Jesus kaijaꞌari navaꞌisohiva abono varani hina hida
3
Kaꞌoa hiki bana hida varani:
“Makhira binofihi ida Jesus kaijaꞌari navaꞌisohiva abono hina;
badani jahaki-ra nofiha.”
2 Nimania bana hida Jesus kaijaꞌari navaꞌisohiva abono hojana jahaki,
ijaꞌari vahoariha avakaraganaharia kaimoni ida nahina jahariki-ra namonahavini.
Gamo hoarani oavani-ra vahojaꞌara ada Jesus kaijaꞌari navaꞌisohiva abono.
Jahaki ida kidivaꞌibodivarani.
Biogaki ida abono-ra nasohivini.
Ni-bado nina arafiaki,
ni-ihivadina arafiani-ra nofiki.
Binofiki ida ijaꞌari-ra gathanijahakivini gorana.
Biogaki ida Deus athia vahoariha-ra vaꞌora kaꞌojomoꞌijahakivini.
3 Ni-kahanoki,
ni-hoariha-ra dafiaki.
Ijaꞌari hahavi-ra nakaidivaki ada.
Ni-kamadiaki.
Ni-bikavaꞌibodivaranihaꞌoadahaki ida jiniro aꞌbaꞌdini-ra gathanivini.
4 Biogaki ida kidigamo,
kidisai vihiki-ra vaꞌora vakaꞌdaꞌdivini,
kidisaia vavavaꞌihavini athi naabani vihira kaimoni.
5 Makhira biogarihi ida kidisai-ra vakaꞌdaꞌdivini,
ni-nihanikia Jesus Cristo kaijaꞌari-ra navaꞌisohivini-ra ogaki?
6 Hariꞌa jorakia vanagathogatho ada Jesu-ra nofijaꞌdiniki,
Jesus kaijaꞌari navaꞌisohiva abono hina.
Avanagathogathojorakiha;
abono-ra vaboraborahaki vahabini bana ada.
ꞌBoꞌdakari Jahari abono-ra vaboraborahaki,
oniani ida jaharikia Deua biarakhavini hija bana.
Jesus kaijaꞌari navaꞌisohiva abono abono-ra vaboraborahaha;
jaharikia Deua biarakhaha jaboni,
Jahari-ra arakhavini vani fori hina.
7 Jesus kaijaꞌari navaꞌisohiva abonoa bada biniꞌaki ida badani jahaki,
vara bivaniꞌaki ida varani jahaki jaboni,
Jesu-ra vanofirikia jahana vakahira kaimoni.
Badani jaharikia kabadanira vaha;
bada biniꞌakia vaꞌi bianaipahihimaniha vaha;
Jahari katapajoa oꞌoiki fori himaniha vaha.
Jesus kaijaꞌari kakodiava abono varani vihina
8 Nimania bana hida Jesus kaijaꞌari kakodiava abono varani vihina.
Jahaki ida Jesus kaijaꞌari kakodiava abono hojai jahakia kahojaina.
Binofikaꞌoaki ida Jesus kaijaꞌari hina.
Ni-kahanoki.
Ni-bikavaꞌibodivaranihaꞌoadahaki ida jiniro aꞌbaꞌdini.
9 Ni-hojaki ida nahina asohiriki vaꞌi kaabanahahani kania.
Bikajariꞌdapaꞌitxirihi ida ojomoꞌihi athini Deua binanamithavini hiꞌiki.
Ni-bianahoarihaki.
10 Jesus kaijaꞌari vahoariha vaꞌora vakaijoꞌaꞌimidiava adani Jesus kaijaꞌari kakodiava abono kaimoni.
Jahani vakaragahi ida vahojana,
oniania vaꞌora vanagathogathoha.
11 Nimania jaboni bana ida Jesus kaijaꞌari kakodiava abono kagamo hojani jahaki.
Ni-hoariha-ra kanavaranihaki varani jaharikia.
Jahaki ida kidivaꞌibodivarani.
Biogaki ida hoariha kanahina-ra akadavaꞌavini.
12 Gamo hoarani oavani-ra vahojara ada Jesus kaijaꞌari kakodiava abono.
Biogaki ida kidisai,
kidigamo,
gorana kaijaꞌarini vihiki-ra vaꞌora vakaꞌdaꞌdivini afojahaki.
13 Jesus kaijaꞌari kakodiava abonoa bada biniꞌajahakihi ida kidibadani,
ijaꞌari vahoariha vanokihi,
vavajahahi,
vanofiꞌihi jaboni ida vaꞌora vakaꞌdaꞌdivini.
Ofinirina vani binamonidanokija jaboni ida Jesus Cristo varani hina bikajariꞌdariki.
Ojomoꞌihi athini hida
14 Timóteo,
ira okajirihivini kabaꞌi,
onofiki ida jorakia ira onavanavanahavini.
15 Kadania okhajorakirihi vahabini bana,
oniani ida oathi kapapirania ira onavaꞌisohijoravini hija Jesus Cristo kaijaꞌari vahojana jahakia.
Hokiki ada akadiDeus kaꞌoa.
Deus kaijaꞌari arihiki hari,
aananamithaonija kaimoni ida Deus athi kaꞌoa hini.
16 Deua binanamithavini viahania ida ojomoꞌihi athini,
ni-ijaꞌaria avigaꞌiaki kaho.
Ahojaki vakadiania ida hojai jahaki Deua binofiki.
Nimania bana hida ojomoꞌihi athini ahojaki Deua vara bivaniꞌaki:
“Makhira hina khaki ada Deus.
Maꞌonahai Jahakia
jahakaꞌoana bikahiki
ada ovari makhira.
Deus ibavi kaijaꞌarinia
vanokiꞌaha ada
makhira Jesus oniki.
Ijaꞌaria vara vavaniꞌavini hiki ida Jesus varani hina arabo hahavi
kaijaꞌarinia vakamithaja
kaimoni.
Ijaꞌari vaipohikia vakajariꞌdarihi ida varani hina.
Ibavi jahani arafiaki kania Deua biavikasiꞌaha.”
Nimania ida ojomoꞌihi athini.