Jesus Cristo kasorara fori hiki varani hina
2
Ivani kodisai Timóteo.
Iabono nadano bana,
ivakaijoka ida Jesus Cristo kania iakaramisini ira kajoamorahaꞌoadahavinia.
2 Ikamithabakhiaꞌiki ida ojomoꞌihi athini vara ovaniꞌabakhiaꞌiki ijaꞌari vaipohiki vahararana.
Vaꞌora kaꞌojomoꞌijahaki bana adani Jesus athi naabava abono afojahaki kodiꞌojomoꞌihi athinia mahija vaꞌoaniaro maina ijaꞌari vahoariha-ra vaꞌora avakaꞌojomoꞌionivini jaboni.
3 Hari.
Jahariharina kabaꞌi ada sorara,
binaabahaꞌoadahaki ida kidikaꞌdaꞌdi athi.
Jesus Cristo kasorara jahaki fori arihihi.
Ni-okajoniki ida ojahariharina.
Hofori hiꞌa bana.
4 Sorara vaꞌora davini kamahini adani arabo hoariha kasorarani,
binofijahakiki ida kidikaꞌdaꞌdi vaꞌi-ra avajahavini,
oniani ida athi kaꞌoa binaabavini hija.
Bada biniꞌavini oadani ida kidikaꞌdaꞌdia bihonariavini hiki,
ni-sorara bikavaꞌibodivaraniki ida gorana,
gorana kaijaꞌarini,
ni-kidinahina hahavi hiki.
Onivani fori hiꞌa bana,
Timóteo,
mahija kadakaꞌdaꞌdi vaꞌi-ra ivajahavini athi inaabavinia.
5 Ira okavarajomiki i jaboni makhira kiꞌdarahajorakina-ra nofiki,
kiꞌdarahi nasohiva abono athi-ra naabavini.
Binofiki ida kiꞌdarahana jorani vahoariha vakadikiꞌdarahi jorani-ra aradavini.
Ovari miroꞌa kaikahiha,
kajamari kakaidivakia gahinaha.
Asohirihi ida kidikiꞌdarahihi;
ni-binaabaki ida kiꞌdarahi nasohiva abono athi,
oniani ida kajamaria vagahinahirina hija.
Onivani fori hiꞌa bana,
Timóteo,
Jesus athi-ra inaabavini.
Hojai asohikia ikahojaihi;
Deus kanahina jahakia igahinahi.
6 Hari.
Makhira biakadavaꞌajahakihi ida siroi,
ovari miroꞌa gahinaha rakhajahi bononia.
Siroi kabadanihi khanaki abosini ida gahinana.
Onivani fori hiki ida kadabadani,
Timóteo.
Deus kabadani-ra iakadavaꞌajahakihi;
igahinahi.
7 Timóteo,
ikavaꞌibodivaranijahaki bana hida ira oniꞌavini hiꞌiki.
Akadikaꞌdaꞌdi Jesus ira kakodiavini hiki bana hida rajomi kavaranihi nahina nini iogaja kaimoni.
8 Ikavaꞌihoki bana ida Jesus Cristo monina jahaki vara ovaniꞌabakhiaꞌiki.
Davi kohana kahanodi namitharonisiagaki ada Jesus.
Deua bianahokiꞌiki ada,
abiniꞌina naothinia.
9 Jesus monina-ra oananamithaonivini mani ida Jesu-ra vanofiriki hora vanajahariharibakhiavini hija,
cadeia hora avibaibakhiavini hiꞌia jaboni.
Ijaꞌari Jahari kabadania kabadaniki fori hora vanihavini.
Cadeia hora vidabohavini kabaꞌi,
ni-vakaabokaki ida Deus athi akarafarakhamani-ra vanadabavini.
10 Deus vaꞌora nagathogathojoraꞌiki adani ijaꞌari vaipohiki vaꞌora akavaꞌijoara kaimoni,
oniani ida Jesus Cristo monina-ra avigavini onofivini hija,
oniani ida vahoariha hora vanaimaꞌbanavini-ra okajoniravini hija.
