini hija,
kidibadani bada aniꞌahahaꞌoadahavini hija.
Aogaki ida Deus haria kakodiahaꞌoadahavini varani hina aananamithaonivini.
Ijaꞌari akavaꞌijoahi abono hokiki ada Deus.
Vaꞌora akavaꞌijoaki adani Cristo-ra vakajariꞌdariki,
imai ꞌbanani kania avikharara kaimoni.
11 Ivavaꞌisohihijahaki bana hida varani,
vaꞌora kaꞌojomoꞌijahakivinihi bana.
12 Timóteo,
hariꞌa bana vahoariha iathini-ra vakaihiponiriva.
—Iꞌboꞌda ihirihi,
Timóteo,
ni-anofiki ida iathini-ra anaabavini — vakhaniha.
Vaꞌora nanokiahi bana adani vajariꞌdariki kadahojai jahakia.
Vakamithava ida kadavarani jahaki.
Vanokiva ida kadahojai asohiki.
Vanokiva ida ijaꞌari-ra inakaidivavini.
Vanokiva ida Deu-ra ivakaijokavini.
Vanokiva ida hojai asohiki kaꞌoa-ra inofivini.
Kadahojai jahaki-ra vanokivini mani ida hojai asohiki-ra vakabanafovini-ra vanofivini hija.
13 Okaikahirina oadani,
vara ivaniꞌabakhia bana ida Deus athi kapapirani,
ijaꞌari vahoariha vakamithaja kaimoni.
Vaꞌora nanamithavinihi bana ida Jesus Cristo varani hina,
vaꞌora kaꞌojomoꞌi bana jaboni.
14 ꞌBoꞌdakari Deus athi namoniva abonoa vara vavaniꞌaꞌiki ida varani ihini,
Jesus kaijaꞌari vanavaꞌisohiva abono iꞌdaꞌdini aꞌani namania vasaꞌa-ra vakanaibaviꞌiki i jaboni.
Jesus varani hina-ra iananamithaonivini ira avanahoarihavini hiki,
oniani ida Deus ira noꞌavini hija kidiꞌogahai danoki bada iniꞌaja kaimoni ida Deua binofiki.
Hariꞌa bana ikavaꞌipahini ida Deus kaꞌogahai danoki.
15 Bada iniꞌahahaꞌoadaha ida badani Deus ira honariavini hiki.
Iabono vaꞌaha bana badani Deua binofikia mahija vahoariha Deu-ra inofivini avijavani-ra vanokivini.
16 Iabono akadavaꞌajahaki bana mahija kaborohirohi ihiravini.
Iakavaꞌigairi bana hida kadaꞌojomoꞌihi athini mahija inasohivini.
Nikia kahojaihaꞌoadaha.
Ivaꞌini ogairihahaꞌoadahahi;
iabono iakavaꞌijoahi;
vaꞌora iakavaꞌijoaha jaboni adani vahoariha iathini-ra vakamithaꞌiki.