Mahi anokhomirikia Deus kania vagahinaki adani ijaꞌari vaabono gahinai vanihaꞌiki Jesus Cristo kania.
Deus vagana,
jahana,
danona hojaki bana vakadiania mahi anokhomirikia.
11 Kaꞌoa hida ojomoꞌihi athini:
“Cristo abiniꞌina kari
akadimahi ꞌboꞌda abiniꞌiki
jaboni kidiania.
Akadimahi ꞌboꞌda abiniꞌini mani ida kidiania haria nahokihahaꞌoadahaja.
12 Cristo kaijaꞌari arihina mani ida haria vanajahariharivini hija.
Ajahariharina-ra akajonirihi;
kaꞌdaꞌdi arihihi Cristo
kania.
Cristo kaijaꞌari arihirina-ra akahihi;
kidijaꞌari arihirina-ra
kahiha jaboni.
13 Bada aniꞌaravini kabaꞌi ida Cristo-ra aniꞌavini hiꞌiki;
ovaria bada biniꞌahahaviki ida vara haria niꞌavini
hiꞌiki.
Cristoa ni-bikaabokaki ida haria korijanahavini.
Kaꞌoa ida Cristo athi.”
Badani abono Deua khai biniꞌaki
14 Vaꞌora navaꞌihoki bana adani Jesus kaijaꞌari hihida kodivarania.
Deus viaha vajoronina vani vaꞌora kaabani bana:
—Hariꞌa avaabononi vaakajaꞌoriakhama hana hini athii asohiki asohirikia.
Niki ni-jahaki.
Vahoariha vakadivarani-ra vakamithaꞌiki vavaꞌi-ra kosakhamaki,
ni-Jesus kaijaꞌari vihina-ra vanofiki bana.
15 Timóteo,
Deus kabadani abono i.
Vahoariha-ra vaꞌora kaꞌojomoꞌi Deus athi asohikia.
Deus athi vaꞌora ikaꞌojomoꞌivini hiꞌiki-ra inasohihi;
Deus ira khai niꞌahi.
Deus kabadani-ra inasohihi;
ni-kadabadani ira anavaꞌiꞌaipahihiki.
16 Hari.
Ijaꞌari vahoariha vaabono vara vakaniꞌakhamaꞌbadaravini hiki ida varani Deua bivajahariki,
akaraꞌo bana vakadiania.
Vahoariha mitha vaniꞌabakhiavini ida vakadivarani ꞌbadara,
oniani ida vaꞌoaniaro maina Deus kania avikhana-ra varagarivini hija.
17 Baijo aꞌahapihapiki ijaꞌari imani-ra najaharivini vani fori hija ida vakadiꞌojomoꞌihi athini ijaꞌari-ra najaharivini.
Nimania ida makhira viꞌbamiki Himeneu,
Fileto vihiki vakadiꞌojomoꞌihi athini ꞌbadara.
18 Himeneu,
Fileto khama vakavaꞌipahiniꞌiki ida Deus athi kaꞌoa hini.
Varani kaꞌoa hirinia Jesus kaijaꞌari-ra vaꞌora vanadabaꞌaha,
Jesu-ra vavakaijokajahakijanarara kaimoni.
Vakadivarani ꞌbadara ida:
—Radahaꞌihi ida mahi Jesus kidijaꞌari-ra anahokivini kamahini,
vaꞌora avikhaꞌiki kaimoni adani kidiania.
Ni-haria avikhajanariha ada kidiania — vakhaniha.
Ni-niki ida Deus ijaꞌari-ra anahokivini varani hini.
19 Hari.
Gora avani hodi abihiakia hojaki,
ni-giragiraki ida gora,
ni-adariki.
Gora avani hodi abihiakia hojaki fori hiki ida Deus athi.
Aꞌboꞌdahahaꞌoadahaki ida athi.
Nahina Deua biniꞌahi;
bona namithahi.
Papira kania hojaki hida Deus athi pitani:
“Deus vaꞌora ogaki adani kidisai hana vihina.”
Hojaki jaboni hida Deus athi pitani hoariha:
“Aꞌonivani Cristo kaijaꞌari avihini-ra avakahiki,
vakavaꞌipahinikaꞌoa ida hojai asohiriki.”
Nihi ida Deus athi kapapirani athini.
20 Hari.
Gora karaho bodinia hojaki ida bavi ipohiki ijaꞌari kidiꞌbai,
kidinahina hiki-ra nabavivini kaimoni.
Hojaki ida bavi kaidivaki,
bavi nokiani jahaki hiki.
Ouro,
prata amonahaki ida bavi.
Hojaki jaboni ida bavi kaidivariki,
nami kamokohi,
ava kamokohi hiki.
Mahi hahavi gora karaho kakaꞌdaꞌdinia binabaviki ida ꞌbai bavi kaidivarikia.
Vaꞌora kaboaꞌivini kamahini adani ijaꞌari vahoariha gorana viꞌbaira kaimoni,
binabaviki ida ꞌbai,
kidinahina hiki bavi kaidivakia,
nokiani jahaki bodinia.
21 Hari.
Vaꞌora okavarajomiki adani Jesu-ra vavakaijokakaꞌoaki bavi kaidivakia.
Deus viaha Jesus kaijaꞌari vaabono vanasohiha;
hojai asohiriki-ra vakavaꞌipahinikaꞌoaha;
ijaꞌari bavi jahaki,
kaidivaki fori vihiha.
Deua khai biniꞌaki ida ijaꞌari hojani hiki.
Deua binofivini kamahini ida ijaꞌari kidibadani danoki bada niꞌani hija kaimoni,
binagathogathoki ida ijaꞌari hojai asohiriki-ra kavaꞌipahinikaꞌoaꞌiki.
Hojai jahakia kahojaini mani ida Deua bianivini hija,
kidibadani danoki binamonahaja kaimoni.
Jahaki ida ijaꞌari hojai jahakia kahojaihaꞌoadahani,
Deu-ra naviahanokhavini,
kidibadani jahaki bada biniꞌaja kaimoni.
22 Imakhinava Jesus kaijaꞌari vihirikia vakavaꞌinofinofiki ida badani kaipahivahaki Deua bivajahariki.
Timóteo,
hariꞌa bana inofi ida vahojana hiki.
Ivani bana inakoꞌdi Deus kania ida binofiki inamonahaki kaimoni.
Iabono nadano Deu-ra ivakaijokavini.
Vaꞌora nakaidiva bana adani ijaꞌari vahoariha.
Inofi bana ida vahoariha khama avaabononi avarakanajahamisikhamavini.
Nimania ida Jesus kaijaꞌari vakadihojai.
Vavaꞌi bodini vara nini asohini vani Deu-ra vakanikhariabakhiaki bana vaꞌora kajoamorara kaimoni.
Vakadihojai asohiki kaꞌoa kahojaiꞌa jaboni bana.
23 Timóteo,
akaraꞌo bana ijaꞌari varani ꞌbadara asohirikia vakavaraniki vakadiania.
Iogaki ida jaharihariki kamaꞌdani hini ida vakadivarani.
24 Deus kabadani abono kahojai hirihi ida vahojana hiki.
Timóteo,
Deus kabadani abono i.
Deus kabadani abono kahojai ida ijaꞌari hahavi nakaidivani,
vaꞌora kaꞌojomoꞌijahakivini,
ni-ihamahijorakiki.
25 Biogaki ida athi kajonini vihiki-ra kaꞌojomoꞌivini vajaforia vaꞌora kaabaniha,
vaꞌora nasohivini.
Deus vaꞌora kakodiaki vahabini bana adani,
vakavaꞌipahinija kaimoni ida vakadivarani asohiriki,
vakadihojai jahariki hiki,
avigaja kaimoni jaboni ida nahina kaꞌoa hini.
26 Deus kabadani abono kakaabanahi-ra vakamithaha;
vakadivaꞌibodivarani asohiꞌianahi.
Nini vani avaihotara adani Jahari vaꞌora anagithiki fori vihiki kidiahofiahia.
Avagithina oadani Jahari vavaꞌi binahonariahihiha